৮. সহধম্মিকৱগ্গো

৪. পহাৰসিক্খাপদৱণ্ণনা

অঙ্গেসু ন মোক্খাধিপ্পাযতা ৱিয অমৰণাধিপ্পাযতা ৱত্তব্বাতি চে? ন ৱত্তব্বা. কস্মা? যো ভিক্খু সযং পহাৰং দাতুকামো, সো অধিপ্পাযেন তস্স মৰণে পযোগৱিৰহোৱাতি কত্ৱা অমৰণাধিকাৰত্তা কেৱলং অমৰণাধিপ্পাযো এৱ সোতি তা ৱিয তা ন ৱুত্তা. মোক্খাধিপ্পাযস্স পন কোপো নত্থি, তস্মা অনাপত্তীতি ৱুত্তং.

পহাৰসিক্খাপদৱণ্ণনা নিট্ঠিতা.

৫. তলসত্তিকসিক্খাপদৱণ্ণনা

তলমেৱ তলসত্তিকং. ‘‘পোথনসমত্থট্ঠেন সত্তিক’’ন্তি একে. যস্মা পহৰিতুকামতায পহৰতো পুৰিমেন পাচিত্তিযং, কেৱলং উচ্চাৰেতুকামতায উগ্গিৰণমত্তে কতে ইমিনা পাচিত্তিযং. ইমিনা পন ৱিৰজ্ঝিত্ৱা পহাৰো দিন্নো, তস্মা নপহৰিতুকামতায দিন্নত্তা দুক্কটং. কিমিদং দুক্কটং পহাৰপচ্চযা, উদাহু উগ্গিৰণপচ্চযাতি? পহাৰপচ্চযা এৱ দুক্কটং, পুৰিমং উগ্গিৰণপচ্চযা পাচিত্তিযন্তি সদুক্কটং পাচিত্তিযং যুজ্জতি. পুৰিমঞ্হি উগ্গিৰণং, পচ্ছা পহাৰো. ন চ পচ্ছিমং পহাৰং নিস্সায পুৰিমং উগ্গিৰণং অনাপত্তিৱত্থুকং ভৱিতুমৰহতীতি নো তক্কোতি (ৱজিৰ. টী. পাচিত্তিয ৪৫৬) আচৰিযো.

তলসত্তিকসিক্খাপদৱণ্ণনা নিট্ঠিতা.

৭. সঞ্চিচ্চসিক্খাপদৱণ্ণনা

পৰো কুক্কুচ্চং উপ্পাদেতু ৱা, মা ৱা, তং অপ্পমাণং. ‘‘কুক্কুচ্চুপাদন’’ন্তি ততিযমঙ্গং তস্স অধিপ্পাযৱসেন ৱুত্তন্তি ৱেদিতব্বং.

সঞ্চিচ্চসিক্খাপদৱণ্ণনা নিট্ঠিতা.

৮. উপস্সুতিসিক্খাপদৱণ্ণনা

উপস্সুতিন্তি যথা উপকুজ্ঝং ‘‘সমীপকুজ্ঝ’’ন্তি ৱুচ্চতি, তথা উপস্সুতি ‘‘সমীপস্সুতী’’তি ৱেদিতব্বা. যত্থ ঠিতো সুণাতি, তং ঠানন্তি অত্থো. সুতীতি পনেত্থ পৰেসং ৱচনসদ্দো চ. সো হি সুয্যতীতি সুতি নাম. উপসুয্যতি ৱা এত্থাতি উপস্সুতি. ওকাসো হি সুতি নাম. ইমেসং সুত্ৱাতি এত্থ ‘‘ৱচন’’ন্তি পাঠসেসো.

সমুট্ঠানাদীনি অতীতদ্ৱযসদিসানীতি ন গহেতব্বানি. থেয্যসত্থসমুট্ঠানং. সিযা কিৰিযং গন্ত্ৱা সৱনে. সিযা অকিৰিযং ঠিতট্ঠানং আগন্ত্ৱা ৱদন্তানং অজানাপনৱসেন সমুট্ঠানতো. ‘‘সঞ্ঞাৱিমোক্খং, সচিত্তকং, লোকৱজ্জং, কাযকম্মং, ৱচীকম্মং, অকুসলচিত্তং, দুক্খৱেদন’’ন্তি লিখিতং.

উপস্সুতিসিক্খাপদৱণ্ণনা নিট্ঠিতা.

