৭. মহানামসিক্খাপদৱণ্ণনা

সত্তমে চতুমাসপ্পচ্চযপৱাৰণাতি চত্তাৰো মাসে গিলানপ্পচ্চযপৱাৰণা, সব্বঞ্চেতং ৱত্থুৱসেন ৱুত্তং. অযং পনেত্থ অত্থো – চতুমাসপৱাৰণা ৱা হোতু, পুনপৱাৰণা ৱা, নিচ্চপৱাৰণা ৱা, সব্বাপি সাদিতব্বা, ‘‘ইদানি মম ৰোগো নত্থী’’তি ন পটিক্খিপিতব্বা, ‘‘ৰোগে পন সতি ৱিঞ্ঞাপেস্সামী’’তি অধিৱাসেতব্বাতি. ততো চে উত্তৰি সাদিযেয্যাতি এত্থ সচে তত্থ ৰত্তীহি ৱা ভেসজ্জেহি ৱা পৰিচ্ছেদো কতো হোতি ‘‘এত্তকাযেৱ ৰত্তিযো, এত্তকানি ৱা ভেসজ্জানি ৱিঞ্ঞাপেতব্বানী’’তি, অথ ততো ৰত্তিপৰিযন্ততো ৱা ভেসজ্জপৰিযন্ততো ৱা উত্তৰি, ন ভেসজ্জকৰণীযেন ৱা ভেসজ্জং, অঞ্ঞভেসজ্জকৰণীযেন ৱা অঞ্ঞং ভেসজ্জং ৱিঞ্ঞাপেন্তস্স পাচিত্তিযং.

সক্কেসু ছব্বগ্গিযে আৰব্ভ ভেসজ্জৱিঞ্ঞাপনৱত্থুস্মিং পঞ্ঞত্তং, সাধাৰণপঞ্ঞত্তি, অনাণত্তিকং, তিকপাচিত্তিযং, নততুত্তৰি ততুত্তৰিসঞ্ঞিনো, ৱেমতিকস্স ৱা দুক্কটং. নততুত্তৰি নততুত্তৰিসঞ্ঞিস্স, যেহি ভেসজ্জেহি পৱাৰিতো, ততো অঞ্ঞেহি ৱা অধিকতৰেহি ৱা অত্থে সতি, যাসু চ ৰত্তীসু পৱাৰিতো, তা অতিক্কমিত্ৱাপি অত্থে সতি যথাভূতং আচিক্খিত্ৱা ৱিঞ্ঞাপেন্তস্স, যে চ ঞাতকে ৱা পুগ্গলিকপ্পৱাৰণায পৱাৰিতে ৱা অপৰিযন্তপৱাৰণায ৱা পৱাৰিতে, অঞ্ঞস্স ৱা অত্থায, অত্তনো ৱা ধনেন ৱিঞ্ঞাপেন্তি, তেসং, উম্মত্তকাদীনঞ্চ অনাপত্তি. সঙ্ঘপৱাৰণতা, ততো ভেসজ্জৱিঞ্ঞত্তি, অগিলানতা, পৰিযন্তাতিক্কমোতি ইমানেত্থ চত্তাৰি অঙ্গানি. সমুট্ঠানাদীনি সঞ্চৰিত্তসদিসানীতি.

মহানামসিক্খাপদৱণ্ণনা নিট্ঠিতা.