৬. উপতিট্ঠনসিক্খাপদৱণ্ণনা

ছট্ঠে ভুঞ্জন্তস্সাতি পঞ্চন্নং ভোজনানং অঞ্ঞতৰং ভুঞ্জতো. পানীযেনাতি সুদ্ধেন ৱা উদকেন, তক্কাদীসু ৱা অঞ্ঞতৰেন. ৱিধূপনেনাতি যায কাযচি বীজনিযা. উপতিট্ঠেয্যাতি যা এতেসু দ্ৱীসু অঞ্ঞতৰং গহেত্ৱা হত্থপাসে তিট্ঠতি, তস্সা পাচিত্তিযং.

সাৱত্থিযং অঞ্ঞতৰং ভিক্খুনিং আৰব্ভ ভুঞ্জন্তস্স এৱং তিট্ঠনৱত্থুস্মিং পঞ্ঞত্তং, তিকপাচিত্তিযং, হত্থপাসং ৱিজহিত্ৱা খাদনীযং খাদন্তস্স উপতিট্ঠন্তিযা দুক্কটং, অনুপসম্পন্নে তিকদুক্কটং. ‘‘ইমং পিৱথ, ইমিনা বীজথা’’তি এৱং দেন্তিযা ৱা, দাপেন্তিযা ৱা, অনুপসম্পন্নং ৱা উপতিট্ঠাপনত্থং আণাপেন্তিযা, উম্মত্তিকাদীনঞ্চ অনাপত্তি. ভুঞ্জন্তস্স ভিক্খুনো হত্থপাসে ঠানং, পানীযস্স ৱা ৱিধূপনস্স ৱা গহণন্তি ইমানেত্থ দ্ৱে অঙ্গানি. সমুট্ঠানাদীনি এড়কলোমসদিসানীতি.

উপতিট্ঠনসিক্খাপদৱণ্ণনা নিট্ঠিতা.