১০. চূড়অস্সপুৰসুত্তৱণ্ণনা

৪৩৫. পুৰিমসদিসমেৱাতি ‘‘অস্সপুৰৱাসীনং ভিক্খুসঙ্ঘে গাৰৱবহুমানং নিপচ্চকাৰঞ্চ দিস্ৱা ভিক্খূ পিণ্ডপাতাপচাযনে নিযোজেন্তো ইদং সুত্তং অভাসী’’তি পুৰিমসুত্তে মহাঅস্সপুৰে (ম. নি. অট্ঠ. ২.৪১৫) ৱুত্তসদিসমেৱ. সমণানং অনুচ্ছৱিকাতি সমণানং সমণভাৱস্স অনুচ্ছৱিকা পতিৰূপা. সমণানং অনুলোমপ্পটিপদাতি সমণানং সামঞ্ঞসঙ্খাতস্স অৰিযমগ্গস্স অনুকূলপ্পটিপদা.

৪৩৬. এতে ধম্মাতি এতে পাড়িযং আগতা অভিজ্ঝাব্যাপাদাদযো পাপধম্মা. উপ্পজ্জমানাতি উপ্পজ্জমানা এৱ, পগেৱ সন্তানে ভাৱিতা. মলিনেতি মলৱন্তে কিলিট্ঠে. মলগ্গহিতেতি গহিতমলে সঞ্জাতমলে. সমণমলাতি সমণানং সমণভাৱস্স মলা. দুস্সন্তীতি ৱিপজ্জন্তি ৱিনস্সন্তি. সমণদোসাতি সমণানং সমণভাৱদূসনা. কসটেতি অসাৰে. নিৰোজেতি নিত্তেজে. অযতো সুখতো অপেতাতি অপাযা, নিৰযাদযো, তং ফলং অৰহন্তি, তং পযোজনং ৱা এতেসন্তি আপাযিকা. ঠানানি অভিজ্ঝাদযো. তেনাহ ‘‘অপাযে’’তিআদি. কাৰণভাৱেন দুগ্গতিপৰিযাপন্নায ৱেদনায হিতানীতি দুগ্গতিৱেদনিযানি. তেন ৱুত্তং ‘‘দুগ্গতিযং ৱিপাকৱেদনায পচ্চযান’’ন্তি. তিখিণং অযন্তি ৱেকন্তকসদিসং সাৰঅযং. অযেনাতি অযোঘংসকেন. কোঞ্চসকুণানং কিৰ কুচ্ছিযং নিৱুত্থং যং কিঞ্চি খৰং তিখিণঞ্চ হোতি. তথা হি তেসং ৱচ্চং অট্ঠিম্পি পাসাণম্পি ৱিলীযাপেতি. তেন ৱুত্তং ‘‘কোঞ্চসকুণে খাদাপেন্তী’’তি. তং কিৰ অযচুণ্ণং অগ্গিনাপি কিচ্ছেন দয্হতি, ভেসজ্জবলেন পন সুখেন দয্হেয্য. তেন ৱুত্তং ‘‘সুসিক্খিতা চ নং অযকাৰা বহুহত্থকম্মমূলং লভিত্ৱা কৰোন্তী’’তিআদি. অতিতিখিণং হোতি, অঞ্ঞতৰং অযোবন্ধনং ফেগ্গুদণ্ডং ৱিয সুখেনেৱ ছিন্দন্তি. সসবিড়াৰচম্মেহি সঙ্ঘটিতট্ঠেন সঙ্ঘাটীতি ৱুচ্চতি আৱুধপৰিচ্ছদোতি আহ ‘‘সঙ্ঘাটিযাতি কোসিযা’’তি. পৰিযোনদ্ধন্তি পৰিতো ওনদ্ধং ছাদিতং. সমন্ততো ৱেঠিতন্তি সব্বসো পিহিতং.

