১৬. সমাৰোপনহাৰৱিভঙ্গৱণ্ণনা

৫০. সুত্তেন গহিতেতি সুত্তে ৱুত্তে. পদট্ঠানগ্গহণং অধিট্ঠানৱিসযদস্সনত্থং, ৱেৱচনগ্গহণং অধিৱচনৱিভাগদস্সনত্থন্তি যোজনা. ৱিসযাধিট্ঠানভাৱতোতি ৱিসযসঙ্খাতপৱত্তিট্ঠানভাৱতো. ৱনীযতীতি ভজীযতি. ৱনতীতি ভজতি সেৱতি. ৱনুতেতি যাচতি, পত্থেতীতি অত্থো. পঞ্চ কামগুণা কামতণ্হায কাৰণং হোতি আৰম্মণপচ্চযতায. নিমিত্তগ্গাহো অনুব্যঞ্জনগ্গাহস্স কাৰণং হোতি উপনিস্সযতাযাতি এৱং সেসেসুপি যথাৰহং কাৰণতা ৱত্তব্বা.

৫১. ‘‘কাযে কাযানুপস্সী ৱিহৰাহী’’তিআদীসু যং ৱত্তব্বং, তং হেট্ঠা লক্খণহাৰৱিভঙ্গৱণ্ণনাযং (নেত্তি. অট্ঠ. ২৩) ৱুত্তনযেনেৱ ৱেদিতব্বং. অযং পন ৱিসেসো – ৰূপধম্মপৰিঞ্ঞাযাতি ৰূপূপিকৱিঞ্ঞাণট্ঠিতিপৰিঞ্ঞায.

‘‘দুক্খ’’ন্তি পস্সন্তী সা ৱেদনানুপস্সনাতি যোজেতব্বং. ৱেদনাহেতুপৰিঞ্ঞাযাতি ফস্সপৰিঞ্ঞায. ‘‘ৱেদনাৱসেনা’’তি পদেন অত্তনা উপ্পাদিতদুক্খৱসেন. ৱেদনাপৰিঞ্ঞাযাতি ৱেদনূপিকৱিঞ্ঞাণট্ঠিতিপৰিঞ্ঞায. নিচ্চাভিনিৱেসপটিপক্খতো অনিচ্চানুপস্সনাযাতি অধিপ্পাযো. নিচ্চসঞ্ঞানিমিত্তস্সাতি নিচ্চসঞ্ঞাহেতুকস্স. সঞ্ঞাপৰিঞ্ঞাযাতি সঞ্ঞূপিকৱিঞ্ঞাণট্ঠিতিপৰিঞ্ঞায. পঠমমগ্গৱজ্ঝত্তা অগতিগমনস্স ৱুত্তং ‘‘দিট্ঠাভিনিৱেসস্স…পে… অগতিগমনস্স চা’’তি.

সঙ্খাৰপৰিঞ্ঞাযাতি সঙ্খাৰূপিকৱিঞ্ঞাণট্ঠিতিপৰিঞ্ঞায.

সমাৰোপনহাৰৱিভঙ্গৱণ্ণনা নিট্ঠিতা.

নিট্ঠিতা চ হাৰৱিভঙ্গৱণ্ণনা.