সঙ্ঘাদিসেসকণ্ডং

১. উস্সযৱাদিকাসিক্খাপদৱণ্ণনা

মানুস্সযৱসেন কোধূস্সযৱসেনাতি বাহুল্লনযেন ৱুত্তং. তেনেৱ ৱক্খতি ‘‘তিচিত্তং তিৱেদন’’ন্তি. অড্ডকৰণত্থাযাতি এত্থ অড্ডোতি ৱোহাৰিকৱিনিচ্ছযো ৱুচ্চতি. যং পব্বজিতা ‘‘অধিকৰণ’’ন্তিপি ৱদন্তি, তস্স কৰণত্থায ৱোহাৰিকৱিনিচ্ছযত্থাযাতি ৱুত্তং হোতি. ৱীতিক্কমক্খণেযেৱাতি ৱত্থুজ্ঝাচাৰক্খণেযেৱ, ন ততিযায সমনুভাসনাযাতি অধিপ্পাযো. ভিক্খুনিং সঙ্ঘতো নিস্সাৰেতীতি আপন্নং ভিক্খুনিং ভিক্খুনিসঙ্ঘম্হা নিস্সাৰেতি. হেতুম্হি চাযং কত্তুৱোহাৰো ‘‘নিস্সাৰণহেতুভূতধম্মো ‘নিস্সাৰণীযো’তি ৱুত্তো’’তি কত্ৱা.

যত্থ ঠিতাযাতি উপস্সযভিক্খাচাৰমগ্গাদীসু যস্মিং ঠানে ঠিতায. ততো পট্ঠায গচ্ছন্তিযাতি ততো পট্ঠায ৱোহাৰিকানং সন্তিকং গচ্ছন্তিযা. দুতিযেতি দুতিযাৰোচনে. তেনাতি উপাসকেন. এৱং ৱুত্তাযাতি ‘‘মম চ তৱ চ কথং ত্ৱংযেৱ আৰোচেহী’’তি ৱুত্তায. অঞ্ঞেন কথাপেতীতি কপ্পিযকাৰকেন কথাপেতি. যথা ৱা তথা ৱা হি আৰোচিযমানেতি কপ্পিযকাৰকো ৱা ভিক্খুনিযা কথং পঠমং আৰোচেতু, ইতৰো ৱা অত্তনো কথং (পাচি. অট্ঠ. ৬৭৯). কপ্পিযকাৰকো ৱা উভিন্নম্পি কথং, ইতৰো ৱা উভিন্নম্পি কথং আৰোচেতূতি এৱং যথা তথা আৰোচিযমানে. উভিন্নম্পি পন কথং সুত্ৱাতি যথা তথা ৱা আৰোচিতং পন উভিন্নম্পি কথং সুত্ৱা.

আকড্ঢিযমানা গচ্ছতীতি ৱুচ্চমানা ৱোহাৰিকানং সন্তিকং গচ্ছতি, ইমস্স ‘‘তস্সা অনাপত্তী’’তি ইমিনা সম্বন্ধো. এৱং সেসেসুপি. ৰক্খং যাচতীতি ধম্মিকং ৰক্খং যাচতি. ইদানি যথা যাচিতা ৰক্খা ধম্মিকা হোতি, তং দস্সেতুং ‘‘উপস্সযে অঞ্ঞেহি কতং অনাচাৰং অনোদিস্স আচিক্খন্তী’’তি ৱুত্তং. তত্থ অতীতং আৰব্ভ অত্থি ওদিস্স আচিক্খনা (পাচি. অট্ঠ. ৬৭৯), অত্থি অনোদিস্স আচিক্খনা, অনাগতং আৰব্ভাপি অত্থি ওদিস্স আচিক্খনা, অত্থি অনোদিস্স আচিক্খনা.

