৯. ছত্তুপাহনৱগ্গো

১. ছত্তুপাহনসিক্খাপদৱণ্ণনা

ছত্তৱগ্গস্স পঠমে ছত্তুপাহনন্তি পদভাজনে (পাচি. ১১৭৮-১১৮২) ৱুত্তলক্খণং ছত্তঞ্চ উপাহনাযো চ. ধাৰেয্যাতি পৰিভোগৱসেন মগ্গগমনে একপ্পযোগেনেৱ দিৱসম্পি ধাৰেন্তিযা একা আপত্তি. সচে পন তাদিসং ঠানং পত্ৱা ছত্তম্পি অপনামেত্ৱা উপাহনাপি ওমুঞ্চিত্ৱা পুনপ্পুনং ধাৰেতি, পযোগগণনায পাচিত্তিযং.

সাৱত্থিযং ছব্বগ্গিযা ভিক্খুনিযো আৰব্ভ ছত্তুপাহনধাৰণৱত্থুস্মিং পঞ্ঞত্তং, ‘‘অগিলানা’’তি অযমেত্থ অনুপঞ্ঞত্তি, ছত্তস্সেৱ উপাহনানংযেৱ ৱা ধাৰণে দুক্কটং, অগিলানায তিকপাচিত্তিযং, গিলানায দ্ৱিকদুক্কটং. গিলানসঞ্ঞায পন, আৰামে আৰামূপচাৰে ধাৰেন্তিযা, আপদাসু, উম্মত্তিকাদীনঞ্চ অনাপত্তি. উভিন্নং ধাৰণং, অনুঞ্ঞাতকাৰণাভাৱোতি ইমানেত্থ দ্ৱে অঙ্গানি. সমুট্ঠানাদীনি এড়কলোমসদিসানীতি.

ছত্তুপাহনসিক্খাপদৱণ্ণনা নিট্ঠিতা.

২. যানসিক্খাপদৱণ্ণনা

দুতিযে যানেনাতি ৱয্হাদিনা. এত্থাপি ওৰোহিত্ৱা পুনপ্পুনং অভিৰুহন্তিযা পযোগগণনায পাচিত্তিযং. অনাপত্তিযং ‘‘আৰামে আৰামূপচাৰে’’তি নত্থি, সেসং পঠমে ৱুত্তনযেনেৱ ৱেদিতব্বন্তি.

যানসিক্খাপদৱণ্ণনা নিট্ঠিতা.

৩. সঙ্ঘাণিসিক্খাপদৱণ্ণনা

ততিযে সঙ্ঘাণিন্তি যংকিঞ্চি কটূপগং. ধাৰেয্যাতি কটিযং পটিমুঞ্চেয্য. এত্থাপি ওমুঞ্চিত্ৱা ওমুঞ্চিত্ৱা ধাৰেন্তিযা পযোগগণনায পাচিত্তিযং.

সাৱত্থিযং অঞ্ঞতৰং ভিক্খুনিং আৰব্ভ সঙ্ঘাণিং ধাৰণৱত্থুস্মিং পঞ্ঞত্তং. আবাধপচ্চযা কটিসুত্তং ধাৰেন্তিযা, উম্মত্তিকাদীনঞ্চ অনাপত্তি. সেসং ৱুত্তনযেনেৱ ৱেদিতব্বং, ইদং পন অকুসলচিত্তন্তি.

সঙ্ঘাণিসিক্খাপদৱণ্ণনা নিট্ঠিতা.

৪. ইত্থালঙ্কাৰসিক্খাপদৱণ্ণনা

চতুত্থে ইত্থালঙ্কাৰন্তি সীসূপগাদীসু অঞ্ঞতৰং যংকিঞ্চি পিড়ন্ধনং. ইধ তস্স তস্স ৱসেন ৱত্থুগণনায আপত্তি ৱেদিতব্বা.

সাৱত্থিযং ছব্বগ্গিযা ভিক্খুনিযো আৰব্ভ ইত্থালঙ্কাৰং ধাৰণৱত্থুস্মিং পঞ্ঞত্তং, আবাধপচ্চযা কিঞ্চিদেৱ ধাৰেন্তিযা, উম্মত্তিকাদীনঞ্চ অনাপত্তি. সেসং ৱুত্তসদিসমেৱাতি.

ইত্থালঙ্কাৰসিক্খাপদৱণ্ণনা নিট্ঠিতা.

৫. গন্ধৱণ্ণকসিক্খাপদৱণ্ণনা

পঞ্চমে গন্ধৱণ্ণকেনাতি যেনকেনচি গন্ধেন চ ৱণ্ণকেন চ. ইধ গন্ধাদিযোজনতো পট্ঠায পুব্বপযোগে দুক্কটং, নহানপৰিযোসানে পাচিত্তিযং. আবাধপচ্চযা, উম্মত্তিকাদীনঞ্চ অনাপত্তি. সেসং চতুত্থসদিসমেৱাতি.

