৬. সুৰাপানৱগ্গো

১. সুৰাপানসিক্খাপদৱণ্ণনা

সুৰাপানৱগ্গস্স পঠমে সুৰামেৰযপানেতি এত্থ পিট্ঠাদীহি কতং মজ্জং সুৰা, পুপ্ফাদীহি কতো আসৱো মেৰযং, তদুভযম্পি বীজতো পট্ঠায কুসগ্গেনাপি পিৱতো পযোগে পযোগে পাচিত্তিযং.

কোসম্বিযং সাগতত্থেৰং আৰব্ভ মজ্জপিৱনৱত্থুস্মিং পঞ্ঞত্তং, সাধাৰণপঞ্ঞত্তি, অনাণত্তিকং, তিকপাচিত্তিযং, অমজ্জে মজ্জসঞ্ঞিস্স, ৱেমতিকস্স ৱা দুক্কটং. অমজ্জসঞ্ঞিস্স, অমজ্জং মজ্জৱণ্ণগন্ধৰসং লোণসোৱীৰকং ৱা সুত্তং ৱা পিৱতো, ৱাসগ্গাহাপনত্থং ঈসকং মজ্জং পক্খিপিত্ৱা সূপাদীনি পচন্তি, তেসু সূপসম্পাকাদীসু, আমলকৰসাদীহি অমজ্জং মজ্জসদিসং অৰিট্ঠং কৰোন্তি, তং পিৱতো, উম্মত্তকাদীনঞ্চ অনাপত্তি. মজ্জভাৱো, তস্স পানঞ্চাতি ইমানেত্থ দ্ৱে অঙ্গানি. সমুট্ঠানাদীনি এড়কলোমসদিসানি, ইদং পন লোকৱজ্জং, অকুসলচিত্তং, তিৱেদনন্তি.

সুৰাপানসিক্খাপদৱণ্ণনা নিট্ঠিতা.

২. অঙ্গুলিপতোদকসিক্খাপদৱণ্ণনা

দুতিযে অঙ্গুলিপতোদকেতি অঙ্গুলীহি উপকচ্ছকাদিঘট্টনং ৱুচ্চতি, অপিচ যেন কেনচি সৰীৰাৱযৱেন হসাধিপ্পাযস্স উপসম্পন্নং ফুসতো পাচিত্তিযং.

সাৱত্থিযং ছব্বগ্গিযে আৰব্ভ অঙ্গুলিপতোদকেন হসনৱত্থুস্মিং পঞ্ঞত্তং, সাধাৰণপঞ্ঞত্তি, অনাণত্তিকং, তিকপাচিত্তিযং, অনুপসম্পন্নে তিকদুক্কটং, ইধ পন ভিক্খুনীপি ভিক্খুস্স, ভিক্খু চ ভিক্খুনিযা অনুপসম্পন্নো এৱ, কাযপ্পটিবদ্ধাদীসু সব্বত্থ দুক্কটমেৱ. ন হসনাধিপ্পাযস্স, সতি কৰণীযে আমসতো, উম্মত্তকাদীনঞ্চ অনাপত্তি. হসাধিপ্পাযতা, উপসম্পন্নস্স কাযেন কাযামসনন্তি ইমানেত্থ দ্ৱে অঙ্গানি. সমুট্ঠানাদীনি পঠমপাৰাজিকসদিসানেৱাতি.

অঙ্গুলিপতোদকসিক্খাপদৱণ্ণনা নিট্ঠিতা.

৩. হসধম্মসিক্খাপদৱণ্ণনা

ততিযে উদকে হসধম্মেতি উদককীড়া ৱুচ্চতি. তস্মা যো ভিক্খু উপৰিগোপ্ফকে উদকেযেৱ গচ্ছন্তো হসাধিপ্পাযো নিমুজ্জতি ৱা উম্মুজ্জতি ৱা, তস্স নিমুজ্জনাদীনং অত্থায ওতৰন্তস্স হত্থৱাৰে পদৱাৰে দুক্কটং, নিমুজ্জনুম্মুজ্জনেসু পযোগে পযোগে পাচিত্তিযং, নিমুজ্জিত্ৱা অন্তোউদকেযেৱ গচ্ছন্তস্স হত্থৱাৰপদৱাৰেসু, তৰন্তস্স ৱা যেন যেন অঙ্গেন তৰতি, তস্স তস্স পযোগে পযোগে পাচিত্তিযং.

