৪. ৰথৱিনীতসুত্তৱণ্ণনা

২৫২. মহাগোৱিন্দেন পৰিগ্গহিততাকিত্তনং তদা মগধৰাজেন পৰিগ্গহিতূপলক্খণং. তস্স হি সো পুৰোহিতো. মহাগোৱিন্দোতি পুৰাতনো একো মগধৰাজাতি কেচি. গয্হতীতি গহো, ৰাজূনং গহো ৰাজগহং. নগৰ-সদ্দাপেক্খায নপুংসকনিদ্দেসো. অঞ্ঞেপেত্থ পকাৰেতি ৰাজূহি দিস্ৱা সম্মা পতিট্ঠাপিতত্তা তেসং গহং গেহভূতন্তিপি ৰাজগহং. আৰক্খসম্পত্তিআদিনা অনত্থুপ্পত্তিহেতুতায উপগতানং পটিৰাজূনং গহং গহভূতন্তিপি ৰাজগহং, আৰামৰামণীযকাদীহি ৰাজতে, নিৱাসসুখতাদিনা সত্তেহি মমত্তৱসেন গয্হতি, পৰিগ্গয্হতীতি ৱা ৰাজগহন্তি এৱমাদিকে পকাৰে. বুদ্ধকালে চ চক্কৱত্তিকালে চাতি ইদং যেভুয্যৱসেন ৱুত্তং. ৱেড়ূহি পৰিক্খিত্তং অহোসি, ন পন কেৱলং কট্ঠকপৱনমেৱ. ৰঞ্ঞো উয্যানকালে পতিট্ঠাপিতঅট্টালকৱসেন অট্টালকযুত্তং.

জননং জাতি, জাতিযা ভূমি জাতিভূমং, জাযি ৱা মহাবোধিসত্তো এত্থাভি জাতি, সা এৱ ভূমীতি জাতিভূমং, সা ইমেসং নিৱাসোতি জাতিভূমকাতি আহ ‘‘জাতিভূমকাতি জাতিভূমিৱাসিনো’’তি. কস্স পনাযং জাতিভূমীতি আহ ‘‘তং খো পনা’’তিআদি. তেন অনঞ্ঞসাধাৰণায জাতিযা অধিপ্পেতত্তা সদেৱকে লোকে সুপাকটভাৱতো ৱিসেসনেন ৱিনাপি ৱিসিট্ঠৱিসযোৱ ইধ জাতি-সদ্দো ৱিঞ্ঞাযতীতি দস্সেতি. তেনাহ ‘‘সব্বঞ্ঞুবোধিসত্তস্স জাতট্ঠানসাকিযজনপদো’’তি. তত্থপি কপিলৱত্থুসন্নিস্সযো পদেসোতি আহ ‘‘কপিলৱত্থাহাৰো’’তি.

গৰুধম্মভাৱৱণ্ণনা

সাকিযমণ্ডলস্সাতি সাকিযৰাজসমূহস্স. দসন্নং অপ্পিচ্ছকথাদীনং ৱত্থু দসকথাৱত্থু, অপ্পিচ্ছতাদি. তত্থ সুপ্পতিট্ঠিততায তস্স লাভী দসকথাৱত্থুলাভী. তত্থাতি দসকথাৱত্থুস্মিং.

গৰুকৰণীযতায ধম্মো গৰু এতস্সাতি ধম্মগৰু, তস্স ভাৱো ধম্মগৰুতা, তায. ‘‘অজ্ঝাসযেন ৱেদিতব্বো’’তি ৱত্ৱা ন কেৱলং অজ্ঝাসযেনেৱ, অথ খো কাযৱচীপযোগেহিপি ৱেদিতব্বোতি দস্সেন্তো ‘‘ধম্মগৰুতাযেৱ হী’’তিআদিমাহ. তিযামৰত্তিং ধম্মকথং কত্ৱাতি এত্থ ‘‘কুম্ভকাৰস্স নিৱেসনে তিযামৰত্তিং ৱসন্তো ধম্মকথং কত্ৱা’’তি এৱং ৱচনসেসৱসেন অত্থো ৱেদিতব্বো. অঞ্ঞথা যথালাভৱসেন অত্থে গয্হমানে তিযামৰত্তিং ধম্মকথা কতাতি আপজ্জতি, ন চ তং অত্থি. ৱক্খতি হি ‘‘বহুদেৱ ৰত্তিন্তি দিযড্ঢযামমত্ত’’ন্তি. দসবলাদিগুণৱিসেসা ৱিয ধম্মগাৰৱহেতুকা পৰহিতপটিপত্তিপি সব্ববুদ্ধানং মজ্ঝে ভিন্নসুৱণ্ণং ৱিয সদিসা এৱাতি ইমস্স ভগৱতো ধম্মগাৰৱকিত্তনে ‘‘কস্সপোপি ভগৱা’’তিআদিনা কস্সপভগৱতো ধম্মগাৰৱং দস্সেতি.

চাৰিকং নিক্খমীতি জনপদচাৰিকং চৰিতুং নিক্খমি. জনপদচাৰিকায অকালে নিক্খন্তত্তা কোসলৰাজাদযো ৱাৰেতুং আৰভিংসু. পৱাৰেত্ৱা হি চৰণং বুদ্ধাচিণ্ণং. পুণ্ণায সম্মাপটিপত্তিং পচ্চাসীসন্তো ভগৱা ‘‘কিং মে কৰিস্সসী’’তি আহ.

অনহাতোৱাতি ধম্মসৱনুস্সুক্কেন সাযন্হে বুদ্ধাচিণ্ণং ন্হানং অকত্ৱাৱ. অত্তহিতপৰহিতপটিপত্তীসু একিস্সা দ্ৱিন্নঞ্চ অত্থিতাসিদ্ধা চতুব্বিধতা পটিপত্তিকতা এৱ নাম হোতীতি ৱুত্তং ‘‘পটিপন্নকো চ নাম…পে… চতুব্বিধো হোতী’’তি. পটিক্খেপপুব্বকোপি হি পটিপন্নো অত্থতো পটিপন্নত্থো এৱাতি. কামং অত্তহিতায পটিপন্নো তায সম্মাপটিপত্তিযা সাসনং সোভতি, ন পন সাসনং ৱড্ঢেতি অপ্পোস্সুক্কভাৱতো, ন চ কাৰুণিকস্স ভগৱতো সব্বথা মনোৰথং পূৰেতি. তথা হি ভগৱা পঠমবোধিযং একসট্ঠিযা চ অৰহন্তেসু জাতেসু – ‘‘চৰথ, ভিক্খৱে, বহুজনহিতাযা’’তিআদিনা (দী. নি. ২.৮৬-৮৮; মহাৱ. ৩২) ভিক্খূ পৰহিতপটিপত্তিযং নিযোজেসি. তেন ৱুত্তং ‘‘এৱৰূপং ভিক্খুং ভগৱা ন পুচ্ছতি, কস্মা? ন ময্হং সাসনস্স ৱুড্ঢিপক্খে ঠিতো’’তি.