গন্ধৱণ্ণকসিক্খাপদৱণ্ণনা নিট্ঠিতা.

৬. ৱাসিতকসিক্খাপদৱণ্ণনা

ছট্ঠে ৱাসিতকেনাতি গন্ধৱাসিতকেন. পিঞ্ঞাকেনাতি তিলপিট্ঠেন. সেসং পঞ্চমসদিসমেৱাতি.

ৱাসিতকসিক্খাপদৱণ্ণনা নিট্ঠিতা.

৭. ভিক্খুনিউম্মদ্দাপনসিক্খাপদৱণ্ণনা

সত্তমে উম্মদ্দাপেয্যাতি উব্বট্টাপেয্য. পৰিমদ্দাপেয্যাতি সম্বাহাপেয্য. এত্থ চ হত্থং অমুঞ্চিত্ৱা উব্বট্টনে একাৱ আপত্তি, মোচেত্ৱা মোচেত্ৱা উব্বট্টনে পযোগগণনায আপত্তিযো. সম্বাহনেপি এসেৱ নযো.

সাৱত্থিযং সম্বহুলা ভিক্খুনিযো আৰব্ভ ভিক্খুনিযা উম্মদ্দাপনপৰিমদ্দাপনৱত্থুস্মিং পঞ্ঞত্তং, গিলানায, আপদাসু, উম্মত্তিকাদীনঞ্চ অনাপত্তি. ইধ মগ্গগমনপৰিস্সমোপি গেলঞ্ঞং, চোৰভযাদীহি সৰীৰকম্পনাদযোপি আপদা. সেসং চতুত্থে ৱুত্তনযেনেৱ ৱেদিতব্বন্তি.

ভিক্খুনিউম্মদ্দাপনসিক্খাপদৱণ্ণনা নিট্ঠিতা.

৮-৯-১০. সিক্খমানউম্মদ্দাপনাদিসিক্খাপদৱণ্ণনা

অট্ঠমনৱমদসমেসুপি সিক্খমানায সামণেৰিযা গিহিনিযাতি এত্তকমেৱ নানং. সেসং সত্তমসদিসমেৱাতি.

সিক্খমানউম্মদ্দাপনাদিসিক্খাপদৱণ্ণনা নিট্ঠিতা.

১১. অনাপুচ্ছাসিক্খাপদৱণ্ণনা

একাদসমে ভিক্খুস্স পুৰতোতি ন অভিমুখমেৱাতি অত্থো, ইদং পন উপচাৰং সন্ধায কথিতন্তি ৱেদিতব্বং. তস্মা ভিক্খুস্স উপচাৰে অন্তমসো ছমাযপি ‘‘নিসীদামি, অয্যা’’তি অনাপুচ্ছিত্ৱা নিসীদন্তিযা পাচিত্তিযং.

সাৱত্থিযং সম্বহুলা ভিক্খুনিযো আৰব্ভ অনাপুচ্ছা নিসীদনৱত্থুস্মিং পঞ্ঞত্তং, তিকপাচিত্তিযং, আপুচ্ছিতে দ্ৱিকদুক্কটং. তস্মিং আপুচ্ছিতসঞ্ঞায, গিলানায, আপদাসু, উম্মত্তিকাদীনঞ্চ অনাপত্তি. ভিক্খুস্স অনাপুচ্ছা, উপচাৰে নিসজ্জা, অনুঞ্ঞাতকাৰণাভাৱোতি ইমানেত্থ তীণি অঙ্গানি. সমুট্ঠানাদীনি কথিনসদিসানি, ইদং পন কিৰিযাকিৰিযন্তি.

অনাপুচ্ছাসিক্খাপদৱণ্ণনা নিট্ঠিতা.

১২. পঞ্হাপুচ্ছনসিক্খাপদৱণ্ণনা

দ্ৱাদসমে অনোকাসকতন্তি ‘‘অসুকস্মিং নাম ঠানে পুচ্ছামী’’তি এৱং অকতওকাসং, তস্মা সুত্তন্তে ওকাসং কাৰাপেত্ৱা ৱিনযং ৱা অভিধম্মং ৱা পুচ্ছন্তিযা পাচিত্তিযং. সেসেসুপি এসেৱ নযো, সব্বসো অকাৰিতে পন ৱত্তব্বমেৱ নত্থি.

সাৱত্থিযং সম্বহুলা ভিক্খুনিযো আৰব্ভ অনোকাসকতং ভিক্খুং পঞ্হং পুচ্ছনৱত্থুস্মিং পঞ্ঞত্তং. তত্থ তত্থ ওকাসং কাৰাপেত্ৱা পুচ্ছন্তিযা, অনোদিস্স ওকাসং কাৰাপেত্ৱা যত্থ কত্থচি পুচ্ছন্তিযা, উম্মত্তিকাদীনঞ্চ অনাপত্তি. ভিক্খুস্স অনোকাসকাৰাপনং, পঞ্হং পুচ্ছনন্তি ইমানেত্থ দ্ৱে অঙ্গানি. সমুট্ঠানাদীনি পদসোধম্মসদিসানি, ইদং পন কিৰিযাকিৰিযন্তি.

