৩. নগ্গৱগ্গো

১. নগ্গসিক্খাপদৱণ্ণনা

নগ্গৱগ্গস্স পঠমে নগ্গাতি অনিৱত্থা ৱা অপাৰুতা ৱা. এৱঞ্হি নহাযন্তিযা সব্বপ্পযোগেসু দুক্কটং, নহানপৰিযোসানে পাচিত্তিযং.

সাৱত্থিযং সম্বহুলা ভিক্খুনিযো আৰব্ভ এৱং নহানৱত্থুস্মিং পঞ্ঞত্তং, উদকসাটিকচীৱৰে অচ্ছিন্নে ৱা নট্ঠে ৱা, ‘‘মহগ্ঘং ইদং দিস্ৱা চোৰাপি হৰেয্যু’’ন্তি এৱৰূপাসু আপদাসু ৱা নহাযন্তিযা, উম্মত্তিকাদীনঞ্চ অনাপত্তি. নগ্গতা, অনুঞ্ঞাতকাৰণাভাৱো, নহানপৰিযোসানন্তি ইমানেত্থ তীণি অঙ্গানি. সমুট্ঠানাদীনি এড়কলোমসদিসানীতি.

নগ্গসিক্খাপদৱণ্ণনা নিট্ঠিতা.

২. উদকসাটিকসিক্খাপদৱণ্ণনা

দুতিযে সাৱত্থিযং ছব্বগ্গিযা ভিক্খুনিযো আৰব্ভ অপ্পমাণিকাযো উদকসাটিকাযো ধাৰণৱত্থুস্মিং পঞ্ঞত্তং, সেসমেত্থ সব্বং ৰতনৱগ্গে নিসীদনসিক্খাপদে ৱুত্তনযেনেৱ ৱেদিতব্বন্তি.

উদকসাটিকসিক্খাপদৱণ্ণনা নিট্ঠিতা.

৩. চীৱৰসিব্বনসিক্খাপদৱণ্ণনা

ততিযে ৱিসিব্বেত্ৱাতি দুস্সিব্বিতং পুনসিব্বনত্থায ৱিসিব্বেত্ৱা. অনন্তৰাযিকিনীতি দসসু অন্তৰাযেসু একেকস্মিম্পি অসতি. অঞ্ঞত্ৰ চতূহপঞ্চাহাতি ৱিসিব্বিতদিৱসতো পঞ্চ দিৱসে অতিক্কামেত্ৱা ‘‘নেৱ সিব্বিস্সামি, ন সিব্বাপনায উস্সুক্কং কৰিস্সামী’’তি ধুৰং নিক্খিত্তমত্তে পাচিত্তিযং.

সাৱত্থিযং থুল্লনন্দং আৰব্ভ চীৱৰং ৱিসিব্বেত্ৱা ন সিব্বনৱত্থুস্মিং পঞ্ঞত্তং, তিকপাচিত্তিযং, অনুপসম্পন্নায তিকদুক্কটং, তথা উভিন্নম্পি অঞ্ঞস্মিং পৰিক্খাৰে. যা পন অন্তৰাযিকিনী ৱা হোতি, পৰিযেসিত্ৱা ৱা কিঞ্চি ন লভতি, কৰোন্তী ৱা পঞ্চাহং অতিক্কামেতি, তস্সা চ, গিলানায চ, আপদাসু চ, উম্মত্তিকাদীনঞ্চ অনাপত্তি. নিৱাসনপাৰুপনুপগচীৱৰতা, উপসম্পন্নায সন্তকতা, সিব্বনত্থায ৱিসিব্বনং ৱা ৱিসিব্বাপনং ৱা, অঞ্ঞত্ৰ অনুঞ্ঞাতকাৰণা পঞ্চাহাতিক্কমো, ধুৰনিক্খেপোতি ইমানেত্থ পঞ্চ অঙ্গানি. সমুট্ঠানাদীনি সমনুভাসনসদিসানীতি.

চীৱৰসিব্বনসিক্খাপদৱণ্ণনা নিট্ঠিতা.

