৩. ততিযপাটিদেসনীযসিক্খাপদৱণ্ণনা

লদ্ধসেক্খসম্মুতিকানীতি ঞত্তিদুতিযেন কম্মেন লদ্ধসেক্খসম্মুতিকানি. যঞ্হি কুলং সদ্ধায ৱড্ঢতি, ভোগেন হাযতি, এৱৰূপস্স কুলস্স ঞত্তিদুতিযেন কম্মেন সেক্খসম্মুতিং দেন্তি, তং সন্ধাযেতং ৱুত্তং.

ঘৰতো নীহৰিত্ৱাতি ঘৰতো আসনসালং ৱা ৱিহাৰং ৱা আনেত্ৱা. তেনাহ ‘‘আসনসালাদীসু ৱা’’তি. ইমস্স ‘‘দেন্তী’’তি ইমিনা সম্বন্ধো. দ্ৱাৰমূলে ৱা ঠপিতং দেন্তীতি দ্ৱাৰমূলে ঠপিতং পচ্ছা সম্পত্তস্স দেন্তি. ভিক্খুং পন দিস্ৱা অন্তোগেহতো নীহৰিত্ৱা দিয্যমানং ন ৱট্টতি. নিচ্চভত্তকেতি নিচ্চং দাতব্বভত্তকে. সলাকভত্তেতি ৰুক্খসাৰমযায সলাকায ৱা ৱেড়ুৱিলীৱতালপণ্ণাদিমযায পট্টিকায ৱা ‘‘অসুকস্স নাম সলাকভত্ত’’ন্তি এৱং অক্খৰানি উপনিবন্ধিত্ৱা গাহাপেত্ৱা দাতব্বভত্তে. পক্খিকেতি একস্মিং পক্খে একদিৱসে দাতব্বভত্তে. উপোসথিকেতি উপোসথে দাতব্বভত্তে. পাটিপদিকেতি পাটিপদদিৱসে দাতব্বভত্তে.

ততিযপাটিদেসনীযসিক্খাপদৱণ্ণনা নিট্ঠিতা.