সাৱত্থিযং সত্তৰসৱগ্গিযে ভিক্খূ আৰব্ভ উদকে কীড়নৱত্থুস্মিং পঞ্ঞত্তং, সাধাৰণপঞ্ঞত্তি, অনাণত্তিকং, তিকপাচিত্তিযং, উদকে অহসধম্মে হসধম্মসঞ্ঞিনো, ৱেমতিকস্স ৱা দুক্কটং, তথা নাৱায কীড়তো হত্থেন ৱা পাদেন ৱা কট্ঠেন ৱা কথলায ৱা উদকং পহৰতো, ভাজনগতং উদকং ৱা কঞ্জিকাদীনি ৱা চিক্খল্লং ৱা খিপনকীড়ায কীড়তো দুক্কটং. অত্থজোতকং পন অক্খৰং ছিন্দিতুং ৱট্টতি. ন হসাধিপ্পাযস্স, সতি কৰণীযে ওতৰিত্ৱা নিমুজ্জনাদীনি কৰোন্তস্স, পাৰং গচ্ছতো, আপদাসু, উম্মত্তকাদীনঞ্চ অনাপত্তি. উপৰিগোপ্ফকতা, হসাধিপ্পাযেন কীড়নন্তি ইমানেত্থ দ্ৱে অঙ্গানি. সমুট্ঠানাদীনি পঠমপাৰাজিকসদিসানীতি.

হসধম্মসিক্খাপদৱণ্ণনা নিট্ঠিতা.

৪. অনাদৰিযসিক্খাপদৱণ্ণনা

চতুত্থে অনাদৰিযেতি পুগ্গলস্স ৱা ধম্মস্স ৱা অনাদৰকৰণে. তস্মা যো ভিক্খু উপসম্পন্নেন পঞ্ঞত্তেন ৱুচ্চমানো তস্স ৱা ৱচনং অকত্তুকামতায, তং ৱা ধম্মং অসিক্খিতুকামতায অনাদৰিযং কৰোতি, তস্স তস্মিং অনাদৰিযে পাচিত্তিযং.

কোসম্বিযং ছন্নত্থেৰং আৰব্ভ অনাদৰিযকৰণৱত্থুস্মিং পঞ্ঞত্তং, সাধাৰণপঞ্ঞত্তি, অনাণত্তিকং, তিকপাচিত্তিযং, অনুপসম্পন্নে তিকদুক্কটং, উপসম্পন্নেন ৱা অনুপসম্পন্নেন ৱা ‘‘ইদং ন সল্লেখায সংৱত্ততী’’তিআদিনা নযেন অপঞ্ঞত্তেন ৱুচ্চমানস্স অনাদৰিযেপি দুক্কটমেৱ. পৱেণিআগতং পন উগ্গহং গহেত্ৱা ‘‘এৱং অম্হাকং আচৰিযানং উগ্গহো পৰিপুচ্ছা’’তি (পাচি. ৩৪৪) ভণন্তস্স, উম্মত্তকাদীনঞ্চ অনাপত্তি. উপসম্পন্নস্স পঞ্ঞত্তেন ৱচনং, অনাদৰিযকৰণন্তি ইমানেত্থ দ্ৱে অঙ্গানি. সমুট্ঠানাদীনি অদিন্নাদানসদিসানি, ইদং পন দুক্খৱেদনন্তি.

অনাদৰিযসিক্খাপদৱণ্ণনা নিট্ঠিতা.

৫. ভিংসাপনসিক্খাপদৱণ্ণনা

পঞ্চমে ভিংসাপেয্যাতি ভিংসাপনত্থং ৰূপাদীনি উপসংহৰেয্য, ভযানককথং ৱা কথেয্য. সো পন ভাযতু ৱা, মা ৱা, ইতৰস্স পাচিত্তিযং.

সাৱত্থিযং ছব্বগ্গিযে ভিক্খূ আৰব্ভ ভিংসাপনৱত্থুস্মিং পঞ্ঞত্তং, সাধাৰণপঞ্ঞত্তি, অনাণত্তিকং, তিকপাচিত্তিযং. অনুপসম্পন্নে তিকদুক্কটং, ন ভিংসাপেতুকামস্স তথা কৰোতো, উম্মত্তকাদীনঞ্চ অনাপত্তি. উপসম্পন্নতা, তস্স দস্সনসৱনৱিসযে ভিংসাপেতুকামতায ৱাযামনন্তি ইমানেত্থ দ্ৱে অঙ্গানি. সমুট্ঠানাদীনি অনন্তৰসিক্খাপদসদিসানেৱাতি.