সমুদাযো অপ্পকেন ঊনোপি অনূনো ৱিয হোতীতি বাকুলত্থেৰং চতুত্থৰাসিতো বহি কত্ৱাপি ‘‘অসীতিমহাথেৰা ৱিযা’’তি ৱুত্তং. অসীতিমহাথেৰসমঞ্ঞা ৱা অৱযৱেপি অট্ঠসমাপত্তিসামঞ্ঞা ৱিয দট্ঠব্বা. ঈদিসে ঠানে বহূনং একতো কথনং মহতা কণ্ঠেন চ কথনং সত্থু চিত্তাৰাধনমেৱাতি তেহি ভিক্খূহি তথা পটিপন্নন্তি দস্সেন্তো ‘‘তে ভিক্খূ মেঘসদ্দং সুত্ৱা’’তিআদিমাহ. গুণসম্ভাৱনাযাতি ৱক্খমানগুণহেতুকায সম্ভাৱনায সম্ভাৱিতো, ন যেন কেনচি কিচ্চসমত্থতাদিনা.

গৰুধম্মভাৱৱণ্ণনা নিট্ঠিতা.

অপ্পিচ্ছতাদিৱণ্ণনা

অপ্প-সদ্দস্স পৰিত্তপৰিযাযতং মনসি কত্ৱা আহ ‘‘ব্যঞ্জনং সাৱসেসং ৱিযা’’তি. তেনাহ ‘‘ন হি তস্সা’’তিআদি. অপ্প-সদ্দো পনেত্থ অভাৱত্থোতি সক্কা ৱিঞ্ঞাতুং ‘‘অপ্পাবাধতঞ্চ সঞ্জানামী’’তিআদীসু (ম. নি. ১.২২৫; ২.১৩৪) ৱিয.

অত্ৰিচ্ছতা নাম (অ. নি. টী. ১.১.৬৩) অত্ৰ অত্ৰ ইচ্ছাতি কত্ৱা. অসন্তগুণসম্ভাৱনতাতি অত্তনি অৱিজ্জমানং গুণানং ৱিজ্জমানানং ৱিয পৰেসং পকাসনা. সদ্ধোতি মং জনো জানাতূতি ৱত্তপটিপত্তিকাৰকৱিসেসলাভীতি জানাতু ‘‘ৱত্তপটিপত্তিআপাথকজ্ঝাযিতা’’তি এৱমাদিনা. সন্তগুণসম্ভাৱনাতি ইচ্ছাচাৰে ঠত্ৱা অত্তনি ৱিজ্জমানসীলধুতধম্মাদিগুণৱিভাৱনা. তাদিসস্স হি পটিগ্গহণে অমত্তঞ্ঞুতাপি হোতি.

গণ্হন্তোযেৱ উম্মুজ্জি অঞ্ঞেসং অজানন্তানংযেৱাতি অধিপ্পাযো.

অপ্পিচ্ছতাপধানং পুগ্গলাধিট্ঠানেন চতুব্বিধং ইচ্ছাপভেদং দস্সেত্ৱা পুনপি পুগ্গলাধিট্ঠানেন চতুব্বিধং ইচ্ছাপভেদং দস্সেন্তো ‘‘অপৰোপি চতুব্বিধো অপ্পিচ্ছো’’তিআদিমাহ. দাযকস্স ৱসন্তি দাযকস্স চিত্তৱসং. দেয্যধম্মস্স ৱসন্তি দেয্যধম্মস্স অপ্পবহুভাৱং. অত্তনো থামন্তি অত্তনো যাপনমত্তকথামং.

একভিক্খুপি ন অঞ্ঞাসি সোসানিকৱত্তে সম্মদেৱ ৱুত্তিত্তা. অব্বোকিণ্ণন্তি অৱিচ্ছেদং. দুতিযো মং ন জানেয্যাতি দুতিযো সহাযভূতোপি যথা মং জানিতুং ন সক্কুণেয্য, তথা সট্ঠি ৱস্সানি নিৰন্তৰং সুসানে ৱসামি, তস্মা অহং অহো সোসানিকুত্তমো.

ধম্মকথায জনতং খোভেত্ৱাতি লোমহংসনসাধুকাৰদানচেলুক্খেপাদিৱসেন সন্নিপতিতং ইতৰঞ্চ ‘‘কথং নু খো অয্যস্স সন্তিকেৱ ধম্মং সোস্সামা’’তি কোলাহলৱসেন মহাজনং খোভেত্ৱা. গতোতি ‘‘অযং সো, তেন ৰত্তিযং ধম্মকথা কতা’’তি জাননভযেন পৰিযত্তিঅপ্পিচ্ছতায পৰিৱেণং গতো.

তযো কুলপুত্তা ৱিযাতি পাচীনৱংসদাযে সমগ্গৱাসং ৱুত্থা তযো কুলপুত্তা ৱিয. পহাযাতি পুব্বভাগে তদঙ্গাদিৱসেন পচ্ছা অগ্গমগ্গেনেৱ পজহিত্ৱা.

অপ্পিচ্ছতাদিৱণ্ণনা নিট্ঠিতা.

দ্ৱাদসৱিধসন্তোসৱণ্ণনা

পকতিদুব্বলাদীনং গৰুচীৱৰাদীনি নফাসুভাৱাৱহানি সৰীৰখেদাৱহানি চ হোন্তীতি পযোজনৱসেন নঅত্ৰিচ্ছতাদিৱসেন তানি পৰিৱত্তেত্ৱা লহুকচীৱৰপৰিভোগো ন সন্তোসৱিৰোধীতি আহ ‘‘লহুকেন যাপেন্তোপি সন্তুট্ঠোৱ হোতী’’তি. মহগ্ঘচীৱৰং, বহূনি ৱা চীৱৰানি লভিত্ৱাপি তানি ৱিস্সজ্জেত্ৱা তদঞ্ঞস্স গহণং যথাসাৰুপ্পনযে ঠিতত্তা ন সন্তোসৱিৰোধীতি আহ ‘‘তেসং…পে… ধাৰেন্তোপি সন্তুট্ঠোৱ হোতী’’তি. এৱং সেসপচ্চযেসুপি যথাবলযথাসাৰুপ্পসন্তোসনিদ্দেসেসু অপিসদ্দগ্গহণে অধিপ্পাযো ৱেদিতব্বো. যথাসাৰুপ্পসন্তোসোযেৱ অগ্গো অলোভজ্ঝাসযস্স উক্কংসনতো.