৯. কম্মপ্পটিবাহনসিক্খাপদৱণ্ণনা

অপ্পমত্তকৱিস্সজ্জনকেন পন চীৱৰং কৰোন্তস্স সেনাসনক্খন্ধকৱণ্ণনাযং (চূড়ৱ. ৩২৮) ৱুত্তপ্পভেদানি সূচিআদীনি অনপলোকেত্ৱাপি দাতব্বানি. ততো অতিৰেকং দেন্তেন অপলোকনকম্মং কাতব্বং. এৱং কতং পন অপলোকনং কম্মলক্খণমেৱাতি অধিপ্পাযো. এৱং সব্বত্থ কম্মলক্খণং ৱেদিতব্বং. গামসীমাৱিহাৰেসু ওসাৰণাদীনি সঙ্ঘকম্মানিযেৱ ন ৱট্টন্তি. ৱিস্সজ্জিযৱেভঙ্গিযানি পন ৱট্টন্তি. ‘‘সঙ্ঘস্স সন্তক’’ন্তি সামঞ্ঞতো অৱত্ৱা ‘‘ইমস্মিং ৱিহাৰে সঙ্ঘস্স সন্তক’’ন্তি অপলোকেতব্বন্তি চ, ‘‘সমুট্ঠানাদীনি অদিন্নাদানসদিসানি, ইদং পন দুক্খৱেদন’’ন্তি পাঠোতি চ লিখিতং.

কম্মপ্পটিবাহনসিক্খাপদৱণ্ণনা নিট্ঠিতা.

১০. ছন্দংঅদত্ৱাগমনসিক্খাপদৱণ্ণনা

সন্নিপাতং অনাগন্ত্ৱা চে ছন্দং ন দেতি, অনাপত্তীতি একে. দুক্কটন্তি একে ধম্মকম্মন্তৰাযকৰণাধিপ্পাযত্তা.

ছন্দংঅদত্ৱাগমনসিক্খাপদৱণ্ণনা নিট্ঠিতা.

১১. দুব্বলসিক্খাপদৱণ্ণনা

অকপ্পিযেন ৱাতি সুৱণ্ণৰজতমযমঞ্চাদিনা. কপ্পিযমঞ্চো সম্পটিচ্ছিতব্বোতি ‘‘সঙ্ঘস্স দেমা’’তি দিন্নং সন্ধায ৱুত্তং, তেহি পন ‘‘ৱিহাৰস্স দেমা’’তি ৱুত্তে সুৱণ্ণৰজতমযাদিঅকপ্পিযমঞ্চাপি সম্পটিচ্ছিতব্বাতি চ, ‘‘অৰঞ্জৰো বহুউদকগণ্হনকো’’তি চ, ‘‘সঙ্ঘিকপঅভোগেন ৱাতি সচে আৰামিকাদযো পটিসামেত্ৱা পটিদেন্তি, পৰিভুঞ্জিতুং ৱট্টতী’’তি চ, ‘‘কংসলোহাদিভাজনং সঙ্ঘস্স দিন্নম্পি পাৰিহাৰিযং ন ৱট্টতী’’তি (চূড়ৱ. অট্ঠ. ৩২১) সমন্তপাসাদিকাযং ৱুত্তত্তা অত্তনো হত্থেন গহেত্ৱা পটিসামিতুং ন লভতীতি চ, ‘‘ৱেধকো কাযবন্ধনস্সাতি ৱদন্তী’’তি চ, ‘‘হিঙ্গু হিঙ্গুলিহৰিতালমনোসিলা অঞ্জনানী’’তি পাঠোতি চ, ‘‘দাৰুমযো ৱা…পে… অপাদকোপি সমুগ্গো’’তি পাঠোতি চ, ‘‘দাৰুমযো তুম্বোতি দাৰুমযো উদকতুম্বো’’তি চ, ‘‘থম্ভতুলাসোপানফলকাদীসূ’’তি চ লিখিতং.

দুব্বলসিক্খাপদৱণ্ণনা নিট্ঠিতা.

১২. পৰিণামনসিক্খাপদৱণ্ণনা

একো ভিক্খু উক্খিত্তকস্স দাতুকামো হোতি, তস্স দানং নিৱাৰেত্ৱা অঞ্ঞস্স দাপেতি, অনাপত্তি. তথা সদ্ধাদেয্যৱিনিপাতনং কৰোন্তস্স দাপেতি, অত্তনো নিস্সিতকা ইত্থন্নামস্স পত্তং দাতুকামা আপুচ্ছন্তি, ‘‘ৱিসভাগো এসো, সভাগস্স দেহী’’তি ৱদতি. অনাপত্তি অত্তনো ভাৰভূতত্তা. তস্স পন দাতুকামং অঞ্ঞস্স দাপেতি, আপত্তি এৱ. সব্বত্থ আপুচ্ছিত্ৱা দাতুকামং যথাসুখং ৱিচাৰেতুং লভতি.

পৰিণামনসিক্খাপদৱণ্ণনা নিট্ঠিতা.

সহধম্মিকৱগ্গো অট্ঠমো.