৩০-৩২. সমতিত্তিকাদিসিক্খাপদৱণ্ণনা

সমতিত্তিকন্তি ভাৱনপুংসকনিদ্দেসো, সমতিত্তিকং কত্ৱাতি অত্থো. এৱমঞ্ঞেসুপি ঈদিসেসু ঠানেসু অত্থো দট্ঠব্বো. সমপুণ্ণন্তি (সাৰত্থ. টী. পাচিত্তিয ৩.৬০৫) পত্তস্স অন্তোমুখৱট্টিলেখাসমপুণ্ণং. সমভৰিতন্তি এত্থাপি এসেৱ নযো. তঞ্চ খো অধিট্ঠানুপগপত্তস্সেৱ, নেতৰস্স. তেনাহ ‘‘অধিট্ঠানুপগপত্তস্সা’’তিআদি. ৰচিতন্তি কতং, পক্খিত্তং পূৰিতন্তি অত্থো. যং কিঞ্চি যাৱকালিকন্তি যাগুভত্তফলাফলাদিং যং কিঞ্চি আমিসজাতিকং. যত্থ কত্থচীতি অধিট্ঠানুপগো ৱা হোতু, অনধিট্ঠানুপগো ৱা যত্থ কত্থচি পত্তে. থূপীকতানীতি থূপং ৱিয কতানি, অধিট্ঠানুপগস্স পত্তস্স অন্তোমুখৱট্টিলেখং অতিক্কমিত্ৱা কতানীতি অত্থো. ইদঞ্চ ‘‘যামকালিকাদীনী’’তি ইমস্স ৱসেন ৱুত্তং, ‘‘যাৱকালিক’’ন্তি ইমস্স পন ৱসেন ৱচনব্যত্তযং কত্ৱা ‘‘থূপীকতম্পি ৱট্টতী’’তি যোজেতব্বং. পি-সদ্দেন অথূপীকতানি ৱট্টন্তীতি এত্থ কথাৱ নত্থীতি দস্সেতি. হেট্ঠা ওৰোহতীতি সমন্তা ওকাসসব্ভাৱতো চালিযমানং হেট্ঠা ভস্সতি. তক্কোলৱটংসকাদযোতি এত্থ মত্থকে ঠপিততক্কোলমেৱ ৱটংসকসদিসত্তা তক্কোলৱটংসকং. আদিসদ্দেন পুপ্ফৱটংসককটুকফলাদিৱটংসকানং (পাচি. অট্ঠ. ৬০৫) গহণং, ন তং থূপীকতং নাম হোতি পাটেক্কং ভাজনত্তা পণ্ণাদীনং.

সমতিত্তিকাদিসিক্খাপদৱণ্ণনা নিট্ঠিতা.