৫. চিত্তাগাৰৱগ্গো

১. ৰাজাগাৰসিক্খাপদৱণ্ণনা

চিত্তাগাৰৱগ্গস্স পঠমে ৰাজাগাৰন্তি ৰঞ্ঞো কীড়নঘৰং. চিত্তাগাৰন্তি কীড়নচিত্তসালং. আৰামন্তি কীড়নউপৱনং. উয্যানন্তি কীড়নুয্যানং. পোক্খৰণিন্তি কীড়নপোক্খৰণিং. দস্সনাযাতি ‘‘এতেসু যংকিঞ্চি পস্সিস্সামী’’তি গচ্ছন্তিযা পদে পদে দুক্কটং, যত্থ ঠত্ৱা পস্সতি, তত্থ পদং অনুদ্ধৰিত্ৱা পঞ্চাপি পস্সন্তিযা একাৱ আপত্তি. সচে পন তং তং ৱিলোকেত্ৱা পস্সতি, গীৱং পৰিৱত্তনপ্পযোগগণনায আপত্তিযো, ন উম্মীলনগণনায.

সাৱত্থিযং ছব্বগ্গিযা ভিক্খুনিযো আৰব্ভ চিত্তাগাৰং দস্সনায গমনৱত্থুস্মিং পঞ্ঞত্তং, ভিক্খুস্স সব্বত্থ দুক্কটং, অৱসেসো ৱিনিচ্ছযো নচ্চদস্সনসিক্খাপদে ৱুত্তনযেনেৱ ৱেদিতব্বোতি.

ৰাজাগাৰসিক্খাপদৱণ্ণনা নিট্ঠিতা.

২. আসন্দিপৰিভুঞ্জনসিক্খাপদৱণ্ণনা

দুতিযে আসন্দী নাম অতিক্কন্তপ্পমাণা ৱুচ্চতি. পল্লঙ্কো নাম সংহাৰিমেন ৱাড়েন কতোতি ৱুত্তো. পৰিভুঞ্জেয্যাতি এত্থ পন নিসীদননিপজ্জনপ্পযোগগণনায পাচিত্তিযং ৱেদিতব্বং.

সাৱত্থিযং সম্বহুলা ভিক্খুনিযো আৰব্ভ আসন্দিপল্লঙ্কপৰিভোগৱত্থুস্মিং পঞ্ঞত্তং, আসন্দিযা পাদে ছিন্দিত্ৱা, পল্লঙ্কস্স ৱাড়ে ভিন্দিত্ৱা পৰিভুঞ্জন্তিযা, উম্মত্তিকাদীনঞ্চ অনাপত্তি. আসন্দিপল্লঙ্কতা, নিসীদনং নিপজ্জনং ৱাতি ইমানেত্থ দ্ৱে অঙ্গানি. সমুট্ঠানাদীনি এড়কলোমসদিসানীতি.

আসন্দিপৰিভুঞ্জনসিক্খাপদৱণ্ণনা নিট্ঠিতা.

৩. সুত্তকন্তনসিক্খাপদৱণ্ণনা

ততিযে সুত্তন্তি ছন্নং অঞ্ঞতৰং. কন্তেয্যাতি এত্থ যত্তকং হত্থেন অঞ্ছিতং হোতি, তস্মিং তক্কম্হি ৱেঠিতে একা আপত্তি. ইদঞ্হি সন্ধায পদভাজনীযে (পাচি. ৯৮৮) ‘‘উজ্জৱুজ্জৱে’’তি ৱুত্তং.

সাৱত্থিযং ছব্বগ্গিযা ভিক্খুনিযো আৰব্ভ সুত্তং কন্তনৱত্থুস্মিং পঞ্ঞত্তং, কন্তনতো পুব্বে কপ্পাসৱিচিননং আদিং কত্ৱা সব্বপ্পযোগেসু হত্থৱাৰগণনায দুক্কটং. কন্তিতসুত্তং কন্তন্তিযা, উম্মত্তিকাদীনঞ্চ অনাপত্তি. অকন্তিততা, কন্তনন্তি ইমানেত্থ দ্ৱে অঙ্গানি. সমুট্ঠানাদীনি এড়কলোমসদিসানীতি.

সুত্তকন্তনসিক্খাপদৱণ্ণনা নিট্ঠিতা.

৪. গিহিৱেয্যাৱচ্চসিক্খাপদৱণ্ণনা

চতুত্থে গিহিৱেয্যাৱচ্চন্তি গিহীনং ৱেয্যাৱচ্চং. সচেপি হি মাতাপিতৰো অত্তনো কিঞ্চি কম্মং অকাৰাপেত্ৱা তেসং যাগুপচনাদীনি কৰোন্তি, পুব্বপ্পযোগেসু পযোগগণনায দুক্কটানি আপজ্জিত্ৱা যাগুআদীসু ভাজনগণনায, খাদনীযাদীসু পূৱগণনায পাচিত্তিযং আপজ্জতি.

