১৪. অধিট্ঠানহাৰৱিভঙ্গৱণ্ণনা

৪৬. ধাৰযিতব্বাতি উপধাৰেতব্বা, উপলক্খিতব্বাতি অত্থো. ৱুত্তমেৱ ‘‘সামঞ্ঞৱিসেসকপ্পনায ৱোহাৰভাৱেন অনৱট্ঠানতো’’তিআদিনা (নেত্তি. অট্ঠ. ১৪).

তং তং ফলন্তি নিৰযাদিং তং তং ফলং. অঞ্চিতাতি গতা. যোনীতি একজাতি. সমানৱসেন মিস্সীভৱতি এতাযাতি হি যোনি, উপপত্তি. পেচ্চাতি মৰিত্ৱা. উস্সন্নতাযাতি ৱিতক্কবহুলতায. ‘‘উস্সন্নত্তা’’তিপি ৱদন্তি. সস্সতাদীহি ৱা উস্সন্নত্তা. অসুৰজাতিযা নিব্বত্তাপনকো অসুৰজাতিনিব্বত্তনকো.

সঙ্খাতি পঞ্ঞা. পঞ্ঞাপধানা চ ভাৱনাতি আহ ‘‘পটিসঙ্খায পটিপক্খভাৱনাযা’’তি.

৪৭. পত্থটভাৱেন পথৱী. সভাৱধাৰণট্ঠেন, নিস্সত্তনিজ্জীৱট্ঠেন চ ধাতু. আপীযতি, অপ্পাযতীতি ৱা আপো. তেজনৱসেন তিক্খতাৱসেন, দহনৱসেন ৱা তেজো. ৱাযনৱসেন ৱেগগমনৱসেন, সমুদীৰণৱসেন ৱা ৱাযো. ৱীসতি আকাৰাতি কেসাদযো ৱীসতি কোট্ঠাসা, পকাৰা ৱা. কক্খড়লক্খণাধিকতায কেসাদী কক্খড়লক্খণা ৱুত্তা.

পাটিযেক্কো পথৱীধাতুকোট্ঠাসোতি পথৱীকোট্ঠাসমত্তো, অত্তসুঞ্ঞধম্মমত্তোতি অত্থো. সন্তপ্পতীতি এত্থ সৰীৰপকতিমতিক্কমিত্ৱা উণ্হভাৱো সন্তাপো, সৰীৰদহনৱসেন পৱত্তো মহাদাহো, অযমেতেসং ৱিসেসো. যেন চ জীৰীযতীতি একাহিকাদিজৰাৰোগেন জৰীযতীতি চ অত্থো যুজ্জতি. ‘‘সতৱাৰং তাপেত্ৱা তাপেত্ৱা উদকে পক্খিপিত্ৱা উদ্ধটসপ্পি সতধোতসপ্পী’’তি ৱদন্তি. ৰসৰুধিৰমংসমেদন্হাৰুঅট্ঠিঅট্ঠিমিঞ্জা ৰসাদযো. কেচি ন্হাৰুং অপনেত্ৱা সুক্কং সত্তমং ধাতুং ৱদন্তি. ৱিৱেকন্তি ৱিসুংভাৱং, ৱিসদিসভাৱন্তি অত্থো. ৱত্থুসঙ্খাতো হি আহাৰো পৰিণামং গচ্ছন্তো পাণভক্খগহণিপদনিয মুত্তকৰীসভাৱেহি ৱিয অত্তনাপি ৱিসদিসৰসসঙ্খাতং ৱিসুংভাৱং নিব্বত্তেন্তো তব্ভাৱং গচ্ছতীতি ৱুচ্চতি, তথা ৰসাদযোপি ৰুধিৰাদিকোট্ঠাসং. তেনাহ ‘‘ৰসাদিভাৱেন ৱিৱেকং গচ্ছতী’’তি.

সভাৱলক্খণতোতি অসুচিভাৱেন লক্খিতব্বতো.

