৮. কোসম্বিযসুত্তৱণ্ণনা

৪৯১. তস্মাতি যস্মা কোসম্বৰুক্খৱতী, তস্মা নগৰং কোসম্বীতিসঙ্খমগমাসি. কুসম্বস্স ৱা ইসিনো নিৱাসভূমি কোসম্বী, তস্সাৱিদূৰে ভৱত্তা নগৰং কোসম্বী.

ঘোসিতসেট্ঠিনা কাৰিতে আৰামেতি এত্থ কো ঘোসিতসেট্ঠি, কথঞ্চানেন আৰামো কাৰিতোতি অন্তোলীনায চোদনায ৱিস্সজ্জনে সমুদাগমতো পট্ঠায ঘোসিতসেট্ঠিং দস্সেতুং ‘‘অদ্দিলৰট্ঠং নাম অহোসী’’তিআদি আৰদ্ধং. কেদাৰপৰিচ্ছিন্নন্তি তত্থ তত্থ কেদাৰভূমিযা পৰিচ্ছিন্নং. গচ্ছন্তোতি কেদাৰপাড়িযা গচ্ছন্তো. পহূতপাযসন্তি পহূততৰং পাযসং, তং পন গৰু সিনিদ্ধং অন্তৰামগ্গে অপ্পাহাৰতায মন্দগহণিকো সমানো জীৰাপেতুং নাসক্খি. তেনাহ ‘‘জীৰাপেতুং অসক্কোন্তো’’তিআদি. যসৱতি ৰূপৱতি কুলঘৰে নিব্বত্তি. ঘোসিতসেট্ঠি নাম জাতোতি এৱমেত্থ সঙ্খেপেনেৱ ঘোসিতসেট্ঠিৱত্থুং কথেতি, ৱিত্থাৰো পন ধম্মপদৱত্থুম্হি (ধ. প. অট্ঠ. ১.সামাৱতীৱত্থু) ৱুত্তনযেনেৱ ৱেদিতব্বো.

উপসংকপ্পনৱসেনাতি উপসঙ্কপ্পননিযামেন. আহাৰপৰিক্খীণকাযস্সাতি আহাৰনিমিত্তপৰিক্খীণকাযস্স, আহাৰক্খযেন পৰিক্খীণকাযস্সাতি অত্থো. সুঞ্ঞাগাৰেতি জনৱিৱিত্তে ফাসুকট্ঠানে.

কলহস্স পুব্বভাগো ভণ্ডনং নামাতি কলহস্স হেতুভূতা পৰিভাসা তংসদিসী চ অনিট্ঠকিৰিযা ভণ্ডনং নাম. হত্থপৰামাসাদিৱসেনাতি কুজ্ঝিত্ৱা অঞ্ঞমঞ্ঞস্স হত্থে গহেত্ৱা পৰামসনঅচ্চন্তবন্ধনাদিৱসেন. ‘‘অযং ধম্মো’’তিআদিনা ৱিৰুদ্ধৱাদভূতং আপন্নাতি ৱিৱাদাপন্না. তেনাহ ‘‘ৱিৰুদ্ধভূত’’ন্তিআদি. মুখসন্নিস্সিততায ৱাচা ইধ ‘‘মুখ’’ন্তি অধিপ্পেতাতি আহ ‘‘মুখসত্তীহীতি ৱাচাসত্তীহী’’তি. সঞ্ঞত্তিন্তি সঞ্ঞাপনং ‘‘অযং ধম্মো, অযং ৱিনযো’’তি সঞ্ঞাপেতব্বতং. নিজ্ঝত্তিন্তি যাথাৱতো তস্স নিজ্ঝানং. অট্ঠকথাযং পন ‘‘সঞ্ঞত্তিৱেৱচনমেৱেত’’ন্তি ৱুত্তং.

সচে হোতি দেসেস্সামীতি সুব্বচতায সিক্খাকামতায চ আপত্তিং পস্সি. নত্থি তে আপত্তীতি অনাপত্তিপক্খোপি এত্থ সম্ভৱতীতি অধিপ্পাযেনাহ. সা পনাপত্তি এৱ. তেনাহ – ‘‘তস্সা আপত্তিযা অনাপত্তিদিট্ঠি অহোসী’’তি.

