৮. উয্যুত্তসেনাসিক্খাপদৱণ্ণনা

অট্ঠমে উয্যুত্তন্তি কতউয্যোগং, গামতো নিক্খন্তন্তি অত্থো. সেনন্তি চতুৰঙ্গিনিং. অঞ্ঞত্ৰ তথাৰূপপ্পচ্চযাতি তথাৰূপে কাৰণে অসতি কেৱলং সেনং দস্সনত্থায গচ্ছতো পদে পদে দুক্কটং, দস্সনূপচাৰে ঠত্ৱা পস্সতো পাচিত্তিযং. দস্সনূপচাৰো নাম যত্থ ঠিতো পস্সতি, তং পন ৱিজহিত্ৱা পুনপ্পুনং পস্সতো পযোগে পযোগে পাচিত্তিযং.

সাৱত্থিযং ছব্বগ্গিযে আৰব্ভ সেনাদস্সনৱত্থুস্মিং পঞ্ঞত্তং, ‘‘অঞ্ঞত্ৰ তথাৰূপপ্পচ্চযা’’তি অযমেত্থ অনুপঞ্ঞত্তি, সাধাৰণপঞ্ঞত্তি, অনাণত্তিকং, তিকপাচিত্তিযং, হত্থিআদীসু একমেকং দস্সনায গমনে ৱুত্তনযেনেৱ দুক্কটং, তথা অনুয্যুত্তে উয্যুত্তসঞ্ঞিনো, ৱেমতিকস্স চ দুক্কটং. অনুয্যুত্তসঞ্ঞিনো পন, আৰামে ঠত্ৱা অত্তনো ঠিতোকাসং আগতং, পটিপথং আগচ্ছন্তঞ্চ পস্সতো, তথাৰূপপ্পচ্চযে, আপদাসু, উম্মত্তকাদীনঞ্চ অনাপত্তি. উয্যুত্তসেনং দস্সনত্থায গমনং, অনুঞ্ঞাতোকাসতো অঞ্ঞত্ৰ দস্সনং, তথাৰূপপ্পচ্চযস্স আপদায ৱা অভাৱোতি ইমানেত্থ চত্তাৰি অঙ্গানি. সমুট্ঠানাদীনি এড়কলোমসদিসানি, ইদং পন লোকৱজ্জং, অকুসলচিত্তং, তিৱেদনন্তি.

উয্যুত্তসেনাসিক্খাপদৱণ্ণনা নিট্ঠিতা.