৮. কুমাৰিভূতৱগ্গো

১-২-৩. পঠমকুমাৰিভূতাদিসিক্খাপদৱণ্ণনা

কুমাৰিভূতৱগ্গস্স পঠমদুতিযততিযানি তীহি গিহিগতসিক্খাপদেহি সদিসানেৱ. যা পন তা সব্বপঠমা দ্ৱে মহাসিক্খমানা, তা অতিক্কন্তৱীসতিৱস্সাতি ৱেদিতব্বা. তা হি গিহিগতা ৱা হোন্তু, অগিহিগতা ৱা, সম্মুতিকম্মাদীসু ‘‘সিক্খমানা’’ইচ্চেৱ ৱত্তব্বা, ‘‘গিহিগতা’’তি ৱা ‘‘কুমাৰিভূতা’’তি ৱা ন ৱত্তব্বা. গিহিগতায দসৱস্সকালে সিক্খাসম্মুতিং দত্ৱা দ্ৱাদসৱস্সকালে উপসম্পদা কাতব্বা, একাদসৱস্সকালে দত্ৱা তেৰসৱস্সকালে কাতব্বা, দ্ৱাদসতেৰসচুদ্দসপন্নৰসসোড়সসত্তৰসঅট্ঠাৰসৱস্সকালে সিক্খাসম্মুতিং দত্ৱা ৱীসতিৱস্সকালে উপসম্পদা কাতব্বা. অট্ঠাৰসৱস্সকালতো পট্ঠায চ পনাযং ‘‘গিহিগতা’’তিপি ‘‘কুমাৰিভূতা’’তিপি ৱত্তুং ৱট্টতি. যা পনাযং ‘‘কুমাৰিভূতা’’তি ৱুত্তা সামণেৰী, সা ‘‘গিহিগতা’’তি ন ৱত্তব্বা, ‘‘কুমাৰিভূতা’’ইচ্চেৱ ৱত্তব্বা. সিক্খাসম্মুতিদানৱসেন পন সব্বাপি ‘‘সিক্খমানা’’তি ৱত্তুং ৱট্টতীতি.

পঠমকুমাৰিভূতাদিসিক্খাপদৱণ্ণনা নিট্ঠিতা.

৪. ঊনদ্ৱাদসৱস্সসিক্খাপদৱণ্ণনা

চতুত্থে ঊনদ্ৱাদসৱস্সাতি উপসম্পদাৱসেন অপৰিপুণ্ণদ্ৱাদসৱস্সা. পাচিত্তিযন্তি উপজ্ঝাযা হুত্ৱা ৱুট্ঠাপেন্তিযা ৱুত্তনযেনেৱ দুক্কটানি অন্তৰা, কম্মৱাচাপৰিযোসানে পাচিত্তিযন্তি.

ঊনদ্ৱাদসৱস্সসিক্খাপদৱণ্ণনা নিট্ঠিতা.

৫. পৰিপুণ্ণদ্ৱাদসৱস্সসিক্খাপদৱণ্ণনা

পঞ্চমে সঙ্ঘেন অসম্মতাতি যস্সা সঙ্ঘেন পদভাজনে (পাচি. ১১৩২) ৱুত্তা ৱুট্ঠাপনসম্মুতি ন দিন্না. সেসং উভযত্থাপি মহাসিক্খমানাসিক্খাপদদ্ৱযসদিসমেৱাতি.

পৰিপুণ্ণদ্ৱাদসৱস্সসিক্খাপদৱণ্ণনা নিট্ঠিতা.

৬. খীযনধম্মসিক্খাপদৱণ্ণনা

ছট্ঠে অলং তাৱ তে অয্যে ৱুট্ঠাপিতেনাতি ৱুচ্চমানাতি ৱুট্ঠাপনসম্মুতিযা যাচিতায সঙ্ঘেন উপপৰিক্খিপিত্ৱা ‘‘যস্মা বালা অব্যত্তা চ অলজ্জিনী চ হোতি, তস্মা অলং তাৱ তুয্হং উপসম্পাদিতেনা’’তি এৱং নিৱাৰীযমানা. পচ্ছা খীযনধম্মন্তি পচ্ছা অঞ্ঞাসং ব্যত্তানং লজ্জিনীনং ৱুট্ঠাপনসম্মুতিং দিয্যমানং দিস্ৱা ‘‘অহমেৱ নূন বালা’’তিআদীনি ভণমানা যত্থ কত্থচি খীযেয্য. পাচিত্তিযন্তি এৱং খীযনধম্মং আপজ্জন্তিযা পাচিত্তিযং.

