৯. সেনাৱাসসিক্খাপদৱণ্ণনা

নৱমে ততো চে উত্তৰীতি তিৰত্ততো উত্তৰি চতুত্থদিৱসে অত্থঙ্গতে সূৰিযে সেনায তিট্ঠতু ৱা নিসীদতু ৱা সযতু ৱা, সচেপি আকাসে ইদ্ধিযা কঞ্চি ইৰিযাপথং কপ্পেতি, পাচিত্তিযমেৱ.

সাৱত্থিযং ছব্বগ্গিযে আৰব্ভ অতিৰেকতিৰত্তং সেনায ৱসনৱত্থুস্মিং পঞ্ঞত্তং, সাধাৰণপঞ্ঞত্তি, অনাণত্তিকং, তিকপাচিত্তিযং, ঊনকতিৰত্তে অতিৰেকসঞ্ঞিনো, ৱেমতিকস্স ৱা দুক্কটং. ঊনকসঞ্ঞিস্স, ততিযায ৰত্তিযা পুৰাৰুণা নিক্খমিত্ৱা পুন ৱসতো, গিলানস্স ৱা গিলানকৰণীযেন ৱা ৱসতো, পটিসেনাৰুদ্ধায সেনায, কেনচি পলিবুদ্ধস্স, আপদাসু, উম্মত্তকাদীনঞ্চ অনাপত্তি. তিৰত্তাতিক্কমো, সেনায সূৰিযস্স অত্থঙ্গমো, গিলানতাদীনং অভাৱোতি ইমানেত্থ তীণি অঙ্গানি. সমুট্ঠানাদীনি এড়কলোমসদিসানেৱাতি.

সেনাৱাসসিক্খাপদৱণ্ণনা নিট্ঠিতা.