৪৯২. কলহভণ্ডনৱসেনাতি কলহভণ্ডনস্স নিমিত্তৱসেন. যথানুসন্ধিনাৱ গতন্তি কলহভণ্ডনানং সাৰণীযধম্মপটিপক্খত্তা তদুপসমাৱহা হেট্ঠাদেসনায অনুৰূপাৱ উপৰিদেসনাতি যথানুসন্ধিনাৱ উপৰিসুত্তদেসনা পৱত্তা. সৰিতব্বযুত্তাতি অনুস্সৰণাৰহা. সব্ৰহ্মচাৰীনন্তি সহধম্মিকানং. পিযং পিযাযিতব্বং কৰোন্তীতি পিযকৰণা. গৰুং গৰুট্ঠানিযং কৰোন্তীতি গৰুকৰণা. সঙ্গহণত্থাযাতি সঙ্গহৱত্থুৱিসেসভাৱতো সব্ৰহ্মচাৰীনং সঙ্গণ্হনায সংৱত্তন্তীতি সম্বন্ধো. অৱিৱাদনত্থাযাতি সঙ্গহৱত্থুভাৱতো এৱ ন ৱিৱাদনায. সতি চ অৱিৱাদনহেতুভূতসঙ্গাহণত্তে তেসং ৱসেন সব্ৰহ্মচাৰীনং সমগ্গভাৱো ভেদাভাৱো সিদ্ধোযেৱাতি আহ ‘‘সামগ্গিযা’’তিআদি. মিজ্জতি সিনিয্হতি এতাযাতি মেত্তা, মিত্তভাৱো, মেত্তা এতস্স অত্থীতি মেত্তং, কাযকম্মং. তং পন যস্মা মেত্তাসহগতচিত্তসমুট্ঠানং, তস্মা ৱুত্তং ‘‘মেত্তচিত্তেন কত্তব্বং কাযকম্ম’’ন্তি. ইমানি মেত্তকাযকম্মাদীনি ভিক্খূনং ৱসেন আগতানি পাঠে ভিক্খূহি পচ্চুপট্ঠপেতব্বতাৱচনতো. ভিক্খুগ্গহণেনেৱ চেত্থ সেসসহধম্মিকানম্পি গহণং দট্ঠব্বং. ভিক্খুনো সব্বম্পি অনৱজ্জকাযকম্মং আভিসমাচাৰিককম্মন্তোগধমেৱাতি আহ – ‘‘মেত্তচিত্তেন…পে… কাযকম্মং নামা’’তি. ৱত্তৱসেন পৱত্তিযমানা চেতিযবোধীনং ৱন্দনা মেত্তাসদিসীতি কত্ৱা তদত্থায গমনং মেত্তং কাযকম্মন্তি ৱুত্তং. আদি-সদ্দেন চেতিযবোধিভিক্খূসু ৱুত্তাৱসেসঅপচাযনাদিং মেত্তাৱসেন পৱত্তং কাযিকং কিৰিযং সঙ্গণ্হাতি.

তেপিটকম্পি বুদ্ধৱচনং কথিযমানন্তি অধিপ্পাযো. তীণি সুচৰিতানি কাযৱচীমনোসুচৰিতানি. চিন্তনন্তি ইমিনা এৱং চিন্তনমত্তম্পি মেত্তং মনোকম্মং, পগেৱ ৱিধিপটিপন্না ভাৱনাতি দস্সেতি.

সহাযভাৱূপগমনং তেসং পুৰতো. তেসু কৰোন্তেসুযেৱ হি সহাযভাৱূপগমনং সম্মুখা কাযকম্মং নাম হোতি. কেৱলং ‘‘দেৱো’’তি অৱত্ৱা গুণেহি থিৰভাৱজোতনং দেৱত্থেৰোতি ৱচনং পগ্গয্হ ৱচনং. মমত্তবোধনং ৱচনং মমাযনৱচনং. একন্ততিৰোক্খকস্স মনোকম্মস্স সম্মুখতা নাম ৱিঞ্ঞত্তিসমুট্ঠাপনৱসেনেৱ হোতি, তঞ্চ খো লোকে কাযকম্মন্তি পাকটং পঞ্ঞাতং হত্থৱিকাৰাদিং অনামসিত্ৱা এৱ দস্সেন্তো ‘‘নযনানি উম্মীলেত্ৱা’’তি আহ. তথা হি ৱচীভেদৱসেন পৱত্তি ন গহিতা.

