৩. সভোজনসিক্খাপদৱণ্ণনা

ততিযে সহ উভোহি জনেহীতি সভোজনং, তস্মিং সভোজনে. অথ ৱা সভোজনেতি সভোগে, ৰাগপৰিযুট্ঠিতপুৰিসস্স হি ইত্থী ভোগো, ইত্থিযা চ পুৰিসো, তেনেৱস্স পদভাজনে ‘‘ইত্থী চেৱ হোতি, পুৰিসো চা’’তিআদি (পাচি. ২৮১) ৱুত্তং. অনুপখজ্জ নিসজ্জং কপ্পেয্যাতি অনুপৱিসিত্ৱা নিসীদেয্য, যং তস্মিং কুলে সযনিঘৰং, তস্স মহাচতুস্সালাদীসু কতস্স মহল্লকস্স পিট্ঠসঙ্ঘাটতো হত্থপাসং ৱিজহিত্ৱা অন্তোসযনস্স আসন্নে ঠানে, খুদ্দকস্স ৱা ৱেমজ্ঝং অতিক্কমিত্ৱা নিসীদেয্যাতি অত্থো, এৱং নিসিন্নস্স পাচিত্তিযং.

সাৱত্থিযং উপনন্দং আৰব্ভ অনুপখজ্জ নিসজ্জনৱত্থুস্মিং পঞ্ঞত্তং, সাধাৰণপঞ্ঞত্তি, অনাণত্তিকং, তিকপাচিত্তিযং, অসযনিঘৰে সযনিঘৰসঞ্ঞিনো, ৱেমতিকস্স ৱা দুক্কটং. নসযনিঘৰসঞ্ঞিস্স, ৱুত্তলক্খণং পদেসং অনতিক্কমিত্ৱা নিসিন্নস্স, ভিক্খুস্মিং দুতিযকে সতি, উভোসু নিক্খন্তেসু ৱা, ৱীতৰাগেসু ৱা নিসীদন্তস্স, উম্মত্তকাদীনঞ্চ অনাপত্তি. অৱীতৰাগজাযম্পতিকানং সন্নিহিততা, সযনিঘৰতা, দুতিযস্স ভিক্খুনো অভাৱো, অনুপখজ্জ নিসীদনন্তি ইমানেত্থ চত্তাৰি অঙ্গানি. সমুট্ঠানাদীনি পঠমপাৰাজিকসদিসানীতি.

সভোজনসিক্খাপদৱণ্ণনা নিট্ঠিতা.