ভিংসাপনসিক্খাপদৱণ্ণনা নিট্ঠিতা.

৬. জোতিসিক্খাপদৱণ্ণনা

ছট্ঠে ৱিসিব্বনাপেক্খোতি তপ্পিতুকামো. সমাদহেয্যাতি জালেয্য, অঞ্ঞত্ৰ তথাৰূপপ্পচ্চযাতি পদীপুজ্জালনং ৱা পত্তপচনাদীসু জোতিকৰণং ৱাতি এৱৰূপং পচ্চযং ৱিনা. তত্ৰাযং ৱিনিচ্ছযো – সযং সমাদহন্তস্স অৰণিসণ্ঠাপনতো পট্ঠায যাৱ জালা ন উট্ঠহতি, তাৱ সব্বপ্পযোগেসু দুক্কটং, জালুট্ঠানে পাচিত্তিযং. সমাদহাপেন্তস্স আণত্তিযা দুক্কটং, সকিং আণত্তেন বহুম্পি সমাদহিতে একমেৱ পাচিত্তিযং.

ভগ্গেসু সম্বহুলে ভিক্খূ আৰব্ভ জোতিং সমাদহিত্ৱা ৱিসিব্বনৱত্থুস্মিং পঞ্ঞত্তং, ‘‘অগিলানো, অঞ্ঞত্ৰ তথাৰূপপ্পচ্চযা’’তি ইমানেত্থ দ্ৱে অনুপঞ্ঞত্তিযো, সাধাৰণপঞ্ঞত্তি, সাণত্তিকং, তিকপাচিত্তিযং, গিলানস্স অগিলানসঞ্ঞিনো, ৱেমতিকস্স ৱা দুক্কটং, তথা পটিলাতং উক্খিপন্তস্স, তঞ্চ অৱিজ্ঝাতং উক্খিপিত্ৱা যথাঠানে ঠপেন্তস্স. ৱিজ্ঝাতং পন জালযতো পাচিত্তিযমেৱ. গিলানস্স গিলানসঞ্ঞিস্স, অঞ্ঞেন কতং ৱা ৱীতচ্চিতঙ্গাৰং ৱা ৱিসিব্বেন্তস্স, পদীপজোতিকজন্তাঘৰাদিকে তথাৰূপপ্পচ্চযে, আপদাসু, উম্মত্তকাদীনঞ্চ অনাপত্তি. অগিলানতা, অনুঞ্ঞাতকাৰণাভাৱো, ৱিসিব্বেতুকামতা, সমাদহনন্তি ইমানেত্থ চত্তাৰি অঙ্গানি. সমুট্ঠানাদীনি সঞ্চৰিত্তে ৱুত্তনযেনেৱ ৱেদিতব্বানীতি.

জোতিসিক্খাপদৱণ্ণনা নিট্ঠিতা.

৭. নহানসিক্খাপদৱণ্ণনা

সত্তমে নহাযেয্যাতি যো ভিক্খু মজ্ঝিমদেসে নহানদিৱসতো পট্ঠায অদ্ধমাসে অপুণ্ণে অঞ্ঞত্ৰ সমযা ‘‘নহাযিস্সামী’’তি চুণ্ণং ৱা মত্তিকং ৱা অভিসঙ্খৰোতি, তস্স ততো পট্ঠায সব্বপ্পযোগেসু দুক্কটং, নহানপৰিযোসানে পাচিত্তিযং. সমযেসু পৰিৱেণসম্মজ্জনমত্তম্পি কম্মসমযো, অদ্ধযোজনং গন্তুকামস্স, গচ্ছতো, গতস্স ৱা অদ্ধানগমনসমযো, সৰজেন ৱাতেন ওকিণ্ণস্স দ্ৱীসু ৱা তীসু ৱা উদকফুসিতেসু কাযে পতিতেসু ৱাতৱুট্ঠিসমযোতি ৱেদিতব্বো. সেসং উত্তানমেৱ.

