১-২-৩. পঠমকুমাৰিভূতাদিসিক্খাপদৱণ্ণনা

কুমাৰিভূতৱগ্গস্স পঠমদুতিযততিযানি তীহি গিহিগতসিক্খাপদেহি সদিসানেৱ. যা পন তা সব্বপঠমা দ্ৱে মহাসিক্খমানা, তা অতিক্কন্তৱীসতিৱস্সাতি ৱেদিতব্বা. তা হি গিহিগতা ৱা হোন্তু, অগিহিগতা ৱা, সম্মুতিকম্মাদীসু ‘‘সিক্খমানা’’ইচ্চেৱ ৱত্তব্বা, ‘‘গিহিগতা’’তি ৱা ‘‘কুমাৰিভূতা’’তি ৱা ন ৱত্তব্বা. গিহিগতায দসৱস্সকালে সিক্খাসম্মুতিং দত্ৱা দ্ৱাদসৱস্সকালে উপসম্পদা কাতব্বা, একাদসৱস্সকালে দত্ৱা তেৰসৱস্সকালে কাতব্বা, দ্ৱাদসতেৰসচুদ্দসপন্নৰসসোড়সসত্তৰসঅট্ঠাৰসৱস্সকালে সিক্খাসম্মুতিং দত্ৱা ৱীসতিৱস্সকালে উপসম্পদা কাতব্বা. অট্ঠাৰসৱস্সকালতো পট্ঠায চ পনাযং ‘‘গিহিগতা’’তিপি ‘‘কুমাৰিভূতা’’তিপি ৱত্তুং ৱট্টতি. যা পনাযং ‘‘কুমাৰিভূতা’’তি ৱুত্তা সামণেৰী, সা ‘‘গিহিগতা’’তি ন ৱত্তব্বা, ‘‘কুমাৰিভূতা’’ইচ্চেৱ ৱত্তব্বা. সিক্খাসম্মুতিদানৱসেন পন সব্বাপি ‘‘সিক্খমানা’’তি ৱত্তুং ৱট্টতীতি.

পঠমকুমাৰিভূতাদিসিক্খাপদৱণ্ণনা নিট্ঠিতা.