দ্ৱাদসৱিধসন্তোসৱণ্ণনা নিট্ঠিতা.

তিৱিধপৱিৱেকৱণ্ণনা

একোতি একাকী. গচ্ছতীতি চুণ্ণিকইৰিযাপথৱসেন ৱুত্তং. চৰতীতি ৱিহাৰতো বহি সঞ্চাৰৱসেন, ৱিহৰতীতি দিৱাৱিহাৰাদিৱসেন. কাযৱিৱেকোতি চ নেক্খম্মাধিমুত্তস্স ভাৱনানুযোগৱসেন ৱিৱেকট্ঠকাযতা, ন ঝানৱিৱেকমত্তং. তেনাহ ‘‘নেক্খম্মাভিৰতান’’ন্তি. পৰিসুদ্ধচিত্তানন্তি নীৱৰণাদিসংকিলেসতো ৱিসুদ্ধচিত্তানং. পৰমৱোদানপ্পত্তানন্তি ৱিতক্কাদিতংতংঝানপটিপক্খৱিগমেন পৰমং উত্তমং ৱোদানং পত্তানং. নিৰুপধীনন্তি কিলেসুপধিআদীনং ৱিগমেন নিৰুপধীনং.

তিৱিধপৱিৱেকৱণ্ণনা নিট্ঠিতা.

পঞ্চৱিধসংসগ্গৱণ্ণনা

সংসীদতি এতেনাতি সংসগ্গো, ৰাগো. সৱনহেতুকো, সৱনৱসেন ৱা পৱত্তো সংসগ্গো সৱনসংসগ্গো. এস নযো সেসেসুপি. কাযসংসগ্গো পন কাযপৰামাসো. ইত্থী ৱাতি ৱধূ, যুৱতী ৱা. সন্ধানেতুন্তি পুব্বেনাপৰং ঘটেতুং. সোতৱিঞ্ঞাণৱীথিৱসেনাতি ইদং মূলভূতং সৱনং সন্ধায ৱুত্তং, তস্স পিট্ঠিৱত্তকমনোদ্ৱাৰিকজৱনৱীথীসু উপ্পন্নোপি ৰাগো সৱনসংসগ্গোযেৱ. দস্সনসংসগ্গেপি এসেৱ নযো. অনিত্থিগন্ধবোধিসত্তো পৰেহি কথিযমানৱসেন পৱত্তসৱনসংসগ্গস্স নিদস্সনং. তিস্সদহৰো অত্তনা সুয্যমানৱসেন. তত্থ পঠমং জাতকে ৱেদিতব্বন্তি ইতৰং দস্সেন্তো ‘‘দহৰো কিৰা’’তিআদিমাহ. কামৰাগেন ৱিদ্ধোতি ৰাগসল্লেন হদযে অপ্পিতো অন্তো অনুৱিদ্ধো.

সোতি দস্সনসংসগ্গো. এৱং ৱেদিতব্বোতি ৱত্থুৱসেন পাকটং কৰোতি. তস্মিং কিৰ গামে যেভুয্যেন ইত্থিযো অভিৰূপা দস্সনীযা পাসাদিকা, তস্মা থেৰো ‘‘সচে অন্তোগামে ন চৰিস্সসী’’তি আহ. কালস্সেৱ পৱিট্ঠত্তা যাগুং অদাসি, তস্মা যাগুমেৱ গহেত্ৱা গচ্ছন্তং ‘‘নিৱত্তথ, ভন্তে, ভিক্খং গণ্হাহী’’তি আহংসু. যাচিত্ৱাতি ‘‘ন মযং, ভন্তে, ভিক্খং দাতুকামা নিৱত্তেম, অপিচ ইদং ভন্তে কাৰণ’’ন্তি যাচিত্ৱা.

আদিতো লপনং আলাপো, ৱচনপটিৱচনৱসেন পৱত্তো লাপো সল্লাপো. ভিক্খুনিযাতি ইদং নিদস্সনমত্তং. যায কাযচিপি ইত্থিযা সন্তকপৰিভোগৱসেন উপ্পন্নৰাগোপি সম্ভোগসংসগ্গোৱ.

পঞ্চৱিধসংসগ্গৱণ্ণনা নিট্ঠিতা.

গাহগাহকাদিৱণ্ণনা

ভিক্খুনো ভিক্খূহি কাযপৰামাসো কাযসম্বাহনাদিৱসেন. কাযসংসগ্গন্তি কাযপৰামাসসংসগ্গং. গাহগাহকোতি গণ্হনকানং গণ্হনকোতি অত্থো. গাহমুত্তকোতি অযোনিসো আমিসেহি সঙ্গণ্হনকেহি সযং মুচ্চনকো. মুত্তগাহকোতি যথাৱুত্তসঙ্গহতো মুত্তানং সঙ্গণ্হনকো. মুত্তমুত্তকোতি মুচ্চনকেহি সযম্পি মুচ্চনকো. গহণৱসেন সঙ্গণ্হনৱসেন. উপসঙ্কমন্তি ততো কিঞ্চি লোকামিসং পচ্চাসীসন্তা, ন দক্খিণেয্যৱসেন. ভিক্খুপক্খে গহণৱসেনাতি পচ্চযলাভায সঙ্গণ্হনৱসেনাতি যোজেতব্বং. ৱুত্তনযেনাতি ‘‘আমিসেনা’’তিআদিনা ৱুত্তনযেন.

ঠানন্তি অত্তনো ঠানাৱত্থং. পাপুণিতুং ন দেতি উপ্পন্নমেৱ তং পটিসঙ্খানবলেন নীহৰন্তো ৱিক্খম্ভেতি. তেনাহ ‘‘মন্তেনা’’তিআদি. যথা জীৱিতুকামো পুৰিসো কণ্হসপ্পেন, অমিত্তেন ৱা সহ ন সংৱসতি, এৱং খণমত্তম্পি কিলেসেহি সহ ন সংৱসতীতি অত্থো.

