অসাধাৰণপাৰাজিকং

৫. উব্ভজাণুমণ্ডলসিক্খাপদৱণ্ণনা

উব্ভকপ্পৰন্তি দুতিযমহাসন্ধিতো উদ্ধং. ইতো চিতো চ সঞ্চৰণন্তি হত্থস্স ৱা কাযস্স ৱা তিৰিযং ইতো চিতো চ সঞ্চৰণং.

একতোঅৱস্সুতেতি (পাচি. অট্ঠ. ৬৬২) ভিক্খুনিযা অৱস্সৱে, ভিক্খুনিযা কাযসংসগ্গৰাগেন অৱস্সুতভাৱে সতীতি অত্থো. ভিক্খুনিযা ৱসেনেৱ চ একতোঅৱস্সুতভাৱো গহেতব্বো. ৱুত্তঞ্হেতং সমন্তপাসাদিকাযং (পাচি. অট্ঠ. ৬৬২) –

‘‘একতোঅৱস্সুতেতি এত্থ কিঞ্চাপি ‘একতো’তি অৱিসেসেন ৱুত্তং, তথাপি ভিক্খুনিযা এৱ অৱস্সুতে সতি অযং আপত্তিভেদো ৱুত্তোতি ৱেদিতব্বো’’তি.

পুৰিসস্স কাযন্তি পুৰিসস্স যং কঞ্চি কাযং. উভতোঅৱস্সুতেপীতি ভিক্খুনিযা চেৱ পুৰিসস্স চ কাযসংসগ্গৰাগেন অৱস্সুতভাৱে সতিপি. কাযেনাতি যথাপৰিচ্ছিন্নেন অত্তনো কাযেন. কাযপ্পটিবদ্ধন্তি পুৰিসস্স কাযপ্পটিবদ্ধং. অৱসেসকাযেন ৱাতি যথাপৰিচ্ছিন্নকাযতো অৱসেসেন কাযেন, উব্ভক্খকঅধোজাণুমণ্ডলঅধোকপ্পৰসঙ্খাতেন কাযেনাতি ৱুত্তং হোতি. তস্স কাযন্তি অৱস্সুতস্স তস্স পুৰিসস্স যং কঞ্চি কাযং. যথা চেত্থ সযং আমসন্তিযা থুল্লচ্চযং, এৱং তস্স আমসনং সাদিযন্তিযাপীতি দট্ঠব্বং. পুৰিসস্স কাযসংসগ্গৰাগো নত্থীতি পুৰিসস্স মেথুনৰাগো, গেহসিতপেমং, সুদ্ধচিত্তং ৱা. অৱসেসেতি পাৰাজিকখেত্ততো অৱসেসে. কাযপ্পটিবদ্ধেন কাযপ্পটিবদ্ধাদিভেদেতি ‘‘কাযপ্পটিবদ্ধেন কাযপ্পটিবদ্ধং আমসতি, আপত্তি দুক্কটস্সা’’তিআদিকে (পাচি. ৬৫৯, ৬৬২) সব্বৱাৰে. ‘‘অসঞ্চিচ্চা’’তিআদীসু ৱিৰজ্ঝিত্ৱা ৱা আমসন্তিযা, অঞ্ঞৱিহিতায ৱা, ‘‘অযং পুৰিসো’’তি ৱা ‘‘ইত্থী’’তি ৱা অজানন্তিযা ৱা, তেন ফুট্ঠাযপি তং ফস্সং অস্সাদযন্তিযা ৱা আমসনেপি সতি অনাপত্তি.

উব্ভজাণুমণ্ডলসিক্খাপদৱণ্ণনা নিট্ঠিতা.