সাৱত্থিযং চণ্ডকাড়িং আৰব্ভ এৱং খীযনধম্মং আপজ্জনৱত্থুস্মিং পঞ্ঞত্তং, পকতিযা ছন্দাদীনং ৱসেন কৰোন্তীনং খীযন্তিযা, উম্মত্তিকাদীনঞ্চ অনাপত্তি. ৱুট্ঠাপনসম্মুতিযা যাচনং, উপপৰিক্খিত্ৱা ন ছন্দাদিৱসেন পটিক্খিত্তায ‘‘সাধূ’’তি পটিস্সৱো, পচ্ছাখীযনন্তি ইমানেত্থ তীণি অঙ্গানি. সমুট্ঠানাদীনি অদিন্নাদানসদিসানি, ইদং পন দুক্খৱেদনন্তি.

খীযনধম্মসিক্খাপদৱণ্ণনা নিট্ঠিতা.

৭-৮. সিক্খমাননৱুট্ঠাপনপঠমদুতিযসিক্খাপদৱণ্ণনা

সত্তমে সা পচ্ছাতি সিক্খমানায উপসম্পদায যাচিযমানায সা ভিক্খুনী এৱং ৱত্ৱা লদ্ধে চীৱৰে পচ্ছা অসতি অন্তৰাযে ‘‘নেৱ ৱুট্ঠাপেস্সামি, ন ৱুট্ঠাপনায উস্সুক্কং কৰিস্সামী’’তি ধুৰং নিক্খিপেয্য, তস্সা সহ ধুৰনিক্খেপেন পাচিত্তিযন্তি. অট্ঠমেপি এসেৱ নযো.

উভযম্পি সাৱত্থিযং থুল্লনন্দং আৰব্ভ এতেসু ৱত্থূসু পঞ্ঞত্তং, দ্ৱীসুপি সতি অন্তৰাযে, পৰিযেসিত্ৱা অলভন্তিযা, গিলানায, আপদাসু, উম্মত্তিকাদীনঞ্চ অনাপত্তি. উভযত্থ ‘‘এৱাহং তং ৱুট্ঠাপেস্সামী’’তি পটিঞ্ঞা, আকঙ্খিতনিপ্ফত্তি, পচ্ছা ধুৰনিক্খেপো, অনুঞ্ঞাতকাৰণাভাৱোতি ইমানেত্থ চত্তাৰি অঙ্গানি. সমুট্ঠানাদীনি সমনুভাসনসদিসানীতি.

সিক্খমাননৱুট্ঠাপনপঠমদুতিযসিক্খাপদৱণ্ণনা নিট্ঠিতা.

৯. সোকাৱাসসিক্খাপদৱণ্ণনা

নৱমে সোকাৱাসন্তি সঙ্কেতং কত্ৱা আগচ্ছমানা পুৰিসানং অন্তোসোকং পৱেসেতীতি সোকাৱাসা, তং সোকাৱাসং. অথ ৱা ঘৰং ৱিয ঘৰসামিকা অযম্পি পুৰিসসমাগমং অলভমানা সোকং আৱিসতি, ইতি যং আৱিসতি, স্ৱাস্সা আৱাসো হোতীতি সোকাৱাসা. তেনেৱস্স পদভাজনে (পাচি. ১১৬০) ‘‘সোকাৱাসা নাম পৰেসং দুক্খং উপ্পাদেতি, সোকং আৱিসতী’’তি দ্ৱিধা অত্থো ৱুত্তো. পাচিত্তিযন্তি এৱৰূপং ৱুট্ঠাপেন্তিযা ৱুত্তনযেনেৱ কম্মৱাচাপৰিযোসানে উপজ্ঝাযায পাচিত্তিযং.

