৪. অনাদৰিযসিক্খাপদৱণ্ণনা

চতুত্থে অনাদৰিযেতি পুগ্গলস্স ৱা ধম্মস্স ৱা অনাদৰকৰণে. তস্মা যো ভিক্খু উপসম্পন্নেন পঞ্ঞত্তেন ৱুচ্চমানো তস্স ৱা ৱচনং অকত্তুকামতায, তং ৱা ধম্মং অসিক্খিতুকামতায অনাদৰিযং কৰোতি, তস্স তস্মিং অনাদৰিযে পাচিত্তিযং.

কোসম্বিযং ছন্নত্থেৰং আৰব্ভ অনাদৰিযকৰণৱত্থুস্মিং পঞ্ঞত্তং, সাধাৰণপঞ্ঞত্তি, অনাণত্তিকং, তিকপাচিত্তিযং, অনুপসম্পন্নে তিকদুক্কটং, উপসম্পন্নেন ৱা অনুপসম্পন্নেন ৱা ‘‘ইদং ন সল্লেখায সংৱত্ততী’’তিআদিনা নযেন অপঞ্ঞত্তেন ৱুচ্চমানস্স অনাদৰিযেপি দুক্কটমেৱ. পৱেণিআগতং পন উগ্গহং গহেত্ৱা ‘‘এৱং অম্হাকং আচৰিযানং উগ্গহো পৰিপুচ্ছা’’তি (পাচি. ৩৪৪) ভণন্তস্স, উম্মত্তকাদীনঞ্চ অনাপত্তি. উপসম্পন্নস্স পঞ্ঞত্তেন ৱচনং, অনাদৰিযকৰণন্তি ইমানেত্থ দ্ৱে অঙ্গানি. সমুট্ঠানাদীনি অদিন্নাদানসদিসানি, ইদং পন দুক্খৱেদনন্তি.

অনাদৰিযসিক্খাপদৱণ্ণনা নিট্ঠিতা.