কথং অতীতং আৰব্ভ ওদিস্স আচিক্খনা হোতি? ভিক্খুনুপস্সযে গামদাৰকা, ধুত্তাদযো ৱা যে কেচি অনাচাৰং ৱা আচৰন্তি, ৰুক্খং ৱা ছিন্দন্তি, ফলাফলং ৱা হৰন্তি, পৰিক্খাৰে ৱা অচ্ছিন্দন্তি. ভিক্খুনী ৱোহাৰিকে উপসঙ্কমিত্ৱা ‘‘অম্হাকং উপস্সযে ইদং নাম কত’’ন্তি ৱদতি. ‘‘কেনা’’তি ৱুত্তে ‘‘অসুকেন চ অসুকেন চা’’তি আচিক্খতি. এৱং অতীতং আৰব্ভ ওদিস্স আচিক্খনা হোতি, সা ন ৱট্টতি. তঞ্চে সুত্ৱা তে ৱোহাৰিকা তেসং দণ্ডং কৰোন্তি, সব্বং ভিক্খুনিযা গীৱা হোতি. ‘‘দণ্ডং গণ্হিস্সন্তী’’তি অধিপ্পাযেপি সতি গীৱাযেৱ হোতি. সচে পন তস্স ‘‘দণ্ডং গণ্হথা’’তি ৱদতি, পঞ্চমাসকমত্তে গহিতে পাৰাজিকং হোতি.

তেহি ‘‘কেনা’’তি ৱুত্তে পন ‘‘অসুকেনা’তি ৱত্তুং অম্হাকং ন ৱট্টতি, তুম্হেযেৱ জানিস্সথ. কেৱলঞ্হি মযং ৰক্খং যাচাম, তং নো দেথ, অৱহটভণ্ডম্পি আহৰাপেথা’’তি ৱত্তব্বং. এৱং অনোদিস্স আচিক্খনা হোতি, সা ৱট্টতি. এৱং ৱুত্তে সচেপি তে ৱোহাৰিকা তে কাৰকে গৱেসিত্ৱা তেসং দণ্ডং কৰোন্তি, সব্বং সাপতেয্যম্পি গহিতং, ভিক্খুনিযা নেৱ গীৱা, ন আপত্তি.

পৰিক্খাৰং হৰন্তে দিস্ৱা তেসং অনত্থকামতায ‘‘চোৰো চোৰো’’তি ৱত্তুম্পি ন ৱট্টতি. এৱং ৱুত্তেপি হি যং তেসং দণ্ডং কৰোন্তি, সব্বং ভিক্খুনিযা গীৱা হোতি. অত্তনো ৱচনকৰং পন ‘‘ইমিনা মে পৰিক্খাৰো গহিতো, তং আহৰাপেহি, মা চস্স দণ্ডং কৰোথা’’তি ৱত্তুং ৱট্টতি. দাসদাসিৱাপিআদীনং অত্থায অড্ডং কৰোন্তি, অযং অকপ্পিযঅড্ডো নাম, ন ৱট্টতি.

কথং অনাগতং আৰব্ভ ওদিস্স আচিক্খনা হোতি? ৱুত্তনযেনেৱ পৰেহি অনাচাৰাদীসু কতেসু ভিক্খুনী ৱোহাৰিকে এৱং ৱদতি ‘‘অম্হাকং উপস্সযে ইদঞ্চিদঞ্চ কৰোন্তি, ৰক্খং নো দেথ আযতিং অকৰণত্থাযা’’তি. ‘‘কেন এৱং কত’’ন্তি ৱুত্তে ‘‘অসুকেন চ অসুকেন চা’’তি আচিক্খতি. এৱং অনাগতং আৰব্ভ ওদিস্স আচিক্খনা হোতি, সাপি ন ৱট্টতি. তেসঞ্হি দণ্ডে কতে পুৰিমনযেনেৱ সব্বং ভিক্খুনিযা গীৱা. সেসং পুৰিমসদিসমেৱ.

সচে পন ৱোহাৰিকা ভিক্খুনুপস্সযে এৱৰূপং অনাচাৰং কৰোন্তানং ‘‘ইমং নাম দণ্ডং কৰোমা’’তি ভেৰিং চৰাপেত্ৱা আণায অতিট্ঠমানে পৰিযেসিত্ৱা দণ্ডং কৰোন্তি, ভিক্খুনিযা নেৱ গীৱা, ন আপত্তি.

