নমো তস্স ভগৱতো অৰহতো সম্মাসম্বুদ্ধস্স
দ্ৱেমাতিকাপাড়ি
ভিক্খুপাতিমোক্খপাড়ি
পুব্বকৰণং-৪
সম্মজ্জনী পদীপো চ, উদকং আসনেন চ;
উপোসথস্স এতানি, ‘‘পুব্বকৰণ’’ন্তি ৱুচ্চতি.
পুব্বকিচ্চং-৫
ছন্দ, পাৰিসুদ্ধি, উতুক্খানং, ভিক্খুগণনা চ ওৱাদো;
উপোসথস্স এতানি, ‘‘পুব্বকিচ্চ’’ন্তি ৱুচ্চতি.
পত্তকল্লঅঙ্গা-৪
উপোসথো, যাৱতিকা চ ভিক্খূ কম্মপ্পত্তা;
সভাগাপত্তিযো চ ন ৱিজ্জন্তি;
ৱজ্জনীযা চ পুগ্গলা তস্মিং ন হোন্তি, ‘‘পত্তকল্ল’’ন্তি ৱুচ্চতি.
পুব্বকৰণপুব্বকিচ্চানি সমাপেত্ৱা দেসিতাপত্তিকস্স সমগ্গস্স ভিক্খুসঙ্ঘস্স অনুমতিযা পাতিমোক্খং উদ্দিসিতুং আৰাধনং কৰোম.
নিদানুদ্দেসো
সুণাতু মে ভন্তে সঙ্ঘো? অজ্জুপোসথো পন্নৰসো, যদি সঙ্ঘস্স পত্তকল্লং, সঙ্ঘো উপোসথং কৰেয্য, পাতিমোক্খং উদ্দিসেয্য.
কিং সঙ্ঘস্স পুব্বকিচ্চং? পাৰিসুদ্ধিং আযস্মন্তো আৰোচেথ, পাতিমোক্খং উদ্দিসিস্সামি, তং সব্বেৱ সন্তা সাধুকং সুণোম মনসি কৰোম. যস্স সিযা আপত্তি, সো আৱিকৰেয্য, অসন্তিযা আপত্তিযা তুণ্হী ভৱিতব্বং, তুণ্হীভাৱেন খো পনাযস্মন্তে ‘‘পৰিসুদ্ধা’’তি ৱেদিস্সামি. যথা খো পন পচ্চেকপুট্ঠস্স ৱেয্যাকৰণং হোতি, এৱমেৱং এৱৰূপায পৰিসায যাৱততিযং অনুসাৱিতং হোতি. যো পন ভিক্খু যাৱততিযং অনুসাৱিযমানে সৰমানো সন্তিং আপত্তিং নাৱিকৰেয্য, সম্পজানমুসাৱাদস্স হোতি. সম্পজানমুসাৱাদো খো পনাযস্মন্তো অন্তৰাযিকো ধম্মো ৱুত্তো ভগৱতা, তস্মা সৰমানেন ভিক্খুনা আপন্নেন ৱিসুদ্ধাপেক্খেন সন্তী আপত্তি আৱিকাতব্বা, আৱিকতা হিস্স ফাসু হোতি.
উদ্দিট্ঠং খো আযস্মন্তো নিদানং. তত্থাযস্মন্তে পুচ্ছামি, কচ্চিত্থ পৰিসুদ্ধা, দুতিযম্পি পুচ্ছামি, কচ্চিত্থ পৰিসুদ্ধা, ততিযম্পি পুচ্ছামি, কচ্চিত্থ পৰিসুদ্ধা, পৰিসুদ্ধেত্থাযস্মন্তো, তস্মা তুণ্হী, এৱমেতং ধাৰযামীতি.
নিদানং নিট্ঠিতং.
পাৰাজিকুদ্দেসো
তত্ৰিমে চত্তাৰো পাৰাজিকা ধম্মা উদ্দেসং আগচ্ছন্তি.
মেথুনধম্ম সিক্খাপদং
১. যো পন ভিক্খু ভিক্খূনং সিক্খাসাজীৱসমাপন্নো সিক্খং অপ্পচ্চক্খায দুব্বল্যং অনাৱিকত্ৱা মেথুনং ধম্মং পটিসেৱেয্য, অন্তমসো তিৰচ্ছানগতাযপি, পাৰাজিকো হোতি অসংৱাসো.
অদিন্নাদানসিক্খাপদং
২. যো পন ভিক্খু গামা ৱা অৰঞ্ঞা ৱা অদিন্নং থেয্যসঙ্খাতং আদিযেয্য, যথাৰূপে অদিন্নাদানে ৰাজানো চোৰং গহেত্ৱা হনেয্যুং ৱা বন্ধেয্যুং ৱা পব্বাজেয্যুং ৱা চোৰোসি বালোসি মূড়্হোসি থেনোসীতি, তথাৰূপং ভিক্খু অদিন্নং আদিযমানো অযম্পি পাৰাজিকো হোতি অসংৱাসো.
মনুস্সৱিগ্গহসিক্খাপদং
৩. যো পন ভিক্খু সঞ্চিচ্চ মনুস্সৱিগ্গহং জীৱিতা ৱোৰোপেয্য, সত্থহাৰকং ৱাস্স পৰিযেসেয্য, মৰণৱণ্ণং ৱা সংৱণ্ণেয্য, মৰণায ৱা সমাদপেয্য ‘‘অম্ভো পুৰিস কিং তুয্হিমিনা পাপকেন দুজ্জীৱিতেন, মতং তে জীৱিতা সেয্যো’’তি, ইতি চিত্তমনো চিত্তসঙ্কপ্পো অনেকপৰিযাযেন মৰণৱণ্ণং ৱা সংৱণ্ণেয্য, মৰণায ৱা সমাদপেয্য, অযম্পি পাৰাজিকো হোতি অসংৱাসো.
