২. ৰত্তন্ধকাৰৱগ্গো

১. ৰত্তন্ধকাৰসিক্খাপদৱণ্ণনা

অন্ধকাৰৱগ্গস্স পঠমে ৰত্তন্ধকাৰেতি ৰত্তিঅন্ধকাৰে. অপ্পদীপেতি পজ্জোতচন্দসূৰিযঅগ্গীসু একেকেনাপি অনোভাসিতে. পুৰিসেনাতি সন্তিট্ঠিতুং সল্লপিতুঞ্চ ৱিঞ্ঞুনা মনুস্সপুৰিসেন সদ্ধিং. সন্তিট্ঠেয্য ৱাতি হত্থপাসে ঠিতমত্তায পাচিত্তিযং. সল্লপেয্যাতি তত্থ ঠত্ৱা গেহসিতকথং কথেন্তিযাপি পাচিত্তিযমেৱ.

সাৱত্থিযং অঞ্ঞতৰং ভিক্খুনিং আৰব্ভ এৱং সন্তিট্ঠনৱত্থুস্মিং পঞ্ঞত্তং, পুৰিসস্স হত্থপাসং ৱিজহিত্ৱা, যক্খাদীনং হত্থপাসং অৱিজহিত্ৱাপি সন্তিট্ঠন্তিযা, সল্লপেন্তিযা ৱা দুক্কটং, যংকিঞ্চি ৱিঞ্ঞুং দুতিযং গহেত্ৱা এৱং কৰোন্তিযা, অৰহোপেক্খায, অঞ্ঞৱিহিতায, উম্মত্তিকাদীনঞ্চ অনাপত্তি. ৰত্তন্ধকাৰতা, পুৰিসস্স হত্থপাসে ঠানং ৱা সল্লপনং ৱা, সহাযাভাৱো, ৰহোপেক্খতাতি ইমানেত্থ চত্তাৰি অঙ্গানি. থেয্যসত্থসমুট্ঠানং, কিৰিযং, সঞ্ঞাৱিমোক্খং, সচিত্তকং, লোকৱজ্জং, কাযকম্মং, ৱচীকম্মং, অকুসলচিত্তং, তিৱেদনন্তি.

ৰত্তন্ধকাৰসিক্খাপদৱণ্ণনা নিট্ঠিতা.

২. পটিচ্ছন্নোকাসসিক্খাপদৱণ্ণনা

দুতিযে পটিচ্ছন্নে ওকাসেতি কুট্টাদীসু যেন কেনচি পটিচ্ছন্নে, ইদমেৱেত্থ নানত্তং.

পটিচ্ছন্নোকাসসিক্খাপদৱণ্ণনা নিট্ঠিতা.

৩. অজ্ঝোকাসসল্লপনসিক্খাপদৱণ্ণনা

ততিযে অজ্ঝোকাসেতি নানং, সেসং উভযত্থাপি পঠমসদিসমেৱাতি.

অজ্ঝোকাসসল্লপনসিক্খাপদৱণ্ণনা নিট্ঠিতা.

৪. দুতিযিকউয্যোজনসিক্খাপদৱণ্ণনা

চতুত্থে ৰথিকাযাতি ৰচ্ছাযং. ব্যূহেতি অনিৱিদ্ধৰচ্ছাযং. সিঙ্ঘাটকেতি চচ্চৰে. নিকণ্ণিকং ৱা জপ্পেয্যাতি কণ্ণমূলে কিঞ্চি জপ্পেয্য. উয্যোজেয্যাতি অনাচাৰং চৰিতুকামতায ‘‘গচ্ছ ত্ৱ’’ন্তি দুতিযিকং উয্যোজেয্য. পাচিত্তিযন্তি পুৰিমনযেনেৱ তাৱ সন্তিট্ঠনাদীসু তীণি পাচিত্তিযানি, উয্যোজেন্তিযা পন উয্যোজনে চ হত্থপাসৱিজহনে চ দুক্কটং, ৱিজহিতে পাচিত্তিযং.

সাৱত্থিযং থুল্লনন্দং আৰব্ভ এৱং সন্তিট্ঠনৱত্থুস্মিং পঞ্ঞত্তং, সেসং পুৰিমত্তযসদিসমেৱ. অনাপত্তিযং পন ‘‘ন অনাচাৰং আচৰিতুকামা, সতি কৰণীযে দুতিযিকং ভিক্খুনিং উয্যোজেতী’’তি (পাচি. ৮৫২) এত্তকং অধিকন্তি.

