১. নন্দিযাৱট্টনযৱণ্ণনা

‘‘সব্বধম্মমূলপৰিযায’’ন্তিআদীসু সব্বধম্মমূলগ্গহণেন মঞ্ঞনাগহণেন চ তণ্হামানদিট্ঠিযো গহিতা. মঞ্ঞনানম্পি হি মঞ্ঞনা কাৰণন্তি দস্সিতোযমত্থো. ‘‘অস্সুতৱা’’তিআদিনা অৱিজ্জামানদিট্ঠিযো গহিতা, সব্বেপি ৱা সংকিলেসধম্মা, তথা সঞ্ঞাঅপৰিঞ্ঞাতগ্গহণেন. ‘‘খীণাসৱো পৰিক্খীণভৱসঞ্ঞোজনো’’তি এত্থ পন আসৱা সঞ্ঞোজনানি চ সৰূপতো গহিতানি, তথা নন্দিগ্গহণেন তণ্হাগহণেন চ তণ্হা, এৱম্পেত্থ সৰূপতো পৰিযাযতো চ তণ্হা অৱিজ্জা তপ্পক্খিযধম্মা চ গহিতা. তত্থ তণ্হায ৱিসেসতো ৰূপধম্মা অধিট্ঠানং, অৱিজ্জায অৰূপধম্মা, তে পন সব্বধম্মগ্গহণেন পথৱীআদিগ্গহণেন চ দস্সিতা এৱ. তাসং সমথো ৱিপস্সনা চ পটিপক্খো, তেসমেত্থ গহেতব্বাকাৰো হেট্ঠা দস্সিতো এৱ. সমথস্স চেতোৱিমুত্তি ফলং, ৱিপস্সনায পঞ্ঞাৱিমুত্তি. তথা হি তা ‘‘ৰাগৱিৰাগা’’তিআদিনা ৱিসেসেত্ৱা ৱুচ্চন্তি, ইমাসমেত্থ গহণং সম্মদঞ্ঞাৱিমুত্তৱীতৰাগাদিৱচনেহি ৱেদিতব্বং. তত্থ তণ্হাৱিজ্জা সমুদযসচ্চং, তপ্পক্খিযধম্মা পন তগ্গহণেনেৱ গহিতাতি ৱেদিতব্বা. তেসং অধিট্ঠানভূতা ৱুত্তপ্পভেদা ৰূপাৰূপধম্মা দুক্খসচ্চং, তেসং অপ্পৱত্তি নিৰোধসচ্চং, নিৰোধপজাননা পটিপদা মগ্গসচ্চং. তণ্হাগহণেন চেত্থ মাযা-সাঠেয্য-মানাতিমান-মদপ্পমাদ-পাপিচ্ছতা-পাপমিত্ততা-অহিৰিকানোত্তপ্পাদিৱসেন অকুসলপক্খো নেতব্বো, অৱিজ্জাগহণেন ৱিপৰীতমনসিকাৰ-কোধূপনাহ-মক্খ-পড়াস-ইস্সা-মচ্ছৰিয- সাৰম্ভদোৱচস্সতা-ভৱদিট্ঠি-ৱিভৱদিট্ঠিআদিৱসেন অকুসলপক্খো নেতব্বো, ৱুত্তৱিপৰিযাযেন অমাযাঅসাঠেয্যাদিঅৱিপৰীতমনসিকাৰাদিৱসেন, তথা সমথপক্খিযানং সদ্ধিন্দ্ৰিযাদীনং ৱিপস্সনাপক্খিযানং অনিচ্চসঞ্ঞাদীনঞ্চ ৱসেন ৱোদানপক্খো নেতব্বোতি. অযং নন্দিযাৱট্টস্স ন যস্স ভূমি.