উত্তৰিমনুস্সধম্মসিক্খাপদং
৪. যো পন ভিক্খু অনভিজানং উত্তৰিমনুস্সধম্মং অত্তুপনাযিকং অলমৰিযঞাণদস্সনং সমুদাচৰেয্য ‘‘ইতি জানামি, ইতি পস্সামী’’তি, ততো অপৰেন সমযেন সমনুগ্গাহীযমানো ৱা অসমনুগ্গাহীযমানো ৱা আপন্নো ৱিসুদ্ধাপেক্খো এৱং ৱদেয্য ‘‘অজানমেৱং আৱুসো অৱচং জানামি, অপস্সং পস্সামি, তুচ্ছং মুসা ৱিলপি’’ন্তি, অঞ্ঞত্ৰ অধিমানা, অযম্পি পাৰাজিকো হোতি অসংৱাসো.
উদ্দিট্ঠা খো আযস্মন্তো চত্তাৰো পাৰাজিকা ধম্মা. যেসং ভিক্খু অঞ্ঞতৰং ৱা অঞ্ঞতৰং ৱা আপজ্জিত্ৱা ন লভতি ভিক্খূহি সদ্ধিং সংৱাসং যথা পুৰে, তথা পচ্ছা, পাৰাজিকো হোতি অসংৱাসো. তত্থাযস্মন্তে পুচ্ছামি, কচ্চিত্থ পৰিসুদ্ধা, দুতিযম্পি পুচ্ছামি, কচ্চিত্থ পৰিসুদ্ধা, ততিযম্পি পুচ্ছামি, কচ্চিত্থ পৰিসুদ্ধা, পৰিসুদ্ধেত্থাযস্মন্তো, তস্মা তুণ্হী, এৱমেতং ধাৰযামীতি.
পাৰাজিকং নিট্ঠিতং.
সঙ্ঘাদিসেসুদ্দেসো
ইমে খো পনাযস্মন্তো তেৰস সঙ্ঘাদিসেসা
ধম্মা উদ্দেসং আগচ্ছন্তি.
সুক্কৱিস্সট্ঠিসিক্খাপদং
১. সঞ্চেতনিকা সুক্কৱিস্সট্ঠি অঞ্ঞত্ৰ সুপিনন্তা সঙ্ঘাদিসেসো.
কাযসংসগ্গসিক্খাপদং
২. যো পন ভিক্খু ওতিণ্ণো ৱিপৰিণতেন চিত্তেন মাতুগামেন সদ্ধিং কাযসংসগ্গং সমাপজ্জেয্য হত্থগ্গাহং ৱা ৱেণিগ্গাহং ৱা অঞ্ঞতৰস্স ৱা অঞ্ঞতৰস্স ৱা অঙ্গস্স পৰামসনং, সঙ্ঘাদিসেসো.
দুট্ঠুল্লৱাচাসিক্খাপদং
৩. যো পন ভিক্খু ওতিণ্ণো ৱিপৰিণতেন চিত্তেন মাতুগামং দুট্ঠুল্লাহি ৱাচাহি ওভাসেয্য যথা তং যুৱা যুৱতিং মেথুনুপসংহিতাহি, সঙ্ঘাদিসেসো.
অত্তকামপাৰিচৰিযসিক্খাপদং
৪. যো পন ভিক্খু ওতিণ্ণো ৱিপৰিণতেন চিত্তেন মাতুগামস্স সন্তিকে অত্তকামপাৰিচৰিযায ৱণ্ণং ভাসেয্য ‘‘এতদগ্গং ভগিনি পাৰিচৰিযানং যা মাদিসং সীলৱন্তং কল্যাণধম্মং ব্ৰহ্মচাৰিং এতেন ধম্মেন পৰিচৰেয্যা’’তি মেথুনুপসংহিতেন, সঙ্ঘাদিসেসো.
সঞ্চৰিত্তসিক্খাপদং
৫. যো পন ভিক্খু সঞ্চৰিত্তং সমাপজ্জেয্য ইত্থিযা ৱা পুৰিসমতিং পুৰিসস্স ৱা ইত্থিমতিং, জাযত্তনে ৱা জাৰত্তনে ৱা, অন্তমসো তঙ্খণিকাযপি, সঙ্ঘাদিসেসো.
কুটিকাৰসিক্খাপদং
৬. সঞ্ঞাচিকায পন ভিক্খুনা কুটিং কাৰযমানেন অস্সামিকং অত্তুদ্দেসং পমাণিকা কাৰেতব্বা, তত্ৰিদং পমাণং, দীঘসো দ্ৱাদস ৱিদত্থিযো সুগতৱিদত্থিযা, তিৰিযং সত্তন্তৰা, ভিক্খূ অভিনেতব্বা ৱত্থুদেসনায, তেহি ভিক্খূহি ৱত্থু দেসেতব্বং অনাৰম্ভং সপৰিক্কমনং. সাৰম্ভে চে ভিক্খু ৱত্থুস্মিং অপৰিক্কমনে সঞ্ঞাচিকায কুটিং কাৰেয্য, ভিক্খূ ৱা অনভিনেয্য ৱত্থুদেসনায, পমাণং ৱা অতিক্কামেয্য, সঙ্ঘাদিসেসো.
ৱিহাৰকাৰসিক্খাপদং
৭. মহল্লকং পন ভিক্খুনা ৱিহাৰং কাৰযমানেন সস্সামিকং অত্তুদ্দেসং ভিক্খূ অভিনেতব্বা ৱত্থুদেসনায, তেহি ভিক্খূহি ৱত্থু দেসেতব্বং অনাৰম্ভং সপৰিক্কমনং. সাৰম্ভে চে ভিক্খু ৱত্থুস্মিং অপৰিক্কমনে মহল্লকং ৱিহাৰং কাৰেয্য, ভিক্খূ ৱা অনভিনেয্য ৱত্থুদেসনায, সঙ্ঘাদিসেসো.
