৭. আৱট্টহাৰৱিভঙ্গৱণ্ণনা

২৯. অকুসলানং ধম্মানং ৱিদ্ধংসনসভাৱত্তা, অকুসলানং ৱা পজহনে কুসলানং সম্পাদনে পট্ঠপনসভাৱত্তা আৰম্ভধাতু. তথাভূতাতি সীলাদীহি সমঙ্গীভূতা. কামধাতুআদিকা তিধাতুযোৱ তেধাতু. তস্স অভিভৱনতো তেধাতুইস্সৰো মচ্চুৰাজা. অনাদিমতিসংসাৰে চিৰকালং লদ্ধপতিট্ঠাপি অচিৰকালং ভাৱিতেহি কুসলেহি ধম্মেহি সমুচ্ছিন্দনীযত্তা অবলা কিলেসাতি ৱুত্তং ‘‘অবলং দুব্বল’’ন্তি. তেনাহ ‘‘অবলা নং বলীযন্তী’’তি.

ইদং ৱচনং অযং গাথাপাদো. সমাধিস্স পদট্ঠানন্তি এত্থ সমাধিস্স কাৰণং সমতানুযোগে নিযোজনতোতি যোজেতব্বং. এস নযো সেসেসুপি. পপঞ্চাতি ৰাগাদযোৱ. তথা চেৱ সংৱণ্ণিতন্তি দেসনায পদট্ঠানভাৱেনেৱ অত্থসংৱণ্ণনা কতাতি অত্থো.

ন্তি তং দেসনং. তস্সাতি সভাগাদিৱসেন আৱট্টনস্স. পৰিপক্কঞাণানং ৱিসেসাধিগমায. লাভৱিনিচ্ছযপৰিগ্গহমচ্ছৰিযানীতিআদীসু লাভোতি ৰূপাদিআৰম্মণপ্পটিলাভো. সো পৰিযেসনায সতি হোতীতি পৰিযেসনাগ্গহণেন গহিতো. ৱিনিচ্ছযোতি ‘‘এত্তকং মে ৰূপাৰম্মণত্থায ভৱিস্সতি, এত্তকং সদ্দাদিআৰম্মণত্থায, এত্তকং ময্হং, এত্তকং পৰস্স, এত্তকং পৰিভুঞ্জিস্সামি, এত্তকং নিদহিস্সামী’’তি এৱং পৱত্তো ৱিতক্কো ৱিনিচ্ছযো. সো লাপিতহেতুকত্তা পৰিযেসনমূলকতায পৰিযেসনাগ্গহণেনেৱ গহিতো, তথা পৰিগ্গহমচ্ছৰিযানি. তত্থ পৰিগ্গহো ‘‘মম ইদ’’ন্তি পৰিগ্গণ্হনং. মচ্ছৰিযং ‘‘ময্হেৱ হোতূ’’তি পৰেহি সাধাৰণভাৱাসহনং. তেনেৱস্স পোৰাণা এৱং ৱচনত্থং ৱদন্তি ‘‘ময্হেৱিদমচ্ছৰিযং হোতু, মা অঞ্ঞেসং অচ্ছৰিযং হোতূতি পৱত্তত্তা মচ্ছৰিযন্তি ৱুচ্চতী’’তি (দী. নি. অট্ঠ. ২.১০৩; অ. নি. অট্ঠ. ৩.৯.২৩). পৰিভোগত্থানং পন ৱিনিচ্ছযাদীনং পৰিভোগন্তোগধতা ৱেদিতব্বা. ছন্দৰাগো দুব্বলৰাগো. অজ্ঝোসানং ‘‘মম ইদ’’ন্তি তণ্হাৱসেন বলৱসন্নিট্ঠানন্তি আহ ‘‘ছন্দৰাগঅজ্ঝোসানা তণ্হা এৱা’’তি. আৰক্খনিমিত্তং দ্ৱাৰপিদহনমঞ্জূসাগোপনাদিনা সুট্ঠু ৰক্খণনিমিত্তং. পাপানি কৰোন্তো পৰিভোগনিমিত্তং ৰত্তো গিদ্ধো গধিতো মুচ্ছিতো হুত্ৱা মিগোৱ পৰিভুঞ্জননিমিত্তং পমাদং আপজ্জতীতি এৱং পৰিযেনাৰক্খা পৰিভোগনিমিত্তং. পমাদো তিৱিধো তণ্হায ৱসেন কথিতোতি দস্সেন্তো ‘‘তিৱিধো তণ্হাযাতি ৱুত্ত’’ন্তি আহ.

