৭. সত্তকনিদ্দেসৱণ্ণনা

৮০৬. ছব্বিধম্পি পচ্চৱেক্খণঞাণন্তি ‘‘জাতিপচ্চযা জৰামৰণন্তি ঞাণ’’ন্তিআদিনা (ৱিভ. ৮০৬) ৱুত্তং পটিচ্চসমুপ্পাদঙ্গানং পচ্চৱেক্খণৱসেন পৱত্তঞাণং. সহ গহেত্ৱাতি একজ্ঝং গহেত্ৱা ৱিপস্সনাৰম্মণভাৱসামঞ্ঞেন একত্তেন গহেত্ৱা. সঙ্খিপিত্ৱা ৱুত্তেনাতি পুব্বে ছধা ৱুত্তং ৱিয দস্সিতং ধম্মট্ঠিতিঞাণন্তি এৱং সঙ্খিপিত্ৱা ৱুত্তেন. ‘‘খযধম্ম’’ন্তিআদিনা পকাৰেন দস্সনন্তি সম্বন্ধো. পৱত্তঞাণস্সাতি ‘‘জাতিপচ্চযা জৰামৰণ’’ন্তিআদিনা পৱত্তস্স ঞাণস্স, পৱত্তে ৱা সংসাৰৱট্টে ঞাণস্স. ঞাণাৰম্মণা ৱিপস্সনা ঞাণৱিপস্সনা. ৱিপস্সনাতি চ ‘‘জাতিপচ্চযা জৰামৰণ’’ন্তিআদিনা পচ্চযপচ্চযুপ্পন্নধম্মে ৱিভাগেন দস্সনতো ধম্মট্ঠিতিঞাণং ইধাধিপ্পেতং. তস্স খযধম্মতাদিজাননং পটিৱিপস্সনা. তেনাহ ‘‘ৱিপস্সনাপটিৱিপস্সনাদস্সনমত্ত’’ন্তি.

এৱমেত্থ অট্ঠকথাধিপ্পাযৱসেন পাড়িযা অত্থং দস্সেত্ৱা ইদানি অত্তনো অধিপ্পাযৱসেন দস্সেতুং ‘‘পাড়িযং পনা’’তিআদিমাহ. সব্বত্থাতি অদ্ধত্তযে পচ্চযৱিসেসেন পচ্চযুপ্পন্নৱিসেসনিদ্ধাৰণে. ঞাণৱচনেনাতি ‘‘জাতিপচ্চযা জৰামৰণ’’ন্তিআদিনা ঞাণস্স গহণেন. অঙ্গানন্তি সত্তসত্ততিযা অঙ্গানং. ইতিসদ্দেনাতি ‘‘নিৰোধধম্ম’’ন্তি এত্থ ৱুত্তইতিসদ্দেন. পকাসেত্ৱাতি ঞাণস্স পৱত্তিআকাৰং জোতেত্ৱা. তেন ধম্মট্ঠিতিঞাণতো অঞ্ঞংযেৱ পৰিযোসানে ৱুত্তং ঞাণন্তি দস্সেতি. তেনাহ ‘‘ৱিপস্সনাঞাণং সত্তমং ঞাণ’’ন্তি. অযমেৱ চেত্থ অত্থো যুত্তোতি দস্সেন্তো ‘‘ন হী’’তিআদিমাহ. তত্থ ‘‘তম্পি ঞাণন্তি সম্বন্ধো ন হোতী’’তি এৱং সম্বন্ধো ন যুত্তো অঙ্গন্তৰভাৱস্স অৱিভাৱনতোতি অত্থো. তেন ৱুত্তং ‘‘তংঞাণ…পে… অনধিপ্পেতত্তা’’তি. ন হি ৱিসুং ৱিসুং ৱুত্তমেৱ একজ্ঝং ৱচনমত্তেন অত্থন্তৰং হোতীতি. ‘‘খযধম্মং…পে… চা’’তি ইমিনা পুৰিমস্মিং পক্খে উপচযেন দোসমাহ.

সত্তকনিদ্দেসৱণ্ণনা নিট্ঠিতা.