দুট্ঠদোসসিক্খাপদং
৮. যো পন ভিক্খু ভিক্খুং দুট্ঠো দোসো অপ্পতীতো অমূলকেন পাৰাজিকেন ধম্মেন অনুদ্ধংসেয্য ‘‘অপ্পেৱ নাম নং ইমম্হা ব্ৰহ্মচৰিযা চাৱেয্য’’ন্তি, ততো অপৰেন সমযেন সমনুগ্গাহীযমানো ৱা অসমনুগ্গাহীযমানো ৱা অমূলকঞ্চেৱ তং অধিকৰণং হোতি, ভিক্খু চ দোসং পতিট্ঠাতি, সঙ্ঘাদিসেসো.
অঞ্ঞভাগিযসিক্খাপদং
৯. যো পন ভিক্খু ভিক্খুং দুট্ঠো দোসো অপ্পতীতো অঞ্ঞভাগিযস্স অধিকৰণস্স কিঞ্চিদেসং লেসমত্তং উপাদায পাৰাজিকেন ধম্মেন অনুদ্ধংসেয্য ‘‘অপ্পেৱ নাম নং ইমম্হা ব্ৰহ্মচৰিযা চাৱেয্য’’ন্তি, ততো অপৰেন সমযেন সমনুগ্গাহীযমানো ৱা অসমনুগ্গাহীযমানো ৱা অঞ্ঞভাগিযঞ্চেৱ তং অধিকৰণং হোতি কোচিদেসো লেসমত্তো উপাদিন্নো, ভিক্খু চ দোসং পতিট্ঠাতি, সঙ্ঘাদিসেসো.
সঙ্ঘভেদসিক্খাপদং
১০. যো পন ভিক্খু সমগ্গস্স সঙ্ঘস্স ভেদায পৰক্কমেয্য, ভেদনসংৱত্তনিকং ৱা অধিকৰণং সমাদায পগ্গয্হ তিট্ঠেয্য, সো ভিক্খু ভিক্খূহি এৱমস্স ৱচনীযো ‘‘মাযস্মা সমগ্গস্স সঙ্ঘস্স ভেদায পৰক্কমি, ভেদনসংৱত্তনিকং ৱা অধিকৰণং সমাদায পগ্গয্হ অট্ঠাসি, সমেতাযস্মা সঙ্ঘেন, সমগ্গো হি সঙ্ঘো সম্মোদমানো অৱিৱদমানো একুদ্দেসো ফাসু ৱিহৰতী’’তি, এৱঞ্চ সো ভিক্খু ভিক্খূহি ৱুচ্চমানো তথেৱ পগ্গণ্হেয্য, সো ভিক্খু ভিক্খূহি যাৱততিযং সমনুভাসিতব্বো তস্স পটিনিস্সগ্গায, যাৱততিযঞ্চে সমনুভাসিযমানো তং পটিনিস্সজ্জেয্য, ইচ্চেতং কুসলং, নো চে পটিনিস্সজ্জেয্য, সঙ্ঘাদিসেসো.
ভেদানুৱত্তকসিক্খাপদং
১১. তস্সেৱ খো পন ভিক্খুস্স ভিক্খূ হোন্তি অনুৱত্তকা ৱগ্গৱাদকা একো ৱা দ্ৱে ৱা তযো ৱা, তে এৱং ৱদেয্যুং ‘‘মাযস্মন্তো এতং ভিক্খুং কিঞ্চি অৱচুত্থ, ধম্মৱাদী চেসো ভিক্খু, ৱিনযৱাদী চেসো ভিক্খু, অম্হাকঞ্চেসো ভিক্খু ছন্দঞ্চ ৰুচিঞ্চ আদায ৱোহৰতি, জানাতি, নো ভাসতি, অম্হাকম্পেতং খমতী’’তি, তে ভিক্খূ ভিক্খূহি এৱমস্সু ৱচনীযা ‘‘মাযস্মন্তো এৱং অৱচুত্থ, ন চেসো ভিক্খু ধম্মৱাদী, ন চেসো ভিক্খু ৱিনযৱাদী, মাযস্মন্তানম্পি সঙ্ঘভেদো ৰুচ্চিত্থ, সমেতাযস্মন্তানং সঙ্ঘেন, সমগ্গো হি সঙ্ঘো সম্মোদমানো অৱিৱদমানো একুদ্দেসো ফাসু ৱিহৰতী’’তি, এৱঞ্চ তে ভিক্খূ ভিক্খূহি ৱুচ্চমানা তথেৱ পগ্গণ্হেয্যুং, তে ভিক্খূ ভিক্খূহি যাৱততিযং সমনুভাসিতব্বা তস্স পটিনিস্সগ্গায, যাৱততিযঞ্চে সমনুভাসিযমানা তং পটিনিস্সজ্জেয্যুং, ইচ্চেতং কুসলং, নো চে পটিনিস্সজ্জেয্যুং, সঙ্ঘাদিসেসো.
দুব্বচসিক্খাপদং
১২. ভিক্খু পনেৱ দুব্বচজাতিকো হোতি উদ্দেসপৰিযাপন্নেসু সিক্খাপদেসু ভিক্খূহি সহধম্মিকং ৱুচ্চমানো অত্তানং অৱচনীযং কৰোতি ‘‘মা মং আযস্মন্তো কিঞ্চি অৱচুত্থ কল্যাণং ৱা পাপকং ৱা, অহম্পাযস্মন্তে ন কিঞ্চি ৱক্খামি কল্যাণং ৱা পাপকং ৱা, ৱিৰমথাযস্মন্তো মম ৱচনাযা’’তি, সো ভিক্খু ভিক্খূহি এৱমস্স ৱচনীযো ‘‘মাযস্মা অত্তানং অৱচনীযং অকাসি, ৱচনীযমেৱাযস্মা অত্তানং কৰোতু, আযস্মাপি ভিক্খূ ৱদতু সহধম্মেন, ভিক্খূপি আযস্মন্তং ৱক্খন্তি সহধম্মেন, এৱং সংৱদ্ধা হি তস্স ভগৱতো পৰিসা যদিদং অঞ্ঞমঞ্ঞৱচনেন অঞ্ঞমঞ্ঞৱুট্ঠাপনেনা’’তি, এৱঞ্চ সো ভিক্খু ভিক্খূহি ৱুচ্চমানো তথেৱ পগ্গণ্হেয্য, সো ভিক্খু ভিক্খূহি যাৱততিযং সমনুভাসিতব্বো তস্স পটিনিস্সগ্গায, যাৱততিযঞ্চে সমনুভাসিযমানো তং পটিনিস্সজ্জেয্য, ইচ্চেতং কুসলং, নো চে পটিনিস্সজ্জেয্য, সঙ্ঘাদিসেসো.