৪. সঙ্ঘাটিচাৰসিক্খাপদৱণ্ণনা

চতুত্থে পঞ্চ অহানি পঞ্চাহং, পঞ্চাহমেৱ পঞ্চাহিকং. সঙ্ঘাটীনং চাৰো সঙ্ঘাটিচাৰো, পৰিভোগৱসেন ৱা ওতাপনৱসেন ৱা সঙ্ঘটিতট্ঠেন ‘সঙ্ঘাটী’তি লদ্ধনামং তিচীৱৰং, উদকসাটিকা, সংকচ্চিকাতি ইমেসং পঞ্চন্নং চীৱৰানং পৰিৱত্তনন্তি অত্থো. অতিক্কামেয্য পাচিত্তিযন্তি ছট্ঠে অৰুণুগ্গমনে একস্মিং চীৱৰে ৱুত্তনযেন অপৰিৱত্তিতে একা আপত্তি, পঞ্চসু পঞ্চ.

সাৱত্থিযং সম্বহুলা ভিক্খুনিযো আৰব্ভ চীৱৰং নিক্খিপিত্ৱা সন্তৰুত্তৰেন জনপদচাৰিকং পক্কমনৱত্থুস্মিং পঞ্ঞত্তং, তিকপাচিত্তিযং, পঞ্চাহানতিক্কন্তে দ্ৱিকদুক্কটং. তস্মিং পন অনতিক্কন্তসঞ্ঞায, পঞ্চমং দিৱসং পঞ্চ চীৱৰানি নিৱাসেন্তিযা ৱা পাৰুপন্তিযা ৱা ওতাপেন্তিযা ৱা, গিলানায, ‘‘ইদং মে চীৱৰং মহগ্ঘং ঈদিসে চোৰভযে ন সক্কা ধাৰেতু’’ন্তি এৱৰূপাসু আপদাসু, উম্মত্তিকাদীনঞ্চ অনাপত্তি. পঞ্চন্নং চীৱৰানং অঞ্ঞতৰতা, পঞ্চাহাতিক্কমো, অনুঞ্ঞাতকাৰণাভাৱো, অপৰিৱত্তনন্তি ইমানেত্থ চত্তাৰি অঙ্গানি. সমুট্ঠানাদীনি কথিনসদিসানীতি.

সঙ্ঘাটিচাৰসিক্খাপদৱণ্ণনা নিট্ঠিতা.

৫. চীৱৰসঙ্কমনীযসিক্খাপদৱণ্ণনা

পঞ্চমে চীৱৰসঙ্কমনীযন্তি সঙ্কমেতব্বং চীৱৰং, অঞ্ঞিস্সা সন্তকং অনাপুচ্ছা গহিতং পুন পটিদাতব্বং পঞ্চন্নং অঞ্ঞতৰং চীৱৰন্তি অত্থো. ধাৰেয্যাতি সচে তং নিৱাসেতি ৱা পাৰুপতি ৱা পাচিত্তিযং.

সাৱত্থিযং অঞ্ঞতৰং ভিক্খুনিং আৰব্ভ ভিক্খুনিযা চীৱৰং আদায অনাপুচ্ছা পাৰুপনৱত্থুস্মিং পঞ্ঞত্তং, তিকপাচিত্তিযং, অনুপসম্পন্নায তিকদুক্কটং. যা পন তায ৱা দিন্নং, তং ৱা আপুচ্ছা, অচ্ছিন্ননট্ঠচীৱৰিকা ৱা হুত্ৱা, ‘‘ইদং মে চীৱৰং মহগ্ঘং ঈদিসে চোৰভযে ন সক্কা ধাৰেতু’’ন্তি এৱৰূপাসু আপদাসু ৱা ধাৰেতি, তস্সা, উম্মত্তিকাদীনঞ্চ অনাপত্তি. চীৱৰসঙ্কমনীযতা, উপসম্পন্নায সন্তকতা, অনুঞ্ঞাতকাৰণাভাৱো, ধাৰণন্তি ইমানেত্থ চত্তাৰি অঙ্গানি. সমুট্ঠানাদীনি পঠমকথিনসদিসানি, ইদং পন কিৰিযাকিৰিযন্তি.

চীৱৰসঙ্কমনীযসিক্খাপদৱণ্ণনা নিট্ঠিতা.