যো চাযং ভিক্খুনীনং ৱুত্তো, ভিক্খূনম্পি এসেৱ নযো. ভিক্খুনোপি হি ওদিস্স আচিক্খনা ন ৱট্টতি, যং তথা আচিক্খিতে তেসং দণ্ডং কৰোন্তি, তং সব্বং গীৱা হোতি. ৱুত্তনযেনেৱ দণ্ডং গণ্হাপেন্তস্স পাৰাজিকং. যো পন ‘‘দণ্ডং কৰিস্সন্তী’’তি জানন্তোপি অনোদিস্স কথেতি, তে চ পৰিযেসিত্ৱা দণ্ডং কৰোন্তিযেৱ, ন দোসো. ৱিহাৰসীমায ৰুক্খাদীনি ছিন্দন্তানং ৱাসিফৰসুআদীনি গহেত্ৱা পাসাণে কোট্টেন্তি, ন ৱট্টতি. সচে ধাৰা ভিজ্জতি, কাৰাপেত্ৱা দাতব্বা. উপধাৱিত্ৱা তেসং পৰিক্খাৰে গণ্হন্তি, তম্পি ন কাতব্বং. লহুপৰিৱত্তঞ্হি চিত্তং, থেয্যচেতনায উপ্পন্নায মূলচ্ছেজ্জম্পি গচ্ছেয্য.

উস্সযৱাদিকাসিক্খাপদৱণ্ণনা নিট্ঠিতা.

২. চোৰিৱুট্ঠাপিকাসিক্খাপদৱণ্ণনা

মল্লগণভটিপুত্তগণাদিকন্তিআদীসু (সাৰত্থ. টী. পাচিত্তিয ৩.৬৮৩) মল্লগণো নাম নাৰাযনভত্তিকো তত্থ তত্থ পানীযট্ঠপনপোক্খৰণিখণনাদিপুঞ্ঞকম্মকাৰকো গণো. ভটিপুত্তগণো নাম কুমাৰভত্তিকগণো. ধম্মগণোতি সাসনভত্তিকো অনেকপ্পকাৰপুঞ্ঞকম্মকাৰকো গণো. গন্ধিকসেণীতি অনেকপ্পকাৰসুগন্ধিৱিকতিকাৰকো গণো. দুস্সিকসেণীতি দুস্সৱাণিজসমূহো, পেসকাৰগণোতি অত্থো.

ৱুট্ঠাপেন্তিযাতি উপসম্পাদেন্তিযা. কেনচি কৰণীযেন পক্কন্তাসু ভিক্খুনীসু অগন্ত্ৱা খণ্ডসীমং যথানিসিন্নট্ঠানেযেৱ অত্তনো নিস্সিতকপৰিসায সদ্ধিং ৱুট্ঠাপেন্তিযা ৱাচাচিত্ততো সমুট্ঠাতি (পাচি. অট্ঠ. ৬৮৩), অঞ্ঞং সীমং ৱা নদিং ৱা গন্ত্ৱা ৱুট্ঠাপেন্তিযা কাযৱাচাচিত্ততো সমুট্ঠাতীতি আহ ‘‘চোৰিৱুট্ঠাপনসমুট্ঠান’’ন্তি. অনাপুচ্ছা ৱুট্ঠাপনৱসেন কিৰিযাকিৰিযং. পঞ্ঞত্তিং অজানন্তা অৰিযাপি ৱুট্ঠাপেন্তীতি ৱা কম্মৱাচাপৰিযোসানে আপত্তিক্খণে ৱিপাকাব্যাকতসমঙ্গিতাৱসেন ৱা তিচিত্তং.

চোৰিৱুট্ঠাপিকাসিক্খাপদৱণ্ণনা নিট্ঠিতা.