কুলদূসকসিক্খাপদং
১৩. ভিক্খু পনেৱ অঞ্ঞতৰং গামং ৱা নিগমং ৱা উপনিস্সায ৱিহৰতি কুলদূসকো পাপসমাচাৰো, তস্স খো পাপকা সমাচাৰা দিস্সন্তি চেৱ সুয্যন্তি চ, কুলানি চ তেন দুট্ঠানি দিস্সন্তি চেৱ সুয্যন্তি চ, সো ভিক্খু ভিক্খূহি এৱমস্স ৱচনীযো ‘‘আযস্মা খো কুলদূসকো পাপসমাচাৰো, আযস্মতো খো পাপকা সমাচাৰা দিস্সন্তি চেৱ সুয্যন্তি চ, কুলানি চাযস্মতা দুট্ঠানি দিস্সন্তি চেৱ সুয্যন্তি চ, পক্কমতাযস্মা ইমম্হা আৱাসা, অলং তে ইধ ৱাসেনা’’তি, এৱঞ্চ সো ভিক্খু ভিক্খূহি ৱুচ্চমানো তে ভিক্খূ এৱং ৱদেয্য ‘‘ছন্দগামিনো চ ভিক্খূ, দোসগামিনো চ ভিক্খূ, মোহগামিনো চ ভিক্খূ, ভযগামিনো চ ভিক্খূ তাদিসিকায আপত্তিযা একচ্চং পব্বাজেন্তি, একচ্চং ন পব্বাজেন্তী’’তি, সো ভিক্খু ভিক্খূহি এৱমস্স ৱচনীযো ‘‘মাযস্মা এৱং অৱচ, ন চ ভিক্খূ ছন্দগামিনো, ন চ ভিক্খূ দোসগামিনো, ন চ ভিক্খূ মোহগামিনো, ন চ ভিক্খূ ভযগামিনো, আযস্মা খো কুলদূসকো পাপসমাচাৰো, আযস্মতো খো পাপকা সমাচাৰা দিস্সন্তি চেৱ সুয্যন্তি চ, কুলানি চাযস্মতা দুট্ঠানি দিস্সন্তি চেৱ সুয্যন্তি চ, পক্কমতাযস্মা ইমম্হা আৱাসা, অলং তে ইধ ৱাসেনা’’তি, এৱঞ্চ সো ভিক্খু ভিক্খূহি ৱুচ্চমানো তথেৱ পগ্গণ্হেয্য, সো ভিক্খু ভিক্খূহি যাৱততিযং সমনুভাসিতব্বো তস্স পটিনিস্সগ্গায, যাৱততিযঞ্চে সমনুভাসিযমানো তং পটিনিস্সজ্জেয্য, ইচ্চেতং কুসলং, নো চে পটিনিস্সজ্জেয্য, সঙ্ঘাদিসেসো.
উদ্দিট্ঠা খো আযস্মন্তো তেৰস সঙ্ঘাদিসেসা ধম্মা নৱ পঠমাপত্তিকা, চত্তাৰো যাৱততিযকা. যেসং ভিক্খু অঞ্ঞতৰং ৱা অঞ্ঞতৰং ৱা আপজ্জিত্ৱা যাৱতীহং জানং পটিচ্ছাদেতি, তাৱতীহং তেন ভিক্খুনা অকামা পৰিৱত্থব্বং. পৰিৱুত্থপৰিৱাসেন ভিক্খুনা উত্তৰি ছাৰত্তং ভিক্খুমানত্তায পটিপজ্জিতব্বং, চিণ্ণমানত্তো ভিক্খু যত্থ সিযা ৱীসতিগণো ভিক্খুসঙ্ঘো, তত্থ সো ভিক্খু অব্ভেতব্বো. একেনপি চে ঊনো ৱীসতিগণো ভিক্খুসঙ্ঘো তং ভিক্খুং অব্ভেয্য, সো চ ভিক্খু অনব্ভিতো, তে চ ভিক্খূ গাৰয্হা, অযং তত্থ সামীচি. তত্থাযস্মন্তে পুচ্ছামি, কচ্চিত্থ পৰিসুদ্ধা, দুতিযম্পি পুচ্ছামি, কচ্চিত্থ পৰিসুদ্ধা, ততিযম্পি পুচ্ছামি, কচ্চিত্থ পৰিসুদ্ধা, পৰিসুদ্ধেত্থাযস্মন্তো, তস্মা তুণ্হী, এৱমেতং ধাৰযামীতি.
সঙ্ঘাদিসেসো নিট্ঠিতো.
অনিযতুদ্দেসো
ইমে খো পনাযস্মন্তো দ্ৱে অনিযতা ধম্মা
উদ্দেসং আগচ্ছন্তি.
পঠমঅনিযতসিক্খাপদং
১. যো পন ভিক্খু মাতুগামেন সদ্ধিং একো একায ৰহো পটিচ্ছন্নে আসনে অলংকম্মনিযে নিসজ্জং কপ্পেয্য, তমেনং সদ্ধেয্যৱচসা উপাসিকা দিস্ৱা তিণ্ণং ধম্মানং অঞ্ঞতৰেন ৱদেয্য পাৰাজিকেন ৱা সঙ্ঘাদিসেসেন ৱা পাচিত্তিযেন ৱা, নিসজ্জং ভিক্খু পটিজানমানো তিণ্ণং ধম্মানং অঞ্ঞতৰেন কাৰেতব্বো পাৰাজিকেন ৱা সঙ্ঘাদিসেসেন ৱা পাচিত্তিযেন ৱা, যেন ৱা সা সদ্ধেয্যৱচসা উপাসিকা ৱদেয্য, তেন সো ভিক্খু কাৰেতব্বো, অযং ধম্মো অনিযতো.
