৩. মহাৱচ্ছসুত্তৱণ্ণনা

১৯৩. সহ কথা এতস্স অত্থীতি সহকথী, ‘‘মযং পুচ্ছাৱসেন তুম্হে ৱিস্সজ্জনৱসেনা’’তি এৱং সহপৱত্তকথোতি অত্থো. এতস্সেৱ কথিতানি, তত্থ পঠমে ৱিজ্জাত্তযং দেসিতং, দুতিযে অগ্গিনা দস্সিতন্তি তেৱিজ্জৱচ্ছসুত্তং অগ্গিৱচ্ছসুত্তন্তি নামং ৱিসেসেত্ৱা ৱুত্তং. সীঘং লদ্ধিং ন ৱিস্সজ্জেন্তি, যস্মা সঙ্খাৰানং নিযতোযং ৱিনাসো অনঞ্ঞসমুপ্পাদো, হেতুসমুপ্পন্নাপি ন চিৰেন নিজ্ঝানং খমন্তি, ন লহুং. তেনাহ ‘‘ৱসাতেল …পে… সুজ্ঝন্তী’’তি. পচ্ছিমগমনং ঞাণস্স পৰিপাকং গতত্তা. যট্ঠিং আলম্বিত্ৱা উদকং তৰিতুং ওতৰন্তো পুৰিসো ‘‘যট্ঠিং ওতৰিত্ৱা উদকে পতমানো’’তি ৱুত্তো. কম্মপথৱসেন ৱিত্থাৰদেসনন্তি সংখিত্তদেসনং উপাদায ৱুত্তং. তেনাহ ‘‘মূলৱসেন চেত্থা’’তিআদি. ৱিত্থাৰসদিসাতি কম্মপথৱসেন ইধ দেসিতদেসনাৱ মূলৱসেন দেসিতদেসনং উপাদায ৱিত্থাৰসদিসা. ৱিত্থাৰদেসনা নাম নত্থীতি ন কেৱলং অযমেৱ, অথ খো সব্বাপি বুদ্ধানং নিপ্পৰিযাযেন উজুকেন নিৰৱসেসতো ৱিত্থাৰদেসনা নাম নত্থি দেসনাঞাণস্স মহাৱিসযতায কৰণসম্পত্তিযা চ তজ্জায মহানুভাৱত্তা সব্বঞ্ঞুতঞ্ঞাণস্স. সব্বঞ্ঞুতঞ্ঞাণসমঙ্গিতায হি অৱসেসপটিসম্ভিদানুভাৱিতায অপৰিমিতকালসম্ভতঞাণসম্ভাৰসমুদাগতায কদাচিপি পৰিক্খযানৰহায অনঞ্ঞসাধাৰণায পটিভানপটিসম্ভিদায পহূতজিৱ্হাদিতদনুৰূপৰূপকাযসম্পত্তিসম্পদায ৱিত্থাৰিযমানা ভগৱতো দেসনা কথং পৰিমিতা পৰিচ্ছিন্না ভৱেয্য, মহাকাৰুণিকতায পন ভগৱা ৱেনেয্যজ্ঝাসযানুৰূপং তত্থ তত্থ পৰিমিতং পৰিচ্ছিন্নং কত্ৱা নিট্ঠপেতি. অযঞ্চ অত্থো মহাসীহনাদসুত্তেন (ম. নি. ১.১৪৬ আদযো) দীপেতব্বো. সব্বং সংখিত্তমেৱ অত্তজ্ঝাসযৱসেন অকথেত্ৱা বোধনেয্যপুগ্গলজ্ঝাসযৱসেন দেসনায নিট্ঠাপিতত্তা. ন চেত্থ ধম্মসাসনৱিৰোধো পৰিযাযং অনিস্সায যথাধম্মং ধম্মানং বোধিতত্তা সব্বলহুত্তা চাতি.

১৯৪. সত্ত ধম্মা কামাৱচৰা সম্পত্তসমাদানৱিৰতীনং ইধাধিপ্পেতত্তা.

অনিযমেত্ৱাতি ‘‘সম্মাসম্বুদ্ধো, সাৱকো’’তি ৱা নিযমং ৱিসেসেন অকত্ৱা. অত্তানমেৱ…পে… ৱেদিতব্বং, তথা হি পৰিব্বাজকো ‘‘তিট্ঠতু ভৱং গোতমো’’তি আহ.

১৯৫. সত্থাৱ অৰহা হোতি পটিপত্তিযা পাৰিপূৰিভাৱতো. তস্মিং ব্যাকতেতি তস্মিং ‘‘একভিক্খুপি সাৱকো’’তিআদিনা সুট্ঠু পঞ্হে কথিতে.

১৯৬. সম্পাদকোতি পটিপত্তিসম্পাদকো.

