১৪. সিক্খাপদৱিভঙ্গো

১. অভিধম্মভাজনীযৱণ্ণনা

৭০৩. সিক্খাসঙ্খাতানং কুসলধম্মানং পঞ্চ সীলঙ্গানি নিস্সযভাৱেন ৱা পতিট্ঠা সিযুং, উপনিস্সযভাৱেন ৱাতি তদুভযং দস্সেন্তো আহ ‘‘সম্পযোগৱসেন, উপনিস্সযৱসেন চ ওকাসভাৱেনা’’তি.

৭০৪. ‘‘কম্মপথা এৱা’’তি নিযমস্স কতত্তা ৱুত্তং ‘‘অসব্বসাধাৰণেসূ’’তি. ন হি সক্কা ইন্দ্ৰিযাদিসাধাৰণকোট্ঠাসৱসেন নিযমং কাতুং. কম্মপথকোট্ঠাসিকা এৱ, ন ঝানাদিকোট্ঠাসিকা. কম্মপথভাৱেন আগতন্তি ৱদন্তি, দুগ্গতিযা, তত্থ উপ্পজ্জনদুক্খস্স চ পৱত্তিউপাযভাৱতোতি অধিপ্পাযো. অস্স সুৰাপানস্স. উপকাৰকত্তং সব্বেসং. সভাগত্তং মিচ্ছাচাৰস্স.

তথাগহিতসঙ্খাৰাৰম্মণতাযাতি ‘‘সত্তং অৱহৰামি, সত্তে ৱিপ্পটিপজ্জামী’’তিআদিনা সত্তাকাৰেন গহিতসঙ্খাৰাৰম্মণতায, ন পন সত্তপঞ্ঞত্তিআৰম্মণতাযাতি অধিপ্পাযো. ‘‘পঞ্চ সিক্খাপদা’’তিআদিনা তমেৱত্থং ৱিৱৰতি.

তস্স তস্সাতি যস্স যস্স ব্যসনত্থায. সযং ৱা উসুআদিং খিপতি, ওপাতখণনাদিং কৰোতি, তাদিসং মন্তং পৰিজপ্পতি, কম্মজইদ্ধিং ৱড়ঞ্জেতি, অঞ্ঞেন ৱা তং সব্বং কাৰেতীতি আহ ‘‘নিস্সগ্গিয…পে… দ্ৱে এৱ গহিতা’’তি.

যদিপি কোট্ঠাসৱাৰে ৱিৰতি সৰূপেন নাগতা ‘‘যেৱাপনা’’ত্ৱেৱ ৱুত্তা, ভজাপিযমানা পন মগ্গভাৱংযেৱ ভজতীতি আহ ‘‘ৱিৰতিসীলং পন মগ্গকোট্ঠাসিক’’ন্তি. সেসসীলানন্তি সেসঅৱীতিক্কন্তসীলানং.

৭১২. অভব্বট্ঠানাতি পাণাতিপাতাদযো. যথা পাণাতিপাতাদযো ৱেৰহেতুতায ৱেৰং, এৱং তদঞ্ঞেপি অকুসলাতি ৱুত্তং ‘‘তংসভাগতায ৱেৰভূতান’’ন্তি. ৱিৰতীনং উপ্পত্তি ন ন ভৱিস্সতি সেক্খানন্তি যোজনা. ‘‘অকুসলসমুট্ঠিতানি চা’’তিআদিনাপি সেক্খানং উভযেন ৱিৰতিসব্ভাৱংযেৱ ৱিভাৱেতি. তস্সত্থো – যানি অকুসলসমুট্ঠিতানি কাযকম্মাদীনি, তানি তেসং সেক্খানং কাযদুচ্চৰিতাদীনীতি ৱেৰানিযেৱ, তেহি ৱেৰেহি তেসং সেক্খানং ৱিৰতিযো সম্ভৱন্তিযেৱ. যতোতি যস্মা পাণাতিপাতাদিৱিৰমিতব্বনিপ্পৰিযাযৱেৰাভাৱেপি কাযদুচ্চৰিতাদিৱেৰমত্ততো সেক্খানং ৱিৰতিসম্ভৱতো. নফলভূতস্সাপীতি যথা ফলস্স মগ্গপটিবিম্বভূতত্তা মগ্গসদিসং সত্তঅট্ঠঙ্গিকতা সিযা, এৱং অফলভূতস্সাপি সকদাগামিমগ্গাদিকস্স যতো ৱিৰতিসম্ভৱতো অট্ঠঙ্গিকতা হোতি, অঞ্ঞথা পঞ্চঙ্গিকো এৱ সিযাতি অধিপ্পাযো.

অভিধম্মভাজনীযৱণ্ণনা নিট্ঠিতা.

২. পঞ্হপুচ্ছকৱণ্ণনা

৭১৪. যথাৱিৰমিতব্বতোতি যো যো পাণাতিপাতাদি ৱিৰমিতব্বো, ততো ৱিৰতিৱসেন.

পঞ্হপুচ্ছকৱণ্ণনা নিট্ঠিতা.

সিক্খাপদৱিভঙ্গৱণ্ণনা নিট্ঠিতা.