৬. এড়কলোমসিক্খাপদৱণ্ণনা

অদ্ধানমগ্গপ্পটিপন্নস্সাতি অদ্ধানমেৱ মগ্গো অদ্ধানমগ্গো, তং পটিপন্নস্সাতি অত্থো. তেনাহ ‘‘অদ্ধানসঙ্খাত’’ন্তিআদি. অদ্ধানসদ্দেন ৱিসেসিতত্তা পন ‘‘দীঘমগ্গ’’ন্তি ৱুত্তং. অদ্ধানগমনসমযস্স ৱিভঙ্গে ‘‘অদ্ধযোজনং গচ্ছিস্সামীতি ভুঞ্জিতব্ব’’ন্তিআদিৱচনতো (পাচি. ২১৮) অদ্ধযোজনম্পি অদ্ধানমগ্গো হোতি. এড়কলোমানি চেতানি অদ্ধানমগ্গতো অঞ্ঞত্থ উপ্পন্নানি পটিগ্গহেতুং ন ৱট্টন্তি, যতো ‘‘অদ্ধানমগ্গপ্পটিপন্নস্সা’’তিআদিকং ৱুত্তন্তি অনুযোগং সন্ধাযাহ ‘‘সব্বঞ্চেত’’ন্তিআদি. তত্থ সব্বঞ্চেতন্তি ‘‘ভিক্খুনো পনেৱ অদ্ধানমগ্গপ্পটিপন্নস্স এড়কলোমানি উপ্পজ্জেয্যু’’ন্তিআদিকং এতং সব্বং. ৱত্থুমত্তদীপনমেৱাতি ‘‘তেন খো পন সমযেন অঞ্ঞতৰস্স ভিক্খুনো কোসলেসু জনপদে সাৱত্থিং গচ্ছন্তস্স অন্তৰামগ্গে এড়কলোমানি উপ্পজ্জিংসূ’’তিআদিকস্স (পাৰা. ৫৭১) ৱত্থুমত্তস্স দীপনমেৱ. যত্থ কত্থচীতি অদ্ধানতো অঞ্ঞত্থাপি যত্থ কত্থচি ঠানেসু. সহত্থাতি কৰণত্থে নিস্সক্কৱচনন্তি আহ ‘‘সহত্থেনা’’তি. লক্খণৱচনঞ্চেতং, তস্মা যেন কেনচি সৰীৰাৱযৱেনাতি অত্থো দট্ঠব্বো. তেনাহ ‘‘অত্তনা হৰিতব্বানীতি অত্থো’’তি. অসন্তে হাৰকেতি এত্থ পদানং অন্তোগধাৱধাৰণতো অৱধাৰণত্থো লব্ভতীতি আহ ‘‘অসন্তেযেৱা’’তিআদি.

এত্থ চ ‘‘ইমানি মে, ভন্তে, এড়কলোমানি তিযোজনং অতিক্কামিতানি নিস্সগ্গিযানী’’তিআদিনা (পাৰা. ৫৭৩) নিস্সজ্জনৱিধানং ৱেদিতব্বং. তিকপাচিত্তিযন্তি অতিৰেকতিযোজনে অতিৰেকতিযোজনসঞ্ঞিৱেমতিকঊনকসঞ্ঞীনং ৱসেন তীণি পাচিত্তিযানি. ৱাসাধিপ্পাযেন গন্ত্ৱা ততো পৰং হৰণেতি যত্থ গতো, তত্থ উদ্দেসপৰিপুচ্ছাদীনং ৱা পচ্চযাদীনং ৱা অলাভেন ততো পৰং অঞ্ঞত্থ হৰণে, ততোপি অঞ্ঞত্থাতি এৱং যোজনসতম্পি হৰণে অনাপত্তি. অচ্ছিন্নং ৱা নিস্সট্ঠং ৱাতি চোৰেহি অচ্ছিন্নং ৱা ৱিনযকম্মকতং ৱা. কতভণ্ডন্তি কতং ভণ্ডং কম্বলকোজৱসন্থতাদি যং কিঞ্চি অন্তমসো সুত্তকেন বদ্ধমত্তম্পি. তেনাহ ‘‘অন্তমসো’’তিআদি. যো পন তনুকপত্তত্থৱিকন্তৰে (পাৰা. অট্ঠ. ২.৫৭৫) ৱা আযোগঅংসবদ্ধককাযবন্ধনাদীনং অন্তৰেসু ৱা পিপ্ফলিকাদীনং মলৰক্খণত্থং সিপাটিকাযং ৱা অন্তমসো ৱাতাবাধিকো কণ্ণচ্ছিদ্দেপি লোমানি পক্খিপিত্ৱা গচ্ছতি, আপত্তিযেৱ. সুত্তকেন পন বন্ধিত্ৱা পক্খিত্তং কতভণ্ডট্ঠানে তিট্ঠতি, ৱেণিং কত্ৱা হৰতি, ইদং নিধানমুখং নাম, আপত্তিযেৱ.

পঠমপ্পটিলাভোতি অত্তনো অত্থায এড়কলোমানং পঠমুপ্পত্তি. এতেন অচ্ছিন্ননিস্সট্ঠপ্পটিলদ্ধানং পটিক্খেপো. অঞ্ঞস্স অজানন্তস্স যানে পক্খিপিত্ৱাতি (পাৰা. অট্ঠ. ২.৫৭২) গচ্ছন্তে ৰথাদিকে ৱা হত্থিপিট্ঠিআদীসু ৱা সামিকস্স অজানন্তস্সেৱ ‘‘হৰিস্সতী’’তি পক্খিপিত্ৱা. অগচ্ছন্তেপি এসেৱ নযো. সচে পন অগচ্ছন্তে ৰথাদিম্হি ৱা হত্থিপিট্ঠিআদীসু ৱা ঠপেত্ৱা আৰোহিত্ৱা সাৰেতি, হেট্ঠা ৱা গচ্ছন্তো চোদেতি, পক্কোসন্তো ৱা অনুবন্ধাপেতি, ‘‘অঞ্ঞং হৰাপেতী’’তি (পাৰা. ৫৭৫) ৱচনতো অনাপত্তি. এত্থ চ ‘‘অজানন্তস্স যানে’’তি ইমিনা জানন্তস্স চে যানে পক্খিপতি, অঞ্ঞং হৰাপেতি নামাতি দস্সেতি. অহৰণপচ্চাহৰণন্তি হৰণপচ্চাহৰণানমভাৱো.

এড়কলোমসিক্খাপদৱণ্ণনা নিট্ঠিতা.