চতুপাৰিসুদ্ধিসীলং লোকিযং লোকুত্তৰঞ্চ. তথা সমাধিপি. ৱিপস্সনায পাদকা ৱিপস্সনাপাদকাতি অট্ঠসমাপত্তিগ্গহণেন যথা লোকিযসমাধি গহিতো, এৱং ৱিপস্সনাপাদকা এতেসন্তি ৱিপস্সনাপাদকাতি অট্ঠসমাপত্তিগ্গহণেনেৱ লোকুত্তৰো সমাধি গহিতো. যথা হি চত্তাৰি ৰূপজ্ঝানানি অধিট্ঠানং কত্ৱা পৱত্তো মগ্গসমাধি ৱিপস্সনাপাদকো, এৱং চত্তাৰি অৰূপজ্ঝানানি অধিট্ঠানং কত্ৱা পৱত্তোপি. সমাপত্তিপৰিযাযো পন পুব্বৱোহাৰেন ৱেদিতব্বো. পটিপক্খসমুচ্ছেদনেন সম্মা আপজ্জনতো ৱা যথা ‘‘সোতাপত্তিমগ্গো’’তি. এৱমেত্থ সীলসমাধীনম্পি মিস্সকভাৱো ৱেদিতব্বো, ন পঞ্ঞায এৱ. ৱিমুত্তীতি অৰিযফলন্তি ৱুত্তং ‘‘ৱিমুত্তিসম্পন্নো’’তি ৱুত্তত্তা. তঞ্হি নিপ্ফাদনট্ঠেন সম্পাদেতব্বং, ন নিব্বানন্তি.

এত্থ চ অপ্পিচ্ছতায লদ্ধপচ্চযেন পৰিতুস্সতি, সন্তুট্ঠতায লদ্ধা তে অগধিতো অমুচ্ছিতোআদীনৱদস্সী নিস্সৰণপঞ্ঞো পৰিভুঞ্জতি, এৱংভূতো চ কত্থচি অলগ্গমানসতায পৱিৱেকং পৰিব্ৰূহেন্তো কেনচি অসংসট্ঠো ৱিহৰতি গহট্ঠেন ৱা পব্বজিতেন ৱা. সো এৱং অজ্ঝাসযসম্পন্নো ৱীৰিযং আৰভতি অপ্পত্তস্স পত্তিযা, অনধিগমস্স অধিগমায. আৰভন্তো চ যথাসমাদিন্নং অত্তনো সীলং পচ্চৱেক্খতি, তস্স সীলস্স সুপৰিসুদ্ধতং নিস্সায উপ্পজ্জতি অৱিপ্পটিসাৰো, অযমস্স সীলসম্পদা. তস্স অৱিপ্পটিসাৰমূলকেহি পামোজ্জপীতিপস্সদ্ধিসুখেহি সম্মা ব্ৰূহিতং চিত্তং সম্মদেৱ সমাধিযতি, অযমস্স সমাধিসম্পদা. ততো যথাভূতং জানং পস্সং নিব্বিন্দতি, নিব্বিন্দং ৱিৰজ্জতি, ৱিৰাগা ৱিমুচ্চতি, অযমস্স পঞ্ঞাসম্পদা. ৱিমুত্তচিত্ততা পনস্স ৱিমুত্তিসম্পদা, ততো ৱিমুত্তিতো ঞাণদস্সনন্তি এতেসং দসন্নং কথাৱত্থূনং অনুপুব্বী ৱেদিতব্বা. তস্স যো দসহি কথাৱত্থূহি সমন্নাগমো, অযং অত্তহিতায পটিপত্তি. যা নেসং পৰেসং সংকিত্তনং, অযং পৰহিতায পটিপত্তি. তাসু পুৰিমা ঞাণপুব্বঙ্গমা ঞাণসম্পযুত্তা চ, ইতৰা কৰুণাপুব্বঙ্গমা কৰুণাসম্পযুত্তা চাতি সব্বং ঞাণকৰুণাকণ্ডং ৱত্তব্বং.

দসহি কথাৱত্থূহি কৰণভূতেহি ভিক্খূনং ওৱাদং দেতি, ‘‘ভিক্খুনা নাম অত্ৰিচ্ছতাদিকে দূৰতো ৱজ্জেত্ৱা সম্মদেৱ অপ্পিচ্ছেন ভৱিতব্ব’’ন্তিআদিনা তং তং কথাৱত্থুং ভিক্খূনং উপদিসতীতি অত্থো. উপদিসন্তো হি তানি ‘‘তেহি ভিক্খূ ওৱদতী’’তি ৱুত্তো. ওৱদতিযেৱ সৰূপদস্সনমত্তেন. সুখুমং অত্থং পৰিৱত্তেত্ৱাতি এৱম্পি অপ্পিচ্ছতা হোতি এৱম্পীতি অপ্পিচ্ছতাদিৱসেন অপৰাপৰং অপ্পিচ্ছতাৱুত্তিং দস্সেত্ৱা তত্থ সুখুমনিপুণং অপ্পিচ্ছতাসঙ্খাতং অত্থং জানাপেতুং ন সক্কোতি. ৱিঞ্ঞাপেতীতি যথাৱুত্তেহি ৱিসেসেহি ৱিঞ্ঞাপেতি. কাৰণন্তি যেন কাৰণেন অপ্পিচ্ছতা ইজ্ঝতি, তং পন ‘‘মহিচ্ছতাদীসু এতে দোসা, অপ্পিচ্ছতায অযমানিসংসো’’তিআদীনৱানিসংসদস্সনং দট্ঠব্বং. সম্মা হেতুনা অপ্পিচ্ছতং দস্সেতীতি সন্দস্সকো. গাহেতুন্তি যথা গণ্হতি, তথা কাতুং, তত্থ পট্ঠপেতুন্তি অত্থো. উস্সাহজননৱসেনাতি যথা তং সমাদানং নিচ্চলং হোতি, এৱং উস্সোড়্হিযা উপ্পাদনৱসেন সম্মদেৱ উত্তেজেতীতি সমুত্তেজকো. উস্সাহজাতেতি অপ্পিচ্ছতায জাতুস্সাহে. ৱণ্ণং ৱত্ৱা তত্থ সম্পত্তিং আযতিঞ্চ লব্ভমানগুণং কিত্তেত্ৱা সম্পহংসেতি সম্মদেৱ পকাৰেহি তোসেতীতি সম্পহংসকো. এৱং সন্তুট্ঠিআদীসু যথাৰহং যোজনা কাতব্বা.

গাহগাহকাদিৱণ্ণনা নিট্ঠিতা.

