পাটিদেসনীযকণ্ডং

১. পঠমপাটিদেসনীযসিক্খাপদৱণ্ণনা

অন্তৰঘৰং পৱিট্ঠাযাতি ৰথিকং ব্যূহং সিঙ্ঘাটকং ঘৰং পৱিট্ঠায. অসপ্পাযন্তি সগ্গমোক্খানং অহিতং অননুকূলং. ভিক্খুনিযা অন্তৰঘৰে ঠত্ৱা দদমানায ৱসেনেত্থ আপত্তি ৱেদিতব্বা, ভিক্খুস্স ঠিতট্ঠানং পন অপ্পমাণং. তেনাহ ‘‘অন্তৰঘৰং পৱিট্ঠাযাতি ৱচনতো’’তিআদি. অন্তৰাৰামাদীসূতি অন্তৰাৰামভিক্খুনুপস্সযতিত্থিযসেয্যাপটিক্কমনেসু. ৰথিযাব্যূহসিঙ্ঘাটকঘৰানন্তি এত্থ ৰথিযাতি ৰচ্ছা. ব্যূহন্তি অনিব্বিজ্ঝিত্ৱা ঠিতা গতপচ্চাগতৰচ্ছা. সিঙ্ঘাটকন্তি চতুক্কোণং ৱা তিকোণং ৱা মগ্গসমোধানট্ঠানং. ঘৰন্তি কুলঘৰং. যথা চ ৰথিযাদীসু ঠত্ৱা দদমানায গণ্হতো আপত্তি, এৱং হত্থিসালাদীসুপি দট্ঠব্বং.

‘‘যামকালিকাদীসু পটিগ্গহণেপি অজ্ঝোহৰণেপি দুক্কট’’ন্তি ইদং আমিসেন অসম্ভিন্নং সন্ধায ৱুত্তং, সম্ভিন্নে পন একৰসে পাটিদেসনীযমেৱ. একতো উপসম্পন্নাযাতি ভিক্খুনীনং সন্তিকে উপসম্পন্নায, ভিক্খূনং সন্তিকে উপসম্পন্নায পন যথাৱত্থুকমেৱ.

ঞাতিকায ৱা দাপেন্তিযাতি সযং অদত্ৱা যায কাযচি ঞাতিকায দাপেন্তিযা, অঞ্ঞাতিকাযাতি অত্থো. উপনিক্খিপিত্ৱা ৱা দদমানাযাতি ভূমিযং ঠপেত্ৱা ‘‘ইদং, অয্য, তুম্হাকং দম্মী’’তি দদমানায. এৱং দিন্নং ‘‘সাধু, ভগিনী’’তি সম্পটিচ্ছিত্ৱা তায এৱ ৱা ভিক্খুনিযা, অঞ্ঞেন ৱা কেনচি পটিগ্গহাপেত্ৱা ইদং ভুঞ্জিতুং ৱট্টতি.

পঠমপাটিদেসনীযসিক্খাপদৱণ্ণনা নিট্ঠিতা.

২. দুতিযপাটিদেসনীযসিক্খাপদৱণ্ণনা

যো চ পটিগ্গহেত্ৱা ভুঞ্জতীতি সম্বন্ধো. অত্তনো ৱা ভত্তং দাপেন্তিযাতি এত্থ সচেপি অত্তনো ভত্তং দেতি, ইমিনা সিক্খাপদেন অনাপত্তিযেৱ, পুৰিমসিক্খাপদেন আপত্তি. অঞ্ঞেসং ৱা ভত্তং দেন্তিযাতি এত্থ পন সচে দাপেয্য, ইমিনা সিক্খাপদেন আপত্তি ভৱেয্য, দেন্তিযা পন নেৱ ইমিনা, ন পুৰিমেন আপত্তি.

দুতিযপাটিদেসনীযসিক্খাপদৱণ্ণনা নিট্ঠিতা.

৩. ততিযপাটিদেসনীযসিক্খাপদৱণ্ণনা

লদ্ধসেক্খসম্মুতিকানীতি ঞত্তিদুতিযেন কম্মেন লদ্ধসেক্খসম্মুতিকানি. যঞ্হি কুলং সদ্ধায ৱড্ঢতি, ভোগেন হাযতি, এৱৰূপস্স কুলস্স ঞত্তিদুতিযেন কম্মেন সেক্খসম্মুতিং দেন্তি, তং সন্ধাযেতং ৱুত্তং.