৬. গণচীৱৰসিক্খাপদৱণ্ণনা

ছট্ঠে গণস্সাতি ভিক্খুনিসঙ্ঘস্স. চীৱৰলাভন্তি ৱিকপ্পনুপগম্পি পচ্ছিমং লভিতব্বং চীৱৰং. অন্তৰাযং কৰেয্যাতি যথা তে দাতুকামা ন দেন্তি, এৱং পৰক্কমেয্য. পাচিত্তিযন্তি সচে তস্সা ৱচনেন তে ন দেন্তি, ভিক্খুনিযা পাচিত্তিযং.

সাৱত্থিযং থুল্লনন্দং আৰব্ভ গণস্স চীৱৰলাভন্তৰাযকৰণৱত্থুস্মিং পঞ্ঞত্তং, অঞ্ঞস্মিং পৰিক্খাৰে দুক্কটং, সম্বহুলানং পন একভিক্খুনিযা ৱা চীৱৰলাভেপি দুক্কটমেৱ. ‘‘সমগ্ঘকালে দস্সথা’’তি এৱং আনিসংসং দস্সেত্ৱা নিৱাৰেন্তিযা, উম্মত্তিকাদীনঞ্চ অনাপত্তি. ৱিকপ্পনুপগপচ্ছিমতা, সঙ্ঘস্স পৰিণতভাৱো, ৱিনা আনিসংসদস্সনেন অন্তৰাযকৰণন্তি ইমানেত্থ তীণি অঙ্গানি. সমুট্ঠানাদীনি অদিন্নাদানসদিসানীতি.

গণচীৱৰসিক্খাপদৱণ্ণনা নিট্ঠিতা.

৭. পটিবাহনসিক্খাপদৱণ্ণনা

সত্তমে ধম্মিকং চীৱৰৱিভঙ্গন্তি সমগ্গেন সঙ্ঘেন সন্নিপতিত্ৱা কৰীযমানং চীৱৰৱিভঙ্গ. পটিবাহেয্যাতি পটিসেধেয্য, এৱং পটিসেধেন্তিযা পাচিত্তিযং.

সাৱত্থিযং থুল্লনন্দং আৰব্ভ ধম্মিকং চীৱৰৱিভঙ্গং পটিবাহনৱত্থুস্মিং পঞ্ঞত্তং, ধম্মিকে ৱেমতিকায, অধম্মিকে ধম্মিকসঞ্ঞায চেৱ ৱেমতিকায চ দুক্কটং. উভযত্থ অধম্মিকসঞ্ঞায, আনিসংসং দস্সেত্ৱা পটিবাহন্তিযা, উম্মত্তিকাদীনঞ্চ অনাপত্তি. চীৱৰৱিভঙ্গস্স ধম্মিকতা, ধম্মিকসঞ্ঞিতা, ৱিনা আনিসংসেন পটিবাহনন্তি ইমানেত্থ তীণি অঙ্গানি. সমুট্ঠানাদীনি অদিন্নাদানসদিসানেৱাতি.

পটিবাহনসিক্খাপদৱণ্ণনা নিট্ঠিতা.

৮. চীৱৰদানসিক্খাপদৱণ্ণনা

অট্ঠমে সমণচীৱৰন্তি কপ্পকতং নিৱাসনপাৰুপনুপগং, এৱৰূপং ঠপেত্ৱা পঞ্চ সহধম্মিকে মাতাপিতৰো চ যস্স কস্সচি গহট্ঠস্স ৱা পব্বজিতস্স ৱা পৰিচ্চজিত্ৱা দেন্তিযা পাচিত্তিযং.

সাৱত্থিযং থুল্লনন্দং আৰব্ভ অগাৰিকস্স সমণচীৱৰদানৱত্থুস্মিং পঞ্ঞত্তং, ভিক্খুনো দুক্কটং. মাতাপিতূনং পৰিচ্চজিত্ৱাপি, অঞ্ঞেসং তাৱকালিকমেৱ দেন্তিযা, উম্মত্তিকাদীনঞ্চ অনাপত্তি. সমণচীৱৰতা, ঠপেত্ৱা সহধম্মিকে চ মাতাপিতৰো চ অঞ্ঞেসং দানং, অতাৱকালিকতাতি ইমানেত্থ তীণি অঙ্গানি. সমুট্ঠানাদীনি সঞ্চৰিত্তসদিসানীতি.