ৰাজগহে সম্বহুলে ভিক্খূ আৰব্ভ ন মত্তং জানিত্ৱা নহাযনৱত্থুস্মিং পঞ্ঞত্তং, ‘‘অঞ্ঞত্ৰ সমযা’’তি অযমেত্থ ছব্বিধা অনুপঞ্ঞত্তি, সাধাৰণপঞ্ঞত্তি, অনাণত্তিকং, তিকপাচিত্তিযং, অতিৰেকদ্ধমাসে ঊনকসঞ্ঞিনো, ৱেমতিকস্স ৱা দুক্কটং. অতিৰেকসঞ্ঞিস্স, সমযে ৱা নহাযন্তস্স, যো ৱা নদীপাৰং গচ্ছন্তো ৱালুকং উক্কিৰিত্ৱা কতআৱাটেসুপি নহাযতি, তস্স, পচ্চন্তিমে জনপদে সব্বেসং, আপদাসু, উম্মত্তকাদীনঞ্চ অনাপত্তি. মজ্ঝিমদেসো, ঊনকদ্ধমাসে নহানং, সমযানং ৱা নদীপাৰগমনস্স ৱা আপদানং ৱা অভাৱোতি ইমানেত্থ তীণি অঙ্গানি. সমুট্ঠানাদীনি এড়কলোমসদিসানেৱাতি.

নহানসিক্খাপদৱণ্ণনা নিট্ঠিতা.

৮. দুব্বণ্ণকৰণসিক্খাপদৱণ্ণনা

অট্ঠমে অলভীতি লভো, লভো এৱ লাভো, কিং অলভি? চীৱৰং, কীদিসং? নৱং, ইতি ‘‘নৱচীৱৰলাভেনা’’তি ৱত্তব্বে অনুনাসিকলোপং অকত্ৱা নৱংচীৱৰলাভেনাতি ৱুত্তং, পটিলদ্ধনৱচীৱৰেনাতি অত্থো. মজ্ঝে ঠিতপদদ্ৱযে পনাতি নিপাতমত্তং. ভিক্খুনাতি যেন লদ্ধং, তস্স নিদস্সনং, সেসং পদত্থতো উত্তানমেৱ. অযং পনেত্থ ৱিনিচ্ছযো – নিৱাসনপাৰুপনুপগং চীৱৰং লভিত্ৱা তস্স নিট্ঠিতৰজনস্স যস্মিং ৱা তস্মিং ৱা পদেসে কংসনীলেন ৱা পত্তনীলেন ৱা কদ্দমেন ৱা যেন কেনচি কাড়কেন ৱা মোৰক্খিমণ্ডলমঙ্গুলপিট্ঠীনং অঞ্ঞতৰপ্পমাণং কপ্পবিন্দুং আদিযিত্ৱা তং চীৱৰং পৰিভুঞ্জিতব্বং, অনাদিযিত্ৱা পৰিভুঞ্জন্তস্স পাচিত্তিযং.

সাৱত্থিযং সম্বহুলে ভিক্খূ আৰব্ভ অত্তনো চীৱৰঅজাননৱত্থুস্মিং পঞ্ঞত্তং, সাধাৰণপঞ্ঞত্তি, অনাণত্তিকং, তিকপাচিত্তিযং, আদিন্নে অনাদিন্নসঞ্ঞিনো, ৱেমতিকস্স ৱা দুক্কটং. আদিন্নসঞ্ঞিস্স, কপ্পে নট্ঠে, কপ্পকতোকাসে জিণ্ণে, কপ্পকতেন অকপ্পকতে সংসিব্বিতে, পচ্ছা আৰোপিতেসু অগ্গড়অনুৱাতপৰিভণ্ডেসু তং পৰিভুঞ্জন্তস্স, উম্মত্তকাদীনঞ্চ অনাপত্তি. ৱুত্তপ্পকাৰস্স চীৱৰস্স অকতকপ্পকতা, ন নট্ঠচীৱৰাদিতা, নিৱাসনং ৱা পাৰুপনং ৱাতি ইমানেত্থ তীণি অঙ্গানি. সমুট্ঠানাদীনি এড়কলোমসদিসানি, ইদং পন কিৰিযাকিৰিযন্তি.

দুব্বণ্ণকৰণসিক্খাপদৱণ্ণনা নিট্ঠিতা.

