৩. সীহৱিক্কীড়িতনযৱণ্ণনা

তথা ৱুত্তনযেন সৰূপতো পৰিযাযতো চ গহিতেসু তণ্হাৱিজ্জাতপ্পক্খিযধম্মেসু ৱিসেসতো তণ্হাদিট্ঠীনং ৱসেন অসুভে ‘‘সুভ’’ন্তি, দুক্খে ‘‘সুখ’’ন্তি চ ৱিপল্লাসা, অৱিজ্জাদিট্ঠীনং ৱসেন অনিচ্চে ‘‘নিচ্চ’’ন্তি, অনত্তনি ‘‘অত্তা’’তি চ ৱিপল্লাসা ৱেদিতব্বা. তেসং পটিপক্খতো মঞ্ঞনাপটিক্খেপপৰিঞ্ঞাগহণাদিসিদ্ধেহি সতিৱীৰিযসমাধিপঞ্ঞিন্দ্ৰিযেহি চত্তাৰি সতিপট্ঠানানি সিদ্ধানেৱ হোন্তি. তত্থ চতূহি ইন্দ্ৰিযেহি চত্তাৰো পুগ্গলা নিদ্দিসিতব্বা. কথং? দুৱিধো হি তণ্হাচৰিতো মুদিন্দ্ৰিযো তিক্খিন্দ্ৰিযোতি, তথা দিট্ঠিচৰিতো. তেসং পঠমো অসুভে ‘‘সুভ’’ন্তি ৱিপৰিযাসগ্গাহী সতিবলেন যথাভূতং কাযসভাৱং সল্লক্খেন্তো তং ৱিপল্লাসং সমুগ্ঘাটেত্ৱা সম্মত্তনিযামং ওক্কমতি. দুতিযো অসুখে ‘‘সুখ’’ন্তি ৱিপৰিযাসগ্গাহী ‘‘উপ্পন্নং কামৱিতক্কং নাধিৱাসেতী’’তিআদিনা (দী. নি. ৩.৩১০; ম. নি. ১.২৬; অ. নি. ৪.১৪, ১১৪; অ. নি. ৬.৫৮) ৱুত্তেন ৱীৰিযসংৱৰভূতেন ৱীৰিযবলেন তং ৱিপল্লাসং ৱিধমেন্তো সম্মত্তনিযামং ওক্কমতি. ততিযো অনিচ্চে ‘‘নিচ্চ’’ন্তি অযাথাৱগ্গাহী সমাধিবলেন সমাহিতচিত্তো সঙ্খাৰানং খণিকভাৱসল্লক্খণেন তং ৱিপল্লাসং সমুগ্ঘাটেন্তো অৰিযভূমিং ওক্কমতি. চতুত্থো সন্ততিসমূহকিচ্চাৰম্মণঘনৱঞ্চিততায ফস্সাদিধম্মপুঞ্জমত্তে অনত্তনি ‘‘অত্তা’’তি মিচ্ছাভিনিৱেসী চতুকোটিকসুঞ্ঞতামনসিকাৰেন তং মিচ্ছাভিনিৱেসং ৱিদ্ধংসেন্তো সামঞ্ঞফলং সচ্ছিকৰোতি.

ইধাপি সুভসঞ্ঞাসুখসঞ্ঞাহি চতূহিপি ৱা ৱিপল্লাসেহি সমুদযসচ্চং, তেসং অধিট্ঠানাৰম্মণভূতা পঞ্চুপাদানক্খন্ধা দুক্খসচ্চন্তিআদিনা সচ্চযোজনা ৱেদিতব্বা. ফলং পনেত্থ চত্তাৰি সামঞ্ঞফলানি, চতূহি চিত্তৱিপল্লাসেহি চতুৰাসৱোঘ-যোগ-কাযগন্থ-অগতি-তণ্হুপ্পাদ-সল্লুপাদান-ৱিঞ্ঞাণট্ঠিতি-অপৰিঞ্ঞাদিৱসেন অকুসলপক্খো নেতব্বো. তথা চতূহি সতিপট্ঠানেহি চতুব্বিধঝান-ৱিহাৰাধিট্ঠান-সুখভাগিযধম্ম-অপ্পমঞ্ঞা-সম্মপ্পধান-ইদ্ধিপাদা- দিৱসেন ৱোদানপক্খো নেতব্বোতি. অযং সীহৱিক্কীড়িতস্স নযস্স ভূমি.