লদ্ধপচ্চযা লব্ভন্তীতি লাভা, পৰিসুদ্ধাগমনা পচ্চযা. ন সম্মা গয্হমানাপি ন ধম্মলদ্ধা নাম ন হোন্তীতি তপ্পটিসেধনত্থং পাড়িযং ‘‘ধম্মলদ্ধা’’তি ৱুত্তং. দেয্যং দক্খিণেয্যঞ্চ অপ্পটিৱিভত্তং কত্ৱা ভুঞ্জতীতি অপ্পটিৱিভত্তভোগী. তেনাহ ‘‘দ্ৱে পটিৱিভত্তানি নামা’’তিআদি. চিত্তেন ৱিভজনন্তি এতেন – ‘‘চিত্তুপ্পাদমত্তেনপি ৱিভজনং পটিৱিভত্তং নাম, পগেৱ পযোগতো’’তি দস্সেতি.

পটিগ্গণ্হন্তোৱ…পে… পস্সতীতি ইমিনা আগমনতো পট্ঠায সাধাৰণবুদ্ধিং উপট্ঠাপেতি. এৱং হিস্স সাধাৰণভোগিতা সুকৰা, সাৰণীযধম্মো চস্স সুপূৰো হোতি. ৱত্তন্তি সাৰণীযধম্মপূৰণৱত্তং.

দাতব্বন্তি অৱস্সং দাতব্বং. অত্তনো পলিবোধৱসেন সপলিবোধস্সেৱ পূৰেতুং অসক্কুণেয্যত্তা ওদিস্সকদানম্পিস্স ন সব্বত্থ ৱাৰিতন্তি দস্সেতুং ‘‘তেন পনা’’তিআদি ৱুত্তং. অদাতুম্পীতি পি-সদ্দেন দুস্সীলস্সপি অত্থিকস্স সতি সম্ভৱে দাতব্বন্তি দস্সেতি. দানঞ্হি নাম কস্সচি ন নিৱাৰিতং.

মহাগিৰিগামো নাম নাগদীপপস্সে একো গামো. সাৰণীযধম্মো মে, ভন্তে, পূৰিতো…পে… পত্তগতং ন খীযতীতি আহ তেসং কুক্কুচ্চৱিনোদনত্থং. তং সুত্ৱা তেপি থেৰা ‘‘সাৰণীযধম্মপূৰকো অয’’ন্তি অব্ভঞ্ঞংসু. দহৰকালে এৱ কিৰেস সাৰণীযধম্মপূৰকো অহোসি, তস্সা চ পটিপত্তিযা অৱঞ্ঝভাৱৱিভাৱনত্থং ‘‘এতে ময্হং পাপুণিস্সন্তী’’তি আহ.

অহং সাৰণীযধম্মপূৰিকা, মম পত্তপৰিযাপন্নেনপি সব্বাপিমা ভিক্খুনিযো যাপেস্সন্তীতি আহ ‘‘মা তুম্হে তেসং গতভাৱং চিন্তযিত্থা’’তি.

সত্তসু আপত্তিক্খন্ধেসু আদিম্হি ৱা অন্তে ৱা, ৱেমজ্ঝেতি চ ইদং উদ্দেসাগতপাড়িৱসেন ৱুত্তং. ন হি অঞ্ঞো কোচি আপত্তিক্খন্ধানং অনুক্কমো অত্থি. পৰিযন্তে ছিন্নসাটকো ৱিযাতি ৱত্থন্তে, দসন্তে ৱা ছিন্নৱত্থং ৱিয. খণ্ডন্তি খণ্ডৱন্তং, খণ্ডিতং ৱা. ছিদ্দন্তি এত্থাপি এসেৱ নযো. ৱিসভাগৱণ্ণেন উপড্ঢং, ততিযভাগং ৱা সম্ভিন্নৱণ্ণং সবলং, ৱিসভাগৱণ্ণেহেৱ পন বিন্দূহি অন্তৰন্তৰা ৱিমিস্সং কম্মাসং, অযং ইমেসং ৱিসেসো. তণ্হাদাসব্যতো মোচনৱচনেনেৱ তেসং সীলানং ৱিৱট্টুপনিস্সযতমাহ. ভুজিস্সভাৱকৰণতোতি ইমিনা ভুজিস্সকৰানি ভুজিস্সানীতি উত্তৰপদলোপেনাযং নিদ্দেসোতি দস্সেতি. অৱিঞ্ঞূনং অপ্পমাণতায ‘‘ৱিঞ্ঞুপ্পসত্থানী’’তি ৱুত্তং. তণ্হাদিট্ঠীহি অপৰামট্ঠত্তাতি – ‘‘ইমিনাহং সীলেন দেৱো ৱা ভৱিস্সামি দেৱঞ্ঞতৰো ৱা’’তি তণ্হাপৰামাসেন – ‘‘ইমিনাহং সীলেন দেৱো হুত্ৱা তত্থ নিচ্চো ধুৱো সস্সতো ভৱিস্সামী’’তি দিট্ঠিপৰামাসেন চ অপৰামট্ঠত্তা. পৰামট্ঠুন্তি চোদেতুং. সীলং নাম অৱিপ্পটিসাৰাদিপাৰম্পৰিযেন যাৱদেৱ সমাধিসম্পাদনত্থন্তি আহ ‘‘সমাধিসংৱত্তকানী’’তি. সমানভাৱো সামঞ্ঞং, পৰিপুণ্ণচতুপাৰিসুদ্ধিভাৱেন মজ্ঝে ভিন্নসুৱণ্ণস্স ৱিয ভেদাভাৱতো সীলেন সামঞ্ঞং সীলসামঞ্ঞং, তং গতো উপগতোতি সীলসামঞ্ঞগতো. তেনাহ ‘‘সমানভাৱূপগতসীলো’’তি.

