৪. তুৱট্টৱগ্গো

১. একমঞ্চতুৱট্টনসিক্খাপদৱণ্ণনা

তুৱট্টৱগ্গস্স পঠমে তুৱট্টেয্যুন্তি নিপজ্জেয্যুং. তাসু পন একায ৱা নিপন্নায অপৰা নিপজ্জতু, দ্ৱেপি ৱা সহেৱ নিপজ্জন্তু, দ্ৱিন্নম্পি পাচিত্তিযং.

সাৱত্থিযং সম্বহুলা ভিক্খুনিযো আৰব্ভ দ্ৱিন্নং একমঞ্চে তুৱট্টনৱত্থুস্মিং পঞ্ঞত্তং, সচে পন একায নিপন্নায একা নিসীদতি, উভো ৱা নিসীদন্তি, তাসং, উম্মত্তিকাদীনঞ্চ অনাপত্তি. একমঞ্চতা, দ্ৱিন্নং তুৱট্টনন্তি ইমানেত্থ দ্ৱে অঙ্গানি. সমুট্ঠানাদীনি এড়কলোমসদিসানীতি.

একমঞ্চতুৱট্টনসিক্খাপদৱণ্ণনা নিট্ঠিতা.

২. একত্থৰণতুৱট্টনসিক্খাপদৱণ্ণনা

দুতিযে একং অত্থৰণঞ্চেৱ পাৱুৰণঞ্চ এতাসন্তি একত্থৰণপাৱুৰণা, সংহাৰিমানং পাৱাৰত্থৰণকটসাৰকাদীনং একং অন্তং অত্থৰিত্ৱা একং পাৰুপিত্ৱা তুৱট্টেন্তীনমেতং অধিৱচনং. পাচিত্তিযন্তি তংযেৱ অত্থৰিত্ৱা তং পাৰুপিত্ৱা নিপজ্জন্তীনং পাচিত্তিযং.

সাৱত্থিযং সম্বহুলা ভিক্খুনিযো আৰব্ভ এৱং তুৱট্টনৱত্থুস্মিং পঞ্ঞত্তং, তিকপাচিত্তিযং, অত্থৰণে ৱা পাৱুৰণে ৱা একস্মিং দুক্কটং, নানত্থৰণপাৱুৰণে দ্ৱিকদুক্কটং. তস্মিং পন নানত্থৰণপাৱুৰণসঞ্ঞায, ৱৱত্থানং দস্সেত্ৱা নিপজ্জন্তিযা, উম্মত্তিকাদীনঞ্চ অনাপত্তি. সেসং পঠমসদিসমেৱাতি.

একত্থৰণতুৱট্টনসিক্খাপদৱণ্ণনা নিট্ঠিতা.

৩. অফাসুকৰণসিক্খাপদৱণ্ণনা

ততিযে অফাসুন্তি ‘‘ইমিনা ইমিস্সা অফাসু ভৱিস্সতী’’তি অনাপুচ্ছা পুৰতো চঙ্কমনট্ঠাননিস্সজ্জাদযো ৱা উদ্দিসউদ্দিসাপনপৰিপুচ্ছনসজ্ঝাযং ৱা কৰোন্তিযা চঙ্কমনে নিৱত্তনগণনায, ঠানাদীসু পযোগগণনায, উদ্দেসাদীসু পদগণনায পাচিত্তিযং.

সাৱত্থিযং থুল্লনন্দং আৰব্ভ সঞ্চিচ্চ অফাসুকৰণৱত্থুস্মিং পঞ্ঞত্তং, তিকপাচিত্তিযং, অনুপসম্পন্নায তিকদুক্কটং, ন অফাসুকামতায, আপুচ্ছা পুৰতো চঙ্কমনাদীনি কৰোন্তিযা, উম্মত্তিকাদীনঞ্চ অনাপত্তি. উপসম্পন্নতা, অফাসুকামতা, অফাসুকৰণং, অনাপুচ্ছনন্তি ইমানেত্থ চত্তাৰি অঙ্গানি. সমুট্ঠানাদীনি অদিন্নাদানসদিসানি, ইদং পন কিৰিযাকিৰিযং, দুক্খৱেদনন্তি.