৩. একগামন্তৰগমনসিক্খাপদৱণ্ণনা

অঞ্ঞো গামো গামন্তৰং. নদিপাৰন্তি নদিযা পাৰিমতীৰং. ‘‘গামন্তৰং গচ্ছেয্যা’’তি (পাচি. ৬৮৭, ৬৯১) ৱুত্তত্তা অঞ্ঞস্মিং গামেযেৱ আপত্তি, ন সকগামেতি আহ ‘‘সকগামতো তাৱা’’তিআদি. পৰিক্খেপে ৱা উপচাৰে ৱা অতিক্কন্তেতি পৰিক্খিত্তস্স গামস্স পৰিক্খেপে ৱা অপৰিক্খিত্তস্স গামস্স পৰিক্খেপাৰহট্ঠানে ৱা অতিক্কন্তে. দুতিযেন অতিক্কন্তমত্তেতি দুতিযেন পাদেন ইতৰস্স গামস্স পৰিক্খেপে ৱা উপচাৰে ৱা অতিক্কন্তমত্তে. যেসু পন পোত্থকেসু ‘‘একেন পাদেন ইতৰস্স গামস্স পৰিক্খেপে ৱা অতিক্কন্তে, উপচাৰে ৱা ওক্কন্তে থুল্লচ্চযং, দুতিযেন অতিক্কন্তমত্তে, ওক্কন্তমত্তে ৱা সঙ্ঘাদিসেসো’’তি পাঠো দিস্সতি, তত্থ ‘‘ওক্কন্তে, ওক্কন্তমত্তে ৱা’’তি এতানি দ্ৱে পদানি পাড়িযা ৱিৰুজ্ঝন্তি. ‘‘অপৰিক্খিত্তস্স গামস্স উপচাৰং অতিক্কামেন্তিযা’’তি (পাচি. ৬৯২) হি পাড়ি. তথা সমন্তপাসাদিকাযপি ৱিৰুজ্ঝন্তি. তত্থ হি –

‘‘পৰিক্খেপাৰহট্ঠানং একেন পাদেন অতিক্কমতি, থুল্লচ্চযং. দুতিযেন অতিক্কন্তমত্তে সঙ্ঘাদিসেসো. অপিচেত্থ সকগামতো…পে… একেন পাদেন ইতৰস্স গামস্স পৰিক্খেপে ৱা উপচাৰেৱা অতিক্কন্তমত্তে থুল্লচ্চযং, দুতিযেন অতিক্কন্তমত্তে সঙ্ঘাদিসেসো’’তি –

ৱুত্তং. ‘‘পঠমং পাদং অতিক্কামেন্তিযা’’তিআদিৱচনতো (পাচি. ৬৯২) পদসা গমনমেৱ ইধাধিপ্পেতন্তি আহ ‘‘পদসা পৱিসন্তিযা আপত্তী’’তি. ইমিনা সচেপি হত্থিপিট্ঠিআদীহি ৱা ইদ্ধিযা ৱা পৱিসতি, ৱট্টতিযেৱাতি দস্সেতি. অযমেত্থ সঙ্খেপো, ৱিত্থাৰো পন সমন্তপাসাদিকায (পাচি. অট্ঠ. ৬৯২) ৱুত্তোতি অধিপ্পাযো.

নদিপাৰগমনে ৱুত্তলক্খণায নদিযাতি ‘‘নদী নাম তিমণ্ডলং পটিচ্ছাদেত্ৱা যত্থ কত্থচি উত্তৰন্তিযা অন্তৰৱাসকো তেমিযতী’’তি (পাচি. ৬৯২) নদিপাৰগমনৱিভঙ্গে ৱুত্তলক্খণায নদিযা. নদিপাৰগমনৱিভঙ্গো হি ইধ নদিপাৰগমনসদ্দেন ৱুত্তো. পুন ওৰিমতীৰমেৱ পচ্চুত্তৰন্তিযা ৱাতি পৰতীৰং গন্তুকামতায ওতিণ্ণত্তা ৱুত্তং. ইতৰিস্সা পন অযং পক্কন্তট্ঠানে ঠিতা হোতি, তস্মা পৰতীৰং গচ্ছন্তিযা অনাপত্তি. সচে সজ্ঝাযং ৱা পধানং ৱা অঞ্ঞং ৱা কিঞ্চি কম্মং কুৰুমানা ‘‘পুৰে অৰুণেযেৱ দুতিযিকায সন্তিকং গমিস্সামী’’তি (পাচি. অট্ঠ. ৬৯২) আভোগং কৰোতি, অজানন্তিযা এৱ তস্সা অৰুণো উগ্গচ্ছতি, অনাপত্তীতি আহ ‘‘পুৰে অৰুণেযেৱা’’তিআদি. অথ পন ‘‘যাৱ অৰুণুগ্গমনা ইধেৱ ভৱিস্সামী’’তি ৱা অনাভোগেন ৱা ৱিহাৰস্স একদেসে অচ্ছতি, দুতিযিকায হত্থপাসং ন ওতৰতি, অৰুণুগ্গমনে সঙ্ঘাদিসেসো. হত্থপাসোযেৱ হি ইধ পমাণং. হত্থপাসাতিক্কমে একগব্ভোপি ন ৰক্খতি. তেনাহ ‘‘একগব্ভে…পে… আপত্তী’’তি.

