১০. ৱেখনসসুত্তৱণ্ণনা

২৮০. সহ ৱত্থুকামেন কিলেসকামো গৰু গৰুকাতব্বো এতস্সাতি কামগৰু. তেস্ৱেৱ কামেসু নিন্নপোণপব্ভাৰজ্ঝাসযোতি কামাধিমুত্তো. পব্বজ্জাপঠমজ্ঝানাদিকং নেক্খম্মং গৰু গৰুকাতব্বং এতস্সাতি নেক্খম্মগৰু. তত্থ নিন্নপোণপব্ভাৰজ্ঝাসযো নেক্খম্মাধিমুত্তো স্ৱাযমত্থো যথা একচ্চে গহট্ঠে লব্ভতি, এৱং একচ্চে অনগাৰেপীতি আহ ‘‘পব্বজিতোপী’’তিআদি. অযং পন ৱেখনসো পৰিব্বাজকো. সো হি ৱেখনসতাপসপব্বজ্জং উপগন্ত্ৱা ৱেখনসেন ইমিনা দিট্ঠিমাদায সমাদিযিত্ৱা ঠিতত্তা ‘‘ৱেখনসো’’তি ৱুচ্চতি. যথা লোকো সযং একাদসহি অগ্গীহি আদিত্তোপি সমানো পচ্চক্খতো অনুভৱিযমানং সালাকিকং অগ্গিসন্তাপং ৱিয অনাদিকালানুগতসম্মাকৱচৰসন্তাপং আদিত্ততায ন সল্লক্খেতি, সম্মাসম্বুদ্ধেন পন মহাকৰুণাসমুস্সাহিতমানসেন ‘‘সব্বং, ভিক্খৱে, আদিত্ত’’ন্তি আদিত্তপৰিযাযে (সং. নি. ৪.২৮; মহাৱ. ৫৪) দেসিযমানে সল্লক্খেতি, এৱং অযম্পি অনাদিকালপৰিভাৱিতং অত্তঅজ্ঝাসযে অৱট্ঠিতং কামাধিমুত্তং সৰসেন অনুপধাৰেন্তো সত্থাৰা – ‘‘পঞ্চ খো ইমে, কচ্চান, কামগুণা’’তিআদিনা কামগুণেসু কামসুখে ভাসিযমানে ‘‘কামাধিমুত্তং ৱত পব্বজিতস্স চিত্ত’’ন্তি উপধাৰেস্সতীতি আহ – ‘‘ইমায কথায কথিযমানায অত্তনো কামাধিমুত্ততং সল্লক্খেস্সতী’’তি. কামগ্গসুখন্তি কামেতব্বৱত্থূহি অগ্গভূতং সুখং. সব্বে হি তেভূমকধম্মা কামনীযট্ঠেন কামা, তে পটিচ্চ উপ্পজ্জনসুখতো নিব্বানসুখমেৱ অগ্গভূতং সুখং. যথাহ – ‘‘যাৱতা, ভিক্খৱে, ধম্মা সঙ্খতা ৱা অসঙ্খতা ৱা, ৱিৰাগো তেসং অগ্গমক্খাযতী’’তি (ইতিৱু. ৯০; অ. নি. ৪.৩৪) – ‘‘নিব্বানং পৰমং সুখ’’ন্তি (ম. নি. ২.২১৫, ২১৭; ধ. প. ২০৩) চ. তেন ৱুত্তং ‘‘নিব্বানং অধিপ্পেত’’ন্তি.

২৮১. পুব্বেনিৱাসঞাণলাভিনো পুব্বন্তং আৰব্ভ ৱুচ্চমানকথা অনুচ্ছৱিকা তদত্থস্স পচ্চক্খভাৱতো, তদভাৱতো ৱেখনসস্স অননুচ্ছৱিকাতি আহ ‘‘যস্মা…পে… নত্থী’’তি. অনাগতকথায…পে… নত্থীতি এত্থাপি এসেৱ নযো. আৰক্খত্থাযাতি দেৱতাহি মন্তপদেহি সহ ঠিতা তত্থ আৰক্খত্থায. অৱিজ্জাযাতি ইদং লক্খণৱচনং, তংমূলকত্তা ৱা সব্বকিলেসধম্মানং অৱিজ্জাৱ গহিতা. জাননং পহীনকিলেসপচ্চৱেক্খণঞাণেন. সেসং সুৱিঞ্ঞেয্যমেৱ.

ৱেখনসসুত্তৱণ্ণনায লীনত্থপ্পকাসনা সমত্তা.

নিট্ঠিতা চ পৰিব্বাজকৱগ্গৱণ্ণনা.