অৱিসেসেন ৱুত্তন্তি ‘‘কতমেন উপাদানেন সউপাদানা’’তি ৱিভাগেন পুচ্ছিত্ৱাপি ‘‘অৱিজ্জায চ তণ্হায চা’’তি অৱিনিব্ভুজিত্ৱা ৱুত্তং. তণ্হঞ্চ অৱিজ্জঞ্চ চতুৰুপাদানং ৱসেনাতি কামুপাদানাদীনং চতুন্নং উপাদানানং ৱসেন ৱিভজিত্ৱা খন্ধানং দুক্খভাৱেন দুক্খসচ্চভাৱেন সহ পৰিঞ্ঞেয্যভাৱং, উপাদানানং সমুদযভাৱেন সমুদযসচ্চভাৱেন সহ পহাতব্বভাৱং দস্সেতীতি যোজনা.

৩০. ‘‘যো’’তিআদিনা ৱুত্তো তিৱিধো পমাদো পৰিযেসতি, আৰক্খণঞ্চ কৰোতি, পৰিভোগনিমিত্তঞ্চাতি সম্বন্ধো. পমাদো হি পমজ্জন্তস্স পুগ্গলস্স ভোগানং পৰিযেসনায, আৰক্খণায চ হেতুভূতো কত্তুভাৱেন উপচৰিতো, পৰিভোগস্স পন নিমিত্তং. ‘‘তপ্পটিপক্খেনা’’তি পদস্স অত্থং ৱিৱৰতি ‘‘অপ্পমাদানুযোগেনা’’তি, তেন সমথভাৱং দস্সেতি. খেপনাতি খযপাপনা. ৱোদানপক্খৱিসভাগধম্মৱসেনাতি ৱোদানপক্খো চ সো পমাদস্স ৱিসভাগধম্মো চাতি ৱোদান…পে… ধম্মো, সমথো, তস্স ৱসেন.

সমথে সতীতি অধিট্ঠানভূতে ঝানে সতি, তং পাদকং কত্ৱাতি অত্থো. যা পঞ্ঞাতি নামৰূপপৰিচ্ছেদাদিৱসেন পৱত্তপঞ্ঞা. তেনাহ ‘‘অযং ৱিপস্সনা’’তি. পহীনেসূতি পহীযমানেসু.

ৱোদানপক্খন্তি আৰম্ভধাতুআদিৱোদানপক্খং নিক্খিপিত্ৱা. ৱিসভাগধম্মৱসেনাতি পমাদৱসেনেৱ. সভাগধম্মৱসেনাতি পুব্বে নিক্খিত্তস্স আৰম্ভধাতুআদিৱোদানধম্মস্স সমথাদিসভাগধম্মৱসেন.

পুন অপৰিযোদাপনিযং সিখাপ্পত্তপৰিযোদাপনং ইধাধিপ্পেতন্তি আহ ‘‘তং পন অৰহত্তেন হোতী’’তি.

মোহসমুট্ঠানতা ৱুত্তা ‘‘মোহো এৱ সমুট্ঠান’’ন্তি কত্ৱা. অঞ্ঞথা পিসুণাৱাচায দোসসমুট্ঠানতা মুসাৱাদস্স ৱিয মোহসমুট্ঠানভাৱা ৱত্তব্বা সিযা.

কম্মপথভাৱং পত্তানং, অপ্পত্তানঞ্চ অকুসলধম্মানং ‘‘সব্বপাপ’’ন্তি পদেন পৰিগ্গহিতত্তা ৱুত্তং ‘‘কম্মপথকম্মৱিভাগেনা’’তি.

৩১. সেসপদানন্তি ‘‘কুসলস্স উপসম্পদা’’তিআদীনং (দী. নি. ২.৯০; ধ. প. ১৮৩; নেত্তি. ৩০, ৫০, ১১৬, ১২৪; পেটকো. ২৯) গাথায অৱসিট্ঠপদানং. যথাধিগতন্তি অত্তনা অধিগতপ্পকাৰং, পচ্ছা ভূমিদিসা.

উপৰি যাপেন্তীতি মনুস্সলোকতো উপৰিট্ঠিমং দেৱলোকং গমেন্তি.

৩২. যথাৱুত্তস্স ধম্মস্সাতি সীলস্স চ মগ্গস্স চ. তণ্হাৱিজ্জাদীনন্তি আদিসদ্দেন তদেকট্ঠকিলেসা গয্হন্তি, তেসং পদট্ঠানধম্মা চ. সমথৱিপস্সনাদীনন্তি আদিসদ্দেন সামঞ্ঞফলানং সঙ্গহো. যদগ্গেন চেত্থ ‘‘নিৰোধো ৰক্খতী’’তি ৱুত্তো, তদগ্গেন মগ্গো ৰক্খণকিৰিযায কৰণং ৱুত্তং ‘‘যেন ৰক্খতী’’তি. ৱিসভাগধম্মৱসেন পুৰিমানি সভাগধম্মাৱট্টনৱসেন পচ্ছিমানি সচ্চানি নিদ্ধাৰিতানীতি যোজেতব্বং.

আৱট্টহাৰৱিভঙ্গৱণ্ণনা নিট্ঠিতা.