৩. যুত্তিহাৰসম্পাতৱণ্ণনা

৬৫. পটিপক্খপটিবাড়্হা কুসলা ধম্মা উপ্পজ্জিতুমেৱ ন সক্কোন্তি, উপ্পন্নাপি সম্মদেৱ অত্তনো কিচ্চং কাতুং অসমত্থতায অনুপ্পন্নসদিসাতি পটিপক্খনিৱাৰণেন কুসলানং ধম্মানং কিচ্চকৰণভাৱং দস্সেতুং ‘‘মনচ্ছট্ঠানি…পে… ভৱিস্সতী’’তি ৱুত্তং. ৱিহৰন্তস্সাতি ৱিহৰণহেতু. ৱিহৰন্তোতি এত্থাপি এসেৱ নযো, তেন ৰক্খিতচিত্ততা ৱুত্তনযেন একন্ততো সম্মাসঙ্কপ্পগোচৰতায চ সংৱত্ততীতি দস্সেতি. ৱুত্তনযেনাতি মিচ্ছাসঙ্কপ্পানং অৱসৰং অদত্ৱা ৱিসোধিতনেক্খম্মাদিৱিতক্কতায. অৱিপৰীতমেৱাতি কাযাদিঅসুভাদিতো আদানং. ৱিনিপাতভযন্তি দুগ্গতিভযং. সব্বোপি চাযমত্থোতি ‘‘সম্মাসঙ্কপ্পগোচৰো সম্মাদিট্ঠি ভৱিস্সতী’’তিআদীসু অত্থো যুত্তিযা যুত্তো এৱ অনৰূপকাৰণভাৱতো.

যুত্তিহাৰসম্পাতৱণ্ণনা নিট্ঠিতা.