ঘৰতো নীহৰিত্ৱাতি ঘৰতো আসনসালং ৱা ৱিহাৰং ৱা আনেত্ৱা. তেনাহ ‘‘আসনসালাদীসু ৱা’’তি. ইমস্স ‘‘দেন্তী’’তি ইমিনা সম্বন্ধো. দ্ৱাৰমূলে ৱা ঠপিতং দেন্তীতি দ্ৱাৰমূলে ঠপিতং পচ্ছা সম্পত্তস্স দেন্তি. ভিক্খুং পন দিস্ৱা অন্তোগেহতো নীহৰিত্ৱা দিয্যমানং ন ৱট্টতি. নিচ্চভত্তকেতি নিচ্চং দাতব্বভত্তকে. সলাকভত্তেতি ৰুক্খসাৰমযায সলাকায ৱা ৱেড়ুৱিলীৱতালপণ্ণাদিমযায পট্টিকায ৱা ‘‘অসুকস্স নাম সলাকভত্ত’’ন্তি এৱং অক্খৰানি উপনিবন্ধিত্ৱা গাহাপেত্ৱা দাতব্বভত্তে. পক্খিকেতি একস্মিং পক্খে একদিৱসে দাতব্বভত্তে. উপোসথিকেতি উপোসথে দাতব্বভত্তে. পাটিপদিকেতি পাটিপদদিৱসে দাতব্বভত্তে.

ততিযপাটিদেসনীযসিক্খাপদৱণ্ণনা নিট্ঠিতা.

৪. চতুত্থপাটিদেসনীযসিক্খাপদৱণ্ণনা

তস্স পৰিৱাৰং কত্ৱা, অঞ্ঞং ৱা তেন সদ্ধিং বহুকম্পীতি যাগুযা পটিসংৱিদিতং কত্ৱা ‘‘কিং সুদ্ধায যাগুযা দিন্নায, পূৱভত্তাদীনিপি এতিস্সা যাগুযা পৰিৱাৰং কত্ৱা, দস্সামা’’তিআদিনা তস্স খাদনীযস্স ৱা ভোজনীযস্স ৱা পৰিৱাৰং কত্ৱা, অঞ্ঞং ৱা যং কিঞ্চি তেন সদ্ধিং বহুকম্পি আহৰীযতু. খাদনীযন্তি নিদস্সনমত্তং ‘‘ভোজনীযং ৱা’’তিপি ইচ্ছিতব্বত্তা. তেন সদ্ধিং আহৰন্তূতি তেন সদ্ধিং অত্তনো দেয্যধম্মং আহৰন্তু. ‘‘যাগুযা পটিসংৱিদিতং কত্ৱা পূৱং ৱা ভত্তং ৱা আহৰন্তি, এতম্পি ৱট্টতী’’তি (পাচি. অট্ঠ. ৫৭৩) কুৰুন্দিযং ৱুত্তং.

পটিসংৱিদিতগিলানাৱসেসকং ৱাতি পটিসংৱিদিতঞ্চ গিলানো চ পটিসংৱিদিতগিলানা, তেসং অৱসেসকং, পটিসংৱিদিতস্স চ গিলানস্স চ সেসকন্তি অত্থো. একস্সত্থায পটিসংৱিদিতং কত্ৱা আহটং, তস্স সেসকং অঞ্ঞস্সাপি পৰিভুঞ্জিতুং ৱট্টতি. চতুন্নং ৱা পঞ্চন্নং ৱা পটিসংৱিদিতং কত্ৱা বহূনং আহটং হোতি, অঞ্ঞেসম্পি দাতুং ইচ্ছন্তি, এতম্পি পটিসংৱিদিতসেসকমেৱ, সব্বেসম্পি ৱট্টতি. অথ অধিকমেৱ হোতি, সন্নিধিং মোচেত্ৱা ঠপিতং দুতিযদিৱসেপি ৱট্টতি. গিলানস্সাহটাৱসেসেপি এসেৱ নযো. যং পন অপ্পটিসংৱিদিতমেৱ কত্ৱা আভতং, তং বহিআৰামং পেসেত্ৱা পটিসংৱিদিতং কাৰেত্ৱা আহৰাপেতব্বং, ভিক্খূহি ৱা গন্ত্ৱা অন্তৰামগ্গে গহেতব্বং. যম্পি ৱিহাৰমজ্ঝেন গচ্ছন্তো ৱা ৱনচৰকাদযো ৱা ৱনতো আহৰিত্ৱা দেন্তি, পুৰিমনযেনেৱ পটিসংৱিদিতং কাৰেতব্বং. কত্থচি পন পোত্থকেসু ‘‘পটিসংৱিদিতং কত্ৱা আহটং ৱা গিলানাৱসেসকং ৱা’’তি পাঠো দিস্সতি, সো ন গহেতব্বো. তত্থজাতকমেৱ ৱাতি আৰামে জাতকমেৱ. মূলফলাদিন্তি মূলফলতচপত্তাদিং অঞ্ঞেন কপ্পিযং কত্ৱা দিন্নং পৰিভুঞ্জতো অনাপত্তি. সচে পন তং গামং হৰিত্ৱা পচিত্ৱা আহৰন্তি, ন ৱট্টতি. পটিসংৱিদিতং কাৰেতব্বং.

চতুত্থপাটিদেসনীযসিক্খাপদৱণ্ণনা নিট্ঠিতা.

ইতি কঙ্খাৱিতৰণিযা পাতিমোক্খৱণ্ণনায

ৱিনযত্থমঞ্জূসাযং লীনত্থপ্পকাসনিযং

পাটিদেসনীযৱণ্ণনা নিট্ঠিতা.