৪৩৭. ৰজোতি আগন্তুকৰজো. জল্লন্তি সৰীৰে উট্ঠানকলোণাদিমলং. ৰজোজল্লঞ্চ ৱতসমাদানৱসেন অনপনীতং এতস্স অত্থীতি ৰজোজল্লিকো, তস্স. তেনাহ ‘‘ৰজোজল্লধাৰিনো’’তি. উদকং ওৰোহন্তস্সাতিআদীনমত্থো মহাসীহনাদসুত্তৱণ্ণনাযং ৱুত্তোযেৱ. সব্বমেতন্তিআদীসু সব্বসোপি ৱতসমাদানৱসেনাতি অধিপ্পাযো. যস্মা সব্বমেতং বাহিৰসমযৱসেনেৱ কথিতং, তস্মা সঙ্ঘাটিকস্সাতি পিলোতিকখণ্ডেহি সঙ্ঘটিতত্তা ‘‘সঙ্ঘাটী’’তি লদ্ধনামৱত্থধাৰিনোতি অত্থো. তথা হি পাড়িযং ‘‘সঙ্ঘাটিকস্স’’ইচ্চেৱ ৱুত্তং, ন ‘‘ভিক্খুনো’’তি. তেনাহ ‘‘ইমস্মিং হী’’তিআদি. কস্মা পনেত্থ ভগৱতা সঙ্ঘাটিকত্তাদীনিযেৱ ৱতসমাদানানি পটিক্খিত্তানীতি? নযদস্সনমেতং অঞ্ঞেসম্পি পঞ্চাতপমূগৱতাদীনং তপ্পটিক্খেপেনেৱ পসিদ্ধিতো. অপৰে পন ভণন্তি – ‘‘নাহং, ভিক্খৱে, সঙ্ঘাটিকস্স সঙ্ঘাটিধাৰণমত্তেন সামঞ্ঞং ৱদামী’’তি ৱুত্তে তত্থ নিসিন্নো কোচি তিত্থন্তৰলদ্ধিকো অচেলকত্তং নু খো কথন্তি চিন্তেসি, অপৰে ৰজোজল্লকত্তং নু খো কথন্তি, এৱং তং তং চিন্তেন্তানং অজ্ঝাসযৱসেন ভগৱা ইমানেৱ ৱতসমাদানানি ইধ পটিক্খিপীতি. সঙ্ঘাটিকন্তি নিৱাসনপাৰুপনৱসেন সঙ্ঘাটিৱন্তং. তেনাহ ‘‘সঙ্ঘাটিকং ৱত্থ’’ন্তিআদি. অত্তনো ৰুচিযা মিত্তাদযো সঙ্ঘাটিকং কৰেয্যুং, পচ্ছা ৱিঞ্ঞুতং পত্তকালে সঙ্ঘাটিকত্তে সমাদপেয্যুং.

৪৩৮. অত্তানং ৱিসুজ্ঝন্তং পস্সতি অভিজ্ঝাদীনং সমুদাচাৰাভাৱতো. মগ্গেন অসমুচ্ছিন্নত্তা ৱিসুদ্ধোতি পন ন ৱত্তব্বো. পামোজ্জন্তি তৰুণপীতিমাহ. তস্স হি অত্তনো সম্মাপটিপত্তিযা কিলেসানং ৱিক্খম্ভিতত্তা চিত্তস্স ৱিসুদ্ধতং পস্সন্তস্স পামোজ্জং জাযতি, তং তুট্ঠাকাৰং. তেনাহ ‘‘তুট্ঠাকাৰো’’তি. পীতীতি পস্সদ্ধিআৱহা বলৱপীতি. নামকাযো পস্সম্ভতীতি ইমিনা উভযম্পি পস্সদ্ধিং ৱদতি. ৱেদিযতীতি অনুভৱতি ৱিন্দতি. ইদানি তেন নীৱৰণেহি চিত্তস্স ৱিসোধনত্তং লদ্ধন্তি আহ ‘‘অপ্পনাপ্পত্তং ৱিয হোতী’’তি. অঞ্ঞত্থ উট্ঠিতা অঞ্ঞং ঠানং উপগতাতি এত্তকেন উপমাভাৱেন উচ্চনীচতাসামঞ্ঞেন হেট্ঠা অসদ্ধম্মানং পটিপক্খৱসেন দেসনায পৰিযোসাপিতত্তা ৱুত্তং ‘‘যথানুসন্ধিনা’’তি. মহাসীহনাদসুত্তে মগ্গো পোক্খৰণিযা উপমিতো ‘‘সেয্যথাপি, সাৰিপুত্ত, পোক্খৰণী’’তিআদিং (ম. নি. ১.১৫৪) আৰভিত্ৱা উপমাসংসন্দনে ‘‘তথাযং পুগ্গলো পটিপন্নো, তথা চ ইৰিযতি, তঞ্চ মগ্গং সমাৰুড়্হো, যথা আসৱানং খযা’’তি (ম. নি. ১.১৫৪) ৱুত্তত্তা. যথা হি পুৰত্থিমাদিদিসাহি আগতা পুৰিসা তং পোক্খৰণিং আগম্ম ৱিসুদ্ধৰূপকাযা ৱিগতপৰিড়াহা চ হোন্তি, এৱং খত্তিযাদিকুলতো আগতা তথাগতপ্পৱেদিতং ধম্মৱিনযং সাসনং আগম্ম ৱিসুদ্ধনামকাযা ৱিগতকিলেসপৰিড়াহা চ হোন্তি. তস্মা সব্বকিলেসানং সমিতত্তা পৰমত্থসমণো হোতীতি. সেসং সুৱিঞ্ঞেয্যমেৱ.

চূড়অস্সপুৰসুত্তৱণ্ণনায লীনত্থপ্পকাসনা সমত্তা.

নিট্ঠিতা চ মহাযমকৱগ্গৱণ্ণনা.