৬. কুটিকাৰসিক্খাপদৱণ্ণনা

কিং ভন্তেতি এত্তকেপি ৱুত্তে. পুচ্ছিতো যদত্থায পৱিট্ঠো, তং কথেতুং লভতি পুচ্ছিতপঞ্ঞত্তা ভিক্খাচাৰৱত্তেতি লিখিতং. হত্থকম্মং যাচিতো ‘‘উপকৰণং, মূলং ৱা দস্সতী’’তি যাচতি, ৱট্টতি, ন ৱট্টতীতি? ৱট্টতি সেনাসনে ওভাসপৰিকথাদীনং লদ্ধত্তাতি একে. তিহত্থা ৱাতি এত্থ ৱড্ঢকিহত্থেন তিহত্থা. ‘‘পমাণযুত্তো মঞ্চোতি পকতিৱিদত্থিযা নৱৱিদত্থিপ্পমাণমঞ্চো, সো তত্থ ইতো চ ন সঞ্চৰতি, তস্মা চতুহত্থৱিত্থাৰা ন হোতী’’তিআদি লিখিতং. অকুটিযা পন ৱত্থুদেসনাকিচ্চং নত্থি উল্লিত্তাৱলিত্তং কাতুং ৱুত্তত্তা. ‘‘উল্লিত্তাদিভাৱো…পে… ‘ছদনমেৱ সন্ধায ৱুত্তো’তি যুত্তমিদং. কস্মাতি চে? যস্মা মত্তিকামযভিত্তিং উট্ঠাপেত্ৱা উপৰি উল্লিত্তং ৱা অৱলিত্তং ৱা উভযং ৱা ভিত্তিযা ঘটিতং কৰোন্তস্স আপত্তি এৱ ৱিনাপি ভিত্তিলেপেনা’’তি লিখিতং. এৱমেত্থ থম্ভতুলাপিট্ঠসঙ্ঘাটাদি নিৰত্থকং সিযা. তস্মা ৱিচাৰেত্ৱাৱ গহেতব্বং. ‘‘উপোসথাগাৰম্পি ভৱিস্সতি, অহম্পি ৱসিস্সামী’’তি ৱা ‘‘ভিক্খূহি ৱা সামণেৰেহি ৱা একতো ৱসিস্সামী’’তি ৱা কৰোন্তস্স ৱট্টতি এৱ. কস্মা? ‘‘অত্তুদ্দেস’’ন্তি ৱুত্তত্তাতি লিখিতং.

ইদং পন সিক্খাপদং চতুত্থপাৰাজিকং ৱিয নিদানাপেক্খং. ন হি ৱগ্গুমুদাতীৰিযা ভিক্খূ সযমেৱ অত্তনো অসন্তং উত্তৰিমনুস্সধম্মং মুসাৱাদলক্খণং পাপেত্ৱা ভাসিংসু. অঞ্ঞমঞ্ঞঞ্হি তে উত্তৰিমনুস্সধম্মৱণ্ণং ভাসিংসু. ন চ তাৱতা পাৰাজিকৱত্থু হোতি, তত্তকেন পন লেসেন ভগৱা তং ৱত্থুং নিদানং কত্ৱা পাৰাজিকং পঞ্ঞপেসি, তথা ইধাপি. ন হি নিদানে ‘‘অদেসিতৱত্থুকাযো সাৰম্ভাযো অপৰিক্কমনাযো’’তি ৱুত্তং. ‘‘অপ্পমাণিকাযো’’তি পন ৱুত্তত্তা পমাণমতিক্কমন্তস্স সঙ্ঘাদিসেসোৱ নিদানাপেক্খো. তত্থ সাৰম্ভে অপৰিক্কমনে সঙ্ঘাদিসেসপ্পসঙ্গং ৱিয দিস্সমানং ‘‘ৱিভঙ্গো তংনিযমকো’’তি ৱুত্তত্তা ৱিভঙ্গে ন নিৱাৰেতি. তথা মহল্লকে.

এত্থাহ – কিমত্থং মাতিকাযং দুক্কটৱত্থু ৱুত্তং, ননু ৱিভঙ্গে এৱ ৱত্তব্বং সিযাতি? এৱমেতং. কিং নু ভিক্খূ অভিনেতব্বা ৱত্থুদেসনায, তেহি ভিক্খূহি ৱত্থু দেসেতব্বং, কীদিসং? অনাৰম্ভং সপৰিক্কমনন্তি. ইতৰঞ্হি ‘‘সাৰম্ভে চে ভিক্খু ৱত্থুস্মিং অপৰিক্কমনে’’তি এৱং অনুপ্পসঙ্গৱসেন আগতত্তা ৱুত্তং. যস্মা ৱত্থু নাম অত্থি সাৰম্ভং অপৰিক্কমনং, অত্থি অনাৰম্ভং সপৰিক্কমনং, অত্থি সাৰম্ভং সপৰিক্কমনং, অত্থি অনাৰম্ভং অপৰিক্কমনন্তি বহুৱিধং, তস্মা বহুৱিধত্তা ৱত্থু দেসেতব্বং অনাৰম্ভং সপৰিক্কমনং, নেতৰন্তি ৱুত্তং হোতি. কিমত্থিকা পনেত্থ ৱত্থুদেসনাতি চে? গৰুকাপত্তিপঞ্ঞাপনহেতুপৰিৱজ্জনুপাযত্তা. ৱত্থুঅদেসনা হি গৰুকাপত্তিপঞ্ঞাপনহেতুভূতা. গৰুকাপত্তিপঞ্ঞাপনং অকতৱিঞ্ঞত্তিগিহিপীড়াজননং, অত্তদুক্খপৰদুক্খহেতুভূতো চ সাৰম্ভভাৱোতি এতে ৱত্থুদেসনাপদেসেন উপাযেন পৰিৱজ্জিতা হোন্তি. ন হি ভিক্খূ অকপ্পিযকুটিকৰণত্থং গিহীনং ৱা পীড়ানিমিত্তং, সাৰম্ভৱত্থুকুটিকৰণত্থং ৱা ৱত্থুং দেসেন্তীতি. হোন্তি চেত্থ –

‘‘দুক্কটস্স হি ৱত্থূনং, মাতিকায পকাসনা;

গৰুকাপত্তিহেতূনং, তেসং এৱং পকাসিতা.

‘‘ৱত্থুস্স দেসনুপাযেন, গৰুকাপত্তিহেতুযো;

ৱজ্জিতা হোন্তি যং তস্মা, সাৰম্ভাদি জহাপিত’’ন্তি.

কুটিকাৰসিক্খাপদৱণ্ণনা নিট্ঠিতা.