৬. ৱজ্জপ্পটিচ্ছাদিকাসিক্খাপদৱণ্ণনা

পাৰাজিকং ধম্মং অজ্ঝাপন্নন্তি ভিক্খূহি সাধাৰণানং চতুন্নং, অসাধাৰণানং চতুন্নঞ্চাতি অট্ঠন্নমঞ্ঞতৰং অজ্ঝাপন্নং. ইদঞ্চ পাৰাজিকং (পাচি. অট্ঠ. ৬৬৬) পচ্ছা পঞ্ঞত্তং, সঙ্গীতিকাৰকাচৰিযেহি পন পুৰিমেন সদ্ধিং যুগড়ং কত্ৱা ইমস্মিং ওকাসে ঠপিতন্তি ৱেদিতব্বং. ‘‘অট্ঠন্নং পাৰাজিকানং অঞ্ঞতৰ’’ন্তি (পাচি. ৬৬৬) ৱচনতো পন ৱজ্জপ্পটিচ্ছাদিকং যা পটিচ্ছাদেতি, সাপি ৱজ্জপ্পটিচ্ছাদিকা এৱাতি দট্ঠব্বং. কিঞ্চাপি ৱজ্জপ্পটিচ্ছাদনং পেমৱসেন হোতি, তথাপি সিক্খাপদৱীতিক্কমচিত্তং দোমনস্সমেৱ হোতীতি কত্ৱা দুক্খৱেদনং হোতীতি ‘‘তত্ৰ হি পাচিত্তিযং…পে… সেসং তাদিসমেৱা’’তি ৱুত্তং.

ৱজ্জপ্পটিচ্ছাদিকাসিক্খাপদৱণ্ণনা নিট্ঠিতা.

৭. উক্খিত্তানুৱত্তিকাসিক্খাপদৱণ্ণনা

সত্থুসাসনেনাতি ঞত্তিসম্পদায চেৱ অনুস্সাৱনসম্পদায চ. ইধ পন চোদনাসাৰণাপুব্বকমেৱ ঞত্তিঅনুস্সাৱনং সত্থুসাসনন্তি আহ ‘‘ইধাপী’’তিআদি. কৰণন্তি ঞত্তিট্ঠপনঞ্চেৱ অনুস্সাৱনাৱচনঞ্চ. অনাদৰন্তি পুগ্গলে চেৱ ধম্মে চ আদৰৱিৰহিতং. তেনাহ ‘‘যেনা’’তিআদি. তত্থ পৰিযাপন্নগণে ৱাতি তস্মিং সঙ্ঘে পৰিযাপন্নে সম্বহুলপুগ্গলসঙ্খাতে গণে ৱা. ‘‘সম্মাৱত্তনায অৱত্তমানন্তি অত্থো’’তি ইমিনা অধিপ্পাযত্থো ৱুত্তো. এককম্মাদিকেতি এককম্মএকুদ্দেসসমসিক্খাতায. সহ অযনভাৱেনাতি সহ ৱত্তনভাৱেন. সমানো সংৱাসো এতেসন্তি সমানসংৱাসকা.

ইদানি যেন সংৱাসেন তে ‘‘সমানসংৱাসকা’’তি (পাচি. অট্ঠ. ৬৬৯) ৱুত্তা, সো সংৱাসো তস্স উক্খিত্তকস্স তেহি সদ্ধিং নত্থি, যেহি চ সদ্ধিং তস্স সো সংৱাসো নত্থি, ন তেন তে ভিক্খূ অত্তনো সহাযা কতা হোন্তি, তস্মা সো অকতসহাযো নামাতি ইমমত্থং দস্সেতুং ‘‘যস্স পনা’’তিআদি ৱুত্তং. এৱং পদৱণ্ণনং কত্ৱা ইদানি অত্থমত্তং দস্সেতুং ‘‘সমানসংৱাসকভাৱং অনুপগতন্তি অত্থো’’তি ৱুত্তং. কিং তং অনুৱত্তনন্তি কস্সচি আসঙ্কা সিযাতি তং সৰূপতো দস্সেন্তো ‘‘যংদিট্ঠিকো সো হোতী’’তিআদিমাহ. তত্থ সোতি যো উক্খিত্তকো, সো.

উক্খিত্তানুৱত্তিকাসিক্খাপদৱণ্ণনা নিট্ঠিতা.

