৫. সঞ্চৰিত্তসিক্খাপদৱণ্ণনা

অলংৱচনীযাতি ন ৱচনীযা, নিৱাৰণে অলং-সদ্দো, ন অলংৱচনীযা নালংৱচনীযা. ‘‘পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্সা’’তি (পাৰা. ৩০৫) ৱুত্তত্তা যস্স একন্তেন সঙ্ঘাদিসেসো হোতি, তস্স পটিগ্গণ্হনৱীমংসনপযোগা এতে দুক্কটথুল্লচ্চযা নত্থীতি ৱদন্তীতি লিখিতং. কিঞ্চাপি এত্থ ‘‘ইত্থী নাম মনুস্সিত্থী, ন যক্খী ন পেতী ন তিৰচ্ছানগতা. পুৰিসো নাম মনুস্সপুৰিসো, ন যক্খো ন পেতো ন তিৰচ্ছানগতো’’তি পাড়ি নত্থি, তথাপি কাযসংসগ্গাদীসু ‘‘মাতুগামো নাম মনুস্সিত্থী’’তি (পাৰা. ২৮৫) ইত্থিৱৱত্থানস্স কতত্তা ইধাপি মনুস্সিত্থী এৱাতি পঞ্ঞাযতি. মেথুনপুব্বভাগসামঞ্ঞতো ইত্থিৱৱত্থানেন পুৰিসৱৱত্থানং কতমেৱ হোতি. তেনেৱাহ ‘‘যেসু সঞ্চৰিত্তং সমাপজ্জতি, তেসং মনুস্সজাতিকতা’’তি (কঙ্খা. অট্ঠ. সঞ্চৰিত্তসিক্খাপদৱণ্ণনা). কাযসংসগ্গাদীসু চ পণ্ডকযক্খিপেতিযো থুল্লচ্চযৱত্থুকাৱ ৱুত্তা, তথা ইধাপি, পণ্ডকসভাৱত্তা মনুস্সউভতোব্যঞ্জনকো চ থুল্লচ্চযৱত্থুকোৱ হোতি. সেসা মনুস্সপুৰিসঅমনুস্সপণ্ডকউভতোব্যঞ্জনকতিৰচ্ছানগতপুৰিসাদযো দুক্কটৱত্থুকাৱ মিচ্ছাচাৰদস্সনসভাৱতোতি ৱেদিতব্বং.

সঞ্চৰিত্তসিক্খাপদৱণ্ণনা নিট্ঠিতা.