৪৮. যাথাৱসৰসলক্খণন্তি ৰসিতব্বোতি ৰসো, পটিৱিজ্ঝিতব্বো সভাৱো, অত্তনো ৰসো সৰসো, যাথাৱো সৰসো, যাথাৱসৰসো যাথাৱসৰসো এৱ লক্খিতব্বত্তা লক্খণন্তি যাথাৱসৰসলক্খণং. অথ ৱা যাথাৱসৰসলক্খণন্তি অৱিপৰীতং অত্তনো পৱত্তিসঙ্খাতং কিচ্চঞ্চেৱ পীড়নসঙ্খাতং লক্খণঞ্চ. ‘‘ইদং কিচ্চং, ইদং লক্খণ’’ন্তি অৱিজ্জাহেতু ঞাতুং ন সক্কোতি, তব্বিসযঞাণুপ্পত্তিং নিৱাৰেন্তী ছাদেত্ৱা পৰিযোনন্ধিত্ৱা তিট্ঠতীতি ৱুত্তা. তেন ৱুত্তং ‘‘জানিতুং পটিৱিজ্ঝিতুং ন দেতী’’তি. তযিদমস্সা কিচ্চন্তি কিচ্চতো কথিতা. কথিতাতি চ ৱুত্তা, যতো চ অৱিজ্জা অসম্পটিৱেধৰসাতি ৱুচ্চতি. জাযতি এত্থাতি জাতি, উপ্পত্তিট্ঠানং. যদিপি নিৰোধমগ্গে অৱিজ্জা আৰম্মণং ন কৰোতি, তে পন জানিতুকামস্স তপ্পটিচ্ছাদনৱসেন অনিৰোধমগ্গেসু নিৰোধমগ্গগ্গহণস্স কাৰণভাৱেন পৱত্তমানা তত্থ উপ্পজ্জতীতি ৱুচ্চতি, তেসম্পি অৱিজ্জায উপ্পত্তিট্ঠানতা হোতি, ইতৰেসং আৰম্মণভাৱেন চাতি.

অত্থানত্থন্তি হিতাহিতং. সম্মোহৱিনোদনিযং পন ‘‘অত্থত্থ’’ন্তি (ৱিভ. অট্ঠ. ২২৬) ৱুত্তং, তত্থ অত্থো এৱ অত্থত্থোতি অত্থস্স অৱিপৰীততাদস্সনত্থং দুতিযেন অত্থসদ্দেন ৱিসেসনং. ন হি ঞাণং অনত্থে ‘‘অত্থো’’তি গণ্হাতীতি. কাৰণাকাৰণন্তি এত্থাপি এৱং দট্ঠব্বং. অত্থত্থন্তি ৱা আমেডিতৱচনং সব্বেসং অত্থানং পাকটকৰণভাৱপ্পকাসনত্থং, ফলং ফলন্তি অত্থো, হিতপৰিযাযেপি এসেৱ নযো. ন্তি অত্থানত্থাদিকং. আকাৰন্তি অত্থাদিকাৰণমেৱ.

পটিৱিদ্ধস্স পুন অৱেক্খনা পচ্চৱেক্খণা. দুচিন্তিতচিন্তিতাদিলক্খণস্স বালস্স ভাৱো বাল্যং. সম্পজানাতীতি সমং পকাৰেহি জানাতি. বলৱমোহো পমোহো. সমন্ততো মোহনং সম্মোহো. দুগ্গতিগামিকম্মস্স ৱিসেসপচ্চযত্তা অৱিন্দিযং. ৱিন্দতীতি লভতি. অনৱজ্জধম্মানং ৱিজ্জা ৱিয ৱিসেসপচ্চযো ন হোতীতি ৱিন্দিযং ন ৱিন্দতি. অযং অৱিজ্জায ৱেমত্ততাতি অযং ‘‘দুক্খে অঞ্ঞাণ’’ন্তিআদিনা কিচ্চজাতিলক্খণেহি ৱুত্তো অৱিজ্জায অৱিসেসো. ৱিজ্জাতিআদীনং ৱুত্তনযানসাৰেন অত্থো ৱেদিতব্বো.

পাসাণসক্খৰৱালিকাৱিৰহিতা ভূমি সণ্হাতি ‘‘সণ্হট্ঠেনা’’তি ৱুত্তং.

তত্তকমেৱ কালন্তি পঞ্চকপ্পসতানি. ৱিভূতং সমত্তিক্কন্তং ৰূপসঞ্ঞাসঙ্খাতং ৰূপং এতাযাতি ৱিভূতৰূপং, সমাপত্তিন্তি পদত্থো. ন হি কাচি অৰূপসমাপত্তি ৰূপসঞ্ঞাসহগতা পৱত্তীতি. নিৰোধসমাপত্তিযং ৱত্তব্বমেৱ নত্থি, তত্থ নেৱসঞ্ঞানাসঞ্ঞাযতনসমাপত্তিযা ৱিসুং গহিতত্তা ৱুত্তং ‘‘সেসাৰুপ্পসমাপত্তিযো’’তি.

দমথং অনুপগচ্ছন্তো দুট্ঠস্সো খলুঙ্কস্সো. উত্তৰিদমথাযাতি অৰিযমগ্গদমথায.

ইতৰোতি দুক্খাপটিপদো খিপ্পাভিঞ্ঞো, সুখাপটিপদো চ খিপ্পাভিঞ্ঞো. উভযতোভাগেহীতি ৰূপকাযনামকাযভাগেহি. উভযতোতি ৱিক্খম্ভনসমুচ্ছেদৱিমুত্তিৱসেন.

অনেকোপীতি সভাৱেন অনেকোপি. একসদ্দাভিধেয্যতাযাতি সামঞ্ঞসদ্দাভিধেয্যতায.

অধিট্ঠানহাৰৱিভঙ্গৱণ্ণনা নিট্ঠিতা.