দুতিযঅনিযতসিক্খাপদং
২. ন হেৱ খো পন পটিচ্ছন্নং আসনং হোতি নালংকম্মনিযং, অলঞ্চ খো হোতি মাতুগামং দুট্ঠুল্লাহি ৱাচাহি ওভাসিতুং, যো পন ভিক্খু তথাৰূপে আসনে মাতুগামেন সদ্ধিং একো একায ৰহো নিসজ্জং কপ্পেয্য, তমেনং সদ্ধেয্যৱচসা উপাসিকা দিস্ৱা দ্ৱিন্নং ধম্মানং অঞ্ঞতৰেন ৱদেয্য সঙ্ঘাদিসেসেন ৱা পাচিত্তিযেন ৱা, নিসজ্জং ভিক্খু পটিজানমানো দ্ৱিন্নং ধম্মানং অঞ্ঞতৰেন কাৰেতব্বো সঙ্ঘাদিসেসেন ৱা পাচিত্তিযেন ৱা, যেন ৱা সা সদ্ধেয্যৱচসা উপাসিকা ৱদেয্য, তেন সো ভিক্খু কাৰেতব্বো, অযম্পি ধম্মো অনিযতো.
উদ্দিট্ঠা খো আযস্মন্তো দ্ৱে অনিযতা ধম্মা. তত্থাযস্মন্তে পুচ্ছামি, কচ্চিত্থ পৰিসুদ্ধা, দুতিযম্পি পুচ্ছামি, কচ্চিত্থ পৰিসুদ্ধা, ততিযম্পি পুচ্ছামি, কচ্চিত্থ পৰিসুদ্ধা, পৰিসুদ্ধেত্থাযস্মন্তো, তস্মা তুণ্হী, এৱমেতং ধাৰযামীতি.
অনিযতো নিট্ঠিতো.
নিস্সগ্গিযপাচিত্তিযা
ইমে খো পনাযস্মন্তো তিংস নিস্সগ্গিযা পাচিত্তিযা
ধম্মা উদ্দেসং আগচ্ছন্তি.
কথিনসিক্খাপদং
১. নিট্ঠিতচীৱৰস্মিং ভিক্খুনা উব্ভতস্মিং কথিনে দসাহপৰমং অতিৰেকচীৱৰং ধাৰেতব্বং, তং অতিক্কামযতো নিস্সগ্গিযং পাচিত্তিযং.
উদোসিতসিক্খাপদং
২. নিট্ঠিতচীৱৰস্মিং ভিক্খুনা উব্ভতস্মিং কথিনে একৰত্তম্পি চে ভিক্খু তিচীৱৰেন ৱিপ্পৱসেয্য, অঞ্ঞত্ৰ ভিক্খুসম্মুতিযা নিস্সগ্গিযং পাচিত্তিযং.
অকালচীৱৰসিক্খাপদং
৩. নিট্ঠিতচীৱৰস্মিং ভিক্খুনা উব্ভতস্মিং কথিনে ভিক্খুনো পনেৱ অকালচীৱৰং উপ্পজ্জেয্য, আকঙ্খমানেন ভিক্খুনা পটিগ্গহেতব্বং, পটিগ্গহেত্ৱা খিপ্পমেৱ কাৰেতব্বং, নো চস্স পাৰিপূৰি, মাসপৰমং তেন ভিক্খুনা তং চীৱৰং নিক্খিপিতব্বং ঊনস্স পাৰিপূৰিযা সতিযা পচ্চাসায. ততো চে উত্তৰি নিক্খিপেয্য সতিযাপি পচ্চাসায, নিস্সগ্গিযং পাচিত্তিযং.
পুৰাণচীৱৰসিক্খাপদং
৪. যো পন ভিক্খু অঞ্ঞাতিকায ভিক্খুনিযা পুৰাণচীৱৰং ধোৱাপেয্য ৱা ৰজাপেয্য ৱা আকোটাপেয্য ৱা, নিস্সগ্গিযং পাচিত্তিযং.
চীৱৰপটিগ্গহণসিক্খাপদং
৫. যো পন ভিক্খু অঞ্ঞাতিকায ভিক্খুনিযা হত্থতো চীৱৰং পটিগ্গণ্হেয্য অঞ্ঞত্ৰ পাৰিৱত্তকা, নিস্সগ্গিযং পাচিত্তিযং.
অঞ্ঞাতকৱিঞ্ঞত্তিসিক্খাপদং
৬. যো পন ভিক্খু অঞ্ঞাতকং গহপতিং ৱা গহপতানিং ৱা চীৱৰং ৱিঞ্ঞাপেয্য অঞ্ঞত্ৰ সমযা, নিস্সগ্গিযং পাচিত্তিযং. তত্থাযং সমযো, অচ্ছিন্নচীৱৰো ৱা হোতি ভিক্খু, নট্ঠচীৱৰো ৱা, অযং তত্থ সমযো.
ততুত্তৰিসিক্খাপদং
৭. তঞ্চে অঞ্ঞাতকো গহপতি ৱা গহপতানী ৱা বহূহি চীৱৰেহি অভিহট্ঠুং পৱাৰেয্য, সন্তৰুত্তৰপৰমং তেন ভিক্খুনা ততো চীৱৰং সাদিতব্বং. ততো চে উত্তৰি সাদিযেয্য, নিস্সগ্গিযং পাচিত্তিযং.
