৪. চূড়গোপালকসুত্তৱণ্ণনা

৩৫০. চেলুক্কাহীতি চেলমযাহি উক্কাহি. উক্কভূতানি চেলানি এত্থাতি উক্কচেলা, নগৰং. সব্বা গঙ্গা পাকটা হুত্ৱা পঞ্ঞাযতীতি পকতিচক্খুস্স পাকটা হুত্ৱা উপট্ঠাতি, দিব্বচক্খুস্স পন সমন্তচক্খুস্স ৱা যত্থ কত্থচি নিসিন্নস্সপি ভগৱতো পাকটা হুত্ৱা পঞ্ঞাযতেৱ. সোত্থীতি অনুপদ্দৱো. ৱড্ঢীতি অপৰিহানি. আৰোগ্যন্তি অৰোগতা আবাধাভাৱো.

মগধো জনপদো নিৱাসো এতস্সাতি মাগধো, মাগধোৱ মাগধিকো. পঞ্ঞায নাম দুট্ঠুভাৱো নত্থি একন্তানৱজ্জতায, তস্মা দু-সদ্দো অভাৱৱাচী ‘‘দুস্সীলো’’তিআদীসু ৱিয, জাতি-সদ্দো চ সভাৱত্থোতি আহ ‘‘নিপ্পঞ্ঞসভাৱো’’তি. -সদ্দো আৰম্ভত্থোতি আহ ‘‘পতাৰেসীতি তাৰেতুং আৰভী’’তি পৰতীৰং গাৱীনং অপ্পত্তত্তা. সুৱিদেহানন্তি সুন্দৰৱিদেহানং. ৱিদেহৰট্ঠং কিৰ ভূমিভাগদস্সনসম্পত্তিযা চ ৱনৰামণেয্যকাদিনা চ সুন্দৰং. আমণ্ডলিকং কৰিত্ৱাতি আৱত্তে পতিতা তেমণ্ডলাকাৰেন পৰিব্ভমিত্ৱা. কতিপযাপি গাৱিযো অসেসেত্ৱা নদীসোতেন ৱূড়্হত্তা ৱুত্তং ‘‘অৱড্ঢিং ৱিনাসং পাপুণিংসূ’’তি. কতিপযাসুপি হি অৱসিট্ঠাসু গাৱীসু অনুক্কমেনপি সিযা গোগণস্স ৱড্ঢীতি. ৱিস্সমট্ঠানন্তি পৰিস্সমৱিনোদনট্ঠানং. তিত্থা ভট্ঠাতি গহেতুং অসমত্থতায তিত্থং অপ্পত্তা. অৰোগো নাম নাহোসীতি লোমমত্তম্পি অসেসেত্ৱা সব্বা গাৱিযো নদীসোতে ৱিনট্ঠাতি অত্থো.

যেসু খন্ধাযতনধাতূসু ইধ লোকসমঞ্ঞা, তে অজানন্তা ‘‘অকুসলা ইমস্স লোকস্সা’’তি ৱুত্তাতি আহ ‘‘ইধলোকে খন্ধধাতাযতনেসু অকুসলা অছেকা’’তি. অযমেৱ নযো ‘‘অকুসলা পৰস্স লোকস্সা’’তি এত্থাপীতি আহ ‘‘পৰলোকেপি এসেৱ নযো’’তি. মাৰো এত্থ ধীযতীতি মাৰধেয্যং. মাৰোতি চেত্থ কিলেসমাৰো ৱেদিতব্বো. খন্ধাভিসঙ্খাৰা হি তস্স পৱত্তনভাৱেন গহিতা, মচ্চুমাৰো ৱিসুং গহিতো এৱ, কিলেসমাৰৱসেনেৱ চ দেৱপুত্তমাৰস্স কামভৱে আধিপচ্চন্তি. তেসন্তি যে ইধলোকাদীসু অছেকা, তেসং. তে পন উক্কট্ঠনিদ্দেসেন দস্সেন্তো আহ ‘‘ইমিনা ছ সত্থাৰো দস্সিতা’’তি.

৩৫১. বলৱগাৱোতি বলৱন্তে গোৰূপে. তে পন দম্মতং উপগতগোণা চেৱ ধেনুযো চাতি আহ ‘‘দন্তগোণে চেৱ ধেনুযো চা’’তি. অৱিজাতগাৱোতি ন ৱিজাতগাৱিযো. ৱচ্ছকেতি খুদ্দকৱচ্ছে. অপ্পত্থো হি অযং ক-সদ্দো. তেনাহ ‘‘তৰুণৱচ্ছকে’’তি. কিসাবলকেতি দুব্বলে.

৩৫২. মাৰস্স তণ্হাসোতং ছেত্ৱাতি খন্ধমাৰসম্বন্ধীতণ্হাসঙ্খাতং সোতং সমুচ্ছিন্দিত্ৱা. তযো কোট্ঠাসে খেপেত্ৱা ঠিতাতি অনাগামিনো সন্ধাযাহ. সব্বৱাৰেসূতি সকদাগামিসোতাপন্নঅট্ঠমকৱাৰেসু. তত্থ পন যথাক্কমং চতুমগ্গৱজ্ঝানং কিলেসানং দ্ৱে কোট্ঠাসে খেপেত্ৱা ঠিতা, এককোট্ঠাসং খেপেত্ৱা ঠিতা, পঠমং কোট্ঠাসং খেপেন্তোতি ৱত্তব্বং. ধম্মং অনুস্সৰন্তি, ধম্মস্স ৱা অনুস্সৰণসীলাতি ধম্মানুসাৰিনো. ধম্মোতি চেত্থ পঞ্ঞা অধিপ্পেতা. সদ্ধং অনুস্সৰন্তি, সদ্ধায ৱা অনুস্সৰণসীলাতি সদ্ধানুসাৰিনো.

জানতাতি এত্থ জাননকিৰিযাৱিসযস্স অৱিসেসিতত্তা অধিকাৰৱসেন অনৱসেসঞেয্যৱিসেসা অধিপ্পেতাতি আহ ‘‘সব্বধম্মে জানন্তেনা’’তি. অন্তোসাৰৱিৰহতো অব্ভুগ্গতট্ঠেন চ নড়ো ৱিযাতি নড়ো, মানোতি আহ ‘‘ৱিগতমাননড়ং কত’’ন্তি. খেমং পত্থেথাতি এত্থ চতূহি যোগেহি অনুপদ্দৱত্তা ‘‘খেম’’ন্তি অৰহত্তং অধিপ্পেতং. পত্থনা চ ছন্দপত্থনা, ন তণ্হাপত্থনাতি আহ ‘‘কত্তুকম্যতাছন্দেন অৰহত্তং পত্থেথা’’তি. পত্তাযেৱ নাম তস্স পত্তিযা ন কোচি অন্তৰাযো. সোত্থিনা পাৰগমনং উদ্দিস্স দেসনং আৰভিত্ৱা খেমপ্পত্তিযা দেসনায পৰিযোসাপিতত্তা যথানুসন্ধিনাৱ দেসনং নিট্ঠাপেসীতি.

চূড়গোপালকসুত্তৱণ্ণনায লীনত্থপ্পকাসনা সমত্তা.