২. তিপুক্খলনযৱণ্ণনা

তথা ৱুত্তনযেন সৰূপতো পৰিযাযতো চ গহিতেসু তণ্হাৱিজ্জাতপ্পক্খিযধম্মেসু তণ্হা লোভো, অৱিজ্জা মোহো, অৱিজ্জায সম্পযুত্তো লোহিতে সতি পুব্বো ৱিয তণ্হায সতি সিজ্ঝমানো আঘাতো দোসো, ইতি তীহি অকুসলমূলেহি গহিতেহি, তপ্পটিপক্খতো মঞ্ঞনাপটিক্খেপপৰিঞ্ঞাগহণাদীহি চ কুসলমূলানি সিদ্ধানিযেৱ হোন্তি. ইধাপি ‘‘লোভো সব্বানি ৱা সাসৱকুসলাকুসলমূলানি সমুদযসচ্চং, তেহি নিব্বত্তা, তেসং অধিট্ঠানগোচৰভূতা চ উপাদানক্খন্ধা দুক্খসচ্চ’’ন্তিআদিনা সচ্চযোজনা ৱেদিতব্বা. ফলং পনেত্থ তযো ৱিমোক্খা, তীহি পন অকুসলমূলেহি তিৱিধদুচ্চৰিত-সংকিলেসমল-ৱিসমঅকুসল-সঞ্ঞা-ৱিতক্কাদিৱসেন অকুসলপক্খো নেতব্বো. তথা তীহি কুসলমূলেহি তিৱিধসুচৰিত-সমকুসল-সঞ্ঞা-ৱিতক্ক-সদ্ধম্ম-সমাধি-ৱিমোক্খমুখ-ৱিমোক্খা-দিৱসেন কুসলপক্খো নেতব্বোতি. অযং তিপুক্খলস্স নযস্স ভূমি.