পঞ্হাপুচ্ছনসিক্খাপদৱণ্ণনা নিট্ঠিতা.

১৩. অসংকচ্চিকসিক্খাপদৱণ্ণনা

তেৰসমে অসংকচ্চিকাতি অধক্খকউব্ভনাভিমণ্ডলসঙ্খাতস্স সৰীৰস্স পটিচ্ছাদনত্থং অনুঞ্ঞাতসংকচ্চিকৱিৰহিতা. গামং পৱিসেয্যাতি এত্থ পৰিক্খিত্তস্স গামস্স পৰিক্খেপং, অপৰিক্খিত্তস্স উপচাৰং অতিক্কমন্তিযা ৱা ওক্কমন্তিযা ৱা পঠমপাদে দুক্কটং, দুতিযে পাচিত্তিযং.

সাৱত্থিযং অঞ্ঞতৰং ভিক্খুনিং আৰব্ভ অসংকচ্চিকায গামং পৱিসনৱত্থুস্মিং পঞ্ঞত্তং. যস্সা পন সংকচ্চিকচীৱৰং অচ্ছিন্নং ৱা নট্ঠং ৱা, তস্সা, গিলানায, আপদাসু, উম্মত্তিকাদীনঞ্চ অনাপত্তি. অসংকচ্চিকতা, ৱুত্তপৰিচ্ছেদাতিক্কমো, অনুঞ্ঞাতকাৰণাভাৱোতি ইমানেত্থ তীণি অঙ্গানি. সমুট্ঠানাদীনি এড়কলোমসদিসানীতি.

অসংকচ্চিকসিক্খাপদৱণ্ণনা নিট্ঠিতা.

ছত্তুপাহনৱগ্গো নৱমো.

১০…পে…১৬. মুসাৱাদাদিৱগ্গো

মুসাৱাদাদিসিক্খাপদৱণ্ণনা

ইতো পৰেসু মুসাৱাদৱগ্গাদীসু সত্তসু ৱগ্গেসু ভিক্খুপাতিমোক্খৱণ্ণনাযং ৱুত্তনযেনেৱ ৱিনিচ্ছযো ৱেদিতব্বোতি.

সোড়সমৱগ্গো.

উদ্দিট্ঠা খো অয্যাযো ছসট্ঠিসতা পাচিত্তিযা ধম্মাতি ভিক্খূ আৰব্ভ পঞ্ঞত্তা সাধাৰণা সত্ততি, অসাধাৰণা ছন্নৱুতীতি এৱং ছসট্ঠিসতা. সেসং সব্বত্থ উত্তানমেৱাতি.

কঙ্খাৱিতৰণিযা পাতিমোক্খৱণ্ণনায

ভিক্খুনিপাতিমোক্খে

সুদ্ধপাচিত্তিযৱণ্ণনা নিট্ঠিতা.

তত্ৰাযং সঙ্খেপতো অসাধাৰণসিক্খাপদেসু সমুট্ঠানৱিনিচ্ছযো – গিৰগ্গসমজ্জা চিত্তাগাৰসিক্খাপদং সঙ্ঘাণী ইত্থালঙ্কাৰো গন্ধৱণ্ণকো ৱাসিতকপিঞ্ঞাকো ভিক্খুনিআদীহি উম্মদ্দনপৰিমদ্দনাতি ইমানি দস সিক্খাপদানি অচিত্তকানি লোকৱজ্জানি অকুসলচিত্তানি. অযং পনেত্থ অধিপ্পাযো, ৱিনাপি চিত্তেন আপজ্জিতব্বত্তা অচিত্তকানি, চিত্তে পন সতি অকুসলেনেৱ আপজ্জিতব্বত্তা লোকৱজ্জানি চেৱ অকুসলচিত্তানি চাতি. অৱসেসানি সচিত্তকানি পণ্ণত্তিৱজ্জানেৱ. চোৰিৱুট্ঠাপনং গামন্তৰং আৰামসিক্খাপদং গব্ভিনিৱগ্গে আদিতো পট্ঠায সত্ত, কুমাৰিভূতৱগ্গে আদিতো পট্ঠায পঞ্চ পুৰিসাদিসংসট্ঠং পাৰিৱাসিকছন্দদানং অনুৱস্সৱুট্ঠাপনং একন্তৰিকৱুট্ঠাপনন্তি ইমানি একূনৱীসতি সিক্খাপদানি সচিত্তকানি পণ্ণত্তিৱজ্জানি. অৱসেসানি সচিত্তকানি লোকৱজ্জানেৱাতি.