পঞ্চলাভৱণ্ণনা

২৫৩. সত্থু সম্মুখা এৱং ৱণ্ণো অব্ভুগ্গতোতি. ইমিনা তস্স ৱণ্ণস্স যথাভূতগুণসমুট্ঠিততং দস্সেতি. মন্দমন্দো ৱিযাতি অতি ৱিয অছেকো ৱিয. অবলবলো ৱিযাতি অতি ৱিয অবলো ৱিয. ভাকুটিকভাকুটিকো ৱিযাতি অতি ৱিয দুম্মুখো ৱিয. অনুমস্সাতি অনুমসিত্ৱা, দস কথাৱত্থূনি সৰূপতো ৱিসেসতো চ অনুপৰিগ্গহেত্ৱাতি অত্থো. পৰিগ্গণ্হনং পন নেসং অনুপৱিসনং ৱিয হোতীতি ৱুত্তং ‘‘অনুপৱিসিত্ৱা’’তি. সব্ৰহ্মচাৰীহি ৱণ্ণভাসনং একো লাভোতি যোজনা. এৱং সেসেসুপি. পত্থযমানো এৱমাহ ধম্মগৰুতাযাতি অধিপ্পাযো.

পঞ্চলাভৱণ্ণনা নিট্ঠিতা.

চাৰিকাদিৱণ্ণনা

২৫৪. অভিৰমনং অভিৰতং, তদেৱ অনুনাসিকলোপং অকত্ৱা ৱুত্তং ‘‘অভিৰন্ত’’ন্তি. ভাৱনপুংসকঞ্চেতং. অনভিৰতি নাম নত্থি, অভিৰমিত্ৱা চিৰৱিহাৰোপি নত্থি সম্মদেৱ পৰিঞ্ঞাতৱত্থুকত্তা. সব্বসহা হি বুদ্ধা ভগৱন্তো অসয্হলাভিনো.

পুব্বে ধম্মগৰুতাকিত্তনপসঙ্গেন গহিতং অগ্গহিতঞ্চ মহাকস্সপপচ্চুগ্গমনাদিং একদেসেন দস্সেত্ৱা ৱনৱাসিতিস্সসামণেৰস্স ৱত্থুং ৱিত্থাৰেত্ৱা জনপদচাৰিকং কথেতুং ‘‘ভগৱা হী’’তিআদি আৰদ্ধং. আকাসগামীহি সদ্ধিং গন্তুকামো ‘‘ছড়ভিঞ্ঞানং আৰোচেহী’’তি আহ. সঙ্ঘকম্মেন সিজ্ঝমানাপি উপসম্পদা সত্থু আণাৱসেনেৱ সিজ্ঝনতো ‘‘বুদ্ধদাযজ্জং তে দস্সামী’’তি ৱুত্তন্তি ৱদন্তি. অপৰে ‘‘অপৰিপুণ্ণৱীসতিৱস্সস্সেৱ তস্স উপসম্পদং অনুজানন্তো সত্থা ‘বুদ্ধদাযজ্জং তে দস্সামী’তি অৱোচা’’তি ৱদন্তি. উপসম্পাদেত্ৱাতি ধম্মসেনাপতিনা উপজ্ঝাযেন উপসম্পাদেত্ৱা.

নৱযোজনসতিকং মজ্ঝিমদেসপৰিযাপন্নমেৱ, ততো পৰং নাধিপ্পেতং দন্ধতাৱসেন গমনতো. সমন্তাতি গতগতট্ঠানস্স চতূসু পস্সেসু. অঞ্ঞেনপি কাৰণেনাতি ভিক্খূনং সমথৱিপস্সনাতৰুণভাৱতো অঞ্ঞেনপি মজ্ঝিমমণ্ডলে ৱেনেয্যানং ঞাণপৰিপাকাদিকাৰণেন নিক্খমতি, অন্তোমণ্ডলং ওতৰতি. সত্তহি ৱাতিআদি ‘‘একং মাসং ৱা’’তিআদিনা ৱুত্তানুক্কমেন যোজেতব্বং.

সৰীৰফাসুকত্থাযাতি একস্মিংযেৱ ঠানে নিবদ্ধৱাসেন উস্সন্নধাতুকস্স সৰীৰস্স ৱিৰেচনেন ফাসুভাৱত্থায. অট্ঠুপ্পত্তিকালাভিকঙ্খনত্থাযাতি অগ্গিক্খন্ধূপমসুত্ত (অ. নি. ৭.৭২) মঘদেৱজাতকাদিদেসনানং (জা. ১.১.৯) ৱিয ধম্মদেসনায অট্ঠুপ্পত্তিকালস্স আকঙ্খনেন. সুৰাপানসিক্খাপদপঞ্ঞাপনে (পাচি. ৩২৬) ৱিয সিক্খাপদপঞ্ঞাপনত্থায. বোধনেয্যসত্তে অঙ্গুলিমালাদিকে বোধনত্থায. নিবদ্ধৱাসঞ্চ পুগ্গলং উদ্দিস্স চাৰিকা নিবদ্ধচাৰিকা.

২৫৫. অপৰিগ্গহভাৱং কত্থচি অলগ্গভাৱং দস্সেতুং ‘‘যূথং পহায…পে… মত্তহত্থী ৱিযা’’তি ৱুত্তং. অসহাযকিচ্চোতি সহাযকিচ্চৰহিতো সীহো ৱিয. তেনস্স একৱিহাৰিতং তেজৱন্ততঞ্চ দস্সেতি. তদা পন কাযৱিৱেকো ন সক্কা লদ্ধুন্তি ইদমেত্থ কাৰণং দট্ঠব্বং. বহূহীতিআদি পন সভাৱদস্সনৱসেন ৱুত্তং. থেৰস্স পৰিসা সুৱিনীতা চিণ্ণগৰুৱাসা গৰুনো ইচ্ছানুৰূপমেৱ ৱত্ততি.

ৱুত্তকাৰণযুত্তে অদ্ধানগমনে চাৰিকানং ৱোহাৰো সাসনে নিৰুড়্হোতি আহ ‘‘কিঞ্চাপী’’তিআদি. কেনচিদেৱ নিমিত্তেন কিস্মিঞ্চি অত্থে পৱত্তায সঞ্ঞায তন্নিমিত্তৰহিতেপি অঞ্ঞস্মিং পৱত্তি ৰুড়্হী নাম. ৱিজিতমাৰত্তা সঙ্গামৱিজযমহাযোধো ৱিয. অঞ্ঞং সেৱিত্ৱাতি ‘‘মম আগতভাৱং সত্থু আৰোচেহী’’তি আৰোচনত্থং অঞ্ঞং ভিক্খুং সেৱিত্ৱা.