পঠমউপক্খটসিক্খাপদং
৮. ভিক্খুং পনেৱ উদ্দিস্স অঞ্ঞাতকস্স গহপতিস্স ৱা গহপতানিযা ৱা চীৱৰচেতাপন্নং উপক্খটং হোতি ‘‘ইমিনা চীৱৰচেতাপন্নেন চীৱৰং চেতাপেত্ৱা ইত্থন্নামং ভিক্খুং চীৱৰেন অচ্ছাদেস্সামী’’তি, তত্ৰ চে সো ভিক্খু পুব্বে অপ্পৱাৰিতো উপসঙ্কমিত্ৱা চীৱৰে ৱিকপ্পং আপজ্জেয্য ‘‘সাধু ৱত মং আযস্মা ইমিনা চীৱৰচেতাপন্নেন এৱৰূপং ৱা এৱৰূপং ৱা চীৱৰং চেতাপেত্ৱা অচ্ছাদেহী’’তি কল্যাণকম্যতং উপাদায, নিস্সগ্গিযং পাচিত্তিযং.
দুতিযউপক্খটসিক্খাপদং
৯. ভিক্খুং পনেৱ উদ্দিস্স উভিন্নং অঞ্ঞাতকানং গহপতীনং ৱা গহপতানীনং ৱা পচ্চেকচীৱৰচেতাপন্নানি উপক্খটানি হোন্তি ‘‘ইমেহি মযং পচ্চেকচীৱৰচেতাপন্নেহি পচ্চেকচীৱৰানি চেতাপেত্ৱা ইত্থন্নামং ভিক্খুং চীৱৰেহি অচ্ছাদেস্সামা’’তি, তত্ৰ চে সো ভিক্খু পুব্বে অপ্পৱাৰিতো উপসঙ্কমিত্ৱা চীৱৰে ৱিকপ্পং আপজ্জেয্য ‘‘সাধু ৱত মং আযস্মন্তো ইমেহি পচ্চেকচীৱৰচেতাপন্নেহি এৱৰূপং ৱা এৱৰূপং ৱা চীৱৰং চেতাপেত্ৱা অচ্ছাদেথ উভোৱ সন্তা একেনা’’তি কল্যাণকম্যতং উপাদায, নিস্সগ্গিযং পাচিত্তিযং.
ৰাজসিক্খাপদং
১০. ভিক্খুং পনেৱ উদ্দিস্স ৰাজা ৱা ৰাজভোগ্গো ৱা ব্ৰাহ্মণো ৱা গহপতিকো ৱা দূতেন চীৱৰচেতাপন্নং পহিণেয্য ‘‘ইমিনা চীৱৰচেতাপন্নেন চীৱৰং চেতাপেত্ৱা ইত্থন্নামং ভিক্খুং চীৱৰেন অচ্ছাদেহী’’তি. সো চে দূতো তং ভিক্খুং উপসঙ্কমিত্ৱা এৱং ৱদেয্য ‘‘ইদং খো, ভন্তে, আযস্মন্তং উদ্দিস্স চীৱৰচেতাপন্নং আভতং, পটিগ্গণ্হাতু আযস্মা চীৱৰচেতাপন্ন’’ন্তি. তেন ভিক্খুনা সো দূতো এৱমস্স ৱচনীযো ‘‘ন খো মযং, আৱুসো, চীৱৰচেতাপন্নং পটিগ্গণ্হাম, চীৱৰঞ্চ খো মযং পটিগ্গণ্হাম কালেন কপ্পিয’’ন্তি. সো চে দূতো তং ভিক্খুং এৱং ৱদেয্য ‘‘অত্থি পনাযস্মতো কোচি ৱেয্যাৱচ্চকৰো’’তি. চীৱৰত্থিকেন, ভিক্খৱে, ভিক্খুনা ৱেয্যাৱচ্চকৰো নিদ্দিসিতব্বো আৰামিকো ৱা উপাসকো ৱা ‘‘এসো খো, আৱুসো, ভিক্খূনং ৱেয্যাৱচ্চকৰো’’তি. সো চে দূতো তং ৱেয্যাৱচ্চকৰং সঞ্ঞাপেত্ৱা তং ভিক্খুং উপসঙ্কমিত্ৱা এৱং ৱদেয্য ‘‘যং খো, ভন্তে, আযস্মা ৱেয্যাৱচ্চকৰং নিদ্দিসি, সঞ্ঞত্তো সো মযা, উপসঙ্কমতাযস্মা কালেন, চীৱৰেন তং অচ্ছাদেস্সতী’’তি. চীৱৰত্থিকেন, ভিক্খৱে, ভিক্খুনা ৱেয্যাৱচ্চকৰো উপসঙ্কমিত্ৱা দ্ৱত্তিক্খত্তুং চোদেতব্বো সাৰেতব্বো ‘‘অত্থো মে, আৱুসো, চীৱৰেনা’’তি, দ্ৱত্তিক্খত্তুং চোদযমানো সাৰযমানো তং চীৱৰং অভিনিপ্ফাদেয্য, ইচ্চেতং কুসলং, নো চে অভিনিপ্ফাদেয্য, চতুক্খত্তুং পঞ্চক্খত্তুং ছক্খত্তুপৰমং তুণ্হীভূতেন উদ্দিস্স ঠাতব্বং, চতুক্খত্তুং পঞ্চক্খত্তুং ছক্খত্তুপৰমং তুণ্হীভূতো উদ্দিস্স তিট্ঠমানো তং চীৱৰং অভিনিপ্ফাদেয্য, ইচ্চেতং কুসলং, ততো চে উত্তৰি ৱাযমমানো তং চীৱৰং অভিনিপ্ফাদেয্য, নিস্সগ্গিযং পাচিত্তিযং. নো চে অভিনিপ্ফাদেয্য, যতস্স চীৱৰচেতাপন্নং আভতং, তত্থ সামং ৱা গন্তব্বং, দূতো ৱা পাহেতব্বো ‘‘যং খো তুম্হে আযস্মন্তো ভিক্খুং উদ্দিস্স চীৱৰচেতাপন্নং পহিণিত্থ, ন তং তস্স ভিক্খুনো কিঞ্চি অত্থং অনুভোতি, যুঞ্জন্তাযস্মন্তো সকং, মা ৱো সকং ৱিনস্সা’’তি, অযং তত্থ সামীচি.