সাৱত্থিযং থুল্লনন্দং আৰব্ভ এৱৰূপং সিক্খমানং ৱুট্ঠাপনৱত্থুস্মিং পঞ্ঞত্তং. অজানন্তিযা, উম্মত্তিকাদীনঞ্চ অনাপত্তি. সোকাৱাসতা, জাননং, ৱুট্ঠাপনন্তি ইমানেত্থ তীণি অঙ্গানি. সমুট্ঠানাদীনি গব্ভিনিৱুট্ঠাপনসদিসানেৱাতি.

সোকাৱাসসিক্খাপদৱণ্ণনা নিট্ঠিতা.

১০. অননুঞ্ঞাতসিক্খাপদৱণ্ণনা

দসমে মাতাপিতূহীতি ৱিজাতমাতৰা চ জনকপিতৰা চ. সামিকেনাতি যেন পৰিগ্গহিতা, তেন. অননুঞ্ঞাতন্তি উপসম্পদত্থায অননুঞ্ঞাতং. দ্ৱিক্খত্তুঞ্হি ভিক্খুনীহি আপুচ্ছিতব্বং, পব্বজ্জাকালে চ উপসম্পদাকালে চ, ভিক্খূনং পন সকিং আপুচ্ছিতেপি ৱট্টতি. তস্মা যা উপসম্পদাকালে অনাপুচ্ছা উপসম্পাদেতি, তস্সা ৱুত্তনযেনেৱ পাচিত্তিযং.

সাৱত্থিযং থুল্লনন্দং আৰব্ভ অননুঞ্ঞাতৱুট্ঠাপনৱত্থুস্মিং পঞ্ঞত্তং. অপলোকেত্ৱা ৱুট্ঠাপেন্তিযা, তেসং অত্থিভাৱং অজানন্তিযা, উম্মত্তিকাদীনঞ্চ অনাপত্তি. অনপলোকনং, অত্থিভাৱজাননং, ৱুট্ঠাপনন্তি ইমানেত্থ তীণি অঙ্গানি. অননুঞ্ঞাতসমুট্ঠানং, কিৰিযাকিৰিযং, নোসঞ্ঞাৱিমোক্খং, অচিত্তকং, পণ্ণত্তিৱজ্জং, কাযকম্মং, ৱচীকম্মং, তিচিত্তং, তিৱেদনন্তি.

অননুঞ্ঞাতসিক্খাপদৱণ্ণনা নিট্ঠিতা.

১১. পাৰিৱাসিকসিক্খাপদৱণ্ণনা

একাদসমে পাৰিৱাসিকছন্দদানেনাতি পাৰিৱাসিযেন ছন্দদানেন. তত্থ চতুব্বিধং পাৰিৱাসিযং পৰিসপাৰিৱাসিযং ৰত্তিপাৰিৱাসিযং ছন্দপাৰিৱাসিযং অজ্ঝাসযপাৰিৱাসিযন্তি.

তত্থ পৰিসপাৰিৱাসিযং নাম ভিক্খূ কেনচিদেৱ কৰণীযেন সন্নিপতিতা হোন্তি, অথ মেঘো ৱা উট্ঠহতি, উস্সাৰণা ৱা কৰীযতি, মনুস্সা ৱা অজ্ঝোত্থৰন্তা আগচ্ছন্তি, ভিক্খূ ‘‘অনোকাসা মযং, অঞ্ঞত্ৰ গচ্ছামা’’তি ছন্দং অৱিস্সজ্জিত্ৱাৱ উট্ঠহন্তি, ইদং পৰিসপাৰিৱাসিযং নাম, কিঞ্চাপি পৰিসপাৰিৱাসিযং, ছন্দস্স পন অৱিস্সট্ঠত্তা কম্মং কাতুং ৱট্টতি.

