২. উয্যোজনসিক্খাপদৱণ্ণনা

দুতিযে দাপেত্ৱা ৱা অদাপেত্ৱা ৱাতি যংকিঞ্চি আমিসং দাপেত্ৱা ৱা ন দাপেত্ৱা ৱা. উয্যোজেয্যাতি মাতুগামেন সদ্ধিং হসনকীড়নৰহোনিসজ্জাদীনি কত্তুকামো ‘গচ্ছা’তিআদীনি ৱত্ৱা উয্যোজেয্য. এতদেৱাতি এতং অনাচাৰমেৱ পচ্চযং কৰিত্ৱা, ন অঞ্ঞং পতিৰূপং কাৰণং. পাচিত্তিযন্তি উয্যোজনমত্তে তাৱ দুক্কটং, যদা পনস্স সো দস্সনূপচাৰং ৱা সৱনূপচাৰং ৱা একেন পাদেন ৱিজহতি, অপৰং দুক্কটং, দুতিযেন ৱিজহিতে পাচিত্তিযং. এত্থ চ দস্সনূপচাৰস্স অজ্ঝোকাসে ঠত্ৱা দ্ৱাদসহত্থপ্পমাণং, তথা সৱনূপচাৰস্স. সচে পন অন্তৰা কুট্টদ্ৱাৰপাকাৰাদযো হোন্তি, তেহি অন্তৰিতভাৱোযেৱ উপচাৰাতিক্কমো.

সাৱত্থিযং উপনন্দং আৰব্ভ উয্যোজনৱত্থুস্মিং পঞ্ঞত্তং, সাধাৰণপঞ্ঞত্তি, উয্যোজনাণত্তিকায সাণত্তিকং, তিকপাচিত্তিযং, অনুপসম্পন্নে তিকদুক্কটং, উভিন্নম্পি কলিসাসনাৰোপনে দুক্কটমেৱ, ‘‘উভো একতো ন যাপেস্সামা’’তি এৱমাদীহি পতিৰূপকাৰণেহি উয্যোজেন্তস্স, উম্মত্তকাদীনঞ্চ অনাপত্তি. অনাচাৰং আচৰিতুকামতা, তদত্থমেৱ উপসম্পন্নস্স উয্যোজনং, এৱং উয্যোজিতস্স উপচাৰাতিক্কমোতি ইমানেত্থ তীণি অঙ্গানি. সমুট্ঠানাদীনি অদিন্নাদানসদিসানীতি.

উয্যোজনসিক্খাপদৱণ্ণনা নিট্ঠিতা.