দুতিযিকউয্যোজনসিক্খাপদৱণ্ণনা নিট্ঠিতা.

৫. অনাপুচ্ছাপক্কমনসিক্খাপদৱণ্ণনা

পঞ্চমে পুৰেভত্তন্তি অৰুণুগ্গমনং উপাদায যাৱ মজ্ঝন্হিকং. আসনেতি পল্লঙ্কস্সোকাসভূতে. সামিকে অনাপুচ্ছাতি তস্মিং কুলে যংকিঞ্চি ৱিঞ্ঞুং মনুস্সং অনাপুচ্ছা. পক্কমেয্যাতি এত্থ ছন্নস্স অন্তো নিসীদিত্ৱা অনোৱস্সকং অজ্ঝোকাসে উপচাৰং অতিক্কামেন্তিযা পঠমপাদে দুক্কটং, দুতিযে পাচিত্তিযং.

সাৱত্থিযং অঞ্ঞতৰং ভিক্খুনিং আৰব্ভ অনাপুচ্ছা পক্কমনৱত্থুস্মিং পঞ্ঞত্তং, তিকপাচিত্তিযং, পল্লঙ্কস্স অনোকাসে দুক্কটং, তথা আপুচ্ছিতে অনাপুচ্ছিতসঞ্ঞায চেৱ ৱেমতিকায চ. আপুচ্ছিতসঞ্ঞায পন, অসংহাৰিমে, গিলানায, আপদাসু, উম্মত্তিকাদীনঞ্চ অনাপত্তি. পুৰেভত্ততা, অন্তৰঘৰে নিসজ্জা, আসনস্স পল্লঙ্কোকাসতা, অঞ্ঞত্ৰ অনুঞ্ঞাতকাৰণা অনাপুচ্ছনং, ৱুত্তপৰিচ্ছেদাতিক্কমোতি ইমানেত্থ পঞ্চ অঙ্গানি. সমুট্ঠানাদীনি কথিনসদিসানি, ইদং পন কিৰিযাকিৰিযন্তি.

অনাপুচ্ছাপক্কমনসিক্খাপদৱণ্ণনা নিট্ঠিতা.

৬. অনাপুচ্ছাঅভিনিসীদনসিক্খাপদৱণ্ণনা

ছট্ঠে পচ্ছাভত্তন্তি মজ্ঝন্হিকে ৱীতিৱত্তে যাৱ সূৰিযস্স অত্থঙ্গমা. অভিনিসীদেয্য ৱাতি আদিম্হি নিসীদিত্ৱা গচ্ছন্তিযা একা আপত্তি, অনিসীদিত্ৱা নিপজ্জিত্ৱাৱ গচ্ছন্তিযাপি একা, নিসীদিত্ৱা নিপজ্জন্তিযা দ্ৱে.

সাৱত্থিযং থুল্লনন্দং আৰব্ভ আসনে অভিনিসীদনৱত্থুস্মিং পঞ্ঞত্তং, সেসং পঞ্চমসদিসমেৱ. যথা পন তত্থ অসংহাৰিমে, এৱমিধ ধুৱপঞ্ঞত্তে অনাপত্তীতি.

অনাপুচ্ছাঅভিনিসীদনসিক্খাপদৱণ্ণনা নিট্ঠিতা.

৭. অনাপুচ্ছাসন্থৰণসিক্খাপদৱণ্ণনা

সত্তমে ৱিকালেতি অত্থঙ্গতে সূৰিযে. সেয্যন্তি অন্তমসো পণ্ণসন্থাৰম্পি, সেসং ছট্ঠসদিসমেৱ.

ইদং পন সাৱত্থিযং সম্বহুলা ভিক্খুনিযো আৰব্ভ ৱিকালে কুলানি উপসঙ্কমিত্ৱা সামিকে অনাপুচ্ছিত্ৱা সেয্যং সন্থৰিত্ৱা অভিনিসীদনৱত্থুস্মিং পঞ্ঞত্তং, অনাপত্তিযঞ্চেত্থ ধুৱপঞ্ঞত্তং নাম নত্থীতি.