দস্সনূপচাৰং ৱা সৱনূপচাৰং ৱাতি এত্থ দস্সনূপচাৰো নাম যত্থ ঠিতং দুতিযিকা পস্সতি. সৱনূপচাৰো নাম যত্থ ঠিতা মগ্গমূড়্হসদ্দেন ৱিয, ধম্মস্সৱনাৰোচনসদ্দেন ৱিয চ ‘‘অয্যে’’তি সদ্দাযন্তিযা সদ্দং সুণাতি. তস্মাতি যস্মা ওহীযনং নাম দস্সনূপচাৰসৱনূপচাৰানমঞ্ঞতৰস্স ৱিজহনং, তস্মা. অন্তোগামে পন ওহীযনং ৱট্টতীতি আহ ‘‘ইন্দখীলাতিক্কমতো পট্ঠাযা’’তি আদি. তত্থ ইন্দখীলাতিক্কমতোতি উম্মাৰাতিক্কমতো. বহিগামেতি গামস্স বহিপদেসে. মগ্গমূড়্হা উচ্চাসদ্দং কৰোন্তীতি আহ ‘‘মগ্গমূড়্হসদ্দেন ৱিযা’’তি. মগ্গমূড়্হং অৱ্হাযন্তস্স সদ্দেন ৱিযাতিপি ৱদন্তি. সদ্দাযন্তিযাতি সদ্দং কৰোন্তিযা. ‘‘সদ্দস্সৱনাতিক্কমে আপত্তিযেৱা’’তি ইমিনা দস্সনূপচাৰো এৱৰূপে সৱনূপচাৰে ৱিজহিতে ন ৰক্খতি, জহিতমত্তেৱ আপত্তি সঙ্ঘাদিসেসস্সাতি দস্সেতি.

মগ্গং গচ্ছন্তীতি একমগ্গং গচ্ছন্তি. সচে পুৰিমাযো অঞ্ঞেন মগ্গেন গচ্ছন্তি, পক্কন্তা নাম হোন্তি, অনাপত্তিযেৱ. দ্ৱিন্নং গচ্ছন্তীনং একা অনুবন্ধিতুং অসক্কোন্তী ‘‘গচ্ছতু অয’’ন্তি ওহীযতি, ইতৰাপি ‘‘ওহীযতু অয’’ন্তি গচ্ছতি, দ্ৱিন্নম্পি আপত্তি. সচে পন গচ্ছন্তীসু পুৰিমাপি অঞ্ঞং মগ্গং গণ্হাতি, পচ্ছিমাপি অঞ্ঞং, একা একিস্সা পক্কন্তট্ঠানে তিট্ঠতি, দ্ৱিন্নম্পি অনাপত্তি.

‘‘সঙ্ঘাদিসেসা চতুৰো’’তি (পৰি. অট্ঠ. ৪৭৯) অযং পঞ্হো অৰুণুগ্গমনে গামন্তৰপৰিযাপন্নং নদিপাৰং ওক্কন্তভিক্খুনিং সন্ধায ৱুত্তো. সা হি সকগামতো পচ্চূসসমযে নিক্খমিত্ৱা অৰুণুগ্গমনকালে ৱুত্তপ্পকাৰং নদিপাৰং ওক্কন্তমত্তাৱ ৰত্তিৱিপ্পৱাসগামন্তৰনদিপাৰগমনগণম্হাওহীযনলক্খণে একপ্পহাৰেনেৱ চতুৰো সঙ্ঘাদিসেসে আপজ্জতি.

পক্খসঙ্কন্তায ৱাতি তিত্থাযতনং সঙ্কন্তায. অনন্তৰাযেনাতি হত্থিমোচনাদিঅন্তৰাযং ৱিনা.

একগামন্তৰগমনসিক্খাপদৱণ্ণনা নিট্ঠিতা.