যাযং দিট্ঠীতি যা অযং দিট্ঠি ময্হঞ্চেৱ তুম্হাকঞ্চ পচ্চক্খভূতা. চতুসচ্চদস্সনট্ঠেন দিট্ঠি, ‘‘সব্বে সঙ্খাৰা অনিচ্চা, সব্বে সঙ্খাৰা দুক্খা, সব্বে ধম্মা অনত্তা’’তি, ‘‘সম্মাসম্বুদ্ধো ভগৱা, স্ৱাখাতো ভগৱতা ধম্মো, সুপ্পটিপন্নো সঙ্ঘো’’তি চ দিট্ঠিযা সামঞ্ঞং সমানদিট্ঠিভাৱং. অগ্গং ইতৰেসং সাৰণীযধম্মানং পধানভাৱতো. এতস্মিং সতি সুখসিদ্ধিতো তেসং সঙ্গাহিকং, ততো এৱ তেসং সঙ্ঘাটনিকং গোপানসিযো অপৰিপতন্তে কত্ৱা সঙ্গণ্হাতি ধাৰেতীতি সঙ্গাহিকং. সঙ্ঘাটন্তি অগ্গভাৱেন সঙ্ঘাটভাৱং. সঙ্ঘাটনং এতেসং অত্থীতি সঙ্ঘাটনিকং, সঙ্ঘাটনিযন্তি ৱা পাঠো, সঙ্ঘাটনে নিযুত্তন্তি ৱা সঙ্ঘাটনিকং, ক-কাৰস্স য-কাৰং কত্ৱা সঙ্ঘাটনিযং. সামঞ্ঞতো এৱ গহিতত্তা নপুংসকনিদ্দেসো.

৪৯৩. পঠমমগ্গসম্মাদিট্ঠিপি এৱংসভাৱা, অঞ্ঞমগ্গসম্মাদিট্ঠীসু ৱত্তব্বমেৱ নত্থীতি আহ ‘‘যাযং সোতাপত্তিমগ্গদিট্ঠী’’তি. এত্তাৱতাপীতি এত্তকেনপি ৰাগাদীসু একেকেন পৰিযুট্ঠিতচিত্ততাযপি পৰিযুট্ঠিতচিত্তোযেৱ নাম হোতি, পগেৱ দ্ৱীহি, বহূহি ৱা পৰিযুট্ঠিতচিত্ততায. সব্বত্থাতি সব্বেসু অট্ঠসুপি ৱাৰেসু. সুট্ঠু ঠপিতন্তি যথা মগ্গভাৱনা উপৰি সচ্চাভিসম্বোধো হোতি, এৱং সম্মা ঠপিতং. তেনাহ ‘‘সচ্চানং বোধাযা’’তি. তং ঞাণন্তি ‘‘নত্থি খো মে তং পৰিযুট্ঠান’’ন্তিআদিনা পৱত্তং পচ্চৱেক্খণঞাণং. অৰিযানং হোতীতি অৰিযানমেৱ হোতি. তেসঞ্হি একদেসতোপি পহীনং ৱত্তব্বতং অৰহতি. তেনাহ ‘‘ন পুথুজ্জনান’’ন্তি. অৰিযন্তি ৱুত্তং ‘‘অৰিযেসু জাত’’ন্তি কত্ৱা. লোকুত্তৰহেতুকতায লোকুত্তৰন্তি ৱুত্তং. তেনেৱাহ ‘‘যেসং পনা’’তিআদি. তথা হিস্স পুথুজ্জনেহি অসাধাৰণতা. তেনাহ ‘‘পুথুজ্জনানং পন অভাৱতো’’তি. সব্বৱাৰেসূতি সব্বেসু ইতৰেসু ছসু ৱাৰেসু.

