৩. দুট্ঠুল্লৱাচাসিক্খাপদৱণ্ণনা

‘‘কদা তে মাতা পসীদিস্সতী’’তি আযাচনং দুট্ঠুল্লৱাচায সিখাপত্তলক্খণদস্সনত্থং ৱুত্তং, ন মেথুনুপসংহিতেযেৱ দুট্ঠুল্লৱাচাতি দস্সনত্থং. ‘‘উভতোব্যঞ্জনকাসী’’তি ৱচনং পন পুৰিসনিমিত্তেন অসঙ্ঘাদিসেসৱত্থুনা মিস্সৱচনং, পুৰিসউভতোব্যঞ্জনকস্স চ ইত্থিনিমিত্তং পটিচ্ছন্নং, ইতৰং পাকটং. যদি তম্পি জনেতি, কথং ‘অনিমিত্তাসী’তিআদীনি পদানি ন সঙ্ঘাদিসেসং জনেন্তী’’তি একে, তং ন যুত্তং পুৰিসস্সাপি নিমিত্তাধিৱচনত্তা. ‘‘মেথুনুপসংহিতাহি সঙ্ঘাদিসেসো’’তি (পাৰা. ২৪৮) মাতিকাযং লক্খণস্স ৱুত্তত্তা চ মেথুনুপসংহিতাহি ওভাসনে পটিৱিজানন্তিযা সঙ্ঘাদিসেসো, অপ্পটিৱিজানন্তিযা থুল্লচ্চযং, ইতৰেহি ওভাসনে পটিৱিজানন্তিযা থুল্লচ্চযং, অপ্পটিৱিজানন্তিযা দুক্কটন্তি একে, ৱিচাৰেত্ৱা গহেতব্বং. এত্থাহ – ‘‘সিখৰণী’’তিআদীহি অক্কোসন্তস্স পটিঘচিত্তং উপ্পজ্জতি, কস্মা ‘‘তিৱেদন’’ন্তি অৱত্ৱা ‘‘দ্ৱিৱেদন’’ন্তি ৱুত্তন্তি? ৰাগৱসেন অযং আপত্তি, ন পটিঘৱসেন. তস্মা ৰাগৱসেনেৱ পৱত্তো অক্কোসো ইধ অধিপ্পেতো. তস্মা ‘‘দ্ৱিৱেদন’’ন্তি ৱচনং সুৱুত্তমেৱ.

দুট্ঠুল্লৱাচাসিক্খাপদৱণ্ণনা নিট্ঠিতা.