১২. ওতৰণহাৰৱিভঙ্গৱণ্ণনা

৪২. ইন্দ্ৰিযেহীতি কৰণে কৰণৱচনং ‘‘মগ্গেন গচ্ছতী’’তিআদীসু ৱিয, ‘‘ফৰসুনা ছিন্দতী’’তি এৱমাদীসু ৱিয চ. ওতৰণাতি অনুপ্পৱেসনা.

পঞ্ঞাক্খন্ধে সঙ্গণ্হনৱসেন সম্মাসঙ্কপ্পো ৱিযাতি যোজনা. অধিচিত্তঅনুযুত্তানং সদ্দহনুস্সহনুপট্ঠানসমাদহনেহি সদ্ধাদীসু উপকৰোন্তেসু এৱ পঞ্ঞা দস্সনকিচ্চং সাধেতীতি দস্সেন্তো ‘‘সদ্ধা..পে… ৱুত্তানী’’তি আহ. নো চ ভৱঙ্গাতি তেসং সঙ্খাৰানং পৱত্তিকাৰণতাভাৱং দস্সেতি.

৪৩. তথা ৱুত্তোতি ‘‘নিস্সযো’’তি ৱুত্তো. চেতনাসীসেন তণ্হং এৱ ৱদতি চেতনাসহচৰণতো.

ৰত্তস্সাতি মগ্গেন অসমুচ্ছিন্নৰাগস্স. যেন পুগ্গলো ‘‘ৰত্তো’’তি ৱুচ্চতি, তস্স ৰাগস্স সম্বন্ধিনী সুখা ৱেদনা ৱুত্তা তত্থ তস্স অনুসযনতো. তেনাহ ‘‘সুখায…পে… ৱুত্ত’’ন্তি. এস নযো সেসেসুপি. তেনাহ ‘‘তথা’’তিআদি.

তানি এৱ ইন্দ্ৰিযানীতি সুখসোমনস্সুপেক্খিন্দ্ৰিযানি. ‘‘সঙ্খাৰপৰিযাপন্নানী’’তি ৱচনং সন্ধাযাহ ‘‘ইধ ৱেদনাসীসেন চেতনা ৱুত্তা’’তি. ন হি ৱেদনা সঙ্খাৰক্খন্ধপৰিযাপন্না হোতি. তণ্হায, দিট্ঠিযাতি চ উপযোগে কৰণৱচনন্তি দস্সেন্তো ‘‘তণ্হাযা’’তিআদিমাহ. ইদানি উপযোগৱসেনেৱ ‘‘তণ্হাযা’’তিআদীনং অত্থং দস্সেতুং ‘‘যথা ৱা’’তিআদিমাহ. তত্থ সেসধম্মানন্তি তণ্হাৱজ্জিতঅৱিসিট্ঠধম্মানং. তণ্হায নিস্সযভাৱেতি যদা তণ্হা তেসং নিস্সযো হোতি.

তণ্হায সেসধম্মানং পচ্চযভাৱেতি যদা সেসধম্মা তণ্হাপচ্চযা হোন্তি. ‘‘কৰজকাযসন্নিস্সিতা’’তি ইমিনা ৱেদনাদিক্খন্ধত্তযনিস্সিতাপি গহিতা কাযপ্পস্সদ্ধিভাৱতো. কাৰণভাৱন্তি পৰম্পৰহেতুভাৱং. তণ্হাদিট্ঠিউপযেনাতি দিট্ঠিউপযেন চ দিট্ঠিসহগততণ্হাউপযেন চ.

‘‘আগতীতি ইধাগতি, গতীতি পেচ্চভৱো’’তি পদদ্ৱযেন ৱুত্তমেৱত্থং পাকটতৰং কাতুং পাড়িযং ‘‘আগতিগতীপি ন ভৱন্তী’’তি ৱুত্তং. ইধ হুৰন্তি দ্ৱাৰাৰম্মণধম্মা দস্সিতা আসন্নদূৰভাৱেহি দ্ৱাৰাৰম্মণেহি ৱিনিৱত্তেত্ৱা গহিতত্তা. ইধ দ্ৱাৰপ্পৱত্তধম্মা ‘‘উভযমন্তৰেনা’’তি পদস্স অত্থভাৱেন ৱুত্তা. চতুব্যূহহাৰে পন অনিন্দ্ৰিযবদ্ধৰূপধম্মা তথা ৱুত্তা. কাৰণভূতেন অনন্তৰপচ্চযভূতেন, উপনিস্সযপচ্চযভূতেন চ. যে ধম্মা উপাদায ‘‘অত্তা’’তি সমঞ্ঞা, তেসং ৱিঞ্ঞাণাদিধম্মানং অভাৱেন অনুপ্পাদধম্মতং আপাদিতত্তাতি অত্থো. ‘‘অনিস্সিতস্স চলিতং নত্থী’’তিআদিনা পটিলোমতো পচ্চযভাৱো দস্সিতোতি দস্সেন্তো পাড়িযং ‘‘এসেৱন্তো দুক্খস্সাতি পটিচ্চসমুপ্পাদো’’তি ৱত্ৱা ননু ‘‘অৱিজ্জাপচ্চযা সঙ্খাৰা’’তিআদিকো পটিচ্চসমুপ্পাদোতি চোদনং সন্ধায যথাৱুত্তস্স পটিচ্চসমুপ্পাদভাৱং দস্সেতুং ‘‘সো দুৱিধো’’তিআদিনা লোকিযলোকুত্তৰৱসেন পটিচ্চসমুপ্পাদো ৱিভত্তো. তদত্থতাযাতি ৱীতৰাগৱিমুত্তিঅত্থতায. তব্ভাৱন্তি লোকুত্তৰপটিচ্চসমুপ্পাদভাৱং.

ওতৰণহাৰৱিভঙ্গৱণ্ণনা নিট্ঠিতা.