৯. ৱিকপ্পনসিক্খাপদৱণ্ণনা

নৱমে ৱিকপ্পেত্ৱাতি এত্থ দ্ৱে ৱিকপ্পনা সম্মুখাৱিকপ্পনা পৰম্মুখাৱিকপ্পনা চ. কথং সম্মুখাৱিকপ্পনা হোতি? চীৱৰানং একবহুভাৱং সন্নিহিতাসন্নিহিতভাৱঞ্চ ঞত্ৱা ‘ইমং চীৱৰ’ন্তি ৱা ‘ইমানি চীৱৰানী’তি ৱা ‘এতং চীৱৰ’ন্তি ৱা ‘এতানি চীৱৰানী’তি ৱা ৱত্ৱা ‘তুয্হং ৱিকপ্পেমী’তি ৱত্তব্বং, অযমেকা সম্মুখাৱিকপ্পনা. এত্তাৱতা নিধেতুং ৱট্টতি, পৰিভুঞ্জিতুং পন ৱিস্সজ্জেতুং ৱা অধিট্ঠাতুং ৱা ন ৱট্টতি. ‘‘ময্হং সন্তকং, ময্হং সন্তকানি পৰিভুঞ্জ ৱা ৱিস্সজ্জেহি ৱা যথাপচ্চযং কৰোহী’’তি (পাচি. ৩৭৪) এৱং পন ৱুত্তে পচ্চুদ্ধাৰো নাম হোতি, ততো পভুতি পৰিভোগাদযোপি ৱট্টন্তি. অপৰো নযো, তথেৱ চীৱৰানং একবহুভাৱং সন্নিহিতাসন্নিহিতভাৱঞ্চ ঞত্ৱা তস্সেৱ ভিক্খুনো সন্তিকে ‘ইমং চীৱৰ’ন্তি ৱা ‘ইমানি চীৱৰানী’তি ৱা ‘এতং চীৱৰ’ন্তি ৱা ‘এতানি চীৱৰানী’তি ৱা ৱত্ৱা পঞ্চসু সহধম্মিকেসু অঞ্ঞতৰস্স অত্তনা অভিৰুচিতস্স যস্স কস্সচি নামং গহেত্ৱা ‘‘তিস্সস্স ভিক্খুনো ৱিকপ্পেমী’’তি ৱা ‘‘তিস্সায ভিক্খুনিযা, সিক্খমানায, সামণেৰস্স, তিস্সায সামণেৰিযা ৱিকপ্পেমী’’তি ৱা ৱত্তব্বং, অযং অপৰাপি সম্মুখাৱিকপ্পনা. এত্তাৱতা নিধেতুং ৱট্টতি, পৰিভোগাদীসু একম্পি ন ৱট্টতি. তেন পন ভিক্খুনা ‘‘তিস্সস্স ভিক্খুনো সন্তকং…পে… তিস্সায সামণেৰিযা সন্তকং পৰিভুঞ্জ ৱা ৱিস্সজ্জেহি ৱা যথাপচ্চযং কৰোহী’’তি ৱুত্তে পচ্চুদ্ধাৰো নাম হোতি, ততো পভুতি পৰিভোগাদযোপি ৱট্টন্তি.

কথং পৰম্মুখাৱিকপ্পনা হোতি? চীৱৰানং তথেৱ একবহুভাৱং সন্নিহিতাসন্নিহিতভাৱঞ্চ ঞত্ৱা ‘ইমং চীৱৰ’ন্তি ৱা ‘ইমানি চীৱৰানী’তি ৱা ‘এতং চীৱৰ’ন্তি ৱা ‘এতানি চীৱৰানী’তি ৱা ৱত্ৱা ‘‘তুয্হং ৱিকপ্পনত্থায দম্মী’’তি ৱত্তব্বং. তেন ৱত্তব্বো ‘‘কো তে মিত্তো ৱা সন্দিট্ঠো ৱা’’তি. ততো ইতৰেন পুৰিমনযেনেৱ ‘তিস্সো ভিক্খূ’তি ৱা…পে… ‘তিস্সা সামণেৰী’তি ৱা ৱত্তব্বং. পুন তেন ভিক্খুনা ‘‘অহং তিস্সস্স ভিক্খুনো দম্মী’’তি ৱা…পে… ‘‘তিস্সায সামণেৰিযা দম্মী’’তি ৱা ৱত্তব্বং, অযং পৰম্মুখাৱিকপ্পনা. এত্তাৱতা নিধেতুং ৱট্টতি, পৰিভোগাদীসু একম্পি ন ৱট্টতি. তেন পন ভিক্খুনা দুতিযসম্মুখাৱিকপ্পনাযং ৱুত্তনযেনেৱ ‘‘ইত্থন্নামস্স সন্তকং পৰিভুঞ্জ ৱা ৱিস্সজ্জেহি ৱা যথাপচ্চযং কৰোহী’’তি ৱুত্তে পচ্চুদ্ধাৰো নাম হোতি, ততো পভুতি পৰিভোগাদযোপি ৱট্টন্তীতি. পত্তৱিকপ্পনাযম্পি এসেৱ নযো. ইতি ইমাসু দ্ৱীসু ৱিকপ্পনাসু যায কাযচি ৱিকপ্পনায পঞ্চসু সহধম্মিকেসু যস্স কস্সচি চীৱৰং ৱিকপ্পেত্ৱা ৱুত্তনযেন অকতপ্পচ্চুদ্ধাৰং ৱা যেন ৱিনযকম্মং কতং, তস্স ৱা ৱিস্সাসেন অগ্গহেত্ৱা পৰিভুঞ্জন্তস্স পাচিত্তিযং.

