৯. ৰতনৱগ্গো

১. অন্তেপুৰসিক্খাপদৱণ্ণনা

অসযনিঘৰেতি পৰিক্খিত্তস্স বহিভূতেসু ৰুক্খমূলাদীসু. ‘‘সচে খত্তিযোৱ হোতি, নাভিসিত্তো, অভিসিত্তোৱ হোতি, ন খত্তিযো, ৰক্খতী’’তি আচৰিযো ‘‘খত্তিযতা, অভিসিত্ততা’’তি আপত্তিযা অঙ্গভাৱেন ৱুত্তত্তা. সমুট্ঠানাদীনি পঠমকথিনসদিসানি, ইদং পন কিৰিযাকিৰিয’’ন্তি পাঠো.

অন্তেপুৰসিক্খাপদৱণ্ণনা নিট্ঠিতা.

২. ৰতনসিক্খাপদৱণ্ণনা

সব্বোপি কথামগ্গো ভণ্ডাগাৰিকসীসেন নিক্খিপনং, গোপনঞ্চ পটিক্খিপিত্ৱা পৱত্তো.

ৰতনসিক্খাপদৱণ্ণনা নিট্ঠিতা.

৩. ৱিকালগামপ্পৱেসনসিক্খাপদৱণ্ণনা

‘‘সন্তং ভিক্খু’’ন্তি চ ‘‘অনাপুচ্ছা’’তি চ ‘‘তথাৰূপা অচ্চাযিকাতি চ ইমাতি এত্থ তিস্সো’’তি পাঠো. ‘‘সমুট্ঠানাদীনি কথিনসদিসানি, ইদং পন কিৰিযাকিৰিয’’ন্তি পাঠো.

ৱিকালগামপ্পৱেসনসিক্খাপদৱণ্ণনা নিট্ঠিতা.

৪. সূচিঘৰসিক্খাপদৱণ্ণনা

তং অস্সাতি তং ভেদনকং অস্স পাচিত্তিযস্স অত্থি পঠমং ভেদনং কত্ৱা পচ্ছা দেসেতব্বত্তা. এস নযো ইতৰেসুপি. ৱাসিজটেতি ৱাসিদণ্ডকে.

সূচিঘৰসিক্খাপদৱণ্ণনা নিট্ঠিতা.

৫. মঞ্চপীঠসিক্খাপদৱণ্ণনা

অট্ঠঙ্গুলপাদকন্তি ভাৱনপুংসকং. তুলাসঙ্ঘাতে ঠপনমেৱ অট্টকৰণং.

মঞ্চপীঠসিক্খাপদৱণ্ণনা নিট্ঠিতা.

৬. তূলোনদ্ধসিক্খাপদৱণ্ণনা

কিঞ্চাপি পটিলাভেযেৱ পাচিত্তিযং ৱিয দিস্সতি, পৰিভোগে এৱ পন আপত্তি দট্ঠব্বা. ‘‘অঞ্ঞেন কতং পটিলভিত্ৱা পৰিভুঞ্জতি, আপত্তি দুক্কটস্সা’’তি (পাচি. ৫২৯) ৱচনং এত্থ সাধকং.

তূলোনদ্ধসিক্খাপদৱণ্ণনা নিট্ঠিতা.

৭. নিসীদনসিক্খাপদৱণ্ণনা

কিঞ্চাপি নিসীদনস্স জাতি ন দিস্সতি এত্থ, তথাপি চীৱৰক্খন্ধকে অনুঞ্ঞাতত্তা, ‘‘নৱ চীৱৰানি অধিট্ঠাতব্বানী’’তি এত্থ চ পৰিযাপন্নত্তা চীৱৰজাতি এৱস্স জাতীতি ৱেদিতব্বং. ‘‘লাভে সদসং, অলাভে অদসম্পি ৱট্টতী’’তি একে, তং ন যুত্তং ‘‘নিসীদনং নাম সদসং ৱুচ্চতী’’তি (পাচি. ৫৩১-৫৩২) তস্স সণ্ঠাননিযমনতো.

নিসীদনসিক্খাপদৱণ্ণনা নিট্ঠিতা.

ৰতনৱগ্গো নৱমো.

সুদ্ধপাচিত্তিযৱণ্ণনা নিট্ঠিতা.