ভগৱা ধম্মং দেসেন্তো তংতংপুগ্গলজ্ঝাসযানুৰূপং তদনুচ্ছৱিকমেৱ ধম্মিং কথং কৰোতীতি দস্সেন্তো ‘‘চূড়গোসিঙ্গসুত্তে’’তিআদিমাহ. তত্থ সামগ্গিৰসানিসংসন্তি ‘‘কচ্চি পন ৱো, অনুৰুদ্ধা, সমগ্গা সম্মোদমানা’’তিআদিনা (ম. নি. ১.৩২৬) সামগ্গিৰসানিসংসং কথেসি. আৱসথানিসংসন্তি ‘‘সীতং উণ্হং পটিহনতী’’তিআদিনা (চূড়ৱ. ২৯৫, ৩১৫) আৱসথপটিসংযুত্তং আনিসংসং. সতিপটিলাভিকন্তি জোতিপালত্থেৰে লামকং ঠানং ওতিণ্ণমত্তে মহাবোধিপল্লঙ্কে পন সব্বঞ্ঞুতং পটিৱিজ্ঝিতুং পত্থনং কত্ৱা পাৰমিযো পূৰেন্তো আগতো. তাদিসস্স নাম পমাদৱিহাৰো ন যুত্তোতি যথা কস্সপো ভগৱা বোধিসত্তস্স সতিং পটিলভিতুং ধম্মিং কথং কথেসি, তথা অযং ভগৱা তমেৱ পুব্বেনিৱাসপটিসংযুত্তকথং ভিক্খূনং ঘটিকাৰসুত্তং (ম. নি. ২.২৮২) কথেসি. চত্তাৰো ধম্মুদ্দেসেতি – ‘‘উপনীযতি লোকো অদ্ধুৱো, অতাণো লোকো অনভিস্সৰো, অস্সকো লোকো সব্বং পহায গমনীযং, ঊনো লোকো অতিত্তো তণ্হাদাসো চা’’তি (ম. নি. ২.৩০৫) ইমে চত্তাৰো ধম্মুদ্দেসে কথেসি. কামঞ্চেতে ধম্মুদ্দেসা ৰট্ঠপালসুত্তে (ম. নি. ২.৩০৪) আযস্মতা ৰট্ঠপালত্থেৰেন ৰঞ্ঞো কোৰব্যস্স কথিতা, তে পন ভগৱতো এৱ আহৰিত্ৱা থেৰেন তত্থ কথিতাতি ৱুত্তং ‘‘ৰট্ঠপালসুত্তে’’তিআদি. তথা হি ৱুত্তং সুত্তে – ‘‘অত্থি খো, মহাৰাজ, তেন ভগৱতা জানতা পস্সতা অৰহতা সম্মাসম্বুদ্ধেন চত্তাৰো ধম্মুদ্দেসা উদ্দিট্ঠা’’তিআদি (ম. নি. ২.৩০৫) পানকানিসংসকথন্তি ‘‘অগ্গিহুত্তং মুখং যঞ্ঞা’’তিআদিনা (ম. নি. ২.৪০০; সু. নি. ৫৭৩) অনুমোদনং ৱত্ৱা পুন পকিণ্ণককথাৱসেন পানকপটিসংযুত্তং আনিসংসকথং কথেসি. একীভাৱে আনিসংসং কথেসি, যং সন্ধায ৱুত্তং ‘‘অথ খো ভগৱা আযস্মন্তং ভগুং ধম্মিযা কথায সন্দস্সেসী’’তিআদি (ম. নি. ৩.২৩৮). অনন্তনযন্তি অপৰিমাণদেসনানযং অপ্পিচ্ছতাদিপটিসংযুত্তং ধম্মিং কথং. তেনাহ ‘‘পুণ্ণ, অযম্পি অপ্পিচ্ছকথাযেৱা’’তিআদি বহূহি পৰিযাযেহি নানানযং দেসেতি. কথং তথা দেসিতং থেৰো অঞ্ঞাসীতি আহ ‘‘পটিসম্ভিদাপত্তস্স…পে… অহোসী’’তি.

চাৰিকাদিৱণ্ণনা নিট্ঠিতা.

সত্তৱিসুদ্ধিপঞ্হৱণ্ণনা

২৫৬. ততো পট্ঠাযাতি. যদা জাতিভূমকা ভিক্খূ সত্থু সম্মুখা থেৰস্স ৱণ্ণং ভাসিংসু, ততো পট্ঠায. সীসানুলোকী হুত্ৱা পিট্ঠিতো পিট্ঠিতো অনুবন্ধনং থেৰেন সমাগমে আদৰৱসেন কতন্তি দট্ঠব্বং. তথা হি ৱুত্তং পাঠে ‘‘অপ্পেৱ নামা’’তিআদি, ‘‘তৰমানৰূপো’’তি চ. যং পন ৱুত্তং অট্ঠকথাযং ‘‘একস্মিং ঠানে নিলীন’’ন্তিআদি, তং অকাৰণং. ন হি ধম্মসেনাপতি তস্স থেৰস্স নিসিন্নট্ঠানং অভিঞ্ঞাঞাণেন জানিতুং ন সক্কোতি. ‘‘কচ্চি নু খো মং অদিস্ৱাৱ গমিস্সতী’’তি অযম্পি চিন্তা আদৰৱসেনেৱাতি যুত্তং. ন হি সত্থাৰং দট্ঠুং আগতো সাৱকো অপি আযস্মা অঞ্ঞাতকোণ্ডঞ্ঞো সত্থুকপ্পং ধম্মসেনাপতিং তত্থ ৱসন্তং অদিস্ৱাৱ গচ্ছনকো নাম অত্থি. দিৱাৱিহাৰন্তি সম্পদানে উপযোগৱচনন্তি আহ ‘‘দিৱাৱিহাৰত্থাযা’’তি.

২৫৭. পুৰিমকথাযাতি পঠমালাপে. অপ্পতিট্ঠিতাযাতি নপ্পৱত্তিতায. পচ্ছিমকথা ন জাযতীতি পচ্ছা ৱত্তব্বকথায অৱসৰো ন হোতি. সত্ত ৱিসুদ্ধিযো পুচ্ছি দিট্ঠসংসন্দনৱসেন. ঞাণদস্সনৱিসুদ্ধি নাম অৰিযমগ্গো. যস্মা ততো উত্তৰিম্পি পত্তব্বং অত্থেৱ, তস্মা ‘‘চতুপাৰিসুদ্ধিসীলাদীসু ঠিতস্সপি ব্ৰহ্মচৰিযৱাসো মত্থকং ন পাপুণাতী’’তি ৱুত্তং. তস্মাতি ব্ৰহ্মচৰিযৱাসস্স মত্থকং অপ্পত্তত্তা. সব্বং পটিক্খিপীতি সত্তমম্পি পঞ্হং পটিক্খিপি, ইতৰেসু ৱত্তব্বমেৱ নত্থি.

