১৫. পৰিক্খাৰহাৰৱিভঙ্গৱণ্ণনা

৪৯. ‘‘হিনোতী’’তি পদস্স অত্থং দস্সেন্তো ‘‘কাৰণভাৱং গচ্ছতী’’তি আহ অনেকত্থত্তা ধাতূনং. এতীতি আগচ্ছতি, উপ্পজ্জতীতি অত্থো.

অৱিজ্জাযপি হেতুভাৱেতি এত্থ অৱিজ্জা অনন্তৰায অৱিজ্জায অনন্তৰসমনন্তৰূপনিস্সযনত্থিৱিগতাসেৱনপচ্চযেহি, অনন্তৰায পন সহজাতায সহজাতঅঞ্ঞমঞ্ঞনিস্সযসম্পযুত্তঅত্থিঅৱিগতহেতুপচ্চযেহি, অসহজাতায উপনিস্সযকোটিযা এৱ পচ্চযো হোতীতি ৱেদিতব্বং. অত্তনো ফলং কৰোতীতি কাৰণন্তি আহ ‘‘কাৰণভাৱো চ ফলাপেক্খাযা’’তি.

নিব্বত্তিঅত্থো ফলত্থো ফলসঙ্খাতো অত্থো.

যো সভাৱোতি পুঞ্ঞাদিঅভিসঙ্খাৰানং যো অভিসঙ্খৰণসভাৱো, সো হেতু. সেসপদেসূতি ৱিঞ্ঞাণাদিপদেসু. যথাৱুত্তপ্পভেদোতি ‘‘অসাধাৰণলক্খণো হেতূ’’তিআদিনা ৱুত্তপ্পভেদো. যো কোচি পচ্চযোতি জনকাদিভেদং যং কিঞ্চি কাৰণং. অভিসঙ্খৰণতোতি পচ্চক্খতো, পৰম্পৰায চ নিব্বত্তনতো.

পৰিক্খাৰহাৰৱিভঙ্গৱণ্ণনা নিট্ঠিতা.