চীৱৰদানসিক্খাপদৱণ্ণনা নিট্ঠিতা.

৯. কালঅতিক্কমনসিক্খাপদৱণ্ণনা

নৱমে দুব্বলচীৱৰপচ্চাসাযাতি দুব্বলায চীৱৰপচ্চাসায, ‘‘সচে সক্কোম দস্সামা’’তি এত্তকমত্তং সুত্ৱা উপ্পাদিতায আসাযাতি অত্থো. চীৱৰকালসমযং অতিক্কামেয্যাতি ৱস্সংৱুট্ঠভিক্খুনীহি কালচীৱৰে ভাজিযমানে ‘‘আগমেয্যাথ, অয্যে, অত্থি সঙ্ঘস্স চীৱৰপচ্চাসা’’তি ৱত্ৱা তং চীৱৰৱিভঙ্গং চীৱৰকালং অতিক্কামেয্য, তস্সা অনত্থতে কথিনে ৱস্সানস্স পচ্ছিমমাসং, অত্থতে কথিনে কথিনুব্ভাৰদিৱসং অতিক্কামেন্তিযা পাচিত্তিযং.

সাৱত্থিযং থুল্লনন্দং আৰব্ভ দুব্বলচীৱৰপচ্চাসায চীৱৰকালসমযং অতিক্কমনৱত্থুস্মিং পঞ্ঞত্তং, দুব্বলচীৱৰে ৱেমতিকায, অদুব্বলচীৱৰে দুব্বলচীৱৰসঞ্ঞায চেৱ ৱেমতিকায চ দুক্কটং. উভযত্থ অদুব্বলচীৱৰসঞ্ঞায, কিঞ্চাপি ‘ন সক্কোমা’তি ৱদন্তি, ‘‘ইদানি পন তেসং কপ্পাসো ৱা উপ্পজ্জিস্সতি, সদ্ধো ৱা পুৰিসো আগমিস্সতি, তস্মিং আগতে অদ্ধা দস্সন্তী’’তি এৱং আনিসংসং দস্সেত্ৱা নিৱাৰেন্তিযা, উম্মত্তিকাদীনঞ্চ অনাপত্তি. দুব্বলচীৱৰতা, দুব্বলসঞ্ঞিতা, ৱিনা আনিসংসেন নিৱাৰণন্তি ইমানেত্থ তীণি অঙ্গানি. সমুট্ঠানাদীনি অদিন্নাদানসদিসানীতি.

কালঅতিক্কমনসিক্খাপদৱণ্ণনা নিট্ঠিতা.

১০. কথিনুদ্ধাৰসিক্খাপদৱণ্ণনা

দসমে ধম্মিকং কথিনুদ্ধাৰন্তি সব্বাসং ভিক্খুনীনং অকালচীৱৰং দাতুকামেন উপাসকেন যত্তকো অত্থাৰমূলিকো আনিসংসো, ততো অধিকং ৱা সমকং ৱা দত্ৱা যাচিতেন সমগ্গেন ভিক্খুনিসঙ্ঘেন যং কথিনং ঞত্তিদুতিযকম্মেন অন্তৰা উদ্ধৰীযতি, তস্স সো উদ্ধাৰো ‘ধম্মিকো’তি ৱুচ্চতি, এৱৰূপং কথিনুদ্ধাৰন্তি অত্থো. পটিবাহেয্যাতি নিৱাৰেয্য, তস্স এৱৰূপং কথিনুদ্ধাৰং নিৱাৰেন্তিযা পাচিত্তিযং.

সাৱত্থিযং থুল্লনন্দং আৰব্ভ কথিনুদ্ধাৰং পটিবাহনৱত্থুস্মিং পঞ্ঞত্তং, সেসং সত্তমে ৱুত্তনযেনেৱ ৱেদিতব্বন্তি.

কথিনুদ্ধাৰসিক্খাপদৱণ্ণনা নিট্ঠিতা.

নগ্গৱগ্গো ততিযো.