পাটিদেসনীযকণ্ডো

১. সপ্পিৱিঞ্ঞাপনসিক্খাপদৱণ্ণনা

পাটিদেসনীযেসু পঠমে সপ্পিন্তি পুব্বে ৱুত্তৱিনিচ্ছযং পাড়িআগতং (পাচি. ১২৩০) গোসপ্পিআদিমেৱ. ৱিঞ্ঞাপেত্ৱা ভুঞ্জেয্যাতি এত্থ ‘‘ৱিঞ্ঞত্তিযা পটিলদ্ধং ভুঞ্জিস্সামী’’তি গহণে দুক্কটং, গহিতস্স অজ্ঝোহাৰে অজ্ঝোহাৰে পাটিদেসনীযং.

সাৱত্থিযং ছব্বগ্গিযা ভিক্খুনিযো আৰব্ভ সপ্পিং ৱিঞ্ঞাপেত্ৱা ভুঞ্জনৱত্থুস্মিং পঞ্ঞত্তং, ‘‘অগিলানা’’তি অযমেত্থ অনুপঞ্ঞত্তি, তিকপাটিদেসনীযং, গিলানায দ্ৱিকদুক্কটং. যা পন গিলানা গিলানসঞ্ঞা, গিলানকালে ৱা ৱিঞ্ঞাপেত্ৱা পচ্ছা অগিলানা হুত্ৱা ভুঞ্জতি, গিলানায ৱা সেসকং, ঞাতকপ্পৱাৰিতট্ঠানতো ৱা ৱিঞ্ঞত্তং, অঞ্ঞস্স ৱা অত্থায, অত্তনো ৱা ধনেন গহিতং ভুঞ্জতি, তস্সা, উম্মত্তিকাদীনঞ্চ অনাপত্তি. ৱুত্তলক্খণসপ্পিতা, অনুঞ্ঞাতকাৰণাভাৱো, ৱিঞ্ঞত্তি, অজ্ঝোহাৰোতি ইমানেত্থ চত্তাৰি অঙ্গানি. সমুট্ঠানাদীনি অদ্ধানসদিসানীতি.

সপ্পিৱিঞ্ঞাপনসিক্খাপদৱণ্ণনা নিট্ঠিতা.

২. তেলৱিঞ্ঞাপনাদিসিক্খাপদৱণ্ণনা

দুতিযাদীসুপি তেলাদীনি পুব্বে ৱুত্তৱিনিচ্ছযানি পাড়িযং (পাচি. ১২৩৬) আগতানেৱ, পাড়িযং অনাগতেসু পন অট্ঠসুপি দুক্কটমেৱ. সেসং সব্বত্থ পঠমে ৱুত্তসদিসমেৱাতি.

তেলৱিঞ্ঞাপনাদিসিক্খাপদৱণ্ণনা নিট্ঠিতা.

কঙ্খাৱিতৰণিযা পাতিমোক্খৱণ্ণনায

ভিক্খুনিপাতিমোক্খে

পাটিদেসনীযৱণ্ণনা নিট্ঠিতা.

১. পৰিমণ্ডলাদিসিক্খাপদৱণ্ণনা

ইতো পৰং পন সেখিযানি চেৱ অধিকৰণসমথা চ সব্বপকাৰতো ভিক্খুপাতিমোক্খৱণ্ণনাযং ৱুত্তনযেনেৱ ৱেদিতব্বাতি.

কঙ্খাৱিতৰণিযা পাতিমোক্খৱণ্ণনায

ভিক্খুনিপাতিমোক্খৱণ্ণনা নিট্ঠিতা.

নিগমনকথা

এত্তাৱতা চ –

ৱণ্ণনং পাতিমোক্খস্স, সোণত্থেৰেন যাচিতো;

ৱিনযে জাতকঙ্খানং, কঙ্খাৱিতৰণত্থিকো.

আৰভিং যমহং সব্বং, সীহড়ট্ঠকথানযং;

মহাৱিহাৰৱাসীনং, ৱাচনামগ্গনিস্সিতং.

নিস্সায সা অযং নিট্ঠং, গতা আদায সব্বসো;

সব্বং অট্ঠকথাসাৰং, পাড়িযত্থঞ্চ কেৱলং.

ন হেত্থ তং পদং অত্থি, যং ৱিৰুজ্ঝেয্য পাড়িযা;

মহাৱিহাৰৱাসীনং, পোৰাণট্ঠকথাহি ৱা.

যস্মা তস্মা অকত্ৱাৱ, এত্থ কঙ্খং হিতেসিনা;

সিক্খিতব্বাৱ সক্কচ্চং, কঙ্খাৱিতৰণী অযং.

যথা চ নিট্ঠং সম্পত্তা, কঙ্খাৱিতৰণী অযং;

দ্ৱাৱীসতি ভাণৱাৰপঅমাণায পাড়িযা.

এৱং অনন্তৰাযেন, নিট্ঠং কল্যাণনিস্সিতা;

অচিৰং সব্বসত্তানং, যন্তু সব্বে মনোৰথাতি.

পৰমৱিসুদ্ধসদ্ধাবুদ্ধিৱীৰিযপ্পটিমণ্ডিতেন সীলাচাৰজ্জৱমদ্দৱাদিগুণসমুদযসমুদিতেন সকসমযসমযন্তৰগহনজ্ঝোগাহণসমত্থেন পঞ্ঞাৱেয্যত্তিযসমন্নাগতেন তিপিটকপৰিযত্তিপ্পভেদে সাট্ঠকথে সত্থুসাসনে অপ্পটিহতঞাণপ্পভাৱেন মহাৱেয্যাকৰণেন কৰণসম্পত্তিজনিতসুৱিনিগ্গতমধউৰোদাৰৱচনলাৱণ্ণযুত্তেন যুত্তমুত্তৱাদিনা ৱাদীৱৰেন মহাকৱিনা পভিন্নপটিসম্ভিদাপৰিৱাৰে ছড়ভিঞ্ঞাদিপ্পভেদগুণপ্পটিমণ্ডিতে উত্তৰিমনুস্সধম্মে সুপ্পতিট্ঠিতবুদ্ধীনং থেৰৱংসপ্পদীপানং থেৰানং মহাৱিহাৰৱাসীনং ৱংসালঙ্কাৰভূতেন ৱিপুলৱিসুদ্ধবুদ্ধিনা বুদ্ধঘোসোতি গৰূহি গহিতনামধেয্যেন থেৰেন কতা অযং কঙ্খাৱিতৰণী নাম পাতিমোক্খৱণ্ণনা –

তাৱ তিট্ঠতু লোকস্মিং, লোকনিত্থৰণেসিনং;

দস্সেন্তী কুলপুত্তানং, নযং সীলৱিসুদ্ধিযা.

যাৱ ‘‘বুদ্ধো’’তি নামম্পি, সুদ্ধচিত্তস্স তাদিনো;

লোকম্হি লোকজেট্ঠস্স, পৱত্ততি মহেসিনোতি.

কঙ্খাৱিতৰণী-অট্ঠকথা নিট্ঠিতা.