৪. ছব্বস্সসিক্খাপদৱণ্ণনা

যং সন্থতসম্মুতিং দেতীতি সম্বন্ধো. গিলানস্স ভিক্খুনোতি যস্স ৱিনা সন্থতা ন ফাসু হোতি, ন সক্কোতি চ সন্থতং আদায পক্কমিতুং, এৱংভূতস্স গিলানস্স ভিক্খুনো. সন্থতসম্মুতিং দেতীতি ‘‘সুণাতু মে, ভন্তে, সঙ্ঘো, অযং ইত্থন্নামো ভিক্খু গিলানো ন সক্কোতি সন্থতং আদায পক্কমিতু’’ন্তিআদিনা (পাৰা. ৫৬০) পদভাজনে ৱুত্তায ঞত্তিদুতিযকম্মৱাচায সন্থতসম্মুতিং দেতি.

সাতি সন্থতসম্মুতি. ৱূপসন্তো ৱা পুন কুপ্পতীতি ৱূপসন্তো ৱা সো আবাধো পুন কুপ্পতি, অনুৱস্সম্পি কাতুং ৱট্টতি, পুন সম্মুতিদানকিচ্চং নত্থীতি অধিপ্পাযো. ন কেৱলং তস্মিংযেৱ ৰোগে কুপ্পিতে, অথ খো অঞ্ঞস্মিং ৰোগে কুপ্পিতেপি গতগতট্ঠানে অনুৱস্সং কাতুং লভতি. তেনেৱ হি সমন্তপাসাদিকাযং ‘‘সচে অৰোগো হুত্ৱা পুন মূলব্যাধিনাৱ গিলানো হোতি, সোযেৱ পৰিহাৰো, নত্থঞ্ঞং ‘সম্মুতিকিচ্চ’ন্তি ফুস্সদেৱত্থেৰো আহ. উপতিস্সত্থেৰো পন সো ৱা ব্যাধি পটিকুপ্পতু, অঞ্ঞো ৱা, সকিং ‘গিলানো’তি নামং লদ্ধং লদ্ধমেৱ, পুন ‘সম্মুতিকিচ্চং নত্থী’তি আহা’’তি (পাৰা. অট্ঠ. ২.৫৫৭) উপতিস্সত্থেৰৱাদো পচ্ছা ৱুত্তো.

এত্থ চ ‘‘ইদং মে, ভন্তে, সন্থতং ঊনকছব্বস্সানি কাৰাপিতং অঞ্ঞত্ৰ ভিক্খুসম্মুতিযা নিস্সগ্গিয’’ন্তি (পাৰা. ৫৬২) ইমিনা নযেন নিস্সজ্জনৱিধানং ৱেদিতব্বং. ‘‘সেসং পঠমসদিসমেৱা’’তি ইমিনা ‘‘অত্তনা কতং পৰেহি পৰিযোসাপেতী’’তিআদিকং অতিদিট্ঠং. অযং পন ৱিসেসো – পৰিপুণ্ণে ছব্বস্সে ৱা অতিৰেকছব্বস্সে ৱা অনাপত্তি. অঙ্গেসু চ ছব্বস্সানং অন্তোভাৱো নানাত্তং.

ছব্বস্সসিক্খাপদৱণ্ণনা নিট্ঠিতা.