৪৯৪. পচ্চত্তন্তি পাটিযেক্কং অত্তনি মম চিত্তেযেৱ. তেনাহ ‘‘অত্তনো চিত্তে’’তি. ‘‘পচ্চত্তং অত্তনো চিত্তে নিব্বুতিং কিলেসৱূপসমং লভামী’’তি ইমমত্থং ‘‘এসেৱ নযো’’তি ইমিনা অতিদিসতি.

৪৯৫. তথাৰূপায দিট্ঠিযাতি ইদং ‘‘যথাৰূপায দিট্ঠিযা সমন্নাগতো’’তি ইমস্স অত্থস্স পচ্চামসনন্তি আহ ‘‘তথাৰূপায দিট্ঠিযাতি এৱৰূপায সোতাপত্তিমগ্গদিট্ঠিযা’’তি.

৪৯৬. সভাৱেনাতি নিযতপঞ্চসিক্খাপদতাদিসভাৱেন. সঙ্ঘকম্মৱসেনাতি মানত্তচৰিযাদিসঙ্ঘকম্মৱসেন. দহৰোতি বালো. কুমাৰোতি দাৰকো. যস্মা দহৰো ‘‘কুমাৰো’’তি চ ‘‘যুৱা’’তি চ ৱুচ্চতি, তস্মা মন্দোতি ৱুত্তং. মন্দিন্দ্ৰিযতায হি মন্দো. তেনাহ ‘‘চক্খুসোতাদীনং মন্দতাযা’’তি. এৱম্পি যুৱাৱত্থাপি কেচি মন্দিন্দ্ৰিযা হোন্তীতি তন্নিৱত্তনত্থং ‘‘উত্তানসেয্যকো’’তি ৱুত্তং. যদি উত্তানসেয্যকো, কথমস্স অঙ্গাৰক্কমনন্তি? যথা তথা অঙ্গাৰস্স ফুসনং ইধ ‘‘অক্কমন’’ন্তি অধিপ্পেতন্তি আহ ‘‘ইতো চিতো চা’’তিআদি. মনুস্সানন্তি মহল্লকমনুস্সানং. ন সীঘং হত্থো ঝাযতি কথিনহত্থতায. খিপ্পং পটিসংহৰতি মুদুতলুণসৰীৰতায. অধিৱাসেতি কিঞ্চি পযোজনং অপেক্খিত্ৱা.

৪৯৭. উচ্চাৱচানীতি মহন্তানি চেৱ খুদ্দকানি চ. তত্থেৱাতি সুধাকম্মাদিম্হিযেৱ. কসাৱপচনং সুধাদিসঙ্খৰণত্থং, উদকানযনং ধোৱনাদিঅত্থং, হলিদ্দিৱণ্ণধাতুলেপনত্থং কুচ্ছকৰণং. বহলপত্থনোতি দড়্হছন্দো. ৱচ্ছকন্তি নিব্বত্তধেনুপগৱচ্ছং. অপচিনাতীতি অপৱিন্দতি, আলোকেতীতি অত্থো. তেনাহ ‘‘অপলোকেতী’’তি. তন্নিন্নো হোতীতি অধিসীলসিক্খাদিনিন্নোৱ হোতি উচ্চাৱচানম্পি কিংকৰণীযানং চাৰিত্তসীলস্স পূৰণৱসেনেৱ কৰণতো, যোনিসোমনসিকাৰৱসেনেৱ চ তেসং পটিপজ্জনতো. থেৰস্স সন্তিকে অট্ঠাসি যোনিসোমনসিকাৰাভাৱতো ‘‘তং তং সমুল্লপিস্সামী’’তি.