৪. উক্খিত্তকওসাৰণসিক্খাপদৱণ্ণনা

তস্সেৱ কাৰকসঙ্ঘস্সাতি যো উক্খেপনীযকম্মকাৰকো গণো, তস্সেৱ কাৰকসঙ্ঘস্স. ৱত্তে ৱা ৱত্তন্তিন্তি তেচত্তালীসপ্পভেদে নেত্থাৰৱত্তে ৱত্তমানং.

উক্খিত্তকওসাৰণসিক্খাপদৱণ্ণনা নিট্ঠিতা.

৫. ভোজনপ্পটিগ্গহণপঠমসিক্খাপদৱণ্ণনা

একতোঅৱস্সুতেতি পুগ্গলস্স ৱা ভিক্খুনিযা ৱা অৱস্সুতে. মহাপচ্চৰিযং পনেত্থ ‘‘ভিক্খুনিযা অৱস্সুতভাৱেতি দট্ঠব্ব’’ন্তি (পাচি. অট্ঠ. ৭০১) ৱুত্তং. তং ‘‘অনৱস্সুতোতি জানন্তী পটিগ্গণ্হাতী’’তি (পাচি. ৭০৩) ইমায পাড়িযা ন সমেতি. যদি হি পুগ্গলস্স অৱস্সুতভাৱো নপ্পমাণং, কিং ‘‘অনৱস্সুতোতি জানন্তী’’তি ইমিনা ৱচনেন, ‘‘অনাপত্তি উভতোঅনৱস্সুতা হোন্তি, অনৱস্সুতা পটিগ্গণ্হাতী’’তি এত্তকমেৱ ৱত্তব্বং সিযা. উভোসু অনৱস্সুতেসূতি পুগ্গলো চেৱ ভিক্খুনী চাতি উভোসু অনৱস্সুতেসু গণ্হন্তিযা সব্বথাপি অনাপত্তি. ‘‘অনৱস্সুতো’’তি ৱা ঞত্ৱা গণ্হন্তিযাতি সযং অনৱস্সুতা সমানা অৱস্সুতেপি ‘‘অনৱস্সুতো অয’’ন্তি সঞ্ঞায তস্স হত্থতো পটিগ্গণ্হন্তিযা. অথ সযং অনৱস্সুতাপি অঞ্ঞং অৱস্সুতং ৱা অনৱস্সুতং ৱা ‘‘অৱস্সুতো’’তি ঞত্ৱা পটিগ্গণ্হাতি, দুক্কটমেৱ. ৱুত্তঞ্হেতং অনন্তৰসিক্খাপদে ‘‘কিস্স ত্ৱং, অয্যে, ন পটিগ্গণ্হাসীতি, অৱস্সুতা, অয্যেতি, ত্ৱং পন, অয্যে, অৱস্সুতাতি, নাহং, অয্যে, অৱস্সুতা’’তি.

ভোজনপ্পটিগ্গহণপঠমসিক্খাপদৱণ্ণনা নিট্ঠিতা.

৬. ভোজনপ্পটিগ্গহণদুতিযসিক্খাপদৱণ্ণনা

দুক্কটাদিকা সঙ্ঘাদিসেসপৰিযোসানা আপত্তিযো ইমিনা সিক্খাপদেন উয্যোজিকাযেৱ, ইতৰিস্সা পন আপত্তিভেদো পঠমসিক্খাপদেনাতি আহ ‘‘সা এৱং উয্যোজনেনা’’তিআদি.

কুলানুদ্দযতাযাতি কুলানুকম্পকতায.

ভোজনপ্পটিগ্গহণদুতিযসিক্খাপদৱণ্ণনা নিট্ঠিতা.

৭-১৩. সঞ্চৰিত্তাদিসিক্খাপদৱণ্ণনা

সত্তমাদীনি উত্তানত্থানেৱ.

সঞ্চৰিত্তাদিসিক্খাপদৱণ্ণনা নিট্ঠিতা.