সাৱত্থিযং সম্বহুলা ভিক্খুনিযো আৰব্ভ গিহীনং ৱেয্যাৱচ্চকৰণৱত্থুস্মিং পঞ্ঞত্তং, মনুস্সেহি সঙ্ঘস্স যাগুপানে ৱা ভত্তে ৱা চেতিযপূজায ৱা কৰীযমানায তেসং সহাযভাৱেন যাগুপচনাদীনি, অত্তনো ৱেয্যাৱচ্চকৰস্স চ তানিযেৱ কৰোন্তিযা, উম্মত্তিকাদীনঞ্চ অনাপত্তি. গিহিৱেয্যাৱচ্চকৰণং, অনুঞ্ঞাতকাৰণাভাৱোতি ইমানেত্থ দ্ৱে অঙ্গানি. সমুট্ঠানাদীনি এড়কলোমসদিসানেৱাতি.

গিহিৱেয্যাৱচ্চসিক্খাপদৱণ্ণনা নিট্ঠিতা.

৫. অধিকৰণসিক্খাপদৱণ্ণনা

পঞ্চমে অধিকৰণন্তি চতুন্নং অঞ্ঞতৰং. পাচিত্তিযন্তি ইধ চীৱৰসিব্বনে ৱিয ধুৰং নিক্খিত্তমত্তে পাচিত্তিযং, একাহম্পি পৰিহাৰো নত্থি.

সাৱত্থিযং থুল্লনন্দং আৰব্ভ অধিকৰণং নৱূপসমনৱত্থুস্মিং পঞ্ঞত্তং, সেসমেত্থ চীৱৰসিব্বনসিক্খাপদে ৱুত্তনযেনেৱ ৱেদিতব্বন্তি.

অধিকৰণসিক্খাপদৱণ্ণনা নিট্ঠিতা.

৬. ভোজনদানসিক্খাপদৱণ্ণনা

ছট্ঠে সহত্থাতি কাযেন ৱা কাযপ্পটিবদ্ধেন ৱা নিস্সগ্গিযেন ৱা ঠপেত্ৱা পঞ্চসহধম্মিকে অৱসেসানং অঞ্ঞত্ৰ উদকদন্তপোনা যংকিঞ্চি অজ্ঝোহৰণীযং দদন্তিযা পাচিত্তিযং.

সাৱত্থিযং থুল্লনন্দং আৰব্ভ অগাৰিকস্স খাদনীযভোজনীযদানৱত্থুস্মিং পঞ্ঞত্তং, উদকদন্তপোনে দুক্কটং. যা পন দাপেতি ন দেতি, উপনিক্খিপিত্ৱা দেতি, বাহিৰলেপং দেতি, তস্সা, উম্মত্তিকাদীনঞ্চ অনাপত্তি. অঞ্ঞত্ৰ উদকদন্তপোনা অজ্ঝোহৰণিযং, ঠপেত্ৱা পঞ্চ সহধম্মিকে অঞ্ঞস্স সহত্থা দানন্তি ইমানেত্থ দ্ৱে অঙ্গানি. সমুট্ঠানাদীনি এড়কলোমসদিসানীতি.

ভোজনদানসিক্খাপদৱণ্ণনা নিট্ঠিতা.

৭. আৱসথচীৱৰসিক্খাপদৱণ্ণনা

সত্তমে আৱসথচীৱৰন্তি ‘‘উতুনিযো ভিক্খুনিযো পৰিভুঞ্জন্তূ’’তি দিন্নচীৱৰং. অনিস্সজ্জিত্ৱাতি চতুত্থে দিৱসে ধোৱিত্ৱা অঞ্ঞিস্সা অন্তমসো সামণেৰিযাপি উতুনিযা অদত্ৱা. পাচিত্তিযন্তি এৱং অনিস্সজ্জিত্ৱা পৰিভুঞ্জন্তিযা পাচিত্তিযং.

সাৱত্থিযং থুল্লনন্দং আৰব্ভ আৱসথচীৱৰং অনিস্সজ্জিত্ৱা পৰিভুঞ্জনৱত্থুস্মিং পঞ্ঞত্তং, তিকপাচিত্তিযং, নিস্সজ্জিতে দ্ৱিকদুক্কটং. তস্মিং পন নিস্সজ্জিতসঞ্ঞায, পুন পৰিযাযেন ৱা, অঞ্ঞাসং উতুনীনং অভাৱেন ৱা, অচ্ছিন্ননট্ঠচীৱৰিকায ৱা, আপদাসু ৱা পৰিভুঞ্জন্তিযা, উম্মত্তিকাদীনঞ্চ অনাপত্তি. আৱসথচীৱৰতা, চতুত্থদিৱসতা, ধোৱিত্ৱা অনিস্সজ্জনং, অনুঞ্ঞাতকাৰণাভাৱোতি ইমানেত্থ চত্তাৰি অঙ্গানি. সমুট্ঠানাদীনি কথিনসদিসানি, ইদং পন কিৰিযাকিৰিযন্তি.