অপ্পচ্চযপৰিনিব্বানন্তি অনুপাদিসেসনিব্বানমাহ. ইদানি পকাৰন্তৰেনপি অনুপাদাপৰিনিব্বানং দস্সেতুং ‘‘দ্ৱেধা’’তিআদি ৱুত্তং. তত্থ গহণূপাদানন্তি দড়্হগ্গহণভূতং উপাদানং. তেনাহ ‘‘কামুপাদানাদিক’’ন্তি. পচ্চযূপাদানন্তি যং কিঞ্চি পচ্চযমাহ. সো হি অত্তনো ফলং উপাদিযতি উপাদানৱসেন গণ্হতীতি উপাদানন্তি ৱুচ্চতি. তেনাহ ‘‘পচ্চযূপাদানং নাম…পে… পচ্চযা’’তি. ‘‘অনুপাদায আসৱেহি চিত্তং ৱিমুচ্চতী’’তি ৱচনতো (মহাৱ. ২৮, ৩০) অৰহত্তফলং অনুপাদাপৰিনিব্বানন্তি কথেন্তি. ন চ উপাদানসম্পযুত্তন্তি উপাদানেহি এতং ন সহিতং নাপি উপাদানেহি সহ পৱত্তি হুত্ৱা. ন চ কঞ্চি ধম্মং উপাদিযতীতি কস্সচি ধম্মস্স আৰম্মণকৰণৱসেন ন উপাদিযতি. পৰিনিব্বুতন্তেতি অগ্গমগ্গেন কাতব্বকিলেসপৰিনিব্বানপৰিযোসানন্তে জাতত্তা. অমতধাতুমেৱ অনুপাদাপৰিনিব্বানং কথেন্তি, কথেন্তানঞ্চ যথা তস্স কোচি পচ্চযো নাম নত্থি, এৱং অধিগতোপি যথা কোচি পচ্চযো নাম ন হোতি, তথা পৰিনিব্বানং অপচ্চযপৰিনিব্বানন্তি দস্সেন্তো ‘‘অযং অন্তো’’তিআদিমাহ. পুন পুচ্ছং আৰভি অনুপাদাপৰিনিব্বানং সৰূপতো পতিট্ঠাপেতুকামো.

২৫৮. সব্বপৰিৱত্তেসূতি সব্বেসু পঞ্হপৰিৱত্তনেসু, পঞ্হৱাৰেসূতি অত্থো. সগহণধম্মমেৱাতি ‘‘এতং মমা’’তিআদিনা গণ্হতীতি গহণং, সহ গহণেনাতি সগহণং, উপাদানিযন্তি অত্থো. ৱিৱট্টসন্নিস্সিতস্স অভাৱতো ৱট্টমেৱ অনুগতোতি ৱট্টানুগতো. তেনাহ ‘‘চতুপাৰিসুদ্ধিসীলমত্তস্সপি অভাৱতো’’তি. যো পন চতুব্বিধে ৱিৱট্টূপনিস্সযে সীলে ঠিতো, সোপি ‘‘অঞ্ঞত্ৰ ইমেহি ধম্মেহী’’তি ৱত্তব্বতং অৰহতি.

সত্তৱিসুদ্ধিপঞ্হৱণ্ণনা নিট্ঠিতা.

সত্তৰথৱিনীতৱণ্ণনা

২৫৯. নিস্সক্কৱচনমেতং ‘‘যাৱ হেট্ঠিমসোপানকড়েৱৰা’’তিআদীসু ৱিয. অত্থোতি পযোজনং. চিত্তৱিসুদ্ধি হেত্থ সীলৱিসুদ্ধিং পযোজেতি তস্স তদত্থত্তা. সীলৱিসুদ্ধিকিচ্চং কতং নাম হোতি সমাধিসংৱত্তনতো. সমাধিসংৱত্তনিকা হি সীলৱিসুদ্ধি নাম. সব্বপদেসূতি ‘‘চিত্তৱিসুদ্ধি যাৱদেৱ দিট্ঠিৱিসুদ্ধত্থা’’তিআদীসু সব্বপদেসু, দিট্ঠিৱিসুদ্ধিযং ঠিতস্স চিত্তৱিসুদ্ধকিচ্চং কতং নাম হোতীতিআদিনা যোজেতব্বং.

সাৱত্থিনগৰং ৱিয সক্কাযনগৰং অতিক্কমিতব্বত্তা. সাকেতনগৰং ৱিয নিব্বাননগৰং পাপুণিতব্বত্তা. অচ্চাযিকস্স কিচ্চস্স উপ্পাদকালো ৱিয নৱমেনেৱ খণেন পত্তব্বস্স অভিসমযকিচ্চস্স উপাদকালো. যথা ৰঞ্ঞো সত্তমেন ৰথৱিনীতেন সাকেতে অন্তেপুৰদ্ৱাৰে ওৰুড়্হস্স ন তাৱ কিচ্চং নিট্ঠিতং নাম হোতি, সংৱিধাতব্বসংৱিধানং ঞাতিমিত্তগণপৰিৱুতস্স সুৰসভোজনপৰিভোগে নিট্ঠিতং নাম সিযা, এৱমেতং ঞাণদস্সনৱিসুদ্ধিযা কিলেসে খেপেত্ৱা তেসংযেৱ পটিপ্পস্সদ্ধিপহানসাধকঅৰিযফলসমঙ্গিকালে অভিসমযকিচ্চং নিট্ঠিতং নাম হোতি. তেনাহ ‘‘যোগিনো…পে… কালো দট্ঠব্বো’’তি. তত্থ পৰোপণ্ণাস কুসলধম্মা নাম চিত্তুপ্পাদপৰিযাপন্না ফস্সাদযো পৰোপণ্ণাস অনৱজ্জধম্মা. নিৰোধসযনেতি নিব্বানসযনে.