৮. অট্ঠৱত্থুকাসিক্খাপদৱণ্ণনা

লোকস্সাদমিত্তসন্থৱৱসেনাতি (সাৰত্থ. টী. পাচিত্তিয ৩.৬৭৫) লোকস্সাদসঙ্খাতস্স মিত্তসন্থৱস্স ৱসেন. কিং তন্তি আহ ‘‘কাযসংসগ্গৰাগেনা’’তি. কাযসংসগ্গৰাগেনেৱ তিন্তা ইধ অৱস্সুতা নাম, ন মেথুনৰাগেনাতি. কথমেতং ৱিঞ্ঞাযতীতি আহ ‘‘অযমেৱ হী’’তিআদি. কিং পনেত্থ কাৰণন্তি আহ ‘‘সমন্তপাসাদিকাযং পনস্স ৱিচাৰণা কতা’’তি. তত্থাযং ৱিচাৰণা – এত্থ চ অসদ্ধম্মোতি কাযসংসগ্গোৱ ৱেদিতব্বো, ন মেথুনধম্মো. ন হি মেথুনস্স সামন্তা থুল্লচ্চযং হোতি. ‘‘ৱিঞ্ঞূ পটিবলো কাযসংসগ্গং সমাপজ্জিতু’’ন্তি (পাচি. ৬৭৬) ৱচনম্পি চেত্থ সাধকন্তি. যং যেন কতং, তং তস্সেৱ হোতীতি. পুৰিসপুগ্গলস্সাতি সামিৱচনন্তি দস্সেতুং ‘‘যং পুৰিসপুগ্গলেনা’’তিআদি ৱুত্তং. তত্থ হত্থোতি অত্তনো হত্থো. ন কেৱলঞ্চেত্থ হত্থগ্গহণন্তি ‘‘হত্থো নাম কপ্পৰং উপাদায যাৱ অগ্গনখা’’তি (পাচি. ৬৭৬) ৱুত্তস্স হত্থস্সেৱ গহণং, অথ খো তস্স চ অঞ্ঞস্সপি অপাৰাজিকখেত্তস্স গহণং একজ্ঝং কত্ৱা ‘‘হত্থগ্গহণ’’ন্তি ৱুত্তং. তথা সঙ্ঘাটিকণ্ণগ্গহণন্তি ন কেৱলং সঙ্ঘাটিকণ্ণস্সেৱ গহণং, অথ খো তস্স চ অঞ্ঞস্সপি যস্স কস্সচি চীৱৰপ্পদেসস্স গহণং ৱুত্তন্তি দস্সেতুং ‘‘এত্থ চ যস্স কস্সচী’’তিআদি ৱুত্তং. ইত্থন্নামং ঠানন্তি এৱংনামকং ঠানং. ‘‘পটিপাটিযা ৱা উপ্পটিপাটিযা ৱা পূৰেত্ৱা’’তি ইদং নিদস্সনমত্তং. তস্মা পটিপাটিযা ৱা উপ্পটিপাটিযা ৱা একন্তৰিকায ৱা যেন তেন নযেন পূৰেত্ৱাতি অত্থো.

তা আপত্তিযোতি তা আপন্না আপত্তিযো. যথা চেকেকস্মিং ৱত্থুস্মিং এৱং ৱিসুং ৱিসুং সত্তসু ৱত্থূসু সতক্খত্তুম্পি ৱীতিক্কন্তেসু তা আপত্তিযো দেসেত্ৱা মুচ্চতি. গণনূপিকাতি দেসিতগণনং উপগচ্ছতি. ধুৰনিক্খেপং কত্ৱাতি ‘‘অঞ্ঞং ৱত্থুং আপজ্জিস্সামী’’তি উস্সাহং ঠপেত্ৱা.

অট্ঠৱত্থুকাসিক্খাপদৱণ্ণনা নিট্ঠিতা.

ইতি কঙ্খাৱিতৰণিযা পাতিমোক্খৱণ্ণনায

ৱিনযত্থমঞ্জূসাযং লীনত্থপ্পকাসনিযং

ভিক্খুনিপাতিমোক্খে পাৰাজিকৱণ্ণনা নিট্ঠিতা.