অফাসুকৰণসিক্খাপদৱণ্ণনা নিট্ঠিতা.

৪. নউপট্ঠাপনসিক্খাপদৱণ্ণনা

চতুত্থে দুক্খিতন্তি গিলানং. সহজীৱিনিন্তি সদ্ধিৱিহাৰিনিং. নেৱ উপট্ঠহেয্যাতি তস্সা উপট্ঠানং সযং ৱা অকৰোন্তিযা, পৰেহি ৱা অকাৰেন্তিযা ধুৰং নিক্খিত্তমত্তে পাচিত্তিযং.

সাৱত্থিযং থুল্লনন্দং আৰব্ভ দুক্খিতং সহজীৱিনিং অনুপট্ঠানৱত্থুস্মিং পঞ্ঞত্তং, অন্তেৱাসিনিযা ৱা অনুপসম্পন্নায ৱা দুক্কটং, দসসু অঞ্ঞতৰন্তৰাযে সতি পৰিযেসিত্ৱা অলভন্তিযা, গিলানায, আপদাসু, উম্মত্তিকাদীনঞ্চ অনাপত্তি. গিলানতা, সদ্ধিৱিহাৰিতা, অনুঞ্ঞাতকাৰণাভাৱো, উপট্ঠানে ধুৰনিক্খেপোতি ইমানেত্থ চত্তাৰি অঙ্গানি. সমুট্ঠানাদীনি সমনুভাসনসদিসানীতি.

নউপট্ঠাপনসিক্খাপদৱণ্ণনা নিট্ঠিতা.

৫. নিক্কড্ঢনসিক্খাপদৱণ্ণনা

পঞ্চমে উপস্সযং দত্ৱাতি সকৱাটবদ্ধং অত্তনো পুগ্গলিকৱিহাৰং দত্ৱা. নিক্কড্ঢেয্যাতি বহূনিপি দ্ৱাৰানি একপ্পযোগেন নিক্কড্ঢেন্তিযা একা আপত্তি, নানাপযোগেহি পযোগগণনায আপত্তিযো, আণত্তিযম্পি এসেৱ নযো. সচে পন ‘‘ইমঞ্চিমঞ্চ দ্ৱাৰং অতিক্কামেহী’’তি আণাপেতি, একায আণত্তিযা এৱ দ্ৱাৰগণনায আপত্তিযো.

সাৱত্থিযং থুল্লনন্দং আৰব্ভ এতাদিসে ৱত্থুস্মিং পঞ্ঞত্তং, তিকপাচিত্তিযং, অকৱাটবদ্ধতো দুক্কটং, অনুপসম্পন্নায তিকদুক্কটং, সকৱাটবদ্ধতো ৱা অকৱাটবদ্ধতো ৱা উভিন্নম্পি পৰিক্খাৰনিক্কড্ঢনে দুক্কটমেৱ, সেসং সঙ্ঘিকৱিহাৰনিক্কড্ঢনসিক্খাপদে ৱুত্তনযমেৱাতি.

নিক্কড্ঢনসিক্খাপদৱণ্ণনা নিট্ঠিতা.

৬. সংসট্ঠসিক্খাপদৱণ্ণনা

ছট্ঠং উত্তানপদত্থমেৱ. সাৱত্থিযং চণ্ডকাড়িং আৰব্ভ সংসট্ঠৱিহাৰৱত্থুস্মিং পঞ্ঞত্তং, সেসমেত্থ পঠমঅৰিট্ঠসিক্খাপদে ৱুত্তৱিনিচ্ছযসদিসমেৱাতি.

সংসট্ঠসিক্খাপদৱণ্ণনা নিট্ঠিতা.

৭. অন্তোৰট্ঠসিক্খাপদৱণ্ণনা

সত্তমে অন্তোৰট্ঠেতি যস্স ৱিজিতে ৱিহৰতি, তস্স ৰট্ঠে. অসত্থিকা চাৰিকন্তি ৱিনা সত্থেন গচ্ছন্তিযা, গামন্তৰগণনায, অগামকে অৰঞ্ঞে অদ্ধযোজনগণনায পাচিত্তিযং.

