৭. আৱসথচীৱৰসিক্খাপদৱণ্ণনা

সত্তমে আৱসথচীৱৰন্তি ‘‘উতুনিযো ভিক্খুনিযো পৰিভুঞ্জন্তূ’’তি দিন্নচীৱৰং. অনিস্সজ্জিত্ৱাতি চতুত্থে দিৱসে ধোৱিত্ৱা অঞ্ঞিস্সা অন্তমসো সামণেৰিযাপি উতুনিযা অদত্ৱা. পাচিত্তিযন্তি এৱং অনিস্সজ্জিত্ৱা পৰিভুঞ্জন্তিযা পাচিত্তিযং.

সাৱত্থিযং থুল্লনন্দং আৰব্ভ আৱসথচীৱৰং অনিস্সজ্জিত্ৱা পৰিভুঞ্জনৱত্থুস্মিং পঞ্ঞত্তং, তিকপাচিত্তিযং, নিস্সজ্জিতে দ্ৱিকদুক্কটং. তস্মিং পন নিস্সজ্জিতসঞ্ঞায, পুন পৰিযাযেন ৱা, অঞ্ঞাসং উতুনীনং অভাৱেন ৱা, অচ্ছিন্ননট্ঠচীৱৰিকায ৱা, আপদাসু ৱা পৰিভুঞ্জন্তিযা, উম্মত্তিকাদীনঞ্চ অনাপত্তি. আৱসথচীৱৰতা, চতুত্থদিৱসতা, ধোৱিত্ৱা অনিস্সজ্জনং, অনুঞ্ঞাতকাৰণাভাৱোতি ইমানেত্থ চত্তাৰি অঙ্গানি. সমুট্ঠানাদীনি কথিনসদিসানি, ইদং পন কিৰিযাকিৰিযন্তি.

আৱসথচীৱৰসিক্খাপদৱণ্ণনা নিট্ঠিতা.