১৯৭. সেখায ৱিজ্জাযাতি সেখলক্খণপ্পত্তায মগ্গপঞ্ঞায সাতিসযং কত্ৱা কৰণৱসেন ৱুত্তা, ফলপঞ্ঞা পন তায পত্তব্বত্তা কম্মভাৱেন ৱুত্তা. তেনাহ ‘‘হেট্ঠিমফলত্তযং পত্তব্ব’’ন্তি. ইমং পনেত্থ অৱিপৰীতমত্থং পাড়িতো এৱ ৱিঞ্ঞাযমানং অপ্পটিৱিজ্ঝনতো ৱিতণ্ডৱাদী ‘‘যাৱতকং সেখেন পত্তব্বং, অনুপ্পত্তং তং মযা’’তি ৱচনলেসং গহেত্ৱা ‘‘অৰহত্তমগ্গোপি অনেন পত্তোযেৱা’’তি ৱদতি. এৱন্তি ইদানি ৱুচ্চমানায গাথায.

কিলেসানি পহায পঞ্চাতি পঞ্চোৰম্ভাগিযসংযোজনসঙ্খাতে সংকিলেসে পহায পজহিত্ৱা, পহানহেতু ৱা. পৰিপুণ্ণসেখোতি সব্বসো ৱড্ঢিতসেখধম্মো. অপৰিহানধম্মোতি অপৰিহানসভাৱো. ন হি যস্স ফাতিগতেহি সীলাদিধম্মেহি পৰিহানি অত্থি, সমাধিম্হি পৰিপূৰকাৰিতায চেতোৱসিপ্পত্তো. তেনাহ ‘‘সমাহিতিন্দ্ৰিযো’’তি. অপৰিহানধম্মত্তাৱ ঠিতত্তো.

অনাগামিনা হি অসেখভাৱাৱহা ধম্মা পৰিপূৰেতব্বা, ন সেখভাৱাৱহাতি সো একন্তপৰিপুণ্ণে সেখো ৱুত্তো. এতং ন বুদ্ধৱচনন্তি ‘‘মগ্গো বহুচিত্তক্খণিকো’’তি এতং ৱচনং ন বুদ্ধৱচনং অনন্তৰেকন্তৱিপাকদানতো, বহুক্খত্তুং পৱত্তনে পযোজনাভাৱতো চ লোকুত্তৰকুসলস্স, ‘‘সমাধিমানন্তৰিকঞ্ঞমাহু (খু. পা. ৬.৫; সু. নি. ২২৮), ন পাৰং দিগুণং যন্তী’’তি (সু. নি. ৭১৯) এৱমাদীনি সুত্তপদানি এতস্সত্থসাধকানি. ওৰম্ভাগিযসংযোজনপ্পহানেন সেক্খধম্মপৰিপূৰিভাৱস্স ৱুত্ততায অত্থো তৱ ৱচনেন ৱিৰুজ্ঝতীতি. অস্স আযস্মতো ৱচ্ছস্স.

১৯৮. অভিঞ্ঞা ৱা কাৰণন্তি যঞ্হি তং তত্ৰ তত্ৰ সক্খিভব্বতাসঙ্খাতং ইদ্ধিৱিধপচ্চনুভৱনাদি, তস্স অভিঞ্ঞা কাৰণং. অথ ইদ্ধিৱিধপচ্চনুভৱনাদি অভিঞ্ঞা, এৱং সতি অভিঞ্ঞাপাদকজ্ঝানং কাৰণং. অৱসানে ছট্ঠাভিঞ্ঞায পন অৰহত্তং. এত্থ চ যস্মা পঠমসুত্তে আসৱক্খযো অধিপ্পেতো, আসৱা খীণা এৱ, ন পুন খেপেতব্বা, তস্মা তত্থ ‘‘যাৱদেৱা’’তি ন ৱুত্তং. ইধ ফলসমাপত্তি অধিপ্পেতা, সা চ পুনপ্পুনং সমাপজ্জীযতি, তস্মা ‘‘যাৱদেৱা’’তি ৱুত্তং. ততো এৱ হি ‘‘অৰহত্তং ৱা কাৰণ’’ন্তি ৱুত্তং. তঞ্হি ‘‘কুদাস্সু নামাহং তদাযতনং উপসম্পজ্জ ৱিহৰিস্সামি, যদৰিযা এতৰহি উপসম্পজ্জ ৱিহৰন্তী’’তি (ম. নি. ১.৪৬৫; ৩.৩০৭) অনুত্তৰেসু ৱিমোক্খেসু পিহং উপট্ঠপেত্ৱা অভিঞ্ঞা নিব্বত্তেন্তস্স কাৰণং, তযিদং সব্বসাধাৰণং ন হোতীতি সাধাৰণৱসেন নং দস্সেন্তো ‘‘অৰহত্তস্স ৱিপস্সনা ৱা’’তি আহ.

২০০. পৰিচৰন্তি নাম ৱিপ্পকতব্ৰহ্মচৰিযৱাসত্তা. পৰিচিণ্ণো হোতি সাৱকেন নাম সত্থু ধম্মে কত্তব্বা পৰিচৰিযা সম্মদেৱ নিট্ঠাপিতত্তা. তেনাহ ‘‘ইতি…পে… থেৰো এৱমাহা’’তি. তেসং গুণানন্তি তেসং অসেক্খগুণানং. সেসং সুৱিঞ্ঞেয্যমেৱ.

মহাৱচ্ছসুত্তৱণ্ণনায লীনত্থপ্পকাসনা সমত্তা.