অনাপুচ্ছাসন্থৰণসিক্খাপদৱণ্ণনা নিট্ঠিতা.

৮. পৰউজ্ঝাপনকসিক্খাপদৱণ্ণনা

অট্ঠমে দুগ্গহিতেন দূপধাৰিতেনাতি যং ৱুত্তং, ততো অঞ্ঞথা গহিতেন চ উপধাৰিতেন চ. পৰন্তি ‘‘অহং কিৰয্যে অয্যং ন সক্কচ্চং উপট্ঠহামী’’তিআদিনা (পাচি. ৮৬৯) নযেন উপসম্পন্নং উজ্ঝাপেন্তিযা পাচিত্তিযং.

সাৱত্থিযং অঞ্ঞতৰং ভিক্খুনিং আৰব্ভ এৱং পৰং উজ্ঝাপনৱত্থুস্মিং পঞ্ঞত্তং, তিকপাচিত্তিযং, অনুপসম্পন্নায তিকদুক্কটং, উম্মত্তিকাদীনংযেৱ অনাপত্তি. দুগ্গহিততা, উজ্ঝাপনং, যং উজ্ঝাপেতি, তস্সা উপসম্পন্নতাতি ইমানেত্থ তীণি অঙ্গানি. সমুট্ঠানাদীনি অদিন্নাদানসদিসানি, ইদং পন দুক্খৱেদনন্তি.

পৰউজ্ঝাপনকসিক্খাপদৱণ্ণনা নিট্ঠিতা.

৯. পৰঅভিসপনসিক্খাপদৱণ্ণনা

নৱমে অভিসপেয্যাতি সপথং কৰেয্য. তত্থ ‘‘নিৰযে উপপজ্জামি, নিৰযে উপপজ্জতূ’’তিএৱমাদীনি ৱদমানা নিৰযেন অভিসপতি নাম, অক্কোসতীতি অত্থো. ‘‘গিহিনী হোমি, গিহিনী হোতূ’’তিএৱমাদীনি ৱদমানা ব্ৰহ্মচৰিযেন. তস্সা ৱাচায ৱাচায পাচিত্তিযং.

সাৱত্থিযং চণ্ডকাড়িং আৰব্ভ এৱং অভিসপনৱত্থুস্মিং পঞ্ঞত্তং, তিকপাচিত্তিযং, অনুপসম্পন্নায তিকদুক্কটং, তিৰচ্ছানযোনিযা ৱা পেত্তিৱিসযেন ৱা মনুস্সদোভগ্গেন ৱা অভিসপনে দুক্কটং. অত্থধম্মানুসাসনিপুৰেক্খাৰানং উম্মত্তিকাদীনঞ্চ অনাপত্তি. নিৰযেন ৱা ব্ৰহ্মচৰিযেন ৱা অভিসপনং, উপসম্পন্নতা, অত্থধম্মপুৰেক্খাৰাদীনং অভাৱোতি ইমানেত্থ তীণি অঙ্গানি. সমুট্ঠানাদীনি অট্ঠমসদিসানেৱাতি.

পৰঅভিসপনসিক্খাপদৱণ্ণনা নিট্ঠিতা.

১০. ৰোদনসিক্খাপদৱণ্ণনা

দসমে ৱধিত্ৱাতি হত্থাদীহি পহৰিত্ৱা, উভযং কৰোন্তিযাৱ পাচিত্তিযং.

সাৱত্থিযং চণ্ডকাড়িং আৰব্ভ অত্তানং ৱধিত্ৱা ৰোদনৱত্থুস্মিং পঞ্ঞত্তং, কেৱলং ৱধন্তিযা ৱা ৰোদন্তিযা ৱা দুক্কটমেৱ. ঞাতিৰোগভোগব্যসনেহি ফুট্ঠায কেৱলং ৰোদন্তিযা এৱ ন ৱধন্তিযা, উম্মত্তিকাদীনঞ্চ অনাপত্তি. অত্তানং ৱধনঞ্চেৱ, ৰোদনঞ্চাতি ইমানেত্থ দ্ৱে অঙ্গানি. সমুট্ঠানাদীনি সমনুভাসনসদিসানি, ইদং পন কিৰিযমেৱাতি.

ৰোদনসিক্খাপদৱণ্ণনা নিট্ঠিতা.

ৰত্তন্ধকাৰৱগ্গো দুতিযো.