কথিনৱগ্গো পঠমো.
কোসিযসিক্খাপদং
১১. যো পন ভিক্খু কোসিযমিস্সকং সন্থতং কাৰাপেয্য, নিস্সগ্গিযং পাচিত্তিযং.
সুদ্ধকাড়কসিক্খাপদং
১২. যো পন ভিক্খু সুদ্ধকাড়কানং এড়কলোমানং সন্থতং কাৰাপেয্য, নিস্সগ্গিযং পাচিত্তিযং.
দ্ৱেভাগসিক্খাপদং
১৩. নৱং পন ভিক্খুনা সন্থতং কাৰযমানেন দ্ৱে ভাগা সুদ্ধকাড়কানং এড়কলোমানং আদাতব্বা, ততিযং ওদাতানং, চতুত্থং গোচৰিযানং. অনাদা চে ভিক্খু দ্ৱে ভাগে সুদ্ধকাড়কানং এড়কলোমানং, ততিযং ওদাতানং, চতুত্থং গোচৰিযানং, নৱং সন্থতং কাৰাপেয্য, নিস্সগ্গিযং পাচিত্তিযং.
ছব্বস্সসিক্খাপদং
১৪. নৱং পন ভিক্খুনা সন্থতং কাৰাপেত্ৱা ছব্বস্সানি ধাৰেতব্বং, ওৰেন চে ছন্নং ৱস্সানং তং সন্থতং ৱিস্সজ্জেত্ৱা ৱা অৱিস্সজ্জেত্ৱা ৱা অঞ্ঞং নৱং সন্থতং কাৰাপেয্য অঞ্ঞত্ৰ ভিক্খুসম্মুতিযা, নিস্সগ্গিযং পাচিত্তিযং.
নিসীদনসন্থতসিক্খাপদং
১৫. নিসীদনসন্থতং পন ভিক্খুনা কাৰযমানেন পুৰাণসন্থতস্স সামন্তা সুগতৱিদত্থি আদাতব্বা দুব্বণ্ণকৰণায. অনাদা চে ভিক্খু পুৰাণসন্থ তস্স সামন্তা সুগতৱিদত্থিং, নৱং নিসীদনসন্থতং কাৰাপেয্য, নিস্সগ্গিযং পাচিত্তিযং.
এড়কলোমসিক্খাপদং
১৬. ভিক্খুনো পনেৱ অদ্ধানমগ্গপ্পটিপন্নস্স এড়কলোমানি উপ্পজ্জেয্যুং, আকঙ্খমানেন ভিক্খুনা পটিগ্গহেতব্বানি, পটিগ্গহেত্ৱা তিযোজনপৰমং সহত্থা হৰিতব্বানি অসন্তে হাৰকে. ততো চে উত্তৰি হৰেয্য, অসন্তেপি হাৰকে, নিস্সগ্গিযং পাচিত্তিযং.
এড়কলোমধোৱাপনসিক্খাপদং
১৭. যো পন ভিক্খু অঞ্ঞাতিকায ভিক্খুনিযা এড়কলোমানি ধোৱাপেয্য ৱা ৰজাপেয্য ৱা ৱিজটাপেয্য ৱা, নিস্সগ্গিযং পাচিত্তিযং.
ৰূপিযসিক্খাপদং
১৮. যো পন ভিক্খু জাতৰূপৰজতং উগ্গণ্হেয্য ৱা উগ্গণ্হাপেয্য ৱা উপনিক্খিত্তং ৱা সাদিযেয্য, নিস্সগ্গিযং পাচিত্তিযং.
ৰূপিযসংৱোহাৰসিক্খাপদং
১৯. যো পন ভিক্খু নানপ্পকাৰকং ৰূপিযসংৱোহাৰং সমাপজ্জেয্য, নিস্সগ্গিযং পাচিত্তিযং.
কযৱিক্কযসিক্খাপদং
২০. যো পন ভিক্খু নানপ্পকাৰকং কযৱিক্কযং সমাপজ্জেয্য, নিস্সগ্গিযং পাচিত্তিযং.
কোসিযৱগ্গো দুতিযো.
পত্তসিক্খাপদং
২১. দসাহপৰমং অতিৰেকপত্তো ধাৰেতব্বো, তং অতিক্কামযতো নিস্সগ্গিযং পাচিত্তিযং.
ঊনপঞ্চবন্ধনসিক্খাপদং
২২. যো পন ভিক্খু ঊনপঞ্চবন্ধনেন পত্তেন অঞ্ঞং নৱং পত্তং চেতাপেয্য, নিস্সগ্গিযং পাচিত্তিযং. তেন ভিক্খুনা সো পত্তো ভিক্খুপৰিসায নিস্সজ্জিতব্বো, যো চ তস্সা ভিক্খুপৰিসায পত্তপৰিযন্তো, সো তস্স ভিক্খুনো পদাতব্বো ‘‘অযং তে ভিক্খু পত্তো যাৱ ভেদনায ধাৰেতব্বো’’তি, অযং তত্থ সামীচি.
ভেসজ্জসিক্খাপদং
২৩. যানি খো পন তানি গিলানানং ভিক্খূনং পটিসাযনীযানি ভেসজ্জানি, সেয্যথিদং – সপ্পি নৱনীতং তেলং মধু ফাণিতং, তানি পটিগ্গহেত্ৱা সত্তাহপৰমং সন্নিধিকাৰকং পৰিভুঞ্জিতব্বানি, তং অতিক্কামযতো নিস্সগ্গিযং পাচিত্তিযং.