সাৱত্থিযং সম্বহুলা ভিক্খুনিযো আৰব্ভ ৱুত্তনযেনেৱ দেসচাৰিকং পক্কমনৱত্থুস্মিং পঞ্ঞত্তং. সত্থেন সহ গচ্ছন্তিযা, খেমে অপ্পটিভযে, আপদাসু, উম্মত্তিকাদীনঞ্চ অনাপত্তি. অন্তোৰট্ঠতা, অখেমতা, অনুঞ্ঞাতকাৰণাভাৱো, চাৰিকং পক্কমনন্তি ইমানেত্থ চত্তাৰি অঙ্গানি. সমুট্ঠানাদীনি এড়কলোমসদিসানীতি.

অন্তোৰট্ঠসিক্খাপদৱণ্ণনা নিট্ঠিতা.

৮. তিৰোৰট্ঠসিক্খাপদৱণ্ণনা

অট্ঠমে তিৰোৰট্ঠেতি যস্স ৱিজিতে ৱিহৰতি, তং ঠপেত্ৱা অঞ্ঞস্স ৰট্ঠে. সেসং সত্তমে ৱুত্তনযেনেৱ ৱেদিতব্বং, নগৰং পনেত্থ ৰাজগহন্তি.

তিৰোৰট্ঠসিক্খাপদৱণ্ণনা নিট্ঠিতা.

৯. অন্তোৱস্সসিক্খাপদৱণ্ণনা

নৱমে অন্তোৱস্সন্তি পুৰিমং ৱা তেমাসং, পচ্ছিমং ৱা তেমাসং অৱসিত্ৱা তস্স ৱস্সস্স অন্তোযেৱ. ইধ সত্তাহকৰণীযেন ৱা কেনচি উব্বড়্হায ৱা আপদাসু ৱা গচ্ছন্তিযা উম্মত্তিকাদীনঞ্চ অনাপত্তি. সেসং অট্ঠমসদিসমেৱাতি.

অন্তোৱস্সসিক্খাপদৱণ্ণনা নিট্ঠিতা.

১০. চাৰিকনপক্কমনসিক্খাপদৱণ্ণনা

দসমে ৱস্সংৱুট্ঠাতি পুৰিমং ৱা তেমাসং, পচ্ছিমং ৱা তেমাসং ৱুট্ঠা. ছপ্পঞ্চযোজনানীতি এত্থ পৱাৰেত্ৱা পঞ্চ যোজনানি গন্তুম্পি ৱট্টতি, ছসু ৱত্তব্বমেৱ নত্থি. সচে পন তীণি গন্ত্ৱা তেনেৱ মগ্গেন পচ্চাগচ্ছতি, ন ৱট্টতি, অঞ্ঞেন আগন্তুং ৱট্টতি. ‘‘ৱুত্তপ্পমাণং অদ্ধানং ন গচ্ছিস্সামী’’তি ধুৰে নিক্খিত্তমত্তে পাচিত্তিযং.

ৰাজগহে সম্বহুলা ভিক্খুনিযো আৰব্ভ ৱস্সং ৱসিত্ৱা চাৰিকং অপক্কমনৱত্থুস্মিং পঞ্ঞত্তং. অন্তৰাযে সতি, পৰিযেসিত্ৱা দুতিযিকং ভিক্খুনিং অলভন্তিযা, গিলানায, আপদাসু, উম্মত্তিকাদীনঞ্চ অনাপত্তি. ৱস্সংৱুট্ঠতা, অনুঞ্ঞাতকাৰণাভাৱো, পঞ্চযোজনানতিক্কমোতি ইমানেত্থ তীণি অঙ্গানি. সমুট্ঠানাদীনি পঠমপাৰাজিকসদিসানি, ইদং পন অকিৰিযং, দুক্খৱেদনন্তি.

চাৰিকনপক্কমনসিক্খাপদৱণ্ণনা নিট্ঠিতা.

তুৱট্টৱগ্গো চতুত্থো.