৬. চাৰিত্তসিক্খাপদৱণ্ণনা

ছট্ঠে নিমন্তিতোতি পঞ্চন্নং ভোজনানং অঞ্ঞতৰেন নিমন্তিতো. সভত্তো সমানোতি তেনেৱ নিমন্তনভত্তেন সভত্তো সমানো. সন্তং ভিক্খুং অনাপুচ্ছাতি অন্তোউপচাৰসীমায দস্সনূপচাৰে ভিক্খুং দিস্ৱা যং সক্কা হোতি পকতিৱচনেন আপুচ্ছিতুং, তাদিসং ‘‘অহং ইত্থন্নামস্স ঘৰং গচ্ছামী’’তি ৱা ‘‘চাৰিত্তং আপজ্জামী’’তি ৱা ঈদিসেন ৱচনেন অনাপুচ্ছিত্ৱা. পুৰেভত্তং ৱা পচ্ছাভত্তং ৱাতি যেন ভত্তেন নিমন্তিতো, তস্মিং ভুত্তে ৱা অভুত্তে ৱা. কুলেসু চাৰিত্তং আপজ্জেয্যাতি যস্মিং কুলে নিমন্তিতো, ততো অঞ্ঞানি কুলানি পৱিসেয্য. অঞ্ঞত্ৰ সমযা পাচিত্তিযন্তি সচে সো ভিক্খু ৱুত্তলক্খণং দুৱিধম্পি সমযং ঠপেত্ৱা অৱীতিৱত্তে মজ্ঝন্হিকে অঞ্ঞং কুলং পৱিসতি, অথস্স ঘৰূপচাৰোক্কমনে দুক্কটং, পঠমপাদেন উম্মাৰং অতিক্কমন্তস্স অপৰম্পি দুক্কটং, দুতিযপাদেন অতিক্কমে পাচিত্তিযং.

ৰাজগহে উপনন্দং আৰব্ভ চাৰিত্তাপজ্জনৱত্থুস্মিং পঞ্ঞত্তং, ‘‘সন্তং ভিক্খুং, অনাপুচ্ছা, পুৰেভত্তং পচ্ছাভত্তং, অঞ্ঞত্ৰ সমযা’’তি অযমেত্থ চতুব্বিধা অনুপঞ্ঞত্তি, সাধাৰণপঞ্ঞত্তি, অনাণত্তিকং, তিকপাচিত্তিযং, অনিমন্তিতে নিমন্তিতসঞ্ঞিস্স, ৱেমতিকস্স ৱা দুক্কটং. তস্মিং অনিমন্তিতসঞ্ঞিস্স, সমযে সন্তং ভিক্খুং আপুচ্ছিত্ৱা, অসন্তং ভিক্খুং অনাপুচ্ছিত্ৱা পৱিসতো, অঞ্ঞস্স ঘৰেন ৱা ঘৰূপচাৰেন ৱা মগ্গো হোতি, তেন গচ্ছতো, অন্তৰাৰামভিক্খুনুপস্সযতিত্থিযসেয্যপটিক্কমনভত্তিযঘৰানি গচ্ছতো, আপদাসু, উম্মত্তকাদীনঞ্চ অনাপত্তি. পঞ্চন্নং ভোজনানং অঞ্ঞতৰেন নিমন্তনসাদিযনং, সন্তং ভিক্খুং অনাপুচ্ছনা, ভত্তিযঘৰতো অঞ্ঞঘৰপ্পৱিসনং, মজ্ঝন্হিকানতিক্কমো, সমযস্স ৱা আপদানং ৱা অভাৱোতি ইমানেত্থ পঞ্চ অঙ্গানি. সমুট্ঠানাদীনি পঠমকথিনসদিসানেৱ, ইদং পন কিৰিযাকিৰিযন্তি.

চাৰিত্তসিক্খাপদৱণ্ণনা নিট্ঠিতা.