২. কাযসংসগ্গসিক্খাপদৱণ্ণনা

‘‘ওতিণ্ণো’’তি ইমিনাস্স সেৱনাধিপ্পাযতা দস্সিতা. তেনেৱ ‘‘কাযসংসগ্গৰাগসমঙ্গিস্সেতং অধিৱচন’’ন্তি ৱুত্তং. ‘‘ৱিপৰিণতেন…পে… সদ্ধি’’ন্তি ইমিনাস্স ৱাযামো দস্সিতো. ‘‘সদ্ধি’’ন্তি হি পদং সংযোগং দীপেতি, সো চ সংযোগো সমাগমো. কেন চিত্তেন? ৱিপৰিণতেন চিত্তেন, ন পত্তপ্পটিগ্গহণাধিপ্পাযাদিনাতি অধিপ্পাযো. ‘‘কাযসংসগ্গং সমাপজ্জেয্যা’’তি ইমিনাস্স ৱাযমতো ফস্সপ্পটিৱিজাননা দস্সিতা হোতি. ৱাযমিত্ৱা ফস্সং পটিৱিজানন্তো হি সমাপজ্জতি নাম. এৱমস্স তিৱঙ্গসম্পত্তি দস্সিতা হোতি. অথ ৱা ওতিণ্ণো ৱিপৰিণতেন চিত্তেন যক্খাদিনা সত্তো ৱিয. উপযোগত্থে ৱা এতং কৰণৱচনং, ওতিণ্ণো ৱিপৰিণতং চিত্তং কূপাদিং ৱিয সত্তো. অথ ৱা ‘‘ৰাগতো উত্তিণ্ণো ভৱিস্সামী’’তি ভিক্খুভাৱং উপগতোপি যো পন ভিক্খু ততো উত্তিণ্ণাধিপ্পাযতো ৱিপৰিণতেন চিত্তেন হেতুভূতেন তমেৱ ৰাগং ওতিণ্ণো. মাতুগামেন অত্তনো সমীপং ৱা আগতেন, অত্তনা উপগতেন ৱা. এতেন মাতুগামস্স সাৰত্ততা ৱা হোতু, ৱিৰত্ততা ৱা, সা ইধ অপ্পমাণং.

হত্থগ্গাহং ৱাতি এত্থ হত্থেন সব্বোপি উপাদিন্নকো কাযো সঙ্গহিতো, ন ভিন্নসন্তানো তপ্পটিবদ্ধো ৱত্থালঙ্কাৰাদি. ৱেণিগ্গহণেন অনুপাদিন্নকো অভিন্নসন্তানো কেসলোমনখগ্গদন্তগ্গাদিকো কম্মপচ্চযউতুসমুট্ঠানো গহিতোতি ৱেদিতব্বং. তেনেৱাহ ‘‘অন্তমসো লোমেন লোমং ফুসন্তস্সাপী’’তি. তেন অঞ্ঞতৰস্স ৱা…পে… পৰামসনন্তি এত্থ অনুপাদিন্নকানম্পি সেসলোমাদীনং অঙ্গভাৱো ৱেদিতব্বো. এৱং সন্তে ‘‘ফস্সং পটিজানন্তস্স সঙ্ঘাদিসেসো’’তি ইমিনা ৱিৰুজ্ঝতীতি চে? ন, তদত্থজাননতো. ফুট্ঠভাৱং পটিৱিজানন্তোপি ফস্সং পটিজানাতি নাম, ন কাযৱিঞ্ঞাণুপ্পত্তিযা এৱ. অনেকন্তিকঞ্হেত্থ কাযৱিঞ্ঞাণং. তস্মা এৱ ইধ ফস্সপ্পটিৱিজাননং অঙ্গন্ত্ৱেৱ ন ৱুত্তং. তস্মিঞ্হি ৱুত্তে ঠানমেতং ৱিজ্জতি ‘‘ন চ মে লোমঘট্টনেন কাযৱিঞ্ঞাণং উপ্পন্নং, তস্মিং ‘ন ফস্সং পটিজানামী’তি অনাপন্নসঞ্ঞী সিযা’’তি. ‘‘ৱেণী নাম কহাপণমালাদিসম্পযুত্তং, তত্থ ‘ৱেণিং গণ্হিস্সামী’তি কহাপণমালাদিং এৱ গণ্হাতি, ন লোমং, নত্থি সঙ্ঘাদিসেসো’’তি ৱদন্তি. ৱীমংসিতব্বং.

কাযসংসগ্গসিক্খাপদৱণ্ণনা নিট্ঠিতা.