সাৱত্থিযং উপনন্দং আৰব্ভ অপ্পচ্চুদ্ধাৰণং পৰিভুঞ্জনৱত্থুস্মিং পঞ্ঞত্তং, সাধাৰণপঞ্ঞত্তি, অনাণত্তিকং, তিকপাচিত্তিযং, তং পন অধিট্ঠহন্তস্স ৱা ৱিস্সজ্জেন্তস্স ৱা দুক্কটং, তথা পচ্চুদ্ধাৰণে অপ্পচ্চুদ্ধাৰণসঞ্ঞিস্স ৱেমতিকস্স ৱা. পচ্চুদ্ধাৰণসঞ্ঞিস্স পন ৱিস্সাসেন পৰিভুঞ্জন্তস্স, উম্মত্তকাদীনঞ্চ অনাপত্তি. সামং ৱিকপ্পিতস্স অপ্পচ্চুদ্ধাৰো, ৱিকপ্পনুপগচীৱৰতা, পৰিভোগোতি ইমানেত্থ তীণি অঙ্গানি. সমুট্ঠানাদীনি পঠমকথিনসদিসানেৱ, ইদং পন কিৰিযাকিৰিযন্তি.

ৱিকপ্পনসিক্খাপদৱণ্ণনা নিট্ঠিতা.

১০. অপনিধানসিক্খাপদৱণ্ণনা

দসমে পত্তন্তি অধিট্ঠানুপগং. চীৱৰন্তি ৱিকপ্পনুপগং. নিসীদনং নাম সদসং ৱুচ্চতি. সূচিঘৰং নাম সসূচিকং ৱা অসূচিকং ৱা. কাযবন্ধনং নাম পট্টিকা ৱা সূকৰন্তকং ৱা. অপনিধেয্যাতি অপনেত্ৱা নিদহেয্য. হসাপেক্খোতি হসাধিপ্পাযো. পাচিত্তিযন্তি সযং অপনিধেন্তস্স পাচিত্তিযং, অঞ্ঞং আণাপেন্তস্স আণত্তিযা দুক্কটং, তেন অপনিহিতে ইতৰস্স পাচিত্তিযং.

সাৱত্থিযং ছব্বগ্গিযে আৰব্ভ অপনিধানৱত্থুস্মিং পঞ্ঞত্তং, সাধাৰণপঞ্ঞত্তি, সাণত্তিকং, তিকপাচিত্তিযং, অনুপসম্পন্নে তিকদুক্কটং, ৱুত্তপ্পকাৰানি পন পত্তাদীনি ঠপেত্ৱা অঞ্ঞং পৰিক্খাৰং উপসম্পন্নস্স ৱা অনুপসম্পন্নস্স ৱা সন্তকং অপনিধেন্তস্স দুক্কটমেৱ. দুন্নিক্খিত্তং পটিসামেন্তস্স, ‘‘ধম্মকথং কত্ৱা দস্সামী’’তি পটিসামেন্তস্স, উম্মত্তকাদীনঞ্চ অনাপত্তি. উপসম্পন্নস্স সন্তকানং পত্তাদীনং অপনিধানং, ৱিহেসেতুকামতা ৱা হসাধিপ্পাযতা ৱাতি ইমানেত্থ দ্ৱে অঙ্গানি. সমুট্ঠানাদীনি অদিন্নাদানসদিসানীতি.

অপনিধানসিক্খাপদৱণ্ণনা নিট্ঠিতা.

সুৰাপানৱগ্গো ছট্ঠো.