১৪-১৭. সঙ্ঘভেদকাদিসিক্খাপদৱণ্ণনা

ভিক্খুনী সঙ্ঘং ন ভিন্দতীতি কম্মং, উদ্দেসো চাতি দ্ৱীহি ভেদো, সো তায সদ্ধিং নত্থীতি ভিক্খুনী সঙ্ঘং ন ভিন্দতি. ন কেৱলং পৰিৱাসাভাৱোযেৱাতি আহ ‘‘ছাদনপচ্চযাপী’’তিআদি. এত্থ চ ‘‘ছাদনপচ্চযাপি ন দুক্কটং আপজ্জতী’’তি পাঠো দট্ঠব্বো, ছাদনপচ্চযাপি দুক্কটং ন আপজ্জতীতি অত্থো. এৱঞ্চ কত্ৱা –

‘‘আপজ্জতি গৰুকং সাৱসেসং;

ছাদেতি অনাদৰিযং পটিচ্চ;

ন ভিক্খুনী নো চ ফুসেয্য ৱজ্জং;

পঞ্হামেসা কুসলেহি চিন্তিতা’’তি. (পৰি. ৪৮১) –

এত্থ ভিক্খুনিনিসেধো উপপন্নো হোতি. যেসু পন পোত্থকেসু ‘‘ছাদনপচ্চযা পন দুক্কটং আপজ্জতী’’তি ৱিনা ন-কাৰং পাঠো দিস্সতি, সো পমাদলেখোতি দট্ঠব্বং. তস্মাতি যস্মা পৰিৱাসো নাম নত্থি, তস্মা. অত্তনো সীমং সোধেত্ৱা ৱিহাৰসীমায ৱাতি ৱিহাৰে বদ্ধসীমমেৱ সন্ধায ৱুত্তং. সোধেতুং অসক্কোন্তীহীতি ৱিহাৰসীমং সোধেতুং অসক্কোন্তীহি.

মুখমত্তনিদস্সনন্তি পৱেসোপাযমত্তনিদস্সনং. এত্থাহ – অথ কস্মা যথা ভিক্খুমানত্তকথায ‘‘পৰিক্খিত্তস্স ৱিহাৰস্স পৰিক্খেপতো, অপৰিক্খিত্তস্স ৱিহাৰস্স পৰিক্খেপাৰহট্ঠানতো দ্ৱে লেড্ডুপাতে অতিক্কম্মা’’তি (কঙ্খা. অট্ঠ. নিগমনৱণ্ণনা) ৱুত্তং, এৱমৱত্ৱা ‘‘গামূপচাৰতো চ ভিক্খূনং ৱিহাৰূপচাৰতো চ দ্ৱে লেড্ডুপাতে অতিক্কমিত্ৱা’’তি ইধ ৱুত্তন্তি? তত্ৰ চেকে ৱদন্তি ‘‘ভিক্খূনং ৱুত্তপ্পকাৰং পদেসং অতিক্কমিত্ৱা গামেপি তং কম্মং কাতুং ৱট্টতি, ভিক্খুনীনং পন গামে ন ৱট্টতি, তস্মা এৱং ৱুত্ত’’ন্তি. অপৰে পন ভণন্তি ‘‘ভিক্খূনম্পি গামে ন ৱট্টতি, ভিক্খুৱিহাৰো নাম পুব্বেযেৱ গামূপচাৰং অতিক্কমিত্ৱা তিট্ঠতি, তস্মা গামং অৱত্ৱা ৱিহাৰূপচাৰমেৱ হেট্ঠা ৱুত্তং. ভিক্খুনীনং পন ৱিহাৰো গামেযেৱ, ন বহি, তস্মা গামূপচাৰঞ্চ ৱিহাৰূপচাৰঞ্চ উভযমেৱেত্থ দস্সিতং. তস্মা উভযত্থাপি অত্থতো নানাত্থং নত্থী’’তি. ৱীমংসিত্ৱা যঞ্চেত্থ যুজ্জতি, তং গহেতব্বং.

ততো পট্ঠাযাতি আৰোচিতকালতো পট্ঠায.

সঙ্ঘভেদকাদিসিক্খাপদৱণ্ণনা নিট্ঠিতা.

ইতি কঙ্খাৱিতৰণিযা পাতিমোক্খৱণ্ণনায

ৱিনযত্থমঞ্জূসাযং লীনত্থপ্পকাসনিযং

ভিক্খুনিপাতিমোক্খে সঙ্ঘাদিসেসৱণ্ণনা নিট্ঠিতা.