২. গণভোজনসিক্খাপদৱণ্ণনা

দেৱদত্তো কালে ৱিঞ্ঞাপেত্ৱা ভুঞ্জতি, তপ্পচ্চযা ভগৱতা ‘‘গণভোজনে পাচিত্তিয’’ন্তি (পাচি. ২০৯) সিক্খাপদং পঞ্ঞত্তং. পদভাজনে পন ‘‘নিমন্তিতা ভুঞ্জন্তী’’তি (পাচি. ২১৮) নিমন্তনমেৱ গহেত্ৱা ৱিভত্তং. অন্ধকট্ঠকথাযং পন ৱত্থুৱসেন ৱিঞ্ঞত্তিযা যাচনম্পি ৱুত্তন্তি লিখিতং. কস্মা? পৰিৱাৰে এৱ ‘‘গণভোজনং দ্ৱীহাকাৰেহি পসৱতি ৱিঞ্ঞত্তিতো ৱা নিমন্তনতো ৱা’’তি (পৰি. ৩২২) ৱুত্তত্তা. তস্মা অট্ঠুপ্পত্তিযংযেৱ পাকটত্তা পদভাজনে ন ৱুত্তন্তি ৱেদিতব্বং. ‘‘‘একতো গণ্হন্তী’তি চ গহিতভত্তাপি অঞ্ঞে যাৱ গণ্হন্তি, তাৱ চে তিট্ঠন্তি, একতো গণ্হন্তি এৱ নামা’’তি চ, ‘‘যো কোচি পব্বজিতোতি সহধম্মিকেসু, তিত্থিযেসু ৱাতি অত্থো’’তি চ, ‘‘সমযাভাৱোতি সত্তন্নং অনাপত্তিসমযানং অভাৱো’’তি চ, ‘‘সমযলদ্ধকেন সহ চত্তাৰো হোন্তী’’তি চ, ‘‘সমযলদ্ধকো সযমেৱ মুচ্চতি, সেসানং গণপূৰকত্তা আপত্তিকৰো হোতী’’তি চ লিখিতং.

এত্থাহ – ‘‘পটিগ্গহণমেৱ হেত্থ পমাণ’’ন্তি ৱুত্তং, অথ কস্মা পাড়িযং ‘‘গণভোজনং নাম যত্থ চত্তাৰো…পে… ভুঞ্জন্তী’’তি (পাচি. ২১৮) ৱুত্তন্তি? ৱুচ্চতে – তত্থ ‘‘ভুঞ্জন্তী’’তি পটিগ্গহণনিযমৱচনং. ন হি অপ্পটিগ্গহিতকং ভিক্খূ ভুঞ্জন্তীতি.

গণভোজনসিক্খাপদৱণ্ণনা নিট্ঠিতা.