৪৯৮. বলং এৱ বলতাতি আহ ‘‘বলেন সমন্নাগতো’’তি. অত্থিকভাৱং কত্ৱাতি তেন ধম্মেন সৱিসেসং অত্থিকভাৱং উপ্পাদেত্ৱা. সকলচিত্তেনাতি দেসনাযআদিম্হি মজ্ঝে পৰিযোসানেতি সব্বত্থেৱ পৱত্ততায সকলেন অনৱসেসেন চিত্তেন.

৫০০. সভাৱোতি অৰিযসাৱকস্স পুথুজ্জনেহি অসাধাৰণতায আৱেণিকো সভাৱো. সুট্ঠু সমন্নেসিতোতি সম্মদেৱ উপপৰিক্খিতো. সোতাপত্তিফলসচ্ছিকিৰিযাযাতি সোতাপত্তিফলস্স সচ্ছিকৰণেন, সচ্ছিকতভাৱেনাতি অত্থো. তেনাহ ‘‘সোতাপত্তিফলসচ্ছিকতঞাণেনা’’তি. পঠমমগ্গফলস্স পচ্চৱেক্খণঞাণৱিসেসা হেতে পৱত্তিআকাৰভিন্না. তেনেৱাহ ‘‘সত্তহি মহাপচ্চৱেক্খণঞাণেহী’’তি. অযং তাৱ আচৰিযানং সমানকথাতি ‘‘ইদমস্স পঠমং ঞাণ’’ন্তিআদিনা ৱুত্তানি পচ্চৱেক্খণঞাণানি, ন মগ্গঞাণানীতি এৱং পৱত্তা পৰম্পৰাগতা পুব্বাচৰিযানং সমানা সাধাৰণা ইমিস্সা পাড়িযা অট্ঠকথা অত্থৱণ্ণনা. তত্থ কাৰণমাহ ‘‘লোকুত্তৰমগ্গো হি বহুচিত্তক্খণিকো নাম নত্থী’’তি. যদি সো বহুচিত্তক্খণিকো সিযা নানাভিসমযো, তথা সতি সংযোজনত্তযাদীনং একদেসপ্পহানং পাপুণাতীতি অৰিযমগ্গস্স অনন্তৰফলত্তা একদেসসোতাপন্নতাদিভাৱো আপজ্জতি, ফলানং ৱা অনেকভাৱো, সব্বমেতং অযুত্তন্তি তস্মা একচিত্তক্খণিকোৱ অৰিযমগ্গো.

যং পন সুত্তপদং নিস্সায ৱিতণ্ডৱাদী অৰিযমগ্গস্স একচিত্তক্খণিকতং পটিক্খিপতি, তং দস্সেন্তো ‘‘সত্ত ৱস্সানীতি হি ৱচনতো’’তি আহ. কিলেসা পন লহু…পে… ছিজ্জন্তীতি ৱদন্তেন হি খিপ্পং তাৱ কিলেসপ্পহানং, দন্ধপৱত্তিকা মগ্গভাৱনাতি পটিঞ্ঞাতং হোতি. তত্থ সচে মগ্গস্স ভাৱনায আৰদ্ধমত্তায কিলেসা পহীযন্তি, সেসা মগ্গভাৱনা নিৰত্থকা সিযা, অথ পচ্ছা কিলেসপ্পহানং, কিলেসা পন লহু ছিজ্জন্তীতি ইদং মিচ্ছা, ‘‘সোতাপত্তিফলসচ্ছিকিৰিযাযা’’তি ৱক্খতীতি. ততো সুত্তপটিজাননতো. মগ্গং অভাৱেত্ৱাতি অৰিযমগ্গং পৰিপুণ্ণং কত্ৱা অভাৱেত্ৱা. অত্থৰসং ৱিদিত্ৱাতি সুত্তস্স অৱিপৰীতো অত্থো এৱ অত্থৰসো, তং যাথাৱতো ঞত্ৱা. এৱং ৱিতণ্ডৱাদিৱাদং ভিন্দিত্ৱা ৱুত্তমেৱত্থং নিগমেতুং ‘‘ইমানি সত্ত ঞাণানী’’তিআদি ৱুত্তং. সেসং সুৱিঞ্ঞেয্যমেৱ.

কোসম্বিযসুত্তৱণ্ণনায লীনত্থপ্পকাসনা সমত্তা.