আৱসথচীৱৰসিক্খাপদৱণ্ণনা নিট্ঠিতা.

৮. আৱসথৱিহাৰসিক্খাপদৱণ্ণনা

অট্ঠমে আৱসথন্তি কৱাটবদ্ধৱিহাৰং. অনিস্সজ্জিত্ৱাতি ৰক্খণত্থায অদত্ৱা, ‘‘ইদং জগ্গেয্যাসী’’তি এৱং অনাপুচ্ছিত্ৱাতি অত্থো. চাৰিকং পক্কমেয্য পাচিত্তিযন্তি এত্থ সকগামতো অঞ্ঞং গামং একৰত্তিৱাসত্থাযপি পক্কমন্তিযা পৰিক্খিত্তস্স আৱসথস্স পৰিক্খেপং, অপৰিক্খিত্তস্স উপচাৰং পঠমপাদেন অতিক্কন্তমত্তে দুক্কটং, দুতিযেন পাচিত্তিযং.

সাৱত্থিযং থুল্লনন্দং আৰব্ভ আৱসথং অনিস্সজ্জিত্ৱা চাৰিকং পক্কমনৱত্থুস্মিং পঞ্ঞত্তং, তিকপাচিত্তিযং, অকৱাটবদ্ধে দুক্কটং, নিস্সজ্জিতে দ্ৱিকদুক্কটং. তস্মিং পন নিস্সজ্জিতসঞ্ঞায, সতি অন্তৰাযে, পটিজগ্গিকং পৰিযেসিত্ৱা অলভন্তিযা, গিলানায, আপদাসু, উম্মত্তিকাদীনঞ্চ অনাপত্তি. সকৱাটবদ্ধতা, ৱুত্তনযেন পক্কমনং, অনুঞ্ঞাতকাৰণাভাৱোতি ইমানেত্থ তীণি অঙ্গানি. সমুট্ঠানাদীনি কথিনসদিসানীতি, ইদং পন কিৰিযাকিৰিযন্তি.

আৱসথৱিহাৰসিক্খাপদৱণ্ণনা নিট্ঠিতা.

৯. তিৰচ্ছানৱিজ্জাপৰিযাপুণনসিক্খাপদৱণ্ণনা

নৱমে তিৰচ্ছানৱিজ্জন্তি যংকিঞ্চি বাহিৰকং অনত্থসংহিতং হত্থিঅস্সৰথধনুথৰুসিপ্পআথব্বণখিলনৱসীকৰণসোসাপনমন্তাগদপ্পযোগাদিভেদং পৰূপঘাতকৰং ৱিজ্জং. পৰিযাপুণেয্যাতি এত্থ যস্স কস্সচি সন্তিকে তং পদাদিৱসেন পৰিযাপুণন্তিযা পদগণনায চেৱ অক্খৰগণনায চ পাচিত্তিযন্তি.

তিৰচ্ছানৱিজ্জাপৰিযাপুণনসিক্খাপদৱণ্ণনা নিট্ঠিতা.

১০. তিৰচ্ছানৱিজ্জাৱাচনসিক্খাপদৱণ্ণনা

দসমে ৱাচেয্যাতি পদং ৱিসেসো. উভযম্পি সাৱত্থিযং ছব্বগ্গিযা চেৱ সম্বহুলা ভিক্খুনিযো চ আৰব্ভ তিৰচ্ছানৱিজ্জং পৰিযাপুণনৱাচনৱত্থুস্মিং পঞ্ঞত্তং. লেখে, ধাৰণায চ, গুত্তত্থায চ যক্খপৰিত্তনাগমণ্ডলাদিকে সব্বপৰিত্তে, উম্মত্তিকাদীনঞ্চ অনাপত্তি. তিৰচ্ছানৱিজ্জতা, পৰিযাপুণনৱাচনা, অনুঞ্ঞাতকাৰণাভাৱোতি ইমানেত্থ দ্ৱীসুপি তীণি অঙ্গানি. সমুট্ঠানাদীনি পদসোধম্মসদিসানীতি.

তিৰচ্ছানৱিজ্জাৱাচনসিক্খাপদৱণ্ণনা নিট্ঠিতা.

চিত্তাগাৰৱগ্গো পঞ্চমো.