পুন ভিক্খূ ‘‘উপোসথাদীনি কৰিস্সামা’’তি ৰত্তিং সন্নিপতিত্ৱা ‘‘যাৱ সব্বে সন্নিপতন্তি, তাৱ ধম্মং সুণিস্সামা’’তি একং অজ্ঝেসন্তি, তস্মিং ধম্মকথং কথেন্তেযেৱ অৰুণো উগ্গচ্ছতি. সচে ‘‘চাতুদ্দসিকং উপোসথং কৰিস্সামা’’তি নিসিন্না, ‘‘পন্নৰসো’’তি কাতুং ৱট্টতি. সচে পন্নৰসিকং কাতুং নিসিন্না, পাটিপদে অনুপোসথে উপোসথং কাতুং ন ৱট্টতি. অঞ্ঞং পন সঙ্ঘকিচ্চং কাতুং ৱট্টতি, ইদং ৰত্তিপাৰিৱাসিযং নাম.

পুন ভিক্খূ ‘‘কিঞ্চিদেৱ অব্ভানাদিসঙ্ঘকম্মং কৰিস্সামা’’তি সন্নিসিন্না হোন্তি, তত্ৰেকো নক্খত্তপাঠকো ভিক্খু এৱং ৱদতি ‘‘অজ্জ নক্খত্তং দাৰুণং, মা ইদং কম্মং কৰোথা’’তি. তে তস্স ৱচনেন ছন্দং ৱিস্সজ্জেত্ৱা তত্থেৱ নিসিন্না হোন্তি, অথঞ্ঞো আগন্ত্ৱা ‘‘নক্খত্তং পতিমানেন্তং, অত্থো বালং উপজ্ঝগা (জা. ১.১.৪৯), কিং নক্খত্তেন কৰোথা’’তি ৱদতি, ইদং ছন্দপাৰিৱাসিযঞ্চেৱ অজ্ঝাসযপাৰিৱাসিযঞ্চ. এতস্মিং পাৰিৱাসিযে পুন ছন্দপাৰিসুদ্ধিং অনাহৰিত্ৱা কম্মং কাতুং ন ৱট্টতি, ইদং সন্ধায ৱুত্তং ‘‘পাৰিৱাসিকছন্দদানেনা’’তি. পাচিত্তিযন্তি এৱং ৱুট্ঠাপেন্তিযা ৱুত্তনযেনেৱ কম্মৱাচাপৰিযোসানে পাচিত্তিযং.

ৰাজগহে থুল্লনন্দং আৰব্ভ এৱং ৱুট্ঠাপনৱত্থুস্মিং পঞ্ঞত্তং. ছন্দং অৱিস্সজ্জেত্ৱাৱ অৱুট্ঠিতায পৰিসায ৱুট্ঠাপেন্তিযা, উম্মত্তিকাদীনঞ্চ অনাপত্তি. পাৰিৱাসিকছন্দদানতা, ৱুট্ঠাপনন্তি ইমানেত্থ দ্ৱে অঙ্গানি. সমুট্ঠানাদীনি গম্ভিনিসিক্খাপদসদিসানেৱাতি.

পাৰিৱাসিকসিক্খাপদৱণ্ণনা নিট্ঠিতা.

১২. অনুৱস্সসিক্খাপদৱণ্ণনা

দ্ৱাদসমে অনুৱস্সন্তি অনুসংৱচ্ছৰং. এৱং ৱুট্ঠাপেন্তিযাপি ৱুত্তনযেনেৱ পাচিত্তিযং.

সাৱত্থিযং সম্বহুলা ভিক্খুনিযো আৰব্ভ অনুৱস্সং ৱুট্ঠাপনৱত্থুস্মিং পঞ্ঞত্তং. একন্তৰিকং ৱুট্ঠাপেন্তিযা, উম্মত্তিকাদীনঞ্চ অনাপত্তি. অনুৱস্সতা, ৱুট্ঠাপনন্তি ইমানেত্থ দ্ৱে অঙ্গানি. সমুট্ঠানাদীনি একাদসমে ৱুত্তনযানেৱাতি.

অনুৱস্সসিক্খাপদৱণ্ণনা নিট্ঠিতা.

১৩. একৱস্সসিক্খাপদৱণ্ণনা

তেৰসমে একন্তৰিকং একং ৱুট্ঠাপেন্তিযা, উম্মত্তিকাদীনঞ্চ অনাপত্তি. সেসং দ্ৱাদসমেন সদিসমেৱাতি.

একৱস্সসিক্খাপদৱণ্ণনা নিট্ঠিতা.

কুমাৰিভূতৱগ্গো অট্ঠমো.