‘‘ৱিসুদ্ধিযো’’তি ৱা ‘‘কথাৱত্থূনী’’তি ৱা অত্থতো একং, ব্যঞ্জনমেৱ নানন্তি তেসং অত্থতো অনঞ্ঞভাৱং দস্সেতুং ‘‘ইতী’’তি আৰদ্ধং. আযস্মা পুণ্ণো দস কথাৱত্থূনি ৱিস্সজ্জেসীতি সত্ত ৱিসুদ্ধিযো নাম ৱিস্সজ্জন্তোপি দস কথাৱত্থূনি ৱিস্সজ্জেসি তেসং অত্থতো অনঞ্ঞত্তা. এতেনেৱ ধম্মসেনাপতি সাৰিপুত্তত্থেৰো সত্ত ৱিসুদ্ধিযো পুচ্ছন্তো দস কথাৱত্থূনি পুচ্ছীতি অযম্পি অত্থো ৱুত্তোৱাতি ৱেদিতব্বো. ন্তি পঞ্হং. কিং জানিত্ৱা পুচ্ছীতি ৱিসুদ্ধিপৰিযাযেন কথাৱত্থূনি পুচ্ছামীতি কিং জানিত্ৱা পুচ্ছি. দসকথাৱত্থুলাভিনং থেৰং ৱিসুদ্ধিযো পুচ্ছন্তো পুচ্ছিতট্ঠানেযেৱ পুচ্ছনেন কিং তিত্থকুসলো ৱা পন হুত্ৱা ৱিসযস্মিং পুচ্ছি, উদাহু পানীযত্থিকমতিত্থেহি ছিন্নতটেহি পাতেন্তো ৱিয অতিত্থকুসলো হুত্ৱা অপুচ্ছিতব্বট্ঠানে অৱিসযস্মিং পুচ্ছীতি যোজনা. ইমিনা নযেন ৱিস্সজ্জনপক্খেপি অত্থযোজনা ৱেদিতব্বা. যদত্থমস্স ৱিচাৰণা আৰদ্ধা, তং দস্সেন্তেন ‘‘তিত্থকুসলো হুত্ৱা’’তিআদিং ৱত্ৱা ৱিসুদ্ধিকথাৱত্থূনং অত্থতো অনঞ্ঞত্তেপি অযং ৱিসেসো ৱেদিতব্বোতি দস্সেতুং ‘‘যং হী’’তিআদি ৱুত্তং. তদমিনাতি যং ‘‘সংখিত্তং, ৱিত্থিণ্ণ’’ন্তি চ ৱুত্তং, তং ইমিনা ইদানি ৱুচ্চমানেন নযেন ৱিধিনা ৱেদিতব্বং.

একা সীলৱিসুদ্ধীতি ৱিসুদ্ধীসু ৱিসুং একা সীলৱিসুদ্ধি. দসসু কথাৱত্থূসু চত্তাৰি কথাৱত্থূনি হুত্ৱা আগতা অপ্পিচ্ছতাদীহি ৱিনা সীলৱিসুদ্ধিযা অসম্ভৱতো. অপ্পিচ্ছকথাতিআদীসু কথাসীসেন দসকথাৱত্থু গহিতং. কথেতব্বত্তা ৱা ৱত্থু কথাৱত্থূতি ৱুত্তং. এৱঞ্চ উপকাৰতো, সভাৱতো ৱা চতুন্নং কথাৱত্থূনং সীলৱিসুদ্ধিসঙ্গহো দট্ঠব্বো. তিণ্ণং কথাৱত্থূনং চিত্তৱিসুদ্ধিসঙ্গহেপি এসেৱ নযো. পঞ্চ ৱিসুদ্ধিযোতি নামৰূপপৰিচ্ছেদো দিট্ঠিৱিসুদ্ধি, সপ্পচ্চযনামৰূপদস্সনং কঙ্খাৱিতৰণৱিসুদ্ধি, ৱিপস্সনুপক্কিলেসে পহায উপ্পন্নং ৱিপস্সনাঞাণং মগ্গামগ্গঞাণদস্সনৱিসুদ্ধি, উদযব্বযঞাণাদি নৱৱিধঞাণং পটিপদাঞাণদস্সনৱিসুদ্ধি, অৰিযমগ্গঞাণং ঞাণদস্সনৱিসুদ্ধীতি ইমা পঞ্চ ৱিসুদ্ধিযো.

সত্তৰথৱিনীতৱণ্ণনা নিট্ঠিতা.

২৬০. সম্মোদিতুন্তি অনন্তৰং ৱুচ্চমানেন সম্মোদিতুং. অট্ঠানপৰিকপ্পেনাতি অকাৰণস্স ৱত্থুনো পৰিকপ্পনেন তদা অসম্ভৱন্তং অত্থং পৰিকপ্পেত্ৱা ৱচনেন. অভিণ্হদস্সনস্সাতি নিচ্চদস্সনস্স, নিযতদস্সনস্সাতি অত্থো.

উক্খিপীতি গুণতো কথিতভাৱেন উক্কংসেতি. থেৰস্সাতি আযস্মতো পুণ্ণত্থেৰস্স. ইমস্মিং ঠানে ইমস্মিং কাৰণে একপদেনেৱ সাৱকৱিসযে অনঞ্ঞসাধাৰণগুণাৱিকৰণনিমিত্তং. ইদানি তমেৱত্থং পাকটতৰং কাতুং ‘‘অমচ্চঞ্হী’’তিআদি ৱুত্তং. অপচাযমানোতি পূজযন্তো.

‘‘অনুমস্স অনুমস্স পুচ্ছিতা’’তি ৱুত্তত্তা ৱিচাৰণৱসেনাহ ‘‘কিং পন পঞ্হস্স পুচ্ছনং ভাৰিযং উদাহু ৱিস্সজ্জন’’ন্তি. সহেতুকং কত্ৱাতি যুত্তাযুত্তং কত্ৱা. সকাৰণন্তি তস্সেৱ ৱেৱচনং. পুচ্ছনম্পীতি এৱং সহধম্মেন পুচ্ছিতব্বমত্থং সযং সম্পাদেত্ৱা পুচ্ছনম্পি ভাৰিযং দুক্কৰং. ৱিস্সজ্জনম্পীতি সহধম্মেন ৱিস্সজ্জনম্পি দুক্কৰং. এৱঞ্হি ৱিস্সজ্জেন্তো ৱিঞ্ঞূনং চিত্তং আৰাধেতীতি. যথানুসন্ধিনাৱ দেসনা নিট্ঠিতাআদিতো সপৰিক্খাৰং সীলং, মজ্ঝে সমাধিং, অন্তে ৱসীভাৱপ্পত্তং পঞ্ঞং দস্সেত্ৱা দেসনায নিট্ঠাপিতত্তাতি.

ৰথৱিনীতসুত্তৱণ্ণনায লীনত্থপ্পকাসনা সমত্তা.