ৱস্সিকসাটিকসিক্খাপদং
২৪. ‘‘মাসো সেসো গিম্হান’’ন্তি ভিক্খুনা ৱস্সিকসাটিকচীৱৰং পৰিযেসিতব্বং, ‘‘অদ্ধমাসো সেসো গিম্হান’’ন্তি কত্ৱা নিৱাসেতব্বং. ওৰেন চে ‘‘মাসো সেসো গিম্হান’’ন্তি ৱস্সিকসাটিকচীৱৰং পৰিযেসেয্য, ওৰেন‘‘দ্ধমাসো সেসো গিম্হান’’ন্তি কত্ৱা নিৱাসেয্য, নিস্সগ্গিযং পাচিত্তিযং.
চীৱৰঅচ্ছিন্দনসিক্খাপদং
২৫. যো পন ভিক্খু ভিক্খুস্স সামং চীৱৰং দত্ৱা কুপিতো অনত্তমনো অচ্ছিন্দেয্য ৱা অচ্ছিন্দাপেয্য ৱা, নিস্সগ্গিযং পাচিত্তিযং.
সুত্তৱিঞ্ঞত্তিসিক্খাপদং
২৬. যো পন ভিক্খু সামং সুত্তং ৱিঞ্ঞাপেত্ৱা তন্তৱাযেহি চীৱৰং ৱাযাপেয্য, নিস্সগ্গিযং পাচিত্তিযং.
মহাপেসকাৰসিক্খাপদং
২৭. ভিক্খুং পনেৱ উদ্দিস্স অঞ্ঞাতকো গহপতি ৱা গহপতানী ৱা তন্তৱাযেহি চীৱৰং ৱাযাপেয্য, তত্ৰ চে সো ভিক্খু পুব্বে অপ্পৱাৰিতো তন্তৱাযে উপসঙ্কমিত্ৱা চীৱৰে ৱিকপ্পং আপজ্জেয্য ‘‘ইদং খো, আৱুসো, চীৱৰং মং উদ্দিস্স ৱিয্যতি, আযতঞ্চ কৰোথ, ৱিত্থতঞ্চ, অপ্পিতঞ্চ, সুৱীতঞ্চ, সুপ্পৱাযিতঞ্চ, সুৱিলেখিতঞ্চ, সুৱিতচ্ছিতঞ্চ কৰোথ, অপ্পেৱ নাম মযম্পি আযস্মন্তানং কিঞ্চিমত্তং অনুপদজ্জেয্যামা’’তি. এৱঞ্চ সো ভিক্খু ৱত্ৱা কিঞ্চিমত্তং অনুপদজ্জেয্য অন্তমসো পিণ্ডপাতমত্তম্পি, নিস্সগ্গিযং পাচিত্তিযং.
অচ্চেকচীৱৰসিক্খাপদং
২৮. দসাহানাগতং কত্তিকতেমাসিকপুণ্ণমং ভিক্খুনো পনেৱ অচ্চেকচীৱৰং উপ্পজ্জেয্য, অচ্চেকং মঞ্ঞমানেন ভিক্খুনা পটিগ্গহেতব্বং, পটিগ্গহেত্ৱা যাৱ চীৱৰকালসমযং নিক্খিপিতব্বং. ততো চে উত্তৰি নিক্খিপেয্য, নিস্সগ্গিযং পাচিত্তিযং.
সাসঙ্কসিক্খাপদং
২৯. উপৱস্সং খো পন কত্তিকপুণ্ণমং যানি খো পন তানি আৰঞ্ঞকানি সেনাসনানি সাসঙ্কসম্মতানি সপ্পটিভযানি, তথাৰূপেসু ভিক্খু সেনাসনেসু ৱিহৰন্তো আকঙ্খমানো তিণ্ণং চীৱৰানং অঞ্ঞতৰং চীৱৰং অন্তৰঘৰে নিক্খিপেয্য, সিযা চ তস্স ভিক্খুনো কোচিদেৱ পচ্চযো তেন চীৱৰেন ৱিপ্পৱাসায, ছাৰত্তপৰমং তেন ভিক্খুনা তেন চীৱৰেন ৱিপ্পৱসিতব্বং. ততো চে উত্তৰি ৱিপ্পৱসেয্য অঞ্ঞত্ৰ ভিক্খুসম্মুতিযা, নিস্সগ্গিযং পাচিত্তিযং.
পৰিণতসিক্খাপদং
৩০. যো পন ভিক্খু জানং সঙ্ঘিকং লাভং পৰিণতং অত্তনো পৰিণামেয্য, নিস্সগ্গিযং পাচিত্তিযং.
পত্তৱগ্গো ততিযো.
উদ্দিট্ঠা খো আযস্মন্তো তিংস নিস্সগ্গিযা পাচিত্তিযা ধম্মা. তত্থাযস্মন্তে পুচ্ছামি, কচ্চিত্থ পৰিসুদ্ধা, দুতিযম্পি পুচ্ছামি, কচ্চিত্থ পৰিসুদ্ধা, ততিযম্পি পুচ্ছামি, কচ্চিত্থ পৰিসুদ্ধা, পৰিসুদ্ধেত্থাযস্মন্তো, তস্মা তুণ্হী, এৱমেতং ধাৰযামীতি.
নিস্সগ্গিযপাচিত্তিযা নিট্ঠিতা.
সুদ্ধপাচিত্তিযা
ইমে খো পনাযস্মন্তো দ্ৱেনৱুতি পাচিত্তিযা
ধম্মা উদ্দেসং আগচ্ছন্তি.
মুসাৱাদসিক্খাপদং
১. সম্পজানমুসাৱাদে পাচিত্তিযং.
ওমসৱাদসিক্খাপদং
২. ওমসৱাদে পাচিত্তিযং.
পেসুঞ্ঞসিক্খাপদং
৩. ভিক্খুপেসুঞ্ঞে পাচিত্তিযং.
পদসোধম্মসিক্খাপদং
৪. যো পন ভিক্খু অনুপসম্পন্